البارت 1
كنبغيك..
- مامصدقاش راسي .. واخيرا ..
- تتزوجي بيا ؟
- موافقة 😍 .. غاندير عرس اسطوري .. وغادي نعيشو فالفيلا ديالي ..
- ميمكنش انا راجل ومغانعيش على عاتق مرتي
- حياتي انا وياك واحد ومنبغيش نسمعك قلتي هاد الهدرة مرة اخرى .. غادي تشدلي خدمتي ..والمشاريع ديالي ..
- كنبغيك احبيبة
- الله يمسخك
- 😳
فقت على الدعوات الجميلة ديال الوليدة .. فيقاتني من احلى حلم ..
- نوض يا اللخر ديال الرجال ... يا عيفة الدراري الله يعطيك مصيبة تهنيني منك .. نوض الهم .. لا خدمة لا ردمة وعاطيها للسهير وقوة التشمكير ومقابل ليا غا الخاوي .. وزايدها بالنعاس حتى الظهر ..
- هانا نايض ..
هذه نبذة عن فياقي من النعاس كل يوم .. نبع الحنان كتشبعني سبان غا بالدعوات الزوينة .. كنوض نفطر وندوش ونلبس ونخرج باش منبقاش فالدار ونسمع السبان .. انا سلطان .. سميتي قريبة من حياتي شوية .. الدراري ديما كيقولو عليا سلطان زماني .. اييه .. الهواية ديالي هي التعارف .. نسوانجي .. فعمري 33 عام .. عاااااطل عن العمل .. حطو تحت هاد عاطل الف خط .. بعدما خديت الاجازة فالقانون .. قلبت حتى عييت على خدمة ومالقيتش .. الى غاية ما صافي يأست .. وجلست الارض .. تفقصت حتى ملليت ..وقررت نعيش اللحظة .. عائلتي كيعياو يعايرو الواليد كيقولي سير تعلم شي حرفة .. ولكن حتى شاب عاد داروله حجاب .. واش حتى دابا عاد نتعلم حرفة.. فات الفوت ..ههه واش صحابليكم سلطان وغانكون سلطان وكنحكم بحالي بحال سليمان القانوني ..والعيالات ضايرين بيا الجواري الجميلات .. نو نو نو .. هادشي مكاينش .. انا مكرد .. بيريمي .. عايش بالكريدي .. ريال مضاير فالجيب .. حياتي كندوزها فالقهوة مع الدراري اللي بحالي .. كنضبرو على بعضياتنا ..
- افين الدراري
- سلطان لاباس عليك ..
كنبقا مدوزهة فالقهوة .. حتى كيوقف عليا مولاها .. واش اسلطان ماباغيش تخلص الكريدي اللي عليك .. راه غانشكيك لباك ..
- واصبر اصاحبي كاع عباد الله كتدير الكريدي .. مالي غانطير .. راني غا حدا عينيك ..
- واخا دابا نشوفو فين غانوصلوها معاك ..
رجعت للدار نتغدا .. جلست حدا الواليد .. اللي كيهضر مع خواتاتي وكيضحك وكيرضى عليهم حيت قرايات .. غا شافني وهو يقلب وجهه ..
بابا : الناس كيولدو الرجال وانا والد الشمايت ..
انا : ها لهضرة اللي كتسد الشهية عاود .. واش الواليد فوقاشما شفتيني غاتبدا تعاير ..
بابا : حيت ماباغيش تعاوط راسك ومقابلي غا التصلكيط .. بدل متمشي تقلب على خدمة نتا مقابل الراحة ..
انا : واش انا لقيت ومبغيت نخدم .. راك شايف الحالة كيدايرا .. عييت بالتقلاب .. حتى طابو رجليا ..
بابا : انا مللي كنت قدك كنت ولدتك وولدت بناتي .. نتا شوف راسك .. قد البغل والعقل مكتكسابوش ..
انا : الواليد الله يهديك متعايرنيش مبغيتش نرد عليك الهضرة ..
بابا : شناهوا .. ترد عليا الهضرة يا الكلب نوض خرج عليا من داري نوووض .. اللي قدك دارو ديور ومشاريع ونتا مازال مزاحم معايا هنا نوووض خرج عليا يا الشماتة ..
كالعادة حرمت من وجبة الغداء .. عادي عادي ماشي اول مرة بلا متخلعو .. هادي هي حالتنا انا والواليد كل يوم .. وغالبا مكتنتهي باني نمشي نبوس ليه راسو ونقوله سمحلي الواليد .. معنديش حل اخور .. البطالة دايرة شغلها ..
البارت 2
جيبي خاوي ومافيه حتى ريال .. كيغاندير .. لقيتها .. عيشة الهبيلة .. بنت الحومة .. كتبغيني .. فوقما تزيرت فالفلوس كنمشي نتغرل فيها بجوج كلمات حتى كتعطيني فلوس .. غانصوني عليها .. "اعتمادكم غير كافي لاجراء المكالمة .. المرجو... " اووف الصولد والو .. غادي نصيفط ليها appel moi stp .. بقيت كنستناها تصوني عليها حتى لقيت نمرتها .. فرحت ..
- الو عيشة ..
- انا حليمة .. لاباس عليك اسلطان ..
- اه حليمة فين هي عيشة ..
- خرجات تصخر شنو كاين الحبيب ..
- ختي حليمة انا منكدبش عليك .. نسيت بزطام الفلوس فالدار ومعندي حتى ريال فالجيب .. واخا تصيفطيليا مية درهم للقهوة اللي فراس الدرب حتى نجي ونردهالك ..
- الله يا ودي اسلطان انا غانتصرف ..
- شكرا بزاف .. الله يزيدك فالزين .. الله يجيبلك راجل بحال راجل منار .. الله يزوجك بشي واحد بحال اياد .. طيت طيت طيت
غاتفكني هاد حليمة .. هما واخا العائلة ديال الحماق وغا الهبيلة لختها ولكن قلبهم حنين وكيفكوني فالمحاين المادية ديالي .. بقيت فالقهوة كنستنى حتى صونا ليا التلفون كان الواليد .. الله يا ربي شنو بغا .. يمكن يقولي اجي تتغدا اولدي راك بقيتي بالجوع ..
- الو بابا ..
- سير الله يسد فوجهك بيبان الرحمة .. من امتا ونتا عندك بزاطم دالفلوس يا القرد
- اينا بزاطم علاياش كتهضر ..
- مصيفط ليا حليمة الهبيلة بالحيلة باش نعطيها الفلوس تجيبهوملك .. والله لا شفتيهم .. يا الشلاهبي وزايدهم بالكذوب على البنت .. علاه نتا عندك شي حاجة اصلا يا المزلوط .. بلاتي عليك والله لا دوزتها ليك .. الشلاهبي .. طيت طيت ..
ماقالو عليها هبيلة حتى كانت هبيلة نيت .. مشات فضحاتني مع الواليد وقالت ليه صيفطني سلطان .. حمارة .. بلاتي اهيا كتصوني ..
- اسلطان مشيت لدارك بغيت بزطامك مبغاوش يعطيوه ليا
- صافي احليمة سيري بحالك صافي مبقيت باغي بزطام غا هني راسك ..
يا ربي رحمني من هاد جماعة الزلط .. بقيت فالقهوة .. حتى بان صاحبي ريان .. هادا واحد كيليميني طيارة .. باه لاباس عليه وموفر ليه كلشي .. الطوموبيل والفلوس .. ولكن هو وجه النحس غبي واحد الغباء منقوليكومش .. كلشي كياخد رأيي فيه ومكيقدر يدير والو بوحده.. كنستغلوه مللي كنبغيو ندورو بالطوموبيل دياله ولا مللي تكون دارهم خاوية .. غا هو اللي عند واليديه .. وكنعرفو كيحماق على رجاء ختي .. ولكن هي مكتحملوش راكو عارفين علاش ..
- افين اريان
- سلطان لاباس عليك
- لاباس وحتى ختي رجاء لاباس .. اه كتسلم عليك
- رجاء
البارت 3
غا ذكرتليه ختي وهو يتبدل فيه اللون ولو اجتمع الحنان ديال الاب والام والجدة مايوصلو للحنان فعيون ريان وانا كنهضرليه على رجاء .. وافين اصاحبي .. الطوموبيل ديالك اش غانديرو فيها .. دورة وحدة ..بدون شعور عطاني السوارت ديال الطوموبيل دياله .. ديتها دغيا قبل مايفيق من الكلبة .. مشيت للوجهة المعلومة .. الليسي .. وما ادراك ما بنات الليسي .. ها القفيفزات ها اللي بعقلهم .. ها اللي مستيليات .. كنختار كيف بغيت .. درت دورة اللولة .. باش يشوفوني البنات ويدو بالهم ليا .. درت الدورة تانية بانتلي واحد الفليفلة منيشة عليا .. بعدت شوية على الليسي وهي تتبعني .. جات ركبات معايا بلا منقولهالها ..
- سلام زوينة لاباس ..
- سالو . سافا .. ايطوا
(دايرالي فيها كتهضر بفرونسي وانا الا شديت معاها الكومونيكاسيون دابا غاتلف .. ولكن ماعليش
- سافا بيان .. Quel est ton nom ..
- حم سميتي اميمة .. ونتا ..
السيدة غا لقاتني شديت معاها وهي تقلبها عربية .. ههه انا اللي كنفهم للبنات ..
- انا سميتي سلطان ..
بقينا دايرين بالطوموبيل حتى تعرفت عليها مزيان ..حتى بانلي اللي مدرتش ليهم الحساب .. اواه البوليس .. وانا معايا قاصر .. حيدي الطابلية ابنت الحرام حيديها دغيا ..
- سلام شاف ..
- وريقاتك ولاكارت ناسيونال دالبنت اللي معاك ..
- احم هادي ختي ومازال صغيرة .. مازال موصلت السن دلاكارت ..
- على نتا بالسلامة شحال عندك من اخت .. هادي كتر من عشرة دالمرات كلما وقفتك كنلقا معاك بنت فشكل وتقولي ختك ..
ناري فضحني ..
- اهه .. لا غا بابا مزوج اربعة دالعيالات ووالد بزاف دالبنات ..
مازال كنهضر معاه حتى نزل من السما موسى هادا بوليسي ولد جيراننا .. عتقني منه دوا معاه .. بفف فلتنا اليوما بأعجوبة .. كملت الدورة مع هاد وجه النحس وتبادلنا النماري ... ديتها لحدا المدرسة نزلتها ومشيت .. تلاقيت موسى ..
- عتقتيني اصاحبي الله يحفظك
- وتا راه ريحتك عطات راك معروف .. ماشي كل مرة تسلم الجرة .. قيل عليك القاصرات حسن ما طيح فشي مشكل ..
- اودي خليني نبروفيتي .. مالي اش غاندي من هاد الدنيا
البارت 4
مشيت للدار لقيت اميمة كتصوني عليا .. صدعاتني هاد البرهوشة .. مالها اش بغات .. بقيت كنهضر معاها حتى جاني الملل .. قطعت معاها .. بقيت كنشوف وكنتفرج من السرجم .. حتى بانتلي الدار اللي قبالتنا فيها ضو مشعول .. هاد الدار عاد تباعت .. دابا اكيد سكنوها الناس اللي شراوها .. متعرفتش عليهم .. باينة فيهم مكايديروش مع الجيران .. شوية تحل الشرجم ديال البيت اللي قبالة بيتي .. وطلات منه بنت زوينة بزاف وشعرها حريري كيديه الريح .. بقيت سارح فيها .. هي غا شافتني سدات السرجم بالجهد وبعصبية .. مغرورة .. متخافيش غاتطيحي فشباكي كيما طاحو اللي قبلك .. مكاين شي بنت اللي تصعاب عليا .. نعست بقيت كنفكر فديك البنت زوينة بزاف يا ترى اش غاتكون سميتها .. اكيد شي ملاك ولا شي جنان ولا شي فردوس .. هاد الاسماء الزوينة .. شوية وهي تصوني الفليفلة من جديد .. اووف واش مغانتهناش من هاد البرهوشة ليوما .. درت التلفون سيلونص ونعست .. الغد ليه فقت .. حليت الشرجم .. لقيت شرجمها مسدود .. فطرت وسمعت الاسطوانة من جديد من عند الواليدة .. وخرجت نتلاقا ريان والجماعة .. اليوما الصهد بزاف .. لقيتهم كيتافقو يمشيو للبحر يعوموً.. مشيت معاهم بعدما خديت من عند ريان حوايج العومان .. باه خدام على ريان وصحابه.. وصلنا للبحر لقينا اشكال والوان ديال البنات .. الخير والخمير ..بدينا العومان وانا تبانلي وحدة .. بحال شي حوتة فالبحر .. خفيفة بزاف .. مشيت لعندها ديريكت تعرفت عليها فوسط الما ..
- سميتي سلطان ونتي ..
- سميتي احلام
- متشرفين .. اشكاديري فحياتك ..
مفهمت حتى زفتة من داكشي اللي شرحات ليا الشيء الوحيد اللي فهمت انها كتدرب الغواصة ..
بقينا كنعومو شوية وهي تقولي ..
- سلطان .. عرفتي باللي فالتدريبات ديالنا عندنا الى بغيتي تغرق شي واحد وتشل القوة دياله اش كادير ..
- اش كادير ..
مازال كنشوف فيها حتى وركات على واحد البلاصة فعنقي وفقدت التوازن ديالي وهبطاتني فالما ..
- غرغرغر .. ابنت الحراااام غرغرغر .. نموت نموت ..
طلقات مني بعدما شربت نص البحر .. لعب البنايا هادا .. واش هادي اللي يتصاحبو معاها الناس .. يا بنت الحرام كانت غاتقتلني .. خرجت من البحر خليتها كتضحك .. مشيت لعند الدراري وانا كنكح وقلبي غايخرج من بلاصته .. كيد النسا اش داير .. هادشي علاش كنمشي للبرهوشات .. الله يعطيك دقة .. كانت غاتقتلني بنت الحرام .. تأليف دودي العيساتي ..
البارت 5
دوزت نهار كحل فلبحر بسبب ديك المسمومة .. مشيت للدار دوشت ومشيت نتلاقا ديك الفليفلة اللهم العمش ولا العمى .. بعدما صدعاتني بالمكالمات .. مكتقاداش .. مشيت درت دورة انا وياها حتى مليت وجيت نجلس فالقهوة .. لعبنا الضامة حتى شبعنا وجيت بحالي للدار .. لقيت ديك البنت كتطل من السرجم .. شافتني استغليتها فرصة ضحكت عندها باش تعرف باللي انا مهتم بها والاهتمام هو اللي كيحمق البنات .. شافت فيا وقلبات وجهها وسدات السرجم من جديد .. بتحط نفسك في مواقف بايخاااا ... في منتصف الجبهة قصف ثلاثي الابعاد .. واخا يا لالة .. غا بلاتي عليك .. كنجمعهم ليك .. دخلت للدار وتعشيت .. طليت لقيت سراجم مسدودين ..واش هادو عايشين ولا معايشينش .. واش ساكنين ولا مساكنينش ... علاش شاغل راسي بهاد البنت مفهمتش .. ماعلينا .. خليني هاكا عايش سلطان لراسي .. ماهاز الهم لحتى حاجة .. نعست .. ايامي كلها بحال بحال كندوزو الوقت .. هاد الايام شادها مع الفليفلة .. حتى طلعاتلي للراس بلوكيتها وتهنيت .. دازت يوماين لقيت شي وحدة كتدق فالباب ديال الدار حليت الباب كان غايوقفلي القلب .. اش كاديري هنا .. حتى جات ختي ..
- اميمة دخلي دخلي ..
هادي صاحبة ختي وانا معارفش .. على بلان طحت فيه .. شكون غايفكني منها دابا هاد اللصقة .. خلات ختي مشغولة جات عندي للبيت
- سلطان علاش مبقيتيش كتجاوب على مكالماتي
- غا مشغول شوية .. وتلفوني تهرس ..
- انا غانعطيك تلفوني .. غا بقا تجاوبني ..
- ونتي اش غاديري ..
- غانقول لبابا راه تلفلي ويشريلي تلفون جديد
- لا انا راجل منقبلش على راسي هادشي ..
- انا كنبغيك بزاف .. متبقاش تغيب عليا ..
هاكاوا على البرهوشة قالك كتبغيني .. لصاق سكوتش هو هادا ..
- سيري دابا قبل ميشوفك حد ونهضرو من بعد ..
حطات تلفونها .. وخرجات .. دابا هادي كتكدب على والديها وانا باغاني نتيق فيها ونبغيها وعقلية هادي .. مشات من الدار فلعشية مشيت عند اختي نقيتليها ودنيها وقلت ليها متبقاش تعرف دوك الانواع وباللي شفتها فمواقف خايبة وزدت حوايج من عندي .. هادشي كله باش متبقاش تجيبها للدار .. وقلت لماما تهضر مع بنتها .. على الله نتفك شوية من هاد اللصقة ..
البارت 6
روتين ديالي هو هو الجديد هو ان الجارة الجديدة فيها ووليت كنراقب كل خطواتها كنستنى منين ندخل .. تعرفت على واحد البنت خدامة فواحد البوتيك وعجبني ستيل ديالها .. تافقنا نتلاقاو فواحد القهيوة .. اللي اكتشفت ان وحدة من حريمي ولات خدامة فيها ..اييه هادي كوثر اللي كنت مصاحب معاها هادي عامين .. كانت كتكدب عليا وتقولي راها لاباس عليها وبنت شي بورجوازي وانا بدوري كنت كنكدب عليها .. كنا خدامين كنكدبو على بعضياتنا وفاللخر واحد ماصور شي حاجة من لاخور حتى النهار اللي كتاشفنا فيها الحقيقة .. بلان خايب بزاف .. ساليناها بالسبان .. من داك النهار مشفتها حتى ليوما .. فهاد الكافي ... جات عندي وانا جالس مع البنت .. تخالطو فيا جميع الوان الطيف ..
- السي سلطان .. اش حب الخاطر .. واش قهيوة كالعادة .. ولا بغيتي افووكا
- احم .. كوثر لاباس عليك .. شوفي البنت اش غاتشرب وانا جيبيلي قهيوة ..
- على الراس والعين .. اه لالة نوال اش بغيتي ..
- حمحم لا ماسميتهاش نوال سميتها هند ..
- اه ماشي هادي هي اللي كانت معاك البارح .. شوفي فيا الالة .. لا لا ماشي هي .. سمحلي اسلطان ولكن حيت كتار ولاو كيتخالطو ليا .. ولكن الصراحة .. هاد البنت زوينة على ديال لبارح .. وديال مور البارح خيبوعة معرفت منين جمعتيها
هند : مافهمت والو اش كاتقولي ..
سلطان: غا ضاحكة كوتر كيعجبها تضحك ..
كوتر : ماضاحكاش .. واش فخبارك باللي هو كل نهار مع وحدة فشكل .. نتي رقم من ضمن البنات اللي كيعرف ..
سمعات هند ديك الهضرة وهي تنوض .. جات عندي نيشان ضرباتني بطرشة حتى دارت بيا الدنيا .. بقات كوتر كتضحك ..
- درتيها يا الشيطانة .. والله لا بقات فيك ..
- سير اش عندك ما دير يا بوراس ..
خرجت لقيت هند مختفية .. باينة غاتبلوكي نمرتي مازال حتى مسخنت بلاصتها وسالات العلاقة قبل متبدا .. واخا يا كوتر .. ها وجهي الى بقات فيك تأليف دودي العيساتي .. مشيت ندور مع صحابي .. دايرين بالطوموبيل .. حتى بانولي شي بنات فواحد البارك جالسين ... كتبت النمرة فورقة طويتها ولحتها عليهم .. شافوفيا ضحكت عندهم .. زعما انا مولاها .. بقيت كنشوف فيهم من المراية لقيتهم ناضو مشاو عند مول الحرشة تقداو منه .. ومشاو بحالهم ... بقيت النهار كامل كنستنى اتصال من شي وحدة منهم الصراحة كلهم عجبوني .. حتى جاني ميساج ...
- سلام زين لاباس عليك ..
زيين !!! الله الله زعما عجبتهم .. صوبت الجلسة صيفطليها ميساج ..
- اهلا وسهلا .. واخيرا من قبيلة وانا كنستنى الميساج ديالك ..
صيفط الميساج وتسنيت الرد يجيني متعطلش بزاف حتى وصلني الميساج ..
- متصوريش الفرحة ديالي ليوما .. حسيت راسي طاير .. تيقي بيا انا غانعيشك بحال الاميرة .،
متصوريش وطاير وتيقي واميرة !!!! هادشي غريب بحال ايلا هادا ميساج من شي دري لشي بنت .. واش شي حد غلط فيه ولا هي غلطت ولا شنو ..
كتبت ميساج ..
- شكون معايا ؟
جاني ميساج اخور فيه ..
- انا مول الحرشة اللي عطيتيه النمرة قبيلة .. بغيت نتعرف عليك نتي شنو سميتك ..
اواعدي 😂😂😂😂😂😂😂😂😂😂😂😂😂😂😂😂😂😂😂😂😂😂😂😂
عطات النمرة اللي عطيتها لمول الحرشة ... بلاتي بلاتي .. صيفطلو ميساج ..
- قبل منتعرف علييك بغيت روشارج بعدا حيت مبقاليش الصولد ..
تسنيت شوية جاني ميساج فيه الروشارج دخلتها لقيتها ديال 50 درهم الله الله .. مول الحرشة عندو فراغ عاطفي وناوي يعيشها بحال الاميرة بالحرشة هههه .. صيفطله ميساج قلتله ..
- المهم انا سميتي سلطان وراجل نمرتي عطاتهالك ديك البنت حيت عطيتهالها الصباح .. ولكن رب ذرة نافعة هانا ربحت بيها روشارج ..
المهم من ديك الساعة وهو كيسبني ومازال كيوصلوني ميساجات السبان حتى بلوكيتو هههه
البارت 7
شدني الملل هاد الايام غا الفليفلة غادية جاية .. لصقة ..خاصني نشدها مع شي وحدة هاد الايام حيت انا كنقنط بوحدي .. جاني واحد الفراغ عاطفي لدرجة ايلا تبسلات عليا الكلاسة دالحمام غادي نبغيها ..المهم جلست فالقهوة حتا بانتلي واحد البنت كادور بوحدها مشيت تابعها ..
- مال الزين ماشي بوحده ..
- بغيتي تمشى معايا .. واش بغيتي تفلا..
- مكرهتش .. انا راني ناوي المعقول .. مكنتفلاش
- ايلا بغيتي المعقول مرحبا ..
بقيت ماشي معاها .. عطيتها نمرتي .. غادي معاها حتى قربنا لواحد الحومة .. وهي تقول
- اجي تطلع معايا .. الدار راها غا هنا ..
غا قالتلي الدار وانا نزعم ايه علاش لا .. مشيت معاها ودخلت وانا نتصدم .. لقيت شي رجال قدهم قد الصخط شفت فيها
- شكون هادو 😳
- هادو خوتي .. اجي نعرفك عليهم ياك قلتي باغي المعقول ..
ركابيا فشلو عليا .. وليت كنغني اش داني علاش مشيت .. شداتني ودخلاتني وقالت ليهم هادا عريس باغي يتعرف عليكم .. وناوي الحلال .. قرب مني واحد منهم وليت كنشوف فيه للفوق .. حيت طويل وعريض مد يدو سلم عليا حسيتو دار ليا زلزال فضلوعي .. غا بالسلام .. ناري مشيت فيها .. جلسوني ونا مافاهم والو .. بداو يهضرو ويقولولي غانعطيوك السكنة وتهلا فالبنت والله الله عرفت انها مطلقة من قبل .. طيحة 3D ..
- ايوا شحال ناوي تعطي فالصداق ..
- هه حتى نجيب والديا ونتافقو على كلشي ..
- فوقاش تجيب والديك ..
- لعشية نجيبهم .. فاين نلقا عائلة بحالكم ..
- غانتسناوك .. يالله نوض ..
هضرتهم دخلات الرعب فيا .. اودي اش داني .. خرجت من تما ضربتها بجرية لوكانت فماراطون كون جيت فيه انا اللول .. عادي اللخرة اش داني لشي ديور .. مشيت للدار مخرجت منها النهار كامل .. وزوينة هادي .. نصدق مزوج بزاز .. بانتلي البنت جارتي خارجة مشيت نتبعها ..
- واش منتعارفوش معاك ..
- ونتا موالف كتعارف على اللي شفتيها جديدة..
- الصراحة نتي مختلفة على كلشي ..
تلفتات عندي ووقفات ووجهها رافعاه وبثقة رفعت يديها ..
- انا حبيبة .. متشرفين ..
صدماتني بهاد الطريقة صراحة .. سلمت عليها وقلت ،،
- وانا سلطان ..
- فاش خدام اسلطان ..
حشمت نقوليها مخدامش .. جيت نهضر ونكدب وهي تهضر ..
- شومور .. ولا خدام مع الواليد .. حاجة من الجوج ..
- باش عرفتيها ..
- حيت اللي فيه النفس يخدم على راسو مكيبقاش عندو الوقت يفكر فالبنات ..
او على غرور فهاد البنت ... عصباتني .. كملات هضرتها وقالتلي ..
- تهلا ..
تما تعصبت مللي مشات وخلاتني .. على غرور فيها .. مالك اسلطان واش عصباتك الحقيقة .. هي ماقالت غا الحق .. نتا نسيتي راسك وبقيتي مقابل البنات .. والعمر كيفوت بيك ..
مازال انا كنفكر فحياتي ومستقبلي اللي ضاع وضميري اللي فاق مع حبيبة حتى بانولي اللي مكنتش داير ليهم الحساب .. واك واك واعلق اولد الحرام ليوما يطحنوك .. هادو اللي كانو غايزوجوني لختهم ليوما بالحيلة جايين عوالين على خزيت .. ليوما يطحنوني .. اشهد اشهد ... حتا الشهاداتان تلفولي هاد الساعة .. مشيت فيها كفتة .. جاو شدوني ..
- واناصدقتيش الساط .. خليتينا نستناو فعائلتك
- اد اد اد اد .. عائلتي غا كنا جايين وخسرت بينا طوموبيل ومي جاتها كريز وخويا مشا يعمر المازوط .. ووووو انا بقيت نستنى ..
مازال مكملت الهضرة حتى جاتني طرشة من حيث لا احتسب .. طيراتني للسماء السابعة .. وهو يقول واحد منهم ..
- الدراري .. خاصنا نربيوه باش معمرو يعاود يضحك على بنات الناس ..
- لا لا لا لا .. متربيونيش عفاكم عفاكوووووم . ضربة من هنا وركلة من هنا وانا مكمش حتى مابقيتش حاس بالضربة منين جات .. تأليف دودي العيساتي
البارت 8
ااااي .. ايي ضهري .. اه يا وجهي اااه .. ناااري ضربوني ولاد الحرام .. قهروني ولاد الحرام .. حكروني اي قلبي اااااه ... اي يدي اي رجلي كلشي كيحرق فيا ..
امي : ونتا اش داك لدوك الناس .. تفليتي على بنتهم راه عندهم الحق .. مالهم ديوث ..
- صافي اماما صافي متفكرينيش .. توبة ولله حتى توبة ..
كليت دقة مكلاهاش حمار فالطلعة .. ناري كرهوني فالبنات .. اش داني انا لشي بنت .. دوزت فترة النقاهة فالدار .. مكنخرجش .. مرة مرة تنقز البرهوشة دير راسها جاية عند ختي .. وهي غا جاية تطل غليا .. حتى طلات عليا اللي مكنتش داير ليها حساب .. حبيبة ☺️ ... جات هي وباباها .. مكنتش عارف انها عشيرة باباها .. جابتو وجات تطل عليا .. جاتني غريبة بزاف .. ولكن عجبني الحال حيت حسيت انها مهتمة بيا ..
- على الله هاد الدقة تخليك داير عقلك اسلطان وتبعد شوية من السوق الخاوي ديال التفلية ..
- هادوك غا تحاماو عليا وتعاونو .. وختهم هي اللي لاحت عليا الباطل انا مكنعرفهاش اصلا ..
- معقولة .. حيت الدرب كله كيهضر عليك ..
نقزت وقلت الدرب كله ؟!!!! .. اااي .. ظهري ..
- تكى ورتاح .. ديها شوية فصحيحتك ..
مشاو وخدات قلبي معاها .. شحال زوينة هاد البنت والاهم من هادشي ان شخصيتها قوية .. وعارفة اش باغا وواثقة من راسها .. وليت مزيان بعد ايام وبديت نخرج .. وانا كنفكر فشي حيلة اللي نوصل بيها لحبيبة ونخليها تتعلق بيا .. هي مكتكدب على باباها مكيهموها فلوس ولا زين .. اش كيهمها .. اه الخدمة هي سولاتني على الخدمة داك النهار .. ولكن فين غانلقا هاد الخدمة .. تمشيت وتعرفت فالطريق على واحد البنت سميتها نسرين .. اييه عارفكم غاتقولو هاكاوا على التوبة .. اللي فيه شي طبيعة ما يبيعها .. عرفت انها بنت يتيمة الاب وعندها اخ واحد وفعمرها 19 عام .. مازالة كتكوتة .. ولكن صغيرة .. دخلت عليها بعندي وعندي وعندي ودوك الكدوب ديال ديما .. عادي هادشي ديما كنقولوه باش نطيحو شي وحدة.. ولكن هادي اختلف معاها الوضع .. حيت استغلات غياب امها اللي خدامة النهار كامل وخوها وعرضات عليا للدار .. وتما غايتبدل كلشي وغاتولي نسرين ديالي .. ندمت بزاف .. حيت على بالها غانتزوج بيها .. ولكن انا مكنتش كنفكر بديك الطريقة .. اللي تسلم راسها لشي واحد فابور راه تكون ساهلة .. وحتى واحد مكيبغي الحاجة الساهلة .. ميكت عليها دوك الايام .. وبقيت كنفكر فطريقة اللي نوصل بيها لحبيبة .. اللي كتعامل معايا بطريقة رسمية ومكتخلي ليا حتى منفذ اللي نوصل بيه ليها .. حتى تعصبت .. عمر شي وحدة مدارتلي هكا .. خاصني نوصل ليها بأي طريقة .. حتى رجعت نسرين ..
- سلطان مالك كتهرب مني ..
- والو غا مشغول هاد الايام ..
- سلطان .. نتا خاصك تجي تخطبني فأقرب وقت .. نتا واعدتيني بهادشي ..
- نخطبك .. باش غانخطبك .. شايفاني خدام وبالمانضة ديالي وبداري .. فين نسكن وشنو نوكلك.. واش صحابليك غا اجي وتزوج ..،
- سلطان .. غانسكنو فدارنا مع ماما انا غانقنعها .. وكنواعدك انا غانخدم ونتعاونو ..
- سيري تلعبي مع قرانك ابنتي انا ماشي ديال الزواج ..
- سلطان ..😢 انا حاملة ..
حسيت الدنيا كتضور بيا ديك الساعة ..
- شنو قلتي .. حاملة .. سيري قلبي فيمن تلصقي ديك الكرش .. واييياك تجي عندي مرة اخرى .. فهمتي ..
خليتها ومشيت .. بقيت كنضور ونتساوا خديت الطوموبيل من عند ريان تساريت حتى شبعت .. جيت للدار لقيت واحد المرا مع الواليدة ومعاها نسرين .. عيطاتلي قالتلي اللي كاين نكرت بالعما قلتليها انا هاد السيدة مكنعرفهاش .. ومعمري شفتها .. بدات تبكي تما وانا ناكر تماما اني شفتها فحياتي اصلا .. مشاو .. بعدما بقات امي كتحلف فيا .. حلفت كدوب اني مكنعرف عليها والو .. انا ماشي دالزواج ولا دالاولاد .. الغد ليه تلقالي خوها .. عرفتو حيت كيشبه فيها .. جبد معايا جنوي كان غايقتلني لولا ان دراري دالحوما فكوني وهبطوه الكوميساريا .. بعدها جات عندي البنت كترغبني .. وانا قلتليها بعدي مني .. قالتلي راه جرات عليها ماماها من الدار بعدما حبسو خوها .. الصراحة مرحمتهاش .. قلتليها بعدي مني ..
البارت 9
نسرين ولات من الماضي .. رجعت للتسركيل من الجديد .. ديما تلفونات جداد .. بقيت بوحدي .. خاصني اللي تونسني .. واش انا نبقا ديما هكا نبدل من وحدة للتانية .. خاصني نتبت ونبقا مع وحدة .. لوكان بغات حبيبة كون بقيت معاها ومنعرف حتى وحدة من غيرها ..كون عيشتها بحال الاميرة .. الله يذكرك بالخير امول الحرشة هههه .. ولكن دوماج مبغاتش .. واحد النهار بقيت كنلعب فتلفوني قلت اجي ندير شي نمرة على الله .. ونشوف واش تصدق .. صونيت حتى سمعت صوت وحدة زوين .. بقيت شاد معاها الحديت ولكن هي من مدينة وانا من مدينة .. بقينا مدة وحنا كنهضرو .. حتا واحد النهار قالتلي راها جاية عند شي عائلة هنا شدات التران وهادا .. قالتلي شغا تلبس انا صاوبت راسي مزيان ومشيت نتسناها فلاكاغ.. بقيت نتسنا حتى صونات قالتلي شنو لابسة وفين راها .. مشيت شفتها .. ولكن هي ماشافتنيش .. اناااري قداش غليضة بزاااف .. وملي دارت بوجهها ندمت على سنوات الروشارج اللي خسرت معاها .. بدلت الطريق جريت جريت جريت .. بلا رجعة.. وهياناري .. اش هاد المصيبة كنت غانطيح فيها راسي .. مشيت بحالي .. وبلوكيت نمرتها.. اووف على زهر .. اوو زعما كاع هادا زهر عندي نهار بغيت نتوب منطيح غا فهادي .. دير مني اربعة .. دوزت الروتين ديالي كالعادة حتى تعرفت على واحد البنت كلاس .، جات عندي وهي طوب فوق كلاس .. عجبتني وقلت هادي هي صافي .. هادي اللي تصبر معايا على محايني .. السيمانة الاخرى درت معاها نتلاقاو حدا البحر .. جات جلست حدايا .. وانا فرحان ولكن شميت ريحة فشكل .. ديال 💩.. واش زعما نكون زطمت عليه باا كنحس ولا هاد البلاصة اللي جالسين فيها داير فيها شي حد كاكي .. قلتلا يالله نتمشاو شوية .. تمشينا والو ديك الريحة غادية معانا شفت رجلي والو طلعت صباتها حتى هي والو .. يعني الريحة جاية منك ابنت لحرام ... هزيتها ولحتها فالبحر .. يالله دوشي دابا الى كتقتصدو فالما دالدوش هادو غايكفيوك 😡 هادشي اللي بقا .. والاه اللي باغيها باش تصبر معايا وتجمعني منقات حتى راسها ... مشيت ومن تما ما وليت شفتها مازال .. مشيت لحميد مول البارفانات ..لقيت معاه جوج بنات واحد مصاحب معاها جايبة معاه صاحبتها .. فرحت حيت ربي دغيا فرحني .. كانت لابسة نظاظر ولابسك سبورتيف وهضرتها بلقياس خديت نمرتها وقلت ليها نديرو شي كافي .. تافقنا الغد ليه نتلاقاو ..
الغد ليه تهليت فراسي مزيان وكلشي مشيت نتلاقاها .. جلست كنستناها حتى جات بالنظاظر ..
- منشوفوش عويناتك ..
حيدات النظاظر ويا ريتها ما حيداتهم .. واه عينيها صغار بزاف .. ولا علاقة مع الشكل ديالها .. اميمتي اش هاد الحصلة عاود تاني .. بقات كتهضر بواحد الطريقة مشمئزة ..
- عرفتي اسلطان انا كنت زوييينة بزاف ولكن مرت عمي سحراتلي حيت كانت باغاني لخوها وانا مبغيتش ... كنت مريضة بداك السحر ..
-😴
بقات كتهضر حتى جابتلي الملل .. حشمت الصراحة انا موالف كنجيب معايا غا التيتيز .. ولكن والو هاد المرة خطيت كنشوف فالدراري كل واحد معاه قوقة .. الا انا جايب معايا قرعة بلدية
حتى جاني الملل مزيان وانا نجبد تلفوني يا نلعبو كلنا يا نحرمو اللعب درت راسي كنهضر فالتلفون وانا نقول ..
- واصاحبي .. واجي للقهيوة راه ختك هنا كتقهوا مع واحد .. جري اصاحبي ..
مكاملاش جوج دقايق حتى خوات القهوة من البنات كلهم حتى من هاديك اللي كانت معايا مشات هربت حتى هيا .. اودي على الزيار اش كايدير
البارت 10
دودي : حبيبة يا حبيبة كيفاش حتى غانوصل ليك .. انا علاش شاغل راسي بيها .. ولا حيت اول مرة كنتلاقا اللي كتقمعني .. انا مكنتقمعش .. غانساها .. واللي ليها ليها .. تهليت فراسي والبارفان وخرجت نضبر على رزقي هاد المرة اللي نتلاقاها وتعجبني غادي نكمل معاها ومنسمحش فيها وغادي نبني معاها حياتي .. كلشي على المعقول وغاندير عقلي .. وغانتزوج بيها.. بقينا كنضورو انا وواحد الدري صاحبي .. حتى بانتليا واحد البنت جالسة بوحدها مشيت جلست حداها :مال الزين جالس بوحده ..
- كنستنى صاحبتي تعطلت عليا ..
- عندك مانع اني نونسك
- لا جلس ..
- انا كنفضل نتمشاو حسن .. واش معندكش طوموبيل ؟
فكرت نقول وي عندي .. ولكن لا انا اتافقت مع راسي اني نقول الحقيقة ونبني علاقتي فالمعقول..
- هه لا معنديش .. نوضي نتمشاو ..
-شنو سميتك ؟
- سميتي سلطان ونتي ؟
- سميتي نهى
- متشرفين انهى .. سميتك زوينة بحالك ..
بقات كتمشى معايا وعاودليها على راسي كلشي اني مجاز ومازال ملقيت خدمة .. وبقيت كنخطب عليها خوك رجولة واخا الفلوس مكاينينش ولكن غانبداو مع بعض من الزيرو .. بقات ساكتة ومقالت والو على راسها طول الوقت انا اللي كنهضر شوية وهي تتجاه لواحد الدرب بغات دوز منه وانا نشدها
- فين غادة ..
- ندوزو من هنا ..
- ولكن هاد الدرب معروف بالكريساج ..
- مالك واش خايف ؟
- ها لا لا .. انا رجولة مكنخافش ..انا خايف غا عليك .. تشوفي شي مدابزة ولا شي سيف وتتخلعي ..
- انا معاك .. منخاف من والو ..
دارت واحد الضحكة صفرا وشدات فيا وكملات على طريقها انا ديك الساعة قلبي بدا يضرب 180 دقة فالدقيقة .. بديت نقرا القرآن يا ربي ما يكريسينا حتى واحد .. هاد بنت اللذين بحال الا كتختبرني .. شوية غادي وانا يبانلي واحد جاي بالموطور قلبي وقف فجأة ناري جاي عندنا .. مشيت فيها انا صافي خصوصا الى جبد عندي شي جنوي انا غانسخف ليها هنا وغانتفضح .. مشيت فيها .. وصل عندنا وهو يوقف استجمعت القوة ديالي ورجعت نهى مور ظهري وبديت نخطب ..
- شوف نتا .. انا راه نوصلك حتى سما بضربة وحدة .. ونعطيك ضربة وحدة تدورك للكورة الارضية .. واش عرفتي شكون انا .. انا راه اللي كيخافو منو نص المشرملين دالمدينة .. بلا منبانلك نقي هكا انا راه مشرمل فمخي .. تبغي تقرب منا نذبحك ..
- كملتي ..
- شنو بغيتي ...
- كنت بغيت نسولك شحال فالساعة .. ولكن بانلي نتا مصوطي غانسول الزوينة اللي معاك ..
نقزات هيا ضاحكة وقالتله شحال فالساعة شوية بداو يهضرو ويضحكو ويتعارفو قدامي .. حتى ركبات معاه .. وخلاتني .. بتحط نفسك فمواقف بايخاااا .. السيد ماشي مشرمل وبغا يسول غا على الساعة وانا سبقتهاله .. لا طلعتي راجل اسلطان .. والدرية بدلاتك بموطور خخخخ .. بقيت كنتمشى مع راسي وكنغني حتى وقفو عليا جوج ماطر ..
-بغيتو تسوله على الساعة حتى نتوما ؟
- حنا بغينا نسولو على الساعة وعلى التلفون وعلى بزطام الفلوس.. وشنو اخور جبد شي سنسلة ايلا عندك وحتى داك السروال عجبني حيدو ..
- لا الا السروال راني غا مسلفو من عند ريان ..
- تا طلق ولا نرسمليك خريطة المغرب فوجهك..
جبد عليا واحد السيف قدي فالطول .. بلعت ريقي وضحكت .. Dodi elaissati
- على الاقل ماشي حدا الدرية .. فين اسلطان اللي كنتي مشرمل فمخك واخا نقي واللي نص مشرملين المدينة كيخافو منك ..
المهم خليت حتى ضلام الحال ومشيت بحالي للدار غا بالبوكسر .. الحمد لله اللي مخداوهش حتى هو .. شافتني ختي بدات تغوت .. جات الواليدة بدات تسول قلتليها راه غا حيدت حوايجي فالبحر نزلت نعوم وملي رجعت لقيتهم تسرقو .. بقات كتشوف فيا شي شوفات ماشي هما هادوك .. مقهمتهاش دخلت لبيتي ولبست حوايجي وانا نهز التلفون اللي عطاتولي الفليفلة .. ااايه ولا عندو قيمة دابا .. بعدما خداولي السمارتفون ديالي .. صونيت منه لموسى وعلماه بشنو وقع .. ودرت معاه غدا نمشي نديكلاري .. جيت ننعس حتى لقيت الواليد دخل عليا بعجاجته ..
- اجي نتا يا الحرايمي فين كنتي ..
- كنت فالبحر ..
- عطيني شي امارة ..
- ام اب ..
- لاواه جدة .. غاتمشي حتى تجيبلينا شي مرض يكلسك فحجرنا كتر ما نتا جالس ..الله يلكيها ليك ونتهنى منك ..
خرج وزدح الباب وانا بقيت كنفكر اش كيقصد الواليد .. ااااااه .. عاد فهمت الشوفات ديال الواليدة .. خخخ صحابليهم دخلت لشي دار مع شي بنت وهربت ونسيت تما حوايجي 😂😂😂 اجي الواليد اجي تسمع راني تكريسيت والله حتى تكريسيت .. تأليف دودي العيساتي
البارت 11
الشوماج قاهرني فحياتي .. الفلوس والو والدين مغرقني والواليد مابقا يعطيني والو وحتى الواليدة مابقاش كيأثر فيها التمسكين ديالي ولات كتبغي غا تتفك مني .. خرجت نتسارا حتى تلاقيت واحد البنت كنعرفها خديت منها النمرة ودرت معاها نتلاقاو فلعشية .. رجعت لقيت حبيبة فالدرب دارت بيا دنيا حماريت وخضاريت :
- 😳 حبيبة لاباس عليك ؟
- لاباس ونتا لاباس عليك
- الحمد لله .. فين غادية ؟
- كنت باغا نخرج ولكن دابا مبقيتش ...
- اه واخا ..
خليتها على راحتها ودخلت للدار وبقيت نتناكر مع راسي شكون هي باش تديرلي هاكا انا نقدر نعرف عشرة حسن منها وهي منخلاني بحال معرفتش شكون حاسبة راسها .. علاش كنذل راسي معاها معرفتش ..
خرجت وعطيتها للدوران تلاقيت واحد البنت بقيت معاها وعطيتها وقت حتى هي .. درت معاها نص ساعة بعدما نتلاقا مع البنت الاخرى .. حاجة والزيارة .. غا وصل وقت الرونديفو وانا نخرج من الدار وريحة بارفان مدوش بيها ماشي غا راشها eau de toillette .. ههه لاعياكم كنستعمل بوص احم احم .. خرجت وانا نتبلوكا .. لقيت حبيبة فوجهي ..
- سلطان لاباس عليك ..
- ان ام الحمد لله ..فين غادة
- للمكتبة تمشي معايا ..
- اه واخا علاش لا ..
تمشيت معاها بحال شي هبيل ونسيت الرونديفًو .. شدينا طاكسي وانا معاها داز مول الطاكسي على الجردة اللي كنت داير فيها مع البنات لقيتهم تما بجوج كيتسناو والاكثر غرابة انهم مع بعض جالسين .. ربي حفظني منهم اليوما اما هما كانو غايتعاونو عليا ليوما ..بقيت مع حبيبة حتى وصلنا للمكتبة .. ملي دخلنا بقات كتقلب على كتب بحال الا موالفة تجي هنا
- حبيبة واش نتي محتاجة شي كتاب فشي قراية
- انا كملت الدراسة بحالك .. ولكن القراية مازال .. القراءة هي غداء العقل .. بحال الماكلة غذاء البطن .. واش نتا مكتقراش .؟
- اه اه حتى انا كنقرا عندي كتوبة كنقراهم ..
- شنو اخر كتاب قريتي ؟
- ام اب
اويلي اش غانقول ليها وانا اخر كتاب اشمن كتاب قول بوليكوب شريتو بزاز باش نفاليدي فالجامعة..
- يعني مكتقراش اسلطان ..
- العلم راه فالراس ماشي فالكراس ..
- ههه هادي الهضرة ديال المعكازة ..
- اش هاد الكتاب فيدك
- هادي رواية ..
- والرواية باش غاتفيدك من غير التسلية ..
- بالعكس .. الروايات تقدر تستفد منهم كتر من الكتب التعليمية.. كتسافر بيك لعالم اخر من العلم .. وكتحببو ليك ..
- نتي موسوعة .. ومختلفة بزاف على البنات ..
- حتى نتا مختلف بزاف ..
- بالصح 😍
- اكيد .. عمري شفت شي حد معندوش هدف فالدنيا بحالك ..
- 😑
بقيت مع حبيبة كتوريني فالكتوبة .. وكتحاول تهضرلي على كل كتاب بوحده .. فعلا هي مختلفة بزاف .. موسوعة .. دابا عاد عرفت علاش راني منجذب ليها حتى هاد الدرجة .
البارت 12
بقات كتوريني فالكتوبة حتى محسيناش بالوقت .. ولاول مرة كنبغي نقرا وتحمست خديت شي روايات وقريتهم فالدار .. مشيت لدارنا وبقيت كنقرا واحد الرواية من اختيارها .. قلبي دخل فالرواية حسيت بحلاوة القراءة .. الروايات عالام اخور قريت الربع دالرواية نضت بقيت نطل من السرجم بقيت نتأمل حتى فتحت السرجم ..
- اش كادير علاش مامشيتيش تقرا هه
- غا خديت بوز هه ولكن الرواية واعرة ..
- هي قلتي عجباتك اها ..
- اكيد .. باراكة غا انها من يدك
بدون شعور بدينا نتناقشو على الرواية كنهضرو ومحسيتاش بالرقت كاع حتى صبح علينا الحال ... مكرهتش نبقى غا نهضر معاها اول مرة نحس هاد الاحساس مع شي وحدة .. احساس غريب بزاف .. طاير فالسما .. ودعاتني ودخلت لبيتي وبقيت نفكر فيها حاولت ننعس مقدرتش .. صورتها قدام عيني ..اش دارت فيا هاد البنت .. غمضت عيني شوية .. فقت لقيتها التاسعة صباحا .. يا للفرحة .. عمري مفقت فهاد الوقت من نهار كنت مصاحب مع واحد المعقدة فيقاتني تلاقاني واحد المرة مع السبعة باش مايشوفها حد .. ديك الفيقة بكري هي التالية ديالي .. من تما وانا من اصحاب الفياق مع العصر .. حسيت راسي ناشط وباغي نشوفها .. نضت غسلت وجهي وخرجت نفطر ..
ماما : بسم الله عليك اش واقع ..
سلطان : علاش شنو كاين
ماما : مالك فايق بكري ..
سلطان : والو غا قررت نتبدل ونبقى نوض بكري
ماما : تتبدل !! الله يجعلني نتيق ..
كالعادة نبع الحنان مامتيقانيش .. خديت الرواية ومشيت للجردة بديت نقرا فيها .. حتى سمعت صوتها مورايا
- كتقرا بوحدك
- اه حبيبة .. لاباس عليك
- انا لاباس فين وصلتي ..
- تعمقت فيها .. مقدرتش نطلق منها
- الروايات هما هادو .. كتشدهم ومكتطلقهم حتى تكملهم .. كيجذبوك بكل كلمة ..
- نتي عالام .. ممكن نسولك
- اكيد ..
- عمرك بغيتي شي حد ؟
- انا عندي مواصفات خاصة للحب ..
- شنو هما هاد المواصفات ..
- حب اسطوري ... مشاعر احاسيس فقط .. بدون جسد .. نطيرو انا وياه لسابع سما ..نتفاهمو بالعين .. وبالقلب ماشي بالهضرة .. ونتا اسلطان عمرك بغيتي ؟
- انا 😳 ههههههه لا .. ولكن دابا كنبغي ..
- وشكون هي
- منعرف .. معرفت والو ..
- نوضو نمشيو للمكتبة ..
- غاتبليني بالروايات عهه
- الروايات غذاء القلب والعقل ..
البارت 13
تبدلت حياتي بزاف وانا مع حبيبة .. كنضعاف بزاف مللي كنكون معاها .. جربت نكون شفاف فالتعامل ديالي ومنكدب عليها فوالو .. ماشي بحال العلاقات اللي كانو قبل .. حسيت راسي لاول مرة انسان مكنكدب ما والو .. مابقيتش كما كنت .. حسيت الدنيا عندها طعم .. بقينا فالمكتبة كنقراو وانا كنشوف فيها وكنتأمل فيها .. شافت فيا وحصلاتني :
- 😄 علاش كتشوف فيا
- والو غا فرحان ..
- فرحان ! وعلاش
- حيت راني معاك ..
قربت يدي بحذر وشديت فيدها
- حبيبة !! 😅 انا ،. انا
- نتا شنو
- انا كنبغيك ..
- حتى انا ..
- 😳 شنو قلتي
- سلطان .. انا من النهار اللول انا معاك واضحة فكلشي .. وحتى فالمشاعر ديالي مستحيل نكدب .. انا فعلا مرتاحة معاك .. وكنبغيك
كنت غانبكي بالفرحة مللي قالتلي هادشي .. وااااو واش كنحلم .. واش البنت اللي تمنيتها حتى هي كتبغيني .. زيرت على يدها
- انا .. حبيبة كنواعدك عمرك تندمي عليا .. غاندير المستحيل باش نعيشك اسعد وحدة فالدنيا .. كنبغيك وغانبقى نبغيك طول حياتي ..
- وانا راني معاك ..
شحال زوين تلقى داكشي اللي باغي وكنتي كتقلب عليه حياتك كاملة .. جات فرصة حيت حبيبة هي وجه السعد عليا .. مباراة ديال المحاماة دوزت المباراة ونجحت .. كان اسعد يوم فحياتي .. بزيت الخدمة فمكتب محاماة كبير .. وكان عندي حماس .. فعلا المدة اللي دوزتها فالمكتبة مع حبيبة خلاني نكون مثقف اكثر ونعرف نجاوب فالمباراة .. واخيرا غادي نبني حياتي مع حبيبة ..
- الوالدة ليوما غانمشيو نخطبو حبيبة .. دغيا وجدي
- مالنا على حالتنا مالك مزروب
- مكرهتش ندير العرس دابا ماشي غا نخطبها ..
وجدنا كلشي ومشينا خطبناها .. حشمت بزاف داز كلشي زوين وقلبي طاير بالفرحة احلى شيء تخطب البنت اللي كتبغي .. احساس ولا في الاحلام ..
البارت 14
الف هنية وهنية يا لالة .. دازت الخطبة من اروع ما يكون ركبنا الخواتم .. هضرت فودنها ...
- كنبغيك يا احبى حاجة وقعتلي فحياتي ..
- حتى انا كنبغيك ..
- واش كنحلم انا مامتيقش عينيا
- ههه لا تيق .. حنا دابا مخطوبين .. وقريب غانتزوجو ..
- انا غاندير المستحيل باش نفرحك .. ونعيشك اميرة ( الله يذكرك بالخير يا مول الحرشة ههه)
- انا تايقة فيك .. وعارفة عيونك مكيكدبوش ..
شطحنا ودوزنا وقت زوين فالخطبة وحتى والديا فرحانين بزاف حيت كان يصحابليهم عمري ماغاندير عقلي ولكن درتو .. وقطعت علاقتي بالماضي .. اه غاتسولوني على الفليفلة ههه تسامحت انا وياها ورديت تلفونها ليها وقلتليها تديها فقرايتها حسن ليها هي اللي غاتنفعها .. استقريت دابا وحققت احلامي .. البنت اللي كنبغي .. والخدمة .. غاناخد كريدي نشري بيه الدار ... وهانا مستقر وعايش حياة مثالية .. حياتي ما بين حبيبة والخدمة .. كنجي من الخدمة ندوز على دارهم نشوفها .، وفالويكاند كنخرجو نتساراو .. ونشوفو الفراش اللي غانفرشو بيه دارنا .. حبيبة ماشي من دوك النوع دالعيالات اللي كيهمهم يخسرو الفلوس على العرس وداكشي بالعكس حريصة ديما على راحتي .. كلشي هو هاداك .. مشيت لخدمتي مللي رجعت كالعادة جيت ندوز على حبيبة قلبي لقيت باها كيودع شي حد فباب دارهم شكون هادا فين شفتو من قبل .. مستحيل .. 😱 هادا خو نسرين .. اش جا يدير عند حبيبة .. شاف فيا باها شي شوفات ماشي هما هادوك .. وحتى داك المسخوط .. مشا وبقيت انا مع اب نسرين
- اكيد عندك بزاف متقول
- عمي .. انا
- قول هادشي لحبيبة .. راها كتسناك ..
طلعت لعندها وركابيا فاشلين عليا .. اش غانقول ليها .. راه التهمة ثابتة في حقي .. انا فعلا.. لقيتها جالسة وقالبة وجهها للناحية الثانية ...
- حبيبة .. 😥
- شنو .. 😠
- خليني نشرح ليك عفاك
- اش غاتشرح .. حاجة وحدة اللي غاتقول دابا واش داكشي اللي قال داك الشاب صحيح ولا كدوب .. واش نتا فعلا ..
- انا ..
- هضر ..
- اه 😓دالبصح ولكن
- خرج عليا برا ومنبغيش نشوف وجهك مرة اخرى
- غا سمعيني عفاك .. كنترجاك احبيبة .. كنقسم ليك داكشي كان قبل منعرفك ..
- وشنو الفرق 😭 ضيعتي مستقبل البنت اشنو الفرق ..
- هي اللي ..
- شوووت 😤 مبغيتش نسمع المبررات القذرة ديالك .. هي اللي خسرت اما نتا جاي تعيش حياتك عادي وتتزوج وتبني عائلة ..
حيدات الخاتم من يديها وحطاتولي فيدي ..
- سير بحالك اسلطان .. راجع راسك وعرف اش درتي .. ديك الساعة غاتعرف شنو باغا انا .. وعلاش تفارقت معاك ...
- حبيبة عفاك 😢 كنترجاك .. عطيني فرصة اخيرة ..
- نتا اللي عطي فرصة لراسك ولو مرة وحدة فحياتك وراجع اخطاءك وحاسب راسك .. الهضرة سالات ... 😪
لاول مرة دموعي كينزلو .. مستحيل تكون نهاية حياتي وفرحتي هي هادي .. مستحيل تكون هادي هي النهاية
البارت 15
حياتي ولات جحيم .. بعدما بقاتش حبيبة كتجاوب على مكالماتي .. حبست راسي فبيتي ومبقيتش كنمشي للخدمة .. ومكاناكل مكانشرب ..
- ولدي علاش داير فراسك هكا .. عفاك نوض كول غا شوية ..
- 😔
- عمري ماشفتك ساكت بهاد الطريقة .. الله يهديك اولدي ..
مشات ام سلطان لحبيبة باش تهضر معاها .. وتعرف سبب فراقهم ..
الام : عفا بنتي ما قوليلي اش واقع بينكم .، كنتو مزيانين اش وقع لهادشي كله
حبيبة : كيفاش الحاجة قدرتي تشاركي فهاد الجريمة اللي وقعت .،
الام : اينا جريمة ابنتي ..
حبيبة : سلطان.. غلط ونتي عاونتيه فغلطو .. هو كان خاصه يصلح غلطه .. ماشي يهرب من تحمل المسؤولية
الام : شكون كتقصدي ..
حبيبة : البنت اللي سميتها نسرين .. جات عندك امها وطلباتك .. ونتي كدبتيها وجريتي عليها من دارك ..
الام : 😞 داك الوقت حلفلي سلطان باللي راها كتكدب .. تيقتو .،
حبيبة : لا متيقتيهش .. غا هربتي من المسؤولية بحاله ،. وتغاضيتي على الحقيقة .. مع انك متيقتيهش .. وفالداخل ديالك كنتي عارفك انه دارها ..
الام : 😢 عندك الحق ابنتي .. حتى انا شاركت فهادشي ..
حبيبة : ميمكنش نعيش مع سلطان وانا هازة على عاتقي مسؤولية بحال هادي .. وانا عارفة انه كاينة انسانة كتعدب بسبابه .. وانا خايفة انه فيوم من الايام نولد بنت تدفع غلط دارو باباها فلحظة طيش وتغاضى عليه ونساه .. حاولو تصلحو الغلط وكل واحد يدفع تمن غلط دارو ويتحمل مسؤوليته فيه ..
مشات الام للدار واتجهات لبيت ولدها اللي كان كينتظرها على احر من الجمر ..
سلطان : ماما .. شنو درتي .. شنو قالتلك حبيبة
الام : ولدي .. نتا خاصك تقلب على البنت اللي سميتها نسرين .. وتصلح ما درتي..
سلطان : مستحيل .. انا مايمكنش نكون مع شي وحدة من غير حبيبة .. الا درت هادشي غانخسر حبيبة ومعمرها ترجع ليا ظطط
الام : نتا في كل الاحوال خسرتيها .. راها مستحيل توجعليك وهي عارفة عليك هاد الحقيقة .. يمكن الا قلبتي على نسرين وصلحتي غلطك واعترفتي بداكشي اللي ولداته .. يمكن تتأكد حبيبة ديك الساعة انك تغيرتي على قبلها ..اما دابا فمستحيل تقبل تشوف فوجهك ..
البارت 16
مشيت لدار حبيبة وبديت نعيط وندق بالجهد
- حبيبااا .. خرجي عندي بغيت نهضرو .. حبيباااا ..
- شنو بغيتي مالك دايرلي الشوهة فالحومة ..
- انا كنموت واش مبغيتيش ترحميني ..
- دير داكشي اللي خاصك دير .. اسلطان
- واعديني هو اللول .. انا مستعد نتزوج بنسرين ونعترف بالولد .. واعديني مللي نتفارق معاها ترجعيلي ونتزوجو ..
- انا مامتيقاش هادشي اللي كنسمع .. كنت كنظن انك تبدلتي ولا عندك ضمير .. اما دابا كنشوف قدامي واحد اللي باغي يوصل لمصلاحته بأي طريقة .. ومكيهموهش المبادئ .. انا ندمانة بزاف حيت عرفتك .. كان يصحابلي نتا انسان مختلف ..
خلاتني ودخلات .. انا حسيت قلبي شاعلة فيه العافية .. مغانضيعش الوقت غانمشي نتلاقا نسرين .. تأليف وردة العيساتي ..
مشيت لدار نسرين دقيت وفتحلي خوها
- اش بغيتي ..
- بغيت ختك ..
شد فيا وبغا يضارب معايا .. حتى خرجت امه وفكاتنا .. شافت فيا وقالت
- اش بغيتي مازال منا .. ضيعتي حياتنا ودمرتيها اش جاي مازال باغي منا ..
- سولي ولدك اللي جاي يخسرلي زواجي .. اش بغيتو عندي نتوما .. فين نسرين عيطي عليها بغيت نهضر معاها ..
- نسرين .. الله ياخد فيك الحق .. فين هي نسرين .. من نهار جريتو علينا من داركم .. ماوليت شفت بنتي طجات حيت دابزت معاها بسبابك .. الله يا ربي ابنتي فين غاتكون .. 😭
- نتوما كتكدبو اكيد راها لداخل وكتضحكو عليا
بديت نعيط .. نسرين نسرييين ..
- سير قلب على بنتي .. نتا سبابها .. قلب لي عليها ورجعها .. والله هو اللي غاياخد حقنا منكم
اش هاد الزهر فين غانلقاها .. الرحلة ديالي غادي تطوال .. وغانبقى نقلب عليها .. اووف ..
البارت 17
بقيت يوماين كنضور ونسول واش شي حد شافها .. بحال الا كنقلب على ابرة فكومة قش .. كنقلب حتى فقدت الامل فأني نلقاها خصوصا ان حياتي مع حبيبة مرهونة بأني نلقى نسرين .. مكان بيدي حل اخر من غير اني نستمر فالبحث عليها .. علمت صحابي كلهم وحتى البوليس عاونوني فأني نلقاها خصوصا واني ولاو عندي بزاف دالمعارف منهم بعدما خدمت فالمحاماة .. واحد النهار قالي واحد السيد راه سبقلو شافها فشي بار .. بار؟ 😳وشنو كان يصحابليك اسلطان .. حبيبة كان عندها الحق انا ماحاسش بقدر الظلم اللي ظلمتو لهاد البنت .. جرات عليها امها للزنقة وهي صغيرة ومعندها والو .. اكيد غايحاوطو بيها الذئاب .. وغايكون مصيرها بار .. مشيت للمكان المعلوم ..طبعا بالليل باش نضمن اني نلقاها تما .. دخلت محملتش البلاصة .. مع اني دوزت بزاف ديال الحوايج الخايبين .. الا اني عمري موصلت لهاد العالم .. الدخان وريحة الشراب كتقتل .. بقيت كنقلب على نسرين ملقيتهاش .. مفقدتش الامل .. قررت نبقى لعلها تبان ولا تجي .. مصيري بين يديها .. فجأة لفتات نظري واحد البنت ناضت تشطح ولكن رقصها غريب بحال ايلا هازة جبل على ظهرها .. بحال شي ميت كيتمايل ومحاطين بيها مجموعة من الرجال .. شي كيصوط عليها دخان الكارو شي سكران .. تلفتات مكانتش غريبة عليا .، دايرا جوج كيلو دالماكياج .. وشعرها صابغاه ولباسها معري .. شفت فيها مزيان .. دمعو عينيا على حالها .. هادي نسرين .. مخافياش عليا .. واش هادي هي البيت اللي كانت منورة .. بحال شي وردة مفتحة .. واش بسبابي وصلت لهاد الحالة .. كل ذنبها فالدنيا انها بغات وتاقت .. مصيرها يكون هو هادا .. حسيت لاول مرة شحال انا حقير ودنيئ .. عاد عرفت كيفاش كتشوفني حبيبة دابا .. واحد الانتهازي دمر حياة انسانة معندها ذنب .. من غير انها بغات انسان عطاتو كلشي وتمنات معاه كلشي .. وجزاءها كان هو انها ولات وسيلة لافراغ الشهوة .. سطل ديال الزبل عمومي لللي جا يخوي فيه .. هادا ماشي عدل .. مشيت لعندها وعينيا كلهم دموع .. شافتني وقف بينا الزمن للحظة ... رجعت ليها جروحها ودمعو عينيها ... يا ترى شنو فادي يكون رد الفعل ديالها وهي شايفة الانسان لللي دمر حياتها واقف قدامها بعد سنوات ...
البارت 18
طالت النظر فيا .. واحد الراجل جبدها وبدا يقوليها شطحي وهو سكران محملتش البلان مشيت عندو ضربتو بونية وجريت نسرين خرجتها من تما حتى بعدنا وحيدات يدها مني ..
- شنو بغيتي
- نسرين .. اش هاد الحالة وصلتي ليها
- هاهاها .. ضحكتيني .. كتسول .. معرفتيش هاد الحالة شكون وصلني ليها
- شوووت .. عفاك صافي .. انا غانصلح كلشي ..
- غاتصلح كلشي ؟ اش غاتصلح اسي سلطان .. اش غاتصلح هاا .. واش عائلتي اللي دمرتيها واللي دخلتي ماما فنوبة ودخلتي خويا الحبس .. واللي كان كيحلف انه غايقتلني مللي غايخرج ولا ماما اللي بعدما عرفتني حاملة جرات عليا وحرماتني .، قالتلي لا نتي بنتي ولا انا امك وغضبانة عليا ليوم الدين .. امك اللي جينا عندنا وجرات علينا بلا رحمة.. شنو غاتصلح .. خرجت وهربت من دارنا وانا معارفة فين غانمشي وخايفة .. وللاسف ضعت كتر وكتر .. غاتصلح الليالي اللي كنت كندوزها مع اللي يسوا واللي مايسواش هما فهاد البلاصة .. ولا مع الشمكارة اللي كانو يخوفوني بالجناوة فنصاص الليل .. غاتصلح شنو ولا شنو ..
- ولدنا ولا بنتنا .. اللي ولدتي انا غانعترف بيه ومغانتخلاش عليه .. ونتي امه غانتهلا فيك حتى نتي .. عفاك حاولي نبداو من جديد ..
- ولدنا 😢 فين هو ولدنا .. ولدنا اللي ولدتو ودوزت المخاض فالزنقة كنتقطع وحتى واحد مسول فيا .. ولدنا اللي مالقيت منوكلو .. ولدنا اللي كمل سبع ايام وقطع النفس .. ولدنا اللي جريت بيه للسبيطار ملقيت حد تما .. بقيت كنرغب حتى واحد مداها فيا .. ولدنا مات .. ومن داك النهار مت معاه حتى انا
-😭
- بكي .. دموعك مايسواو والو ... ميسواو لحظة وحدة عشتها فالجحيم ..
طحت الارض .. وبديت نبكي بدون شعور .. نسرين عفاك سحميلي عفاك انا ندمان.. ودفعت الثمن غالي ..
- دفعتي الثمن ؟؟ مكاين حتى واحد دفع الثمن الا انا .. مكاين حد الا انا فهمتي .. نتا راجل وحتى واحد مكايحاسبك على حتى حاجة .. حيت راجل .. اما انا نية وحمقة .. وغلطة الصفر دفعاتني تمن حياتي كاملة نبقى نخلصو ..
- 😭
- بغيتك وكنت صادقة فالمشاعر ديالي .. نتا معارفش احساس تكره اكتر انسان بغيتيه فحياتك .. نتا معارفش شناهو احساس تتجرح وتكون كتبغي شي حد ويبعد عليك ويتخلى عليك ويلوحك فالنار بوحدك ونتا اللي كنتي معلق الدنيا عليه
- عارف 😭 عارف حيت حتى انا بغيت والانسانة اللي بغيت تخلات عليا .. حيت عرفات شنو درت ليك
-😢 .. عليها قلبتي عليا .. وانا اللي كان صحابلي باللي ضميرك فاق .. وحسيتي بالذنب اتجاهي .. وصحابلي مشاعرك مازال مخبيهم ليا
- نسرين عفاك فهميني ..
- مبغيتكش تجي عندي ولا تقلب عليا مرة اخرى اللي كان رابطنا مات ودفنتو .. خلاص باراكة العداب اللي شفت منك عطيتي بالتيساع
- نسرين كنترجاك متمشيش سمعيني عفاك وعاونيني .. نسرييين ...
مشات وخلاتني وانا شايف املي كايضيع .. مسمكنش نستسلم
البارت 19
فقدت الامل .. تلفت .. بقيت كنتمشى فالزنقة .. غا لايح رجليا فالارض .. شحال صعيبة تكون مقيد ومقادر دير والو .. يديك مكبلة .. قلبك معلق بأمل .. ونتا معدك حل اخور .. الولد مات .. شحال كنت اناني معاها .. ضيعت حياتها .. دمرتها وعشت حياتي كأن شيئا لم يكن .. لحتها فالعافية لوحدها والمجتمع عاقبها هي بوحدها من دوني .. اما انا كملت حياتي عادي .. خطأ غايدفعني الثمن غالي وغانبقى هازو طول حياتي .. وصلت حدا لبحر وبقيت جالس .. والهواء كيضرب فوجهي .. يالله نورني ووريني طريقي .. وسهل الامور من عندك .. مشيت لدارنا .. نعست الصباح مشيت نخدم .. دوزت نهاري فالخدمة ... مللي جيت فالعشية شفت فدار حبيبة كان كلشي مسدود .. دخلت لدارها لقيت ماما حاطة يدها على خدها ..
- ولدي شفتي حبيبة ..
- لا .. هي ماباغاش تشوفني 😔
- هي وعائلتها ليوما مشاو من الدار وجات جابليك شي حوايج ..
- 😱 شنو .. فين مشاو .. فين واش مشاو كاع ..
جريت لداك البواط للي جابتلي اقيت فيها كاع الكادوات اللي كنت جبتليها كلهم .، مستحيل واش سالات اللي بيناتنا كله .. لقيت ورقة :
- سلطان .. اتمنى ان تكمل حياتك مع الفتاة التي ظلمتها ..ذلك اقل تعويض تقدمه لها مقابل الاذى الذي اذيتها اياه .. ارجوك لا تظلمها اكثر .. هذه رغبتي ارجوك حققها لي .. لكي لا اشعر بتأنيب الضمير .. ولكي الا اكون طرفا من ظالميها.. اتمنى لك السعادة .. ارجوك انساني .. -😭😭😭😭 علاش احبيبة .. علاش تتخلاي علي.. حتى قلت حياتي تكادات .. وغانعيش اخيرا .. هادا جزاءي .. علاش يوقعلي هاكا .. اه كنعترف دوزت بزاف دالاخطاء فحياتي .. صحيح لعبت بزاف بالمشاعر ديال البنات .. ولكن كنت مستعد ندير عقلي .. الثمن كان غالي بزاف .. الحساب كان تقيل ومقدرتش نتحملو .. البنت اللي بغيتها وتمنيتها تخلات عليا وخلاتني نتعدب .
البارت 20
دوزت فترة كئيبة بزاف .. قلبت على حبيبة فكل بلاصة وملقيتهاش .. اكيد سافرات لبرا المغرب .. حياتي ولات جحيم بعدما كنت عايش سلطان لراسي .. وحتى حاجة مكانت تهمني .. اش داني نبغي شي وحدة ونتعدب هاكا .. ولا لا .. انا كنت غالط نهار كنت كنلعب ببنات الناس.. مشاعر الناس ماشي لعبة .. وبنات الناس ماشي لعبة .. اش داني .. قررت نحقق الرغبة ديال حبيبة ونعوض نسرين على الضرر اللي لحقت بيها .. مشيت عندها للبلاصة المعتادة .. هاد المرة لقيتها جالسة بوحدها ومامقاداش راسها بحال داك المرة .. مشيت جلست حداها .. كانت حاطة يديها على خدها .. غا شافتني حيداتها
- نسرين لاباس
- شنو بغيتي ..
- نسرين جا الوقت اللي تخرجي فيه من هنا .. نتي ماشي ديال هاد البلاصة .. نتي خاصك تبداي حياتك من جديد ..
- بالصح 😏 ايوا كيفاش غادير ليها ..
- ماماك مقهورة عليك .. ومعدبة وهي بعيدة عليك .. انا عارف باللي راكي خايفة من خوك لا يقتلك .. الى مشيتي عندهم ونتي مزوجة مغايقدرو يديرولك حتى حاجة .. انا غانديرلك عرس كبير .. باش نردليك ولو جزء بسيط من اعتبارك .. وغانحاول نعوضك على كاع العداب اللي دوزتي بسبابي ..
شافت فيا بتأمل وكأنها عندها امل شديد فهضرتي وانها تخرج من هاد المستنقع .. كأي غريق باغي اي حاجة يشد فيها .. شديت فيدها وزيرات عليا .. خرجنا من تما .. مشينا لدارنا دخلت لقيت ماما جالسة كالعادة وهازة همي ..
- ماما .. شوفي شكون جبت معايا ..
دخلات نسرين وهي خايفة شديت يدها وهدنتها
شافت فيها ماما ودمعات عينيها ..
ماما : سمحيلي ابنتي .. انا السبب .. لوكنت ربيت ولدي يحترم بنات الناس.. لوكنت تيقتك داك النهار .. مكانش يوقعليك هادشي كله ..
نسرين : 😭 سمحتليك .. الله هو اللي يسامح كل واحد ..
تعانقو .. جميل الانسان يعرف خطأه ويواجهه ميهربش من مواجهته ..
سلطان : حنا غدا غانديرو العقد.. وبعده غادي نتواجهو مع ماماك وتتسامحي معاها ..
نسرين : واخا 😔
البارت 21
مشينا انا ونسرين درنا العقد .. كنت شايف فعينيها الفرحة مصحوبة بالدموع .. مللي كملنا وتزوجنا ديتها لدار امها .. كانت مترددة بزاف انها تمشي خافت ..
- سلطان . خلينا نرجعو مابغيتش نمشي ..
- خاصك تواجهي انسرين .. متخافيش انا راني معاك ..مغانتخلاش عليك
دقينا وفتحات الباب امها .. شافت بنتها وهي تفشل نزلو دموعها .. قربات منها وبدات تبكي .. شداتها وبدات تعنق فيها وتبكي بالجهد .. حتى نشرين بدات تبكي بالجهد وتعنق ماماها وتطلب منها السماح .. شوية خرج خوها بدا يشوف ختو بدا يسب فيها وبغا يضرب جيت انا شديتو ..
- ماشي من حقك تحط يدك عليها حيت هادي دابا راها مرتي ..
- مرتك 😳
- انا ونسرين تزوجنا .. وغادي نديرو العرس ونعرضو على كاع الناس يجيو يحضرو ..
فرحات ماماها وبالبكا زغرتات حتى كلشي طل من السرجم .. وجدنا للعرس درنا حفلة صغيرة فدارها .. الجيران والعائلة حضرو .. لبست حوايج العريس وبرزت .. ولكن قلبي وعقلي مع وحدة اخرى .. اللي من نهار غابت مابانت .. شفت فنسرين .. كانت فرحانة وضاحكة شفت فيها حبيبة .. اللي المفروض فهاد اللحظة هي اللي تكون بلاصة نسرين .. تنهدت وسكتت .. انا اللي درتها فراسي ودابا لابد نتحمل ثمن اخطائي .. داز العرس ومشات معايا نسرين للدار .. دار والديا .. كنت كنتمنى نشريو دار انا وحبيبة ونبداو بيها حياتنا .. مكنتش كنتخيل ان حياتي غاتكون هاكا.. دوزت ايام كنبقى سارح ومكنهضرش .. مع ان نسرين كادير محاولات تهضر الا ان المواضيع بينا دغيا كيتسالاو .. مع اني عمري رفعت صوتي عليها ولا دابزت معاها ولا قلقتها .. الا اني بعيد عليها بزاف .. كنبقا بالساعات كنطل من السرجم كنشوف فبيت حبيبة .. كلي امل انها تفتحو مرة اخرى وتطل منه ويطير الريح شعرها ..بغيتها من القلب .. اكيد اني كنمشي لكل بلاصة جمعاتنا مرة .. خصوصا المكتبة اللي كنشوف فيها صورتها قدامي وضحكتها وهي كتهضرلي على الكتب ..
واحد المهار رجعت من الخدمة بدلت حوايجي وجلست لقيت نسرين باغا تهضر معايا كانت مترددة بزاف ..
- سلطان .. ممكن نطلب منك طلب ..
- اكيد طلبي ..
- انا قنطانة فالدار بزاف .. ومكرهتش نخدم باش نعمر وقتي .،
- واخا .. نقدر نضبر ليك خدمة فالبيرو اللي راني خدام فيه .. منه تفوجي وتستقلي براسك .. نتي تقرري كيف غاتعيشي .. انا مغانفرض عليك حتى حاجة .. واللي حتاجيتيها غانديرها .. هكا نكون كفرت ولو عن القليل من ذنوبي اتجاهك ..
- كنشكرك بزاف ،، نتا تغيرتي اسلطان .. ولا سلطان القلب هو اللي كيهضر منك ،. كتر من سلطان الشاب اللي كان مفلس وسوقه خاوي ..
- ☺️
فعلا ولات نسرين خدامة معايا وكلشي عارف انها مرتي وكلشي كيستغرب من العلاقة ديالنا اللي كانت غريبة بزاف .. ماشي علاقة جوج مزوجين قد ما كانت علاقة جوج صحاب بيناتهم جميل ..كيردوه لبعضياتهم ..
البارت 22
بقات نسرين خدامة حتى ولات كتعتمد على راسها وحتى انا كنعاونها .. حتى جا النهار اللي طلبت مني الحاجة اللي مكنتش متوقع انها تجي من عندها هي .. كنت منغمس فالدار فشي وراق ديال واحد القضية ..
- سلطان
- ممم
- انا بغيت نتطلق ..
- شنو !!!
- جاتك غريبة .. ماشي هادشي اللي كنتي باغي
- 😔
- انا عارفاك ماشي ديالي .. وقلبك راه مع وحدة اخرى .. ومكنتش كنتسنى منك حتى حاجة بالعكس نتا عاونتيني بزاف .. ومديتي ليا يدك .. حتى انا مخاصنيش نكون انانية .. نا خاصك تكون مع البنت اللي كتبغي ..
-😔 البنت اللي كنبغي .. صافي مشات وعمرها مغاترجع ..
- متيأسش .. يمكن ترجع شي نهار .. وخاصها تلقاك كتسناها .. المهم خاصنا نبداو فاجراءات الطلاق ..
- نسرين .. سمحيلي .. وفوقما حتاجيتي شي حاجة .. حنا صحاب وخوت مترديش تطلبيها مني
- واخا كنشكرك بزاف .،
مشينا انا ونسرين وبدينا اجراءات الطلاق .. ماماها معجبهاش الحال ولكن قنعاتها نسرين انها ماشي نهاية الدنيا وانها قادرة تهز راسها من جديد .. رجعت للصفر بعد الطلاق ووليت رجل مطلق .. احساس خايب بزاف .. الراجل كيحس راسو بحال الا محيد عليه غطاه .. كنحس راسي غادي بين الناس عريان .. كل ما درت فحياتي دوزتو امتحان .. وتهلمت منه بزاف .. درت عقلي ووليت غادي وحاني الراس مكنشوف فحتى وحدة .. كنحترم الجميع ومكنعلي عيني فحتى وحدة ..
البارت 23 الاخير
بقيت عايش فالملكوت .. كنفكر غا فحبببة .، حبي ليها رغم البعد كيتزاد يوم عن يوم .. من الخدمة للدار .. واحد النهار كنت فالخدمة حاط يدي على خدي كالعادة جات عندي نسرين ..
- سلطان ..
- مم ..
- مممم ( كتقلدني )
- 😄 اشنو
- شحال هادي مقريتي شي كتاب .. شنو رأيك نمشيو للمكتبة ..
غا قالت المكتبة وانا نتفكر حبيبة .. اكيد انا غانمشي .. حيت هي الذكرى اللي بقاتلي منها
- واخا نمشيو .،
..مشينا انا ونسرين دخلنا وختارينا شنو نقراو .، بقينا جالسين شوية وهي تنوض ..
- افين واش صافي سخيتي ومليتي
- ههه هانا هنا نمشي نجيب شي حاجة نشربوها ..
- جلسي نمشي نجيبليك اللي بغيتيه
- لا لا انا باغا نتحرك شوية غا خليني على خاطري
- واخا متعطليش ..
مشاو وانا انغمست فالقراية حتى جلست حدايا تلفت عندها
- متعطلتيش 😳😳😳 حبيبة !!!!
- اه حبيبة .. سلطان لاباس عليك
- اب اب ان .. انا ممتيقش راسي .. حبيبة .، واش هادي نتي ولا غا كنحلم .. انا خاصني نفيق
- لا هادي حقيقة .. انا حداك
- 😭 علاش مشيتي وخليتيني .. واش مبقيتش فيك خليتيني كل هاد المدة فعداب ..
- انا مخليتكش .. انا كنت ديما حداك .. وكنراقبك..وتأكدت باللي حبي ليك مكانش غلطة .. حيت شفت قدامي انسان خدم وتصرف بضمير ..
- كنبغيك احبيبة .. كنبغيك بزاف .، انا تعلمت من اخطائي بزاف .. تعلمت
- حتى انا كنبغيك .. شوف مسح عليا دوك الدموع واش انا نبقى نتسنى فيك حياتي كاملة باش تتزوجني .. زيد قدامي عند لعدول ..
- حالا ..
بقينا كنضحكو نضنا لقيت نسرين واقفة فالباب كتشوف فينا وكتضحك وكتتأمل ..
- نسرين .. واش كنتي عارفة ..
- اه .. وتلاقيتها قبل وعرفت باللي كتبغيك بزاف .. انا فرحانة ليك بيها .. تستاهل وحدة بحالها بعدما تبدلتي ..
- يعني دابا نتي جبتيني للمكتبة بالعاني باش نتلاقاها
-اه ..
- كنشكرك بزاف .. عمري ننساليك هادشي ..
وصل نهار العرس كنت ناشط وفرحان بزاف واخيرا حياتي تكادات .. بالمناسبة نسرين تعرفات على واحد السيد من عائلة حبيبة محترم وقاري غايتزوجو قريب .. العرس كان اسطوري .. طلعنا انا وحبيبتي فوق العمارية وتصورنا .. بقيت كنشوف فيها متيقتش عينيا .. بغينا نقوليها فودنها شي حاجة معرفت مانقول : شديتو شي غرامة ؟ شافت فيا تصدمات .. احم احم غا ضاحك .. لبست جلابة كنت كنبان بوكوص .. شوية وانا نشوف قدامي اربعة دالبنات لابسين بحال بحال وكيخنزرو فيا .. فايتلي شفتهم شكون هادو .. اويييلي هادو كنت مواعدهم بالزواج فالتسعينات .. علق اسلطان باش متحصلش .. طلعت جلابتي وهزيت بلغتي فيدي وبديت نجري وحبيبة كتجري مورايا .. واعلق علق .. وردة العيساتي النهاية