البارت 1
كانت مرا ديال الزمان.. وكانت جميلة بزاف .. بغاها راجل بسيط وعاش معاها لفترة.. فيوم من الايام حملات منه .. مللي وصل وقت الولادة.. ولدات بنيتة زوينة.. ولكن للاسف هي ماتت.. حزن عليها الراجل بزاف.واتجأ للسكر..باش ينسى... ومكانش كيحمل ديك البنت.. اسمها عايدة.. بعد مدة تزوج الراجل بمرا اخرى.. وعاشت عايدة بين مرات باها وابوها اللي مكانش كيحمل فيها الشعرة.. حيت فنظره هي السبب فموت حب حياته.. اه تزوج وبدا حياة جديدة.. عايدة كانت كتعاني الامرين مع زوجة الاب من جهة ومع الاب من جهة اخرى.. كانت كتظل تبكي .. وكتكره هاد الحياة اللي جات ليها.. هي كانت كتسكن فحي شعبي .. وكان عندها جار اكبر منها شوية .. كبرات معاه وكانت كتشكي ليه كل مشاكلها.. اسمه اسماعيل ... هو متعلق بها بزاف.. وكان كايدير اي حاجة باش يرضيها .. هو كان مخزن اسرارها وشكواها ..من كل ماكاديرو فيها زوجة ابيها.. كانت كتنعسها فالكوزينة وبلا ماكلة في حين ولادها كتهلا فيهم.. ويلا هضرات كتضربها وكتحرش عليها باها باش يضربها.. كانت عايشة فجحيم.. كبرات عايدة .. وصلات 15 عام .. وزيانت وكل من كان فالدرب كانت تعجبو .. حيت كانت زوينة بزاف وكلشي كايقول انها كانت نسخة طبق الاصل عن امها.. حتى فاجأوها واحد النهار بقرار كان صعب عليها بزاف .. الزواج.. وبمن.. براجل عنده 45 عام .. هي كانت صغيرة بزاف.. وماقدراتش تستوعب انها ممكن تتزوج راجل اكبر عليها ب 30 عام .. كانت صدمة كبيرة.. والاكتر من ذلك ان الراجل تقريبا جارهم ومابعيدش .. وخدام عساس فشي مستودع.. ومعروف عليه الشراب والقمار.. وعايش مع مو.. اللي هي مرا شارفة ومعروف عليها السم فالدرب.. هادا انتحار.. مقدراتش تستوعب ان هادشي كلشي فحياتها.. فكرات فالهرب.. ولكن فين تمشي .. اسماعيل حاول وصيفط امه تهضر معاهم ..
الام: الله يهديك السي مرزوق.. بنتك راها مازال صغيرة بزاف.. واش غاتلوحها..
زوجة الاب: حنا كنستروها ماشي كنلوحوها .. راها ولات شابة وكلشي طامع فيها .. نستروها قبل ماتجيب لينا شي فضيحة..
الاب: انا اللي عارف مصلاحتها.. ومرتي عندها الحق..
الام: ايوا انا كنطلب منك يد بنتك لولدي اسماعيل.. هو باغيها ومازال صغير .. وغايتفاهمو ..
الاب: اسماعيل ولدك البرهوش اللي مازال باه كيعطيه الفلوس.. نزوجو لبنتي.. ديك الساعة غانكون كنلوحها بالمعقول.. انا باغيها لراجل بعقله وخدام وبدارو .. اللي غايحميها وغايتهلا فيها .. ماشي سوقك فينا الالة.. ومدخليش فينا .. اللي بغيتو انا هو اللي غايكون..
فعلا اللي قالها باها هي اللي كانت.. منعها من الخروج.. وزوجها بزاز عليها بداك الراجل اللي كان فرحان بزاف حيت تزوج بملكة جمال الحومة.. خداها وهي ركابيها كيرجفو.. صغيرة وماعارفا والو فالدنيا.. غادية ومرت باها وعجوزتها الشارفة كيزغرتولها.. اما هي بحال الى غادية للموت.. وفعلا هادا هو الموت .. حيت من داك النهار عايدة القديمة ماتت وحيات من بعدها عايدة جديدة .. وحدها قلبها حجر ومكتحن فحتى واحد .. كارهة كلشي وكارهة الدنيا.. وحدة حقيرة .. كيهمها الاستغلال.. ومكتعطف حتى على واحد.. هادي كانت بداية عايدة الحقيرة...
البارت 2
فاقت عايدة الصباح ..جلست على ناموسيتها.. عينيها منفوخين والكحل اللي دارت ليها مرت باها سال ليها من عينيها .. وسنانها مزيرة عليهم بقوة الغضب اللي فيها.. تلفتات شافتها فزوجها .. الراجل اللي تمكن منها البارح.. بدون شفقة.. وبدون مايراعي صغر سنها وقلة تجربتها.. شافت فيه مليا... وهو ناعس وكيشخر وماسايق للدنيا خبار.. شافت دم على ناموسيتها .. ورجعات شافت فيه من جديد ولكن هاد المرة دمعات عينها .. وزادت زيرات على سنانها.. مكرهاتش ديك الساعة .. تنوض تقتلو .. وتنتاقم منه.. هادا اللي اغتصب طفولتها.. ولكن مكانش بيدها حيلة.. قتل فيها كلشي.. هاد الليلة بالذات مات فيها كلشي.. قررات انها تتبدل.. وتستعمل طريقة اخرى للتعامل مع الكل.. ناضت وتقابلات مع المراية.. شافت فراسها مزيان..:
انا عايدة.. اللي قتلوها من نهار تزادت.. كل مرة كيقتلو فيها شوية .. صغيرة ولكن .. ماتت بكري... زوجوها بواحد كبير عليها بزاف.. انا اللي تزاديت ولقيت كلشي كينتقم مني.. وانا ماعارفاش علاش.. شنو ذنبي.. شنو درت حتى يوقع ليا هادشي كله.. ولكن من هاد النهار ومن اليوما .. كلشي غايتبدل.. وغاننتاقم من اي واحد دار فيا شي حاجة خايبة.. غاننتاقم من كلشي ..
فاق راجل عايدة .. وخرجات معاه لعند مو اللي كانت موجدة ليهم لفطور .وبدات تزغرت... عايدة سكتات وبقات غير كتشوف .. تأليف دودي
عزيز: صباح الخير امي..
الشارفة: صباح الخير اوليدي.. صباح الخير ابنتي عايدة.. غير رتاحي ليك هاد النهار.. حيت راكي عروسة.. من هنا الفوق غاتبقاي تعاونيني وتتهلاي فراجلك.. كوني مرا ونساي اللعب ديال البنات الصغار.. واخا راكي صغيرة ولكن دابا وليتي مرا وعندك مسؤولية..
بقيت غير كنشوف فيها ..
عزيز: هه هه .. وانا تزوجتها صغيرة غير باش نربيها على يدي .. هه هه
نشوفو شكون غايربي لاخور.. غا صبرو عليا...
بقاو كيهضرو مع بعضياتهم وكيضحكو .. هضرتهم باااسلة.. وحامضة.. مازال كيهضرو حتى سمعنا الدقان فالباب.. ناض عزيز يفتح لقا ديك مرت با المسمومة جات تصبح على حساب هضرتها.. يا ربي يصبح عليها عزرائيل.. انا عارفاها انها جاية تشمت فيا وتشوفني كيدايرا بعدما دخل عليها هاد الزفت..
زوجة الاب: كيدايرا اعايدة.. شوفي تهلاي فراجلك هو اللي غايدوم ليك ..
بقيت كنشوف فيها ومهضرتش مكرهتش نطير عليها بشي نتفة ونقتلها.. ولكن كنت حاسة راسي مقيدة.. وماقادة ندير والو.. ماعليش كلشي مجموع..
داز داك النهار .. وختاريت نسايس هاد الويل اللي ماعندي منه هروب.. بقيت كنتفشش عليه وكندلعو باش يعطيني بالتيساع وميحاسبنيش.. وباش يكبح تجبر مو وتسلطها عليا .. السيدة جايباني خدامة ليها وانا مافخباريش.. النهار اللي كيخدم بالنهار كنبقا نفقصها ونتفرج فالتلفزة ونطلق الموسيقى ونشطح بعض المرات.. وهي النهار كامل وهي تعاير وانا فاقصاها بالعاني.. مللي كايقرب يجي الراجل كانلبس الطابلية دالشقا وكنبدا نسيق .. غير كيدخل كنبقا نتبوحط عليه ونشكي ونقوليه راها مفقصاني وقاتلاني بالشقا واش جبتيني باش نكون ليك مرا وحبيبة ولا باش نكون خدامة .. ومع السيد ميت فيا مكيقدرش يشوفني كنبكي .. كيرجع الظلم فمو.. وهي كتبقا مفقوصة.. كندير راسي بحال الى عيانة وقاتلاني بالشقا ونبقا الليل كامل وانا كنتفشش والسيد فالخدمة ديالي وعند رجلي بحال الكلب.. عمري غانحن فيهم ولا فشي واحد اخور اه تبدلت وبزاااف .. وليت وحدة اخرى معندها قلب..معارفة فالدنيا غير تذل وتعدب لاخور.. فاقد الشيء لا يعطيه .. وانا ماشفت فحياتي غير الذل .. والمهانة.. قصص دودي..
البارت 3
مكنحملوش ملي كيقرب عندي.. كنحس راسي بحال الى كتقيسني شي جيفة.. ديما فيه ريحة الشراب وريحة الكارو.. هادا زواج ولا انتحار .. هادشي اللي كنقولو مللي كنفيق كل صباح وكنلقاه حدايا.. مكنكرهش نقتلو..والاكيد انني اختاريت منولدش مع هاد الزمر.. دازت عامين وانا مزوجة بيه .. وانا خارجينلي الجرون معاه .. ديك البريئة اللي تزوجها النهار اللول مبقاتش هي.. وليت كنتحكم فيه كما بغيت ومو مفقوصة من جيهتي... مال هاد الشارفة باغا تتحكم فيا .. ولات تطلب معايا الشرع وتدعي ليل ونهار.. مكنتيش تبانيلنا هاكا النهار للول.. هادي هي الجملة اللي كتضل تعاودها.. واللي مفقصني منها انها تضل تهضر على الولاد.. انا ماباغا ولاد.. وحتى واحد معارف اني كنشرب كنينة.. حتى ولا عديز كل مرة يطلب مني نمشيو لعند الطبيب.. كنت كنتحجج بأي حاجة .. مستحيل نولد.. مبغيتش نولد شي حاجة اللي نعدبها فالدنيا كما تعدبت انا.. انا ماشي ام مثالية وهو ماشي اب مثالي.. واش كاين شي حد كيولد مع هاد العائلة.. شنو ذنبه.. كبرت زيانيت اكتر حتى ولاو رجال الدرب كلهم كيحماقو علي.. انا غادية بيناتهم بحال العصفورة.. كلشي باغي وكيستنى غير ضحكة مني.. وانا مطلعة راسي الفوق وشايفة راسي.. الاكيد ان فالداخل ديالي واحد الغضب عميق اتجاه كل هاد الناس ومحاملة حتى واحد .. يمكن كنحملهم مسؤولية انهم خلاوني نتعذب قدامهم ومتحركوش .. وكاين اللي تشفى فيا منهم.. وحدها الام ديال اسماعيل هي اللي كنتعامل معاها برفق .. حاسباها بحال الام ديالي .. هي اللي كتحن فيا.. حتى اسماعيل مقطعتش علاقتي به.. ولكن علاقتنا بعد زواجي ولات اخوية اكتر.. واخا انا متأكدة باللي هو مازال ضعيف اتجاهي بحال النهار اللول او اكتر.. اما عائلتي فانا قطعت علاقتي بيهم من نهار وقعو عقد زواجي .. حتا انا مكنهمهومش ومكلفوش راسهم يسولو فيا شي نهار واخا ديما كيسمعو الصداع عندي فالدار.. دازو سنوات وانا عايشة هاكا .. حتى ولات عندي 20 سنة.. عزيز تبدل ولا كيشرب اكتر.. ولا كيقمر وكيقصر مع صحابو وانا هملتو وحتى هو هملني.. حيت مل الصراعات الدائمة بيني وبين مو واللي ولات علانية .. وقدامو.. وحتى انا مابقاش كيهمني.. انا جالسة معاه غير حيت مالقيت فين نمشي.. غا الزنقة هي اللي قدامي .. الاب ديال اسماعيل مستحيل يقبل نمشي نسكن معاهم وانا مطلقة.. هادشي اللي سمعتو قال واحد النهار وانا غضبانة عندهم من راجلي.. عزيز كلما غضبت كيجري يرغب نرجع لدارو.. ماشي حيت كيبغيني .. حيت معندوش بديل.. دابا كبر ولات عندو 50 عام.. فين غايلقا وحدة صغيرة وزوينة بحالي..وشكون غاتقبل تعيش مع واحد بحالو اصلا...
عايدة: شنو كادير..
اسماعيل: عايدة .. دخلي ..
عايدة: انا قنطانة بزاف مكرهتش نخرج من هاد الحومة دالزبل ..
اسماعيل: فين تخرجي .. وفين تمشي..
عايدة: منعرف .. خرجني نتا.. ديني معاك لخدمتك..
اسماعيل: تسطيتي.. باغا تمشي لديسكو..
عايدة: اه وشنو فيها .. نجلس بعقلي.. ونستناك حتى تكمل خدمتك ونجيو مرة.. واصلا انا غانجلس قدامك.. ياك نتا سرباي .. وغاتحضيني .. منه نفوج شوية.. شنو رأيك..
اسماعيل: شوفي اعايدة.. ديك البلاصة راه كايمشيو ليها غير الناس اللي فوق فوق كلاس... يعني اللي لاباس عليهم بزاااااف فهاد البلاد.. كيفاش غانقدر ندخلك وكيفاش غاتخلسي تما الجلسة.. صعيب بزاف تمشي..
عايدة: اوووف.. عمري طلبت شي حاجة فهاد الدنيا وتحققاتلي.. ديما الزهر معايا معكس...
نضت خرجت من عندو وانا كنتنفخ وماحاملاش راسي.. اش هاد القنط والغمة.. غانطرطق من هاد الدنيا.. الى بقيت هاكا غانمشي نقتل راسي ونتهنى..
البارت 4
مشيت بقيت فالدار وديك الشارفة غير كتهضر معرفتها اش كتقول كاع.. محملتش راسي.. مشيت ديريكت لبيتي ونعست.. جا الراجل اللي مايتسمى وبقا كيفيق ويطلب مني نوض نصاوب ليه ما يتعشى حيت عيا..
-نوضي .. راه فيا الجوع فيقي..
- بعد مني .. واش صحابليك جبتيني باش نكون خدامة عندك..
- وعلاش جبتك باش تعمري عليا الدار.. العيالات ماشي هاكا كيكونو.. المرا خاص تتهلا فراجلها..
- كيفاش اشناهو.. سير بعد مني .. انا متخلاقيت لا نكون عبدة عندك ولا عند موك.. سير عندها ديرلك ماتاكل.. وايلا معطيتيني التيساع.. غنطج من هاد الدار ومتلقا ليا طريق..
- صافي هانا غادي .. كلما هضرنا معاك كتهديني بالطجان من الدار... غا هني راسك ورتاحي.. انا اللي درتها لراسي وتبعت هوايا وبغيت الزين.. مكنتش عارف انك غاتكوني هاكا..
داز داك النهار وانا محاملاش راسي.. مشيت عند ام اسماعيل باش نبقا معاها شوية .. ومهضرتش.. بقات كتحاول تفوج عليا حتا جا اسماعيل شافني بديك الحالة.. عيط عليا باش يهضر معايا ..
- عايدة .. قوليلي كيفاش حتى غاتقدرلي تخرجي.. وشنو غاتقولي لراجلك..
- يعني موافق تخرجني؟؟
- اه انا سولت الباطرون ديالي قالي ماشي مشكل بشرط تجلسي بعقلك وبلا مشاكل..
- ياااااي انا فرحانة بزاف متخممش.. غدا عزيز خدام بالليل ومكايجيش كاع ومكيصونيش..والشارفة مو كتنعس مور لعشا .. ومكتعقل على الدنيا.. انا غانمشي معاك.. وحتى واحد مغايسيقلي لخبار..
- متافقين غدا وجدي راسك .. انا غانجي موراك مع 10 واخا؟
- غاتلقاني واااجدة هههه انا فرحانة بزاف ..
مشيت كنقز وفرحانة .. مو بقات غي كتعجب فيا كيفاش حتى تبدلت فجأة عاد كنت مغوبشة..
تأليف دودي...بقيت كنفكر شنو نلبس جبدت كل ما عندي .. الماريو كامل حطيتو على ناموسية نلبس هادي لا هادي .. اكتشفت انه ما عندي ما نلبس.. مللي جا عزيز بقيت كنتفشش عليه باش يعطيني لفلوس نمشي نشري لحوايج.. استغرب حتى هو من التغيير ديالي حيت شحال هادا ما تفششت عليه بحال هاكا.. ضعاف قدامي حتى حطلي لفلوس مشيت شريت كسوة جديدة.. وشريت صباط طالون.. فرحت بزاف بداكشي اللي شريت.. الغد ليه نضت بكري مشيت للحمام تهليت فراسي مزيان.. منو دزت للكوافورة.. صاوباتلي شعري وقطعاتولي.. مشيت للدار بقا عزيز حال فيا فمو.. حماق عليا..
- ناري يالعفريتة راكي زوينة بزاف.. اشهادشي واش موجدة ليا شي مفاجأة ولا..
- اه.. موجدة ليك مفاجأة.. كيجيتك كنهبل ياك..
- خرجتيلي عقلي.. كنبغيك الكتكوتة ديالي.. انا مغانمشيش ليوما للخدمة.. غانبقا معاك .. سطيتيني..
- 😳 شناهوا.. لا سير لخدمتك انا ديالك ديما... الخدمة الا مامشيتيش غايجريو عليك.. شكون ديك الساعة غايخدم علينا.. غير سير وانا غدا غانتهلا فيك..
- واخا العصفورة ديالي.. اللي بغيتيها..
اووف كنت غانحصل فهادا.. بنادم شحال لصقة خاصو غا السبة
البارت 5
وصل الليل لبست الكسوة اللي شريتها ولبست داك الطالون.. بحال الى غادية للعرس.. ودرت ماكياج.. كنت غانحماق على راسي.. غانخرج من هاد العالم دالزبل واخا غي شوية.. خرجت بالحس باش ماتفيقش ديك الحيزبون ديال عجوزتي.. سديت الباب خرجت لقيت اسماعيل كيستناني بالموطور.. ركبت معاه ومشينا وصلنا .. داك البلاصة كانت فشكل .. انا حليت فمي على وسعه.. مللي شفت هاد البلاصة هادي.. وفرحت بزاف.. برا كانو بزاف ديال الطوموبيلات غا الحديد الواعر.. شدني اسماعيل من يدي ودخل بيا من الباب لورانيا..
- علاش حنا مادخلناش من تما..
- حيت بلاصة الخدامة ها هي ..
دخلنا حتى واحد البيت طلب مني اسماعيل نستناه حتى يبدل حوايجو.. بقيت جالسة حتى خرجلي واحد القرع معرفتو منين خرج.. بقا كيضحك ويشوف فيا .. ماديتهاش فيه.. جا عندي اسماعيل سلم على هاداك.. وخرجنا للداك ديسكو.. كان مختلف تماما على داكشي اللي تخيلتو.. كانت الموسيقى مجهدة .. وكلشي فوق كلاس كما قال اسماعيل حتى من الارض زوينة ونقية بحال الجاج.. وبنادم اللي تما كلشي نقي كتحس بحال الى كنتفرج فالقناة التركية.. حسيت راسي كنحلم وانا وسط هاد الناس ولا كنشوف فيهم.. طلب مني اسماعيل نجلس ومنتحركش من بلاصتي .. وافقت على الفور..كيفاش نقدر نتحرك وانا خايفة .. اكتفيت نتفرج على هاد الناس.. شي كيشطح شي ناشط شي مجمع وكيضحك.. بقيت جالسة وحالة فمي فهاد الناس.. شوية جات عندي واحد البنت..
- السلام..
- وعليكم السلام..
خلعاتني هادي كانت واحد البنت طويلة وزوييينة وشعرها زعر يمكن صابغاه.. انا تزعت فيها مللي شفتها .. ولكن لباسها كان معري بزاف.. - انا سميتي اليف.. ونتي..
فكرت قبل مانجاوب اكيد مغانقولش ليها سميتي عايدة.. غادي نتشوه.. فكرت فشي سمية ديال هادوك اللي كنتفرج فالمسلسلات التركية..
- احم.. انا سميتي ملاك..
- تشرفت بيك املاك.. واش نتي اول مرة تجي لهاد البلاصة.. حيت عمري شفتك هنا..
- اول مرة لهاد الديسكو.. انا كنت فباريس عاد جيت البارح.. عليها معمرك شفتيني.. (طلقت السلوكية)
- باريس ههه .. وفين كتكوني فباريس.. انا كنمشيليها بزاف..
تما حماريت اويلي انا مكنعرف حتى بلاصة فباريس كنسمع غا السمية .. من حفظ الله جا واحد وقطع لينا الهضرة..
- هيه اليف اشكاديري هنا وشكون هاد البنت..
- هادي ملاك..
- السلام ملاك سافا..
مد ليا يديه وسلم عليا حرك يدي بالايجاب بمعنى سافا.. كملات معايا الهضرة اليف وهي تقول ..
- زيد كملي .. انا باغا نتعارف عليك حيت كلشي اللي كاينين هنا معروفين ولاد من وبنات من.. اكيد حتى نتي عائلتك معروفة..
الله ياربي اش غانقول لهادي.. مكان بيدي الا اني نطلق السلوكية من جديد..
البارت 6
- انا بابا صاحب شركة استيراد وتصدير .. اسمه عدنان العالي..
- عمري ماسمعت بهاد السمية.. وشنو كيستورد وشنو كيصدر..
- الفواكه.. كيصدر الفواكه وكيستوردهم..
- ممم يعني عندكم فيرمات..
-اه اه .. عندنا بزاف دالفيرمات..
- باينة.. حيت فالصراحة باينة فيك عروبية هههه ..
ضحكات هي وداك خينة اللي معاها وانا ماحملتش راسي ديك الساعة.. عندها الحق لا علاقة بين هاد الحوايج اللي شريت وهادوك اللي لابسة هي .. ولا هادوك اللي لابسين كلشي هنا.. وبين هاد الشرواط اللي لابسة انا.. محملتش راسي .. كتمت الغيظ ديالي.. شوية لقيتها كتعيط على اصحابها كلشي وكتهضر عليا وكلشي كيشوف فيا فخطرة وحدة.. ديك الساعة نضت وخرجت بقيت كنجري وكنبكي .. حتى عييت بالجرا .. وانا نلقا شي حد كيهضر مورايا..
- متعصبيش راسك.. هاديك هاكا دايرة.. كيعجبها تحط كلشي محط سخرية..
- 😭 معرفتش شنو كاتستافد.. اهئ اهئ..
- عفاك متبكيش .. اجي معايا..
- 😢 شكون نتا..
- انا سميتي يحيى.. ونتي..
- امم ملاك اسمي ملاك..
- متشرفين املاك.. يالله نرجعو ومتخليش لوخرا تغلبك .. خاصك تكوني قوية وتواجهي اي شخص ماشي تهربي..
رجعت معاه للديسكو بعدما مسحت دموعي.. عندو الحق خاصني نواجه.. باراكة غير ماداز معايا فعائلتي .. دخلنا لقيت اسماعيل غايحماق رتاح مللي شافني ولكن مقدرش يجي مللي لقاني مع يحيى.. مشيت جلست معاه واليف غير شافتني معاه وهي تشوكا.. جات ديريكت عندي..
- يحيى.. شفتك دغيا درتي صديقة جديدة..
- وي علاش لا.. هي ظريفة بزاف.. وكتعرفيني صداقاتي كنبنيها على الجوهر ماشي على المظهر.. ماشي المهم عندي بنت من .. المهم انها ملاك..
تزنكات بديك الهضرة ولكن دغيا رجعات دارت ديك الهضرة الزائفة ديالها من جديد..
- علاش لا .. انا اللي تعرفت عليها اللول واقترحت عليها تنظم للكليكة ديالنا.. ياك املاك..
شفت فيها واختاريت نبان حتى انا قوية وابتسمت.. طبعا معنديش مانع ننضم ليها..
كملو السهرة بعدما نشطو مزيان ويحيى جالس حدايا وكيهضر وكيعرفني بنفسو .. سميتو يحيى واللي فهمت هو ولد شي حد لاباس عليه ومعروف وكلشي دايرلينلو الخاطر فلجروب حيت هو اللي كيخلص عليهم السهرات.. وحيت هو ولد شي واحد من اكبر الاغنياء .. والبنات كيتزعطو فيه دغيا حيت زوين ومأدب.. ولاباااس عليه.. هادا هو المهم.. لاباس عليه... انا شخصيا حمقني.. هو طويل ولحيته خفيفة وشعرو كحل وفنيييون ولابس زوين .. بوكوص بزاف ودغيا كيدخل للقلب.. ناضو باش يمشيو ..
- ملاك قوليلي فين ساكنة باش نوصلك..
- لا بلاش.. انا غانمشي مع شيفور راه كيستناني..
- واخا قوليلو يمشي ونتي ركبي معايا .. باش نهضرو فالطريق الصراحة مازال ماسخيت بيك..
- مايمكنش .. بابا صعيب بزاف ومغيقبلش نركب مع واحد غريب.. انا اصلا كدبت عليه وقلتله غانمشي لحفلة ديال صاحبتي..
- باينة باللي عائلتك صعاب عليها خباو علينا هاد البلورة طول هاد المدة..
- انا غانوض نصاوب الميكياج انا راجعة..
- تفضلي..
نضت وتلاقيت اسماعيل..
- من قبيلة وانا كنستناك تنوضي.. تعطلتي بزاف..
- هانا راه تفكيت غير بزاز منهم..
- صافي خلينا نمشيو..
خرجنا سالتين حتى ركبنا فالموطور ديال اسماعيل ومشينا هاكاوا على الشيفور.. انطلقنا وبالسلت دخلت لداري مع داك الملعوق .. ناري رجعت عاود تاني لهاد الحبس .. الله بعدا ننعس كنفكر فيحيى على الاقل هو احلى حاجة وقعاتلي فالدنيا..
البارت 7
صبحات عليا عجوزتي كتفيق فيا بكري ..
- خليني ننعس يا هاد الهارفة مالك معندك سوق فالدنيا غيري انا ..
- نوضي ياهاد البلية اللي بلاني بيها الله .. نوضي راه دابا يجي راجلك ونتي مازال ناعسة..
- واش تي سوقك.. ونتي مالك ياك هو اللي راجلي ماشي نتي.. قسما بالله وماعطيتيني التيساع حتى نوض نخشي فيك شي موس ونتهنى منك..
شفتها سكتات خافت على راسها وهي عارفة باللي معندي حتى شي واحد عزيز فهاد الدنيا ومعندي مانخسر ونقدر نديرها..حسن لي نفكر فيحيى باش ننسى هاد لاعصاب اللي كديرلي هاد الشارفة.. نعست شوية وهو يفيقني داك بوكرش اللي راني مزوجة بيه..
- نوضي احبيبة هانا رجعت ليك وانا مشتاقة .. استنيت الصبح على احر من الجمر.. باش نعرف المفاجأة اللي وجدتي ليا..
-صباحة لله.. اينا مفاجأة واش كتحلم..
- كيفاش واش كنحلم.. وداك التسكسيفة ديال البارح .. قلتيلي راكي موجدة ليا مفاجئة..
- واش نتا مخبول فراسك .. سير عطيني بالتيساع وجمع عليا ديك الحرباية ديال موك.. واش باغين تقتلوني قبل لوقت.. خليوني ننعس اعباد الله...
- صافي صافي متغوتيش .. هانا خليتك.. نعسي وشبعي نعاس..
كملت نعاسي.. مللي نضت ... بقيت كنفكر كيفاش حتى هاديك ضحكات عليا .. يعني خاصني نشري حوايج غاليين بحالها.. باش نبان حتى انا زوينة.. ومنعطيعاش فرصة تضحك عليا.. الفلوس هما المشكل .. لقيت حدايا داك الصكع ناعس وكيشخر.. هادا هو املي الوحيد.. بقيت كنفيقو وكنتحلون من جديد مللي فاق:
- حبي .. ياك قلتلك وجدلك مفاجأة.. نوض احياتي ..
- فين نوض ياك قلتيلي نعطيك التيساع تنعسي..
- واكنت باغا نرتاح باش نوجد راسي للمفاجأة.. ونوض..
- واخا احبيبة هانا .. وريلي المفاجأة..
- قبل مانوريك .. عندي واحد الطلب..
- قولي احبيبة.. انا كنستنى المفاجأة..
- بغيت الفلوس.. بغيت نمشي نلسوق..
- واخا نعطيك 200 درهم ..
- اشمن 200 درهم .. انا بغيت كتر بغيت 1000
- اشناهو.. فين غانلقاها واش غاديري بيها..
- البنات كاع كيعطيوهم رجالهم هاد المبلغ.. وانا عزيتيه فيا .. ايلا هكاك نسا المفاجأة.. بديت نتبوحط..
- خليك من لفلوس دابا .. ونوضي وريلي المفاجأة..
فكرت هادا كغايطلق من الفلوس الا بشق الانفس نضت طلقت الموسيقى وبقيت كنشطح سيد عجبو الحال.. مشيت جلست فحجرو.: ايوا اعزوزي شنو قلتي فالفلوس..
- غانعطيك اللي بغيتي ها لعار كملي الشطيح..
- عطيني للول .. ديك الساعة نوض نكمل..
ناض بسرعة جبد الفلوس وعطاهملي.. ديك الساعة عاد كملت الشطيح سخفتو مزياان..
واخيرا الفلوس فيدي .. غانمشي نشري اللي بغيت..
مشيت ختاريت هاد المرة نشري لحوايج من البوتيكات الكبار.. اللي كيشريو منهم اللي لاباس عليهم.. اتفاجأة من الثمن ارخص حاجة كتسوا 1300 درهم.. اويلي وانا اللي كنت ناوية نخبع منهم.. صدقت هادو ومغايقدونيش ...
البارت 8
معرفتش اش غاندير وشكون غايعاوني .. جيت للدار وانا غضبانة من راسيء.. واخيرا جات فبالي سحر.. هادي وحدة كانت ساكنة فالدرب.. خرجات منو .. بقات مدة حتى جات طلات علينا كانت مبدلة بزاااف .. ترفحات.. داك العام كلشي كان كيهضر عليها وكيقول راها خدمات فالدعارة .. شي كيمسخها شي كيعاير فظهرها .. انا غانمشي عندها .. حيت كانت عطاتني عنوانها.. خاصني نمشي باش نتسلق منها الحوايج وتصاوبلي الماكياج.. شديت عندها الطريق دغيا .. كانت ساكنة فواحد البرطمة..
- مرحبا بيك اصحبتي.. فين غبورك..
- غير هنا احبيبة قوليلي .. بغيتك تعاونيني..
- نعاون ختي علاش لا .. غير قوليلي فاش..
عاودت ليها المشكل كله.. واعداتني توقف معايا.. مشات حلاتلي الماريو ديالها طلبات مني ناخد اللي بغيت.. عندها داكشي زوين .. اختاريت لبسة زوينة .. ديك الساعة مشيت للدار.. وطلبات مني ندوز عليها قبل مانمشي للديسكو تصاوبلي شعري والماكياج.. وقالتلي غاتطلب من واحد السيد معرفة ديالها يوصلني على اساس شيفور ديالي .. وغيجي مورايا.. علماتني هاد المرة داكشي اللي غانقولو كله.. مشيت لعند اسماعيل طلبت منه يوصلني عندها بالليل وهي غاتوصلني للديسكو.. فاللول مبغاش وقالي نتي كتلعبي بالنار .. فين باغا توصلي بهادشي اللي كاديري فيه.. سكتو وقلتله متدخلش .. هادي حياتي وندير فيها مابغيت.. سكت ووافق.. بالليل مللي مشا راجلي لخدمته ..وبعدما نعسات ديك حشورة.. خرجت ومشيت لعند اسماعيل وصلني لعند سحر.. لقيت معاها واحد الراجل سلمت عليه ودخلت لبيتها.. لبستني احلى لبسة عندها .. وصاوبتلي شعري.. ودارتلي مايك اب.. رجعاتني زوينة بزاف.. دابا غاتحلا اللعبة.. مشيت مع هاداك وصلني نزلت من الباب وانا رافعة راسي.. دخلت قلبت عليهم.. لقيتهم مجموعين كالعادة... مشيت عندهم .. يحيى كان ساهي غير شافني ناض بسرعة جا عندي وعنقني.. هادو عندهم العناق عادي..
- توحشتك .. كنت خايف لا منوليش نشوفك مرة اخرى..
- حتى انا ..
- علاش مشيتي البارح بلا متقوليها ليا..
- انا اسفة بزاف.. ولكن بابا صونا عليا وانا خفت .. اضطريت نمشي دغيا..
- عليها.. انا كنت عارف غي سميتك.. ومكانت عندي لا نمرة ديالك لا والو باش نسول فيك..
- كنتاسف ليك مرة اخرى..
- واخا الالة هاد المرة مغانطلق منك حتى ناخد نمرتك وعنوانك وكلشي..
- واخا..
سلمت على كلشي .. وكلشي مكانش حاملني .. جلست معاهم وسي يحيى جالس معايا ومفوج بيا ومسايق لخبار لوخرين..
البارت 9
بقينا كنهضرو انا ويحيى .. ديك الساعة طلب مني نوضو نشطحو.. مكنتش كنعرف كيفاش ندير ليها.. اعتذرت منه ودرت راسي حشمانة .. حسيت بيه عجبو الحال معرفتش علاش .. عطيتو نمرة تلفوني.. وطلقت السلوكية من جديد.. واخا كنعتر فشي حوايج ولكن بعدما علماتني سحر شنو نقول.. وليت دغيا كنفك راسي.. شوية لقيت هداك السيد اللي صيفطات معايا سحر جا لعندي..
- انسة.. الوقت هادي خاصنا نمشيو باش ميتقلقش الواليد..
- واخا.. انا غانوض دابا..
بقاو كلشي مستغرببن ولكن عجبني الحال حيت هاداك اكد السلوكية ديالي.. استأذنت من يحيى ومن لوخرين.. سلمت ونضت مشيت .. حسيت بالسعادة ليوما ماشي بحال البارح.. مشيت لسحر عاودت ليها كلشي.. فرحات وبدات كتقريني من جديد.. حتى جا اسماعيل ووصلني للدار.. حتى واحد مشاف شي حاجة.. مشيت نعست حيت عارفة بللي ديك العقروشة غاتصبح عليا صبح بكري..
فقت على تنفاخ ديال الراجل ..هضرت عنده بعين منفوخة ومسدودة بالنعاس..
-شحال الساعة؟
- راها الواحدة ديال النهار.. معرفتش مالك مع النعاس هاد الايام..
- حتى النعاس غاتحاسبني عليه.. اووف على عيشة..
- شنو شريتي البارح بدوك الفلوس..
- مازال ماشريت والو..
- اريهوملي ..
-شناهواا .. واش انا مضيعة معاك شبابي باش تحاسب معايا على الفلوس... مزيان تبارك الله..
نضت وتجاهلتو مشيت فطرت وبثقل راسي كيضرني.. جات عجوزتي بدات كتقولي يمكن راكي حاملة راهم فيك الاعراض.. الشارفة باغا تلصقني باي طريقة غير تهناي انا معمري نكون ام... انا مكنعرفش ليمن كيقولوها.. ومعندي حنان نعطيه للولد.. مللي كنتفكر كيفاش كان كيعاملني يحيى البارح كنستخسر راسي فهادو.. فالعشية مشيت لسحر باش نشوف اش غاتقول.. جبداتلي كساوي احسن من اللول .. شوية لقيت شي نمرة كتصوني .. جاوبت بخشونة بحال ديما الو شكون.. ملاك انا يحيى.. تما حماريت وبديت نصاوب ونرقق فالهضرة ديالي.. يحيى لاباس... لاباس ممكن نتلقاو دابا الى معندك والو.. اه واخا فين نتلقاو؟ .. قالي فين نتلقاو ديك الساعة لبساتني سحر .. وصاوبتلي .. الشعر والمايك اب .. عيطات للشيفور المزعوم جا عندي باش يوصلني للبلاصة .. لقيتو كيستناني ..
- سلام .. لاباس يحيى
- لاباس جلسي.. انا حبيت نجلسو بوحدنا بعيد على الديسكو والصداع ديالو وبعيد على الجروب ..
- اه احسن حتى انا مكنرتاحش مللي كنكون معاهم .. كنحس راسي مختلفة معاهم ومكيحملونيش..
- اه فعلا نتي مختلفة بزاف.. نتي متواضعة بزاف رغم انك حتى نتي من مستواهم ولا كتر.. ومحافظة بزاف.. يعني فين تلقا بنت فهاد الزمان مازال محافظة.. عرفتها مللي مابغيتيش تشطحي معايا.. لوكانت شي وحدة اخرى غاتستغل غياب اهلها عليها .. ولكن نتي حافظتي على نفسك حتى فغياب والديك.. باينة عائلتك رباوك مزيان غير حيت مكيخليوكش تخرجي الا بشيفور.. نتي مختلفة على كل البنات اللي شفتهم من قبل.. بالرغم من انك زوينة بزاف ولاباس عليك .. مستغليتيش هاد الجوج حوايج .. واختاريتي تكوني سوية..
(نتا اللي نية اسي يحيى .. يعني الخطة ديالي نجحات وتيقو الكدبة ديالي.. )
- ملاك نتي فعلا ملاك.. واسم على مسمى.. عليك كنت كنقلب من زمان.. تقبلي نكون حبيبك وتكوني حبيبتي ..
(الله يمسخك انا صحابلي تطلب مني نتزوجو.. ولكن نتوما الناس اللي لاباس عليكم كتصاحبو هو اللول عاد كتزوجو..)
- شنو قلتي .. كنواعدك مغانكون مع حتى وحدة من غيرك .. حيت فعلا نتي اللي كنت كنقلب عليها.. تيقي بيا غاتكوني فرحانة معايا..
مازال سارحة فهضرتو الرومانسية حتى صونالي التلفون هادا كان زوجي العزيز .. ماموالفنيش نخرج ونتعطل ..
- الله يا ربي.. هادا بابا.. اش غانقوليه تعطلت بزاف..
- ملاك .. جاوبيه .. وقوليلو راكي مع صديق مافيها والو..
- نتا مكتعرفوش هو عندو كلشي كود.. ممكن يقتلني الى عرف راني جالسة معاك دابا..
البارت 10
- غير تهدني.. جاوبيه ومغايوقع والو.. جاوبيه متخافيش..
اضطريت نسايرو باش مايشكش فيا .. وجاوبت..
- الو الحاج .. لاباس عليك..
- واش اللي يتزوج بيك نتي غايعرف شي حج ولا شي صلا فحياتو.. فين راكي البلا..
- امم راني مع صاحبني .. غانجي دابا للدار مغنتعطلش..
- جي لدارك الله يعطيك مصيبة فهاد النهار نتهنى منك.. واجي .. منين خرج ليك هاد الاداب ليوما..
- ههه واخا الحاج .. الله يطولي فعمرك..
- حاج والله يطول فعمرك .. لا هادي بزاف..
- يالله بالسلامة.. وتهلا فالواليدة.. (السلوكية جالبة..)..
قطعت وخليت عزيز مصدوم .. اما يحيى فزاد اعجابه بيا..
- حبيبة واش معندكش تلفون .. هادا بانلي قديم..
- امم لا غير حطيتو يتصاوب وجبت هادا ليوما نديباني بيه.. (ياااي كيفاش نسيت هاد القضية ديال التليفون..)
- المهم خاصني نمشي انا غانصوني للشيفور .. باش ميزيدش يتعصب الحاج..
- نتلقاو بالليل فديسكو .. غاتجي ياك..
- واه غانجي.. بسلامة..
جا عندي الشيفور ديالك احليمة ههه داني لسحر عاودت ليها كلشي .. وقلت ليها باللي غانمشي بالليل للديسكو وغاندوز عندها قبل.. مشيت للدار لقيت سي عزيز مشحراه مو مزيااان .. بدا بالنكير وانا بديت نجاوبو .. هو يدابز وانا ندابز ...الجيران كاع سمعو غواتنا ودبازنا.. خليتو كيدابز مشيت دخلت لبيتي .. درت دوش وصاوبت راسي.. خرجت لقيت السي عزيز زايد بالاعصاب .. مفهمتش مالو هادا ليوما.. بقا كيدابز وحتى انا ماخليتش من جهدي شوية وهو يضربني ماجات غا فوجهي .. لا ماشي وقتها هاد الضربة .. دخلت للبيت وسديت الباب .. مشيت نشوف فالمرايا .. يا ربي ماتنفخش ماشي وقتها.. ولكن للاسف تنفخات وتزرقاتلي وجهي.. الزين مشا.. والسهرة مشات.. اش غاندير دابا.. بقيت مكمشة فبلاصتي اتصلت بسحر عاودتليها شنو كاين وقلتليها واش كاين شي طريقة نخبيها بالماكياج.. قالتلي الا منفوخة ميمكنش.. وباللي مكاينش فرصة اني نمشي والحل هو نلغي السهرة.. صونيت لاسماعيل قلتلو داكشي اللي كاين.. وتكمشت فبيتي.. سمعت عزيز خرج مشا لخدمتو.. وانا بقيت كنفكر.. بالليل سمعت التلفون كيصوني.. كان يحيى.. شنو غاندير دابا.. فالاخير جاوبتو.. وخفضت صوتي
- الو..
- ملا فينك.. عييت منستنى فيك واش مازال غاتعطلي
- يحيى .. انا مغانجيش .. حيت بابا دارلي عقوبة ومخلانيش نخرج..
- وعلاش..
- قصة طويلة منبعد ونحكيهالك.. بسلامة ..
قطعت وخليتو مازال باغي يهضر.. هادشي حسن مانحصل فشي حاجة اخرى.. نعست ورتاحيت هاد المرة..
طلع النهار فقت بكري.. نضت غسلت وجهي اللي منفوخ وزادت فيه الزروقية واللي ولات الضربة فيه كتحرقني بزاف .. وجدت منفطر .. حطيت على الطبلة.. جلست نفطر وانا سااكتة وكنفكر.. يا ترى اش غايكون يحيى كيدير دابا.. بدات تهضر ديك العقروشة ..
- شفتي اللي مكتسمع كلام راجلها ومكتحتارموش.. هادا هو جزاءها.. الى مادرتي عقلك من هنا الفوق غادي غايبقى يصبحك بقتلة دالعصا ويمسيك بقتلة وحدة اخرى..
انا تجاهلت الهضرة ديالها بحال الى مكنسمعهاش.. وبقيت نخمم فيحيى.. جا سيدهم عزيز.. جا جلس حدايا وبدا يتمحلس.. باسني من كتفي وبدا يهضر..
- عايدة حياتي .. سمحيلي احبيبة مقصدتش نديرلك هادشي.. محسيتش براسي حتى قاستك يدي.. نتي رطيطبة عليها دغيا بانت فيك الضربة اما انا مضربتكش بالجهد.. وحتى نتي ديما كنقولك ماتشديش معايا الضد كتعرفيني مللي كنكون معصب مكنعرفش اش كندير..
بقا كيخطب عليا وانا مطرشة ودنيا ليه .. ومو تصدمت بولدها للي كتشوفو دلدول قدامها دابا.. هادا اللي كانت كتستناه يصبحني بقتلة ويمسيني بقتلة.. خاب ظنها.. نضت مطنشاه خليتو كيهضر ويزاوك ودخلت لبيتي.. هو تبعني وخلا مو..
- اعايدة عفاك لما هضري انا عارف راسي قفرتها معاك .. ولكن هادي وتوبة عمري مانعاود نخسر ليك خاطرك او نضربك.. عفاك سمحيلي..
كما العادة درت راسي مشايفاهش ومكاينش فالدنيا اصلا.. حتى الانسان اللي ديما معاديك وفيه النكير .. النهار اللي كيسكت كتحس ناقصاك شي حاجة.. نهار كيتبدل كتشتاق لداك النكير احسن من السكات ديالو.. لانه اسوء شيء هو الصمت..
البارت 11
سكتت وسديت فمي .. ماشي حيت تجرحت منو وبغيتو يديرلي الخاطر .. لا .. ولكن لأنه مبقاش كيعنيلي ولا تفكيري مشغول بحاجة اخرى.. مشغول بيحيى.. خرجت ومشيت لعند ام اسماعيل.. وبقيت كنشكي عليها وهي كتسب فالحيوان اللي دارلي هاكا.. بقيت معاها حتى فاق اسماعيل..
- شكون دار فيك هاد الحالة..
- كما العادة راك عارف..
- الكلب..
- قولي دابا .. واش شفتي يحيى البارح..
- اه شفتو .. جا ولكن دغيا مشا .. مبقاش بحال ديما يقصر مع صحابو..
- بالصح.. حيت انا مكايناش.. اكيد اش غايدير تما.. 😍
قلبي فرح مللي حسيت باللي عندي قيمة .. دوزت نهاري كنفكر فيحيى.. فلعشية صونالي جاوبتو قلتلو مازال معنديش فرصة نخرج قالي واش محتاجة نساعدك تحججت كالعادة.. فالليل رجعت لدار عزيز.. لقيتو كيستناني.. مبغاش يمشي للخدمة وبقا جالس ليا تما .. وانا مديتهاش فيه بحال الا مكاينش.. بدا يرغب عاوتاني.. هاد المرة الصمت ديالي حرقو فقلبو بزاف.. مفهمنيش.. ولا باغي يدير اي حاجة باش نهضر عندو.. وانا مدايهاش فيه كاع ..دازت يوماين وانا فديك الحالة حتى تفشات عيني .. مشيت لعند سحر دارتلي شوية دالماكياج حتى وليت مزيانة.. مكيبانلي والو.. صاوبت شعري وخرجت صونيت ليحيى جا عندي بسرعة لواحد الكافي..
- حبيبة توحشتك بزاف..
- حتى انا.. ولكن المكتاب هو هادا.. بابا ساد عليا حيت عاقبني.. ومبقيتش غانجي لديسكو مرة اخرى حيت دابا غير سلت..
- حبيبة اجي تعيشي معايا.. وانا غانديرك فعينيا.. شنو اللي مصبرك على هادشي..
- انا بنت الناس ايحيى.. ماشي انا البنت اللي تجيب العار لوالديها وتهرب مع صاحبها..
- اسف.. مقصدتش.. انا باغي غير نريحك..
- خاصني نمشي دابا باش منتعطلش .. واي فرصة لقيتها غادي نجي نشوفك.. بالسلامة..
بقيت غادية للدار.. وغا دزت من الحومة اللي ساكن فيها الواليد ديالي .. وانا يبانلي شي حايحة باينة شي فرح.. ولا عرس.. قربت شوية وسولت واحد المرا قالتلي راه خو مرت با هو اللي كيتزوج.. وباللي با هو اللي عرسلو ودار ليه عرس كبير.. حرقلي قلبي.. رزقو كيخسرو على البراني .. اما انا عمرو ما خسر عليا حتى ريال .. وكأنه تهنى مني مللي زوجني بداك الشارف.. خرجت بسرعة ومشيت لدار عزيز.. دخلت ومهضرت مع حتى واحد بقيت ساهية وكنفكر فعائلتي.. اي واحد مهما كان فحياته.. متجاهل لبزاف دالحوايج ولكن ضروري تكون عندو حاجة كتقتلو فالداخل ديالو.. ومكيقدر يصبر على والو.. تأليف دودي العيساتي.. بقيت فداك الحالة ثلاثة ايام وحتى واحد مافاهم شنو عندي.. هملت راجلي وهملت كلشي .. غير كنفكر.. علاش انا منتمتعش معاهم .. داكشي عندي فيه حق حتى انا بزاز عليهم نتمتع.. مرة مرة كيصونيلي يحيى.. ملي كنلقا فرصة كنجاوبو ومللي مكنلقاش كندير راسي بحال الى حدايا شي واحد وكنقطع.. والحقيقة اني تدمرت نفسيا.. اسماعيل حتى هو حسيتو تبدل شوية.. بحال الى مبقاش باغي يعاوني فكدوبي على يحيى .. مبغاش يتحمل مسؤولية ديال مرا مزوجة.. واحد النهار فقت قررت نمشي نشوف يحيى ونفطر معاه.. سولني عزيز فين غادية.. قلتلو راني غادية لام اسماعيل وغانتعطل معاها .. مشيت تلاقيت يحيى..
- حبيبة توحشتك بزاف.. وليت كنتوحشك ونتي معايا.. اشنو درتي فيا يا هاد البنت..
- حتى نتا .. وليت كنتوحشك بزاف..
- عمري حسيت هادشي مع شي وحدة... من ديما انا كنختار بزاااف قبل مانتاخذ شي قرار ديال شي علاقة.. ولكن معاك جات غير هاكاك.. محسيتش حتى لقيت راسي باغي نكون معاك بدون مقدمات.. بغيت نكمل معاك حياتي.. نتي اي واحد يتمناك.. زوينة وينت عائلة.. ومتبتة..
سمعتو بدا يشكر فالمواصفات وانا قلبي يتقبط.. اشمن بنت عائلة.. واشمن متبتة.. ولكن كتر من هادشي اني لاول مرة كنعرف معنى الحب.. اول مرة كنحس اني باغا نكمل حياتي مع شي واحد.. اول مرة كنعرف الحب..
- يحيى .. عفاك واعدني انك عمرك متخلى عليا مهما كانت الظروف وكما كانت..
- كانواعدك.. مكاين حتى حاجة تفرقنا..
دوزت صبح كله معاه وجيت بحالي .. جيت للدار مللي دخلت لقيت شي حاجة ماشي هي هاديك.. الحس مقطوع والشارفة مكايناش.. تمشيت حتى وصلت لبيتي سمعت شي وشوشة.. حليت الباب لقيت سي عزيز معاه وحدة فالبيت وناشط مع راسو.. نوضت عليه القربلة.. بقيت كنغوت واعباد الله اجيو تشوفو .. شوهتو فالحومة.. هو كيسكت فيا وكيرغبني نتهدن وانا غير زايدة فيه.. شوية شديت فديك خيتي هي كتضرب وانا كنضرب.. درنا روينة.. حتى كلشي ولا كيشوف من السراجم.. والبيبان.. عزيز طلعاتلو داك الروينة للراس وهو يشدني ..
- خرجي برا .. خرجي من داري نتي ماشي مرا .. سيري تقلبي فين تعيشي .. باراكة غير عاد المدة اللي صبرت عليك فيها ..
خرجني وجرا عليا للزنقة والناس مجموعين عليا.. تفقصت بزاف.. مشيت لدار ام اسماعيل دغيا بقات كتهدن فيا.. محملتش البلان.. داك الخانز يخوني انا.. انا يجري عليا من دارو.. محملتش راسي.. بقيت النهار كامل كنعاير فيه .. مللي وصل ليل جا مول الدار ومللي عاوداتلو مرتو شنو كاين خسر عليها جوج كلمات.. هي باها مازال عايش .. تمشي عندو.. كان لموت اهون ليا من اني نمشي لعند مرت با.. ولكن هادا خرجني حتى هو وجرا عليا من دارو..
البارت 12
فكرت نمشي لعند سحر.. ولكن لا .. هي خدامة فالدعارة معندي مندير بالرجال شي داخل شي خارج.. يكفيني يحيى.. مكلن بيدي الا نمشي لعند مرت با وندخل صحة.. مشيت ترددت بزاف قبل ماندق... ولكن فالتالي دقيت وفتحاتلي واحد البنيتة صغيرة الباب يمكن ختي.. اه انا مكنعرف حتى واحد فيهم .. دخلت قبل ماتجي امها .. مللي دخلت شافت فيا ..
- نتي.. اش فكرك بينا .. عاد تفكرتي باللي عندك عائلة..
- فين با..
- باك خارج .. شنو بغيتيه..
- ماشي سوقك.. هادي دار با .. ماجيتش عندك ..
شوية لقيت واحد المرا خارجة من البيت اللي كان ديالس شافت فديك المسمومة وسولاتها عليها ..
- شكون هادي ..
- هادي ربيبتي .. بنت راجلي .. مزوجة بواحد الراجل غا هنا فالدرب..
شافت فيا وبدات كتهضر ..
- عايدة هادي راها مرت خويا عاد دارت العرس داك النهار..
- ممم شفت العرس ودزت من حداكم بحال الغريبة.. ماشاء الله با دار العرس لنسيبو حسن وماداروش لبنتو..
دخل با تصدم مللي شافني .. جا جلس ..
- فين هو راجلك..
- جرا عليا..
- شنو درتي حتى جرا عليك..
- هو اللي دار .. ماشي انا ..لقيت معاه وحدة فبيت نعاسي.. وجرا عليا مللي..
- وجهك منحوس من نهار خلاقيتي.. وكاطيحي عليا النحس ديالك..
كلمات كلها بحال السم.. من نهار تزاديت.. الصراحة كنت تهنيت شوية مع عزيز من بحال هاد الجمل دالسم .. وهانا رجعت ليه برجلي.. شوية وهو يدخل واحد باين خوها.. شاف فيا وسول ختو جاوباتو بنفس الهضرة.. كمل الواليد الهضرة..
- سمعيني مزيان.. معندنا فين تنعسي.. هانتي تشوفي بيتك ساكنين فيه الازواج.. ولبيت لاخور فيه الاولاد.. الدار عامرة مكتحملش ترجعي ليها..
- ولكن انا معندي فين نمشي .. واش غاتلوح بنتك فالزنقة .. بنت رحمة.. هو غير سمع رحمة للي هي امي واللي كنحس بيه باقي الجرح فقلبو كيتأثر..
- واخا نعسي فالصالة ..
نضت مهضرت مع تاواحد نعست فالصالة.. بلا كاشة.. شكون غايرحمني مرت با اللي درت عليها الزحام ولا.. نعست واخا هكاك وكنفكر كيفاش غانمشي من هنا واش غانقول ليحيى باللي هربت من دارنا يمكن يتيقني ويخليني نعيش معاه.. ولكن لا انا مابغيتش نكون عندو رخيصة باش مايلوحنيش بالساهل.. سمعتيه اعايدة شنو قال فاللول باللي نتي عجبتيه حيت ماشي بحال البنات لوخرين .. نتي حيت عززتي راسك عليه.. داني النعاس وانا كنفكر فيحيى.. مدونة قصص دودي.. فقت وحسيت بشي لمسات فرجلي .. نضت بسرعة مفزوعة لقيت خو مرت با هو اللي دخل عندي للبيت..
- شنو بغيتي 😡
- شوووت .. نتي زوينة بزاف اعايدة.. بغيت نتزوج بيك .. انا غانطلق مرتي ونتي طلقي من راجلك .. ونتزوجو .. شنو قلتي..
- غاتخرج عليا دابا من بيتي ولا غنشوهك..
- غا سمعيني .. نتي زوينة بزاف ..
بدا كيلمس وكيهضر .. بديت كنغوت حتى فاقو مالين الدار كلهم.. كلشي جاو للبيت عندي منهم مراتو... وبا ..
با : اشنو واقع هنا ..
انا: هاد الملعوق تهجم عليا ..
الملعوق: كدابة انا كنت فايق نمشي نشري وهي تعيط عليا دخلاتني لهنا وبدات تعرض عليا راسها ودير شي حركات ومللي قلتليها انا مزوج وكنبغي مرتي قالتلي طلقها وتزوجني ويلا مابغيتيش غانشوهك ونطيح عليك الباطل ..
انا : كداب هو اللي جا عندي ..
مرتو غير سمعات ديك الهضرة جات تنتف فيا وتقمش .. با غوت علينا غوتة وحدة حتى كلشي صقل.. ووجه ليا الكلام: خرجي عليا برة مابغيتش نعاود نشوفك مرة اخرى..
- ولكن .. فين غانمشي فهاد الليل ..
- براا..
معاودتش معاه الهضرة .. خرجت وكلشي كيشوف فيا وخصوصا مرت با اللي حسيتها دارت ابتسامة الانتصار.. خرجت فوسط الليل .. غادية كنجر رجليا فالزنقة .. وقطرات الدموع متلاحقة كتنزل من عيني.. كرهت النهار اللي تزاديت فيه فهاد الدنيا.. اللي بحالي تابعهم النحس عندو الحق با .. انا الى بقيت معاه غادي نزيدو النحس .. معرفتش فين نمشي خفت فالظلام والشوارع خاااوية.. مكان بيدي الا سحر.. تمشيت شوية حتى بانتلي طاكسي شديتها ..
البارت 13
شديت طاكسي حتى وصلت لدار سحر طلبت من مول طاكسي يستناني حتى خرجات هي عندو خلصاتو .. طلعات لدارها لقيتها مقصرة مديتها فحتى واحد دخلت لبيتها ونعست بعدما سديت الباب.. حسيت راسي هازة جبل على ظهري.. الصباح فقت خرجت لقيت الدار مرونة .. القراعي دالشراب والكارو فكل بلاصة.. والريحة ديال الخنز عاطية.. محملتش لبلاصة .. بديت نخمل ونفتح فالشراجم باش يتنقى شوية المكان .. شوية وهو يبانلي واحد الراجل خارج من بيت سحر .. جا شاف فيا مزيان وانا حنيت راسي ..حتى مشا وخرج.. بقيت كنخمل ووجدت الغدا .. حتى فاقت سحر وجات جلست معايا..
- عاوديلي احبيبة شنو وقع..
- اش غانقوليك داك الزمر ديال عزيز لقيتو مدخل وحدة للدار.. ملي نوضتها معاه جرا علي مشيت لدار با .. لقيت تما خو مرتو تحرش بيا نوضتها معاه حتى هو وجرا عليا با حتى هو.. وليت تقيلة على عائلتي.. مابقا عندي حبيب فالدنيا ولا قريب.. بقيتي غي نتي الى قبلتي عليا نعيش معاك..
- ايوا احبيبة اش غانقوليك.. انا دزت من نفس المرحلة ديالك .. وهانا استقليت براسي ودرت فلوس لراسي .. حتى نتي خاصك تديري بحالي وميهمك حتى واحد.. منكدبش عليك .. انا عاد يالله كنقد على مصاريفي بوحدي منقدش على مصاريف جوج دالناس.. هاد الدار راه ماشي ديالي راها ديال الشاف ديالي وهو اللي كيجيبلي الزبائن .. ويلا عرف باللي نتي عايشة معايا غادي يطلب منك تخدمي حتى نتي معاه ولا غايجري عليك..
- سحر عفاك.. انا معندي حد فالدنيا الا نتي.. وقفي معايا.. انا ماباغاش نخدم فهادشي..
- حبيبة والله معندي منديرلك.. وزايدون نتي ماعندك متخسري .. ياك نتي ماشي بنت ومعندك عائلة .. اش غاتخسري الى خدمتي معايا..
- صبري عليا غير حتى نلقا دار ..
- نتي والله حتى هبيلة .. واش الفلوس غايجيوك حتى عندك .. ونتي معندك متخسري وباغا تذلي راسك وتخدمي بجوج دريال.. نتي زوينة وكلشي غايحماق عليك.. وغادي تجمعي زبالة دالفلوس.. وديك الساعة ديري مشروع ديالك وبعدي من هاد الدومين .. وعيشي لراسك..
- لا اسحر منقدرش .. مستحيل..
- نتي حرة ..الى معجباكش هضرتي ديك الساعة قلبي فين تباتي.. وحتى حب حياتك يحيى .. مغتبقايش تشوفيه وتمثلي راسك عليه باللي لاباس عليك.. وغايعرف حقيقتك.. ديك الساعة حتى واحد اصلا مغايديرلك قيمة فهاد الدنيا،. شوفي غير عزيز اللي حتى وحدة مكتقبل عليه وشنو دارلك.. فما بالك بشي حد اخور...
صدماتني بديك الهضرة اللي قالت .. كيفاش حتى هي ولات دابا ضدي.. قبل مكانتش كتقدر تقولي هاد الهضرة حيت كان عزيز دايرلي العز ومسكني فدارو.. دابا غير جرا عليا وعرفات معندي منفذ من غيرها استغلات هاد نقطة الضعف فيا .. صحيح الى طاح الثور كترو الجناوى.. ها الجناوا من كل ناحية وكلشي طامع فيا وحتى واحد ماباغي يهز مسؤوليتي.. كرهت النهار اللي تزاديت فيه،. حياة الزبل هادي.. سكتت وهي بحال الى فهمات انها خاصها تعطيني وقت للتفكير.. والحقيقة انه مكان عندي اي حل.. واخا نفكر حياتي كاملة .. الطريق هي هي.. والاكيد اني ماقادراش نفكر اني ممكن نخسر يحيى.. هو النقطة البيضاء الوحيدة اللي فقلبي.. الى خسرتها غادي نمشي نعلق غير راسي عند شي شجرة.. وننهي حياتي .. حيت ديك الساعة مغادي يكون عندها حتى معنى.. تأليف دودي.. خلاتني سحر النهار كامل وانا كنفكر.. جات عندي فالعشية ..
- ايوا الالة عايدة .. شنو قلتي..
- منعرف ..
- طالما قلتي منعرف يعني موافقة..
- انا خايفة..
- متخافيش .. نتي راكي معايا .. متخافي من حتى حاجة..
اودي مالخوف الا منك يا وجه الويل... اللي تستاغل نقطة ضعف شي وحدة اشمن امان ليها ..
البارت 14
ناضت فرحانة وقالتلي راه غايجي عندها واحد السيد اليوما وغايجيب معاه صاحبو.. وباللي هاد الناس مرفحين بزاف .. وغايتهلاو فينا .. قالتلي نتي ماديري والو انا اللي غانتافق معاهم على الثمن وعلى كلشي.. انا حسيت قلبي تزير .. جبداتلي واحد الكسوة من عندها معرية بزاف ودارتلي الماكياج والسيشوار وانا قلبي مقبوظ.. حاسة راسي غانموت الى قرب مني شي واحد.. انا عمري مابعت راسي لشي واحد كلشي كان كايحماق عليا ولكن عمري ما زعمت نعطي لشي واحد وقت حيت كنت محتارمة راسي .. كنت مزوجة.. مازال دابا راني مزوجة.. ولكن راه جرا عليا .. هو السبب هو عزيز السبب فهادشي.. لا با هو السبب .. هو اللي زوجني من اللول لعزيز باش يتخلص مني.. لوكان تزوجت باسماعيل كنت غانكون لاباس ومغانوصلش للدعارة.. مرت با هي السبب .. غاننتاقم من كل واحد كان السبب فالتعاسة ديالي فالحياة .. هادا وعد.. وصلو دوك الناس بعدما كانت سحر موجدة كلشي .. انا محملتش راسي.. هاداك جلس حدايا وكيطلب مني ندير شي حوايج انا كرهاهم... اكتر حاجة كرهتها فهاد النهار هي نفسي .. نوضني نشطح .. وهو سكران وبديت كنشطح بحال شي ميتة.. محاملاش راسي.. اشمأزيت من نفسي.. دوزت الليلة معاه وهو مارحمنيش ومعطانيش فرصة نهضر .. بالنسبة ليه خلص الفلوس خاصني نعطيه مقابل .. كرهت جسمي .. اول مرة كيقيصو شي حد بعد عزيز .. خديت لقب عاهرة من اليوم.. منعستش الليل كامل وانا كنفكر وكنبكي .. فين غانوصل فهادشي.. علاش انا ندوز هاد العذاب وهاد القرف.. ناض الصباح لبس حوايجو وشاف فيا باشمئزاز ومهضرش وخرج.. نضت دخلت للحمام وبديت نتقيا .. قلبي حسيتو غايخرج محملتش هادشي اللي دوزت .. محملتش راسي البارح.. دوشت وخرجت نجمع الروينة ديالهم .. معرفتش كيفاش كتقدر سحر تعيش وسط هاد القرف.. والزبل ديالهم.. انا اي حاجة كتفكرني بيهم كتغيفلني.. بقيت كنستناها تفيق .. مللي فاقت جات عندي ..
- عايدة.. الراجل ديال البارح شكا منك .. واش اصاحبتي هو لوكان باغي الاصنام واش يجي عندنا .. راه هو كان باغي ينشط.. وخلص الفلوس باش يمشي من هنا ناشط ماشي مبرزط ..
- وانا مالي شنو بغيتيني ندير..
- عارفة اول مرة صعيبة..ولكن من بعد غاتولفي .. غايولي يجيك عادي.. حتى انا كنت بحالك فاللول .. ولكن دابا قلبي مات .. ولا عندي هادشي عادي..
مديتهاش فيها جبدات شي فلوس وحطاتهم قدامي..
- هادا حقك.. شفتي شحال كتار.. وفليلة وحدة.. تقدري تشري بيهم الحوايج اللي بغيتي وتتهلاي فراسك .. باش تعمري العين لسي يحيى ديالك..
فكراتني بيحيى هزيت الفلوس ودخلت لبيتي صونيتلو.. درت معاه موعد باش نتلقاو.. وفعلا صاوبت راسي ومشيت عندو طلب مني نركب معاه مشينا تسارينا..
- حبيبة واش باباك مازال مزير عليك..
- اه بزاف ..
- باينة فعينيك .. كنشوف فيهم حزن.. مكرهتش نخرجك من هاد العذاب .. الى بغيتي نتزوجو نجي نخطبك من باباك ..
- لا ... بغيت نقول ماشي دابا .. حتى يبرد شوية الجو..
- حبيبة انا باغي راحتك.. كنبغيك بزاف مكرهتش تكوني معايا اليوم قبل غدا.. عرفتي بغيت ندير مشروع .. نستقل على الوليد ديالي .. ومازال مفكرت شنو ندير..
- انا نفكر معاك
- اها اقترحي عليا افكار ..
تفكرت باللي تفرجت فواحد المسلسل مصري كيهضرو على منتجعات سياحية اللي معرفت شنو هي ..
- شنو رأيك دير شي حاجة للسياح .. منتجعات سياحية مثلا ..
- فكرة رائعة .. انا مجاتش فبالي كاع.. هاد المشروع ممكن ينجح بزاف.. نتي مولات الفكرة .. شنو رأيك تدخلي معايا شريكة فيه..
- انا معنديش الفلوس .. انا..
- عارف.. باباك.. واخا بغيتك تكوني معايا فيه .. بأفكارك..
- انا معاك ديما ايحيى.. كنبغيك وعمري مغانتخلا عليك..
شدلي فيدي وابتسم وقال : حتى انا عمري مغانتفارق معاك.. نتي فتاة احلامي ونتي اللي كنت كنقلب عليها من زمان ودابا لقيتك..
البارت 15
دوزت نهاري مع يحيى فوج عليا بزاف وتأكدت اني منقدرش نتفارق معاه .. انا وصلت لطريق ميمكنش فيها نمشي للقدام ولا نرجع اللور.. فكرت نعاودلو كلشي ونقولو انا غير كدبت عليك.. ولكن خايفة يتفارق معايا .. منقدرش نتحمل اني نبعد عليه.. كنبغيه بزاف .. وغانموت الى بعدت عليه.. مشيت لسحر بدات كتوصي فيا وكتعلمني كيفاش نعامل الزبائن.. وانا محاملاهاش.. وصل الليل جاو اشخاص عمري مشفتهم مختلفين على ديال البارح.. زيرت على قلبي وشطحت ودوزت الليلة مع واحد فيهم.. حتى مشاو.. دازو ايام وانا فهاد الحال .. بالليل فبيت الدعارة باسم عايدة .. وبالنهار مع يحيى باسم ملاك.. ولفت شوية .. وبديت كنستقل بالفلوس .. واحد النهار تلاقيت مع يحيى ..
- حياتي .. ركبي معايا غانمشيو لواحد البلاصة..
- واخا ..
ركبت معاه وهو طول الوقت ناشط حتى وصلنا لواحد الفيلا ..
- يحيى فين غاديين ..
- دابا تعرفي..
نزلنا وكلشي بداو كيحيوه دخلنا ولقينا واحد المرا كبيرة شوية ومهلية فراسها ومعاها وحدة تكون فالاربعين .. باس راس الكبيرة سلم على الاخرى ووجه ليهم الهضرة ..
- جدة .. ماما .. هادي هي ملاك..
انا حشمت وليت حمرا واش هادو عائلته .. وغرفني بيهم ..
الجدة: تبارك الله عليك ابنتي .. زوينة بزاف ..
الام: ولدي عرفتي تختار .. البنت زوينة بزاف كما عاودتي عليها تماما..
انا حنيت راسي وحشمت
الام: جلسي ابنتي ..
يحيى: هادي جدة .. وهادي ماما ..
الام: وهادا يحيى ولدنا الوحيد والمفشش دالعائلة.. ههه
الجدة: شحال وهو كيهضر عليك ابنتي وكلنا كنا متشوقين باش نتعرفو على هاد البنت اللي خدات عقل يحيى.. كنا متأكدين باللي اختياره غايكون رائع.. وهاحنا تأكدنا منه بعدما شفناك ..
انا مهضرتش .. القضية وصلات للعائلة.. حماضت انا خايفة
الجدة: حنا معندنا مانع مرحبا بيك فعائلتنا مدام يحيى كيبغيك حتى هاد الدرجة..
يحيى: ملاك عندها ظروف .. باباها صعيب ولكن حنا غانقدرو نقنعوه ياك اجدة..
الجدة: طبعا.. باباك ابنتي خليه علي.. انا اللي غانقدر نقنعو.. الرجال القدام كيتفاهمو بيناتهم..
الله يا ربي كيغاندير دابا.. واش نقوليهم مابغاش يتلاقاكم .. ولا ندير ما دارت ايلول فسامحيني مللي كرات ديك المرا وقالتليهم هادي ماما .. نكري حتى انا شي راجل نقوليهم هادا بابا.. بقاو كيهضرو وانا ساكتة.. اظطريت نقوليهم تعطلت وغادي يدابزو معايا فالدار .. طلبت من يحيى يوصلني .. وفعلا وصلني للمدينة وشديت طاكسي لدار ..
البارت 16
مشيت لسحر لقيتها كتوجد فالسهرة من جديد مليت هاد العيشة .. كنحس راسي رخيصة بزاف .. وكل ما بدا يحيى كيهضر ويشوف فيا شوفات البراءة كنكره راسي.. كنبغي نغوت ونقولو انا ماشي كما كتشوفني .. كنبغي نقولو انا غير كلبة ومنستاهلش حبك.. ولكن لا .. خايفة.. خايفة يبعد عليا ونموت ... انا فعلا غانموت الا تفارق معايا .. وصل الليل .. وكما العادة تعلمت كلما يفعله العاهرات .. وليت كنكمي وكنشرب وكنشطح.. دخلت للبيت مع واحد هاد المرة كان شارف وكيغيفل .. مللي قضا غراضو بزق عليا فوجهي .. وبدا يسب فيا بأسوء النعوت .. والالفاظ.. بحال الى خلصني حتى على داك السبان.. وانا ساكتة ومتحملة الاهانة.. ناض كيسب هكاك وكيهيني حتى خرج.. مريض .. الرجال كلهم مرضى .. وكلهم منفصمي الشخصية.. كرهت راسي واحتقرت راسي كتر منو.. هو كيفاش بغيتو يديرلي قيمة مادمت انا مدرتهاش لراسي .. وسمحت لراسي ننزل لهاد الوسط دالزبل .. ماشي ذنبي .. مابيدي والو.. كما قالت سحر غانجمع شوية دالفلوس وغانتطلق من عزيز وغادي ندير مشروعي وديك الساعة غانقول ليحيى باللي بابا تبرا مني ومغايسمحليش .. وغادي يتزوجني... ونطلب منو نسافرو ومنبقاوش فهاد البلاد.. نعيشو برا .. مبقيتش حاملة الحياة هنا .. الغد ليه مشيت تلاقيت يحيى..
- حياتي .. عائلتي فرحانة بيك بزاف.. وباغين غير امتا نتزوجو.. وتعيشي معاهم..
- يحيى انا.. خايفة بزاف.. خايفة من بابا منقدر نقولو والو.. مبغيتش نعصبك ولكن هو مصر يزوجني بواحد السيد من عائلتنا.. عليها مغايتفاهمش معاكم..
-شنو.. علاش مقلتيليش هاد الهضرة من اللول..
- حيت عارفاك غاتعصب.. شفتي ..
- 😒 ونتي واش موافقة تتزوجي واحد مكتبغيهش..
- طبعا لا .. انا كنبغيك نتا.. ميمكنش نوافق على واحد اخور..
- شنو غانديرو..
- مازال عطيني شوية دالوقت.. انا غانحاول نقنعو.. الى مبغاش ديك الساعة انا غانظطر نهرب من الدار ..
- حبيبة انا مابغيتش نوصلو حتى لهاد الدرجة.. حنا نحاولو معاه.. وغايوافق انشاء الله ..
- نتمنى نتهنى من هاد الكابوس.. عييت
- حرام ملاك بحالك يعيش هاد الجحيم كله ..
بقيت كنشوف فيه وكنفكر .. عندو الحق انا ماشي خايبة من الداخل.. ضروفي هي اللي دارت فيا هاكا ..
- عينيك زوينين.. كنسرح فيهم ..
- نتا اللي كتسحرني بهضرتك.. كنبغيك بزاف ايحيى..
دوزت نهار زوين بزاف مع يحيى وبالليل رجعت للمستنقع من جديد .. قالتلي سحر باللي حنا معروضين عند هاداك اللي خدامة عندو وباللي غايكونو غا المرفحين تما وخاصني نضبر على راسي ونضرب ضربة صحيحة فداك الحفلة.. وجدت راسي ولبست كسوة زوينة على امل نجمع شي ضربة صحيحة ونهرب من هنا نمشي نأسس حياة جديدة مع يحيى.. مشينا انا وسحر حتى وصلنا لداك البلاصة كانت فيلا كبيرة.. مللي دخلنا لقينا بزاف دالبنات اشكال والوان وحدة تنسيك فلوخرا .. وبزاف دالشباب .. والرجال باينة فيهم كما قالت سحر من الطبقة البورجوازية.. بداو دوك البنات كيشطحو على امل يضبرو على راسهم .. فكرت الى مضبرت على راسي حتى انا غادي نضيع الفرصة وغانمشي من هنا جيبي خاوي.. هادي فرصتي باش نخوي هاد الضومين فمرة.. طلقت الشرقي وشطحت بكل قوة .. حتى ولا كلشي حال فمو فيا .. مللي كملت كلشي كيشير عندي وانا دايرة راسي مكيهمونيش كلهم .. هادي طريقة من طرق الجذب.. تمشيت للكوزينة درت راسي غانشرب على اساس اللي بغاني غيتبعني.. حيلة من الحيل دالعاهرات تعلمتهم من سحر.. بقيت مدة واقفة حتى سمعت صوت مورايا..
- بونسواغ..
تلفت نشوف لقيتو واحد شاب طويل وعضلاته خارجين من الكوستوم ديالو وفنوويون لحيته مطراسية وكحلة اقل ما يقال عليه انه زوين بزاف.. واش انا حلمت فيوم من الايام يديها فيا شي واحد بحال هادا .. عايدة مالك ياك طاح فيك يحيى ولد الارسطوقراطين .. مغايطيحش فيك هادا .. ولكن الفرق ان هادا شايفني عاهرة بغا يدوز بها الوقت ماشي بحال لاخور .. شفت فيه وتلفت باش نكمل الشرب ..
- اهلا..
- كيدايرا الزوينة .. متعرفيناش عليك..
- انا عايدة.. تشرفت بيك..
-انا عصام.. حتى انا تشرفت بيك.. شنو رأيك تجي تكملي معايا السهرة فداري .. هاد البلاصة معاجبانيش ..
- ولكن كولو بمقابل..
- متخافيش .. اللي بغيتيه غايكون عندك.. أمريني وانا غانفذ..
- مزيان ولكن بغيت فلوسي دابا ..
جبد من جيبو شيك كأنه كان عارف انه غادي يجي هنا وغادي يتعرف عليا وغانطلبلو فلوس كثيرة.. عطاني الشيك مللي شفت المبلغ جاتني السخفة.. عمري مشديت بحالو.. وعمري مافكرت نشدو.. ابتسمت ليه بالفرحة وقلتله .. دابا نتا اللي تآمر اللي بغيتيه غانفذو..
خرجنا .. لقيت واحد الشارف غير كيتفاوض مع سحر عليا .. شفت فيها شديت فعصام ومشيت .. ركبت معه فسيارته الفخمة .. مشا حتى وصل لشي فيلات صغار دخلنا فوحدة فيهم دارو كتحمق.. عجبني الحال وحتى هو محسسنيش انه جايبني بفلوسه.. تصرفت كأني فداري .. الغد ليه نضت على اساس نمشي بحالي ..
- عايدة.. ممكن نطلب منك طلب ..
- اه طبعا..
- انا حاس باللي محتاجك معايا هاد الفترة .. ممكن تبقاي معايا .. ومتخافيش انا غانعطيك اللي بغيتي..
- ولكن ..
- شنو رأيك نسافرو ثلاثة ايام.. انا كنمر بظروف صعيبة.. وبغيتك تسانديني ..
- واخا .. انا موافقة.. غير خاصني نعلم صاحبتي ونجمع حوايجي..
- واخا انا غانوصلك عندها وغانستناك..
- متافقين ..
البارت 17
مشيت مع عصام .. حتى وصلت لدار سحر طلعت وهو بقا كيستناني لتحت..
- افين الشابة.. شكون هاداك .. باينة فيك ضربتي ضربة صحيحة..
- ضروري.. المهم انا غانسافر معاه .. غانجمع حوايجي ثلاثة ايام وهانا راجعة ..
- بصحتك الالة.. شكون بحالك..
رجعت لعند عصام اللي كان كيستناني .. ركبت معاه مباشرة للمطار .. سافرت معاه مشينا لمرزوكة.. حيت انا خاصني باسبور باش نسافر برا.. ولكن الحياة هنا مكان رائع بمعنى الكلمة .. عمري تخيلت راسي نخرج من الحومة.. ولكن خرجت وسافرت ومازال غانسافر.. غانخرج من هاد البلاد كاع غادي نسافر مع يحيى خاصني غير الفلوس باش نوجد كلشي.. غانوجد باسبور بسمية ملاك وهوية .. وغانبدا حياتي معاه .. غانسى كاع هاد الناس كلهم.. دوزت وقت زوين مع عصام.. مشينا ركبنا بجوج على واحد الجمل وبقينا كنتمشاو بيه..
- عايدة .. نتي عمرك بغيتي فحياتك.،
- ههه اه .. ونتا..
- حتى انا.. الحب هو اللي معدبني..
- الله يا ربي .. شكون اللي يعدب هاد الزين..
- وحدة عمية .. مكتشوفش .. ومبدلاني بواحد اخور.. معرفتش شنو فيه هو انا مافياش..
- الحب هو هادا .. علاش نتا ماتشوفش وحدة غيرها..
- عميت ههه ..
- ههههه ..قوللي هادشي اللي مسبب ليك ازمة نفسية هاد الايام..
- اه .. حاولت نبدلها والو.. حتى وحدة ماداخلة عقلي من غيرها..
- الصراحة هبيلة هاد البنت ..
- ههه اه ... ونتي اعايدة .. مازال راكي مع الحب ديالك..
- انا حريرتي حريرة.. انا كنت مزوجة وراجلي جرا عليا للزنقة.. ومازال باغا نطلق منه .. واش تعاوني ..
- نعاونك..
- مزيان.. باش نمشي نعيش مع حبيبي بلا قيود ديك الساعة..
- واش داك للدومين ديال الدعارة..
- الازمة والفلوس والفقر..
- مفهوم..
بقينا كنتمشاو ونهضرو.. هاد عصام قلبو طيب واخا لاباس عليه .. الا انه قلبو زوين وكيبغي غير وحدة ومازال وفي للذكرى ديالها واخا راه مع وحدة اخرى.. مكيهمنيش .. انا خلصني على مهمة خاصني نديرها.. دوزت معاه 3 ايام .. نسيتو فيهم الدنيا كلها .. وحتى البنت اللي كيبغي واللي مرة مرة كيهضرلي عليها..
رجعنا من السفر والرحلة وخلصني عصام .. شافت فيا سحر قالتلي الزهر ياختي ولمن عطاه الله.. شايفة زهري من صغري مشتت .. قولي الله يستر وصاف هادو راه فلوس الحرام .. بغيت نعتق بيهم راسي وصاف .. صونيت ليحيى لقيتو غادي يحماق..
- الو ملاك فين كنتي شحال وانا نصوني كنلقا التلفون طافي فين كنتي .. راني غانحماق..
- الو يحيى.. والو غا بابا كان محيدلي تلفوني.. ولكن دابا رجعولي.. راني عاودتلك شنو كاين.. دابا هو مكيهضرش معايا كاع..
- واخا احبيبة صبري مابقاش بزاف وغاتهناي من هاد المشاكل..
- انشاء الله..
- شوفي المشروع ديالك كلشي عجبهم .. وعائلتي عارضة عليك العشا باش نهضرو فالمشروع كتر وغادي تعطينا افكارك .. واش موافقة ..
- واخا غانحاول نجي..
- غادي تجي.. انا طلبت منهم يوجدو كلشي..
- واخا ايحيى.. غانجي..
- كنبغيك احياتي..
- حتى انا كنبغيك بزاف.. تأليف دودي..
وجدت راسي نمشي بالليل نتعشى مع عائلة يحيى خاص تبان فيا الثباتة.. لبست كسوة صواغي كحلة وطويلة ومشيكة من اليدين وصاوبت شعري وروليتو وطلقتو ودرت ماكياج وعكار حمر جا معايا..وهزيت بوشيط داليد صواغي.. كنت كنبان كلاس .. لا علاقة مع اول نهار شافني فيه يحيى.. شديت طاكسي وبقيت كنستنى فيه يحيى حتى جا عندي لقيتو لابس كوستيم وداير بابيون .. وداير لحية مطراسية اقل ما يمكن ان يقال عليه انه جنتلمان.. زوين بزاف وعاطي العين.. نزل عندي باس يدي ..
- اجمل وحدة شافت عيني.. كنحماق عليك املاك..
- حتى انا كنبغيك ايحيى .. كنبغيك بزاف..
البارت 18
ركبت معاه ومشينا لفيلا ديالو دخلنا وكل الانظار كانت علينا كنا كنبانو كوبل زوين بزاف.. فعلا هو ماشي كان موجد غير عشا واش هادشي كله على شرفي انا .. واش انا نستاهل كل هادشي.. كلشي كان كيستناني.. الجدة ديالو الام ديالو والاب ديالو اللي اول مرة نتعرف عليه... مكيختلفش بزاف على يحيى.. هاذا الشبل من ذلك الاسد.. كيحمقو.. جلست وبانتلي حتى ديك اليف اللي مكتحملني مكتقبلني غير كتخنزر فيا .. باينة كانت حاطة عينيها على يحيى وانا ديتولها علاش غاتقبلني .. جلست معاهم كلشي بدا كيهضر وانا متبتة.. وكنجاوب بثبات.. بداو يهضرو على المشروع والخدامات كيوجدو السفرة باش نتعشاو..
- بابا .. بالنسبة للمشروع ديالي .. ملاك هي مولاتو..
- اه هو مشروع زوين بزاف ولكن مكلف .. غاتحتاج شريك ..
- فكرت فالموضوع ابابا .. ولقيت شريك ..
انا كنسمع ليهم كيهضرو بيناتهم حتى سمعت شي صوت جاي مغريبش عليا "واش تعطلت على العشا" تلفت نشوف وكانت الصدمة قوية بزاف .. مستحيل .. عصام اش كايدير هنا .. ناص يحيى مشا عنقو وسلم عليه بحرارة.. وجابو
- اجي اخويا نعرفك على البنت اللي سلبات عقلي .. ملاك
شير بيديه عندي كأنه كيقدمني ليه اما عصام فتبدل فيه اللول الف درجة مللي شافني ..
- واش هادي هي ملاك اللي صدعتينا بيها ..
- اه هادي اللي خدات عقلي ..
جا عندي عصام ومد لي يديه ونظراته كلها تساؤل.. متشرفين الالة ملاك..
جاوبت بصوت مبحوح .. الشرف ليا.. جا يحيى وبدا يهضر .. هادا عصام اللي غايكون شريكي فالمشروع ديالنا .. هو صاحبي من الصغر .. وكلشي كنديروه مرا ..بقيت مسمرة فبلاصتي .. مقاداش نهضر.. الله يا ربي اش غايوقع الى اعتارف هادا بكلشي داكشي اللي وقع بيناتنا .. وباني ماسميتيش ملاك .. وباللي انا مزوجة.. اش داني نعاودلو شي حاجة.. بقا كيشوف فيا طول المدة حتى هو ماهضرش .. العشا وجد طلبو منا نوضو نتعشاو يحيى شد ليا فيدي وكيعاملني بحذر.. وبلطف .. قرب ليا الكرسي وجلست.. بدا كيحاول يوكلني وانا مبدل فيا اللون وغانطرطق.. وعصام حاضيني..
- ملاك .. فين هو عقلك مالكي سارحة..
- ا.. والو .. غير راك عارف..
- متخافيش احبيبة .. عارفك كتفري فباباك.. ولكن متخافيش حنا غانتفاهمو معاه.. وغانقنعوه..
حركت راسي وانا خايفة.. وبدا كيحاول يوكلني عاود حيت كان باين جدا الارتباك فيا.. مللي كملنا العشا ناضنا نجلسو عاود تاني وانا مكرهتش يخليني نمشي بحالي .. خايفة وكنشوف فعصام فكل لحظة كنقول غايفضحني وغايقول كلشي عليا ليحيى.. شوية طلب مني يحيى رقصة كل الانظار كانت عليا .. وكلهم كانو كيحفزوني ويقولولي وافقي الا عصام.. كان محيد عينيه من عليا.. يحيى كان فرحان بزاف .. درت خاطرو ونضت شطحت معاه رقصة كلاسيكية.. كلشي كان كايشوف فيا يحيى كان فرحان بزاف.. اما انا كان قلبي غايوقف ورجليا كيرجفو.. كنشوف قدامي الفضيحة.. عصام غايفضحني وغادي يشفي فيا العديان .. قربت من ودنو وهمست..
- يحيى انا خاصني نمشي .. مبغيتش مشاكل مع بابا ..
- واخا احبيبة .. مسخيتش بيك ولكن مبغيتش نسبب ليك شي مشكل ..
اعتذرت من عائلته .. وسلمت عليهم وماشفتش جهة عصام .. خرجت مع يحيى وركبت معاه..
- حبيبة حاس بيك اليوما مرتبكة بزاف ..
- اه.. خايفة من الواليد حيت تعطلت بزاف..
- هو مزير عليك بزاف .. عمري شفت شي اب بحالو .. واش كاين شي حد كيغضب من بنتو حيت مقبلاتش راجل اللي بغا هو..
بديت كنهضر فنفسي.. اه يا يحيى لوكان تعرف نوع ديال با.. اللي جرا عليا فنص الليل واللي زوجني على 15 عام بشارف واللي عمرو ماقالي ابنتي..
- هو شايف باللي مصلاحتي هي هادي .. معارفش اني كنبغيك نتا..
- صبري غا نجي نخطبك ونتزوجو غايساليو كل هاد المشاكل ..
- نتمناو..
وصلني لواحد مجمع سكني .. قلتلو غانشد طاكسي باش ميشوفنيش معاه شي واحد ونصدقو فالمشاكل.. فعلا ركبت طاكسي وتأكدت انه حتى واحد متابعني ومشيت للدار..
البارت 19
وصلت للدار .. وانا رجليا فاشلين عليا مقاداش نوقف عليهم.. كنفكر عصام دابا اكيد غايعاود كلشي ليحيى وغادي يكرهني.. وغادي يقرلو باللي انا خدامة فالدعارة ومبنت ناس ما والو.. وباللي انا كدبت عليه.. انا غانهرب احسن ما يدير فيا يحيى شي حاجة.. منقدرش نواجهو.. دوك الفلوس اللي عطاني عصام غانهرب بيهم.. الله يا ربي .. اش غاندير..
بقيت غادية جاية فالدار حتى سمعت الدقان فالباب.. رجليا زادو فشلو عليا .. يكما يحيى هو اللي لحق عليا.. مشيت بتباطئ حليت لقيتو عصام ... مقدرتش نهضر .. كان واقف وحاط يدو فجيبو وداير نص ضحكة..
- لاباس عليك ا ملاك.. ولا هنا نقولك اعايدة احسن...
- عصام .. دخل عفاك وخليني نشرح ليك..
- واخا ها هو داخل.. بشرط تعاوديلي كلشي من aحتى z ..
دخل وبديت كنرجف.. جلس وجلست معاه حتى انا..
- عصام .. انا ولله ماخايبة .. ويحيى تعرفت عليه قبل ما نخدم فهادشي.. وبغيتو ومكنتش قادرة نقولو باللي انا مزوجة.. خفت لا يتفارق عليا وانا كنبغيه بزاف.. و ..
- كتبغيه هو ولا كتبغي فلوسه.. متنسايش باللي درتيلي اللي بغيت مقابل الفلوس.، شنو اللي يخليني نتيق انك كتبغي يحيى لشخصه ماشي حيت هو الوريث الوحيد ديال عائلته..
- كنقسم ليك .. انا كنبغيه لشخصه.. وعمري فكرت ففلوسه ولا خديت منو شي ريال.. فضلت نخدم فهادشي ونطيح بكرامتي غير باش نكون معاه.. عفاك متعاودلو والو عليا..
- انا ميمكنش نشوف صديق عمري كيغرق مع وحدة مكتسواش بحالك ونسكت.. نعطيك اللي بغيتي .. وتبعدي عليه..
- لا منقدرش .. عفاك.. متحرمنيش منو.. انا والله ماباغا منو شي حاجة غير كنبغيه هو.، عفاك .. تيق بيا..
- فين باغا توصلي.. تتزوجي بيه.. واش نتي نسيتي باللي راكي كادبة عليه فكلشي...
- عفاك .. انا اللي غانقوله كلشي .. غير عطيني فرصة..
- موافق .. عاوديله كلشي .. والا غانعاودلو انا..
خلاني فبلاصتي كنبكي.. وخرج.. بقيت انا كنبكي.. انا ممكن نتحمل اي حاجة.. الا فراقي على يحيى.. نموت الى تفارقت معاه.. كيفاش غانقدر نعاودلو... مغاديش يسامحني .. الله يا ربي كيفاش غاندير .. اش هاد الموقف تحطيت فيه.. بقيت الليل كامل منعستش كنفكر فهادشي اللي وقع .. وكيفاش غاندير.. المسلسل كمل .، الغد ليه نضت بكري جمعت شعري ولبست تيشرت وسوفيطما.. وسبرديلة..ولبست نظاظر كوحل .. صونيت ليحيى فيقتو من النعاس .. قلتلو نتلقاو.. قلتلو غانتمشى.. ولحق عليا..فكرت نعاودلو كلشي.. جا بسرعة متعطلش .. جا باسني من حنكي.. وكيفرنس..
- هادا نهار زوين حيت اول حد شفتو هو نتي.. كنحماق عليك..
-حتى انا كنبغيك بزاف.. يحيى كيفاش كتشوفني ..
- ملاك قدامي.. كنشوفك ملاك.. بيضا ونقية...
- اش غادير الى عرفتي شي نهار اني ماشي ملاك.. وماشي كما كتشوفني..
- مستحيل تكوني شي حاجة مختلفة.. انا اللي شايفك.. ملاك.. انا متأكد مليون فالمية...
- يحيى انا ماشي ملاك.،
- باراكة من التواضع.. شوووت.. نتي مشفتيش البنات لوخرين.. انا اللي شفت كيدايرين.. نتي بالمقارنة معاهم ملاك،. انا اللي شايف الفرق احبيبة.. عفاك باراكة من الهضرة على هاد الموضوع .. حيت حتى حاجة مغاتبدلي رأيي فيك.. خلينا نمشيو نفطرو..
مقدرتش نقول والو.. معطانيش فرصة.. كيفاش غانقدر ندير.. هو كيبغيني حب اعمى ومغايتحملش الحقيقة.. كيغاندير .. مشيت معاه نفطرو ومقدرت نقولو والو.. تمنيت يعطيني عصام شوية دالوقت .. مشيت للدار .. يحيى مغيقدرش يتحمل يعرف الحقيقة.. عندي حل وحيد هو اني نمشي من هنا ولا نهرب معاه.. ونقولو مايقول لحتى واحد باللي انا معاه.. بقيت كنفكر دازت يوماين وانا مكنقدر نفكر ولا نخرج وسديت التلفون .. تلفت بمعنى الكلمة..
جات عندي سحر..
- عايدتي.. جبت ليك خبر زوين بزاف..
- اما هو..
- جبت ليك همزة .. كليان مرفح نضربو ضربة صحيحة حتى ليوما..
- بعدي مني انا مبقيتش غانخدم فهادشي باراكة .. داكشي اللي فات وبزاز..
- سمعي مني.. هادي همزة صحيحة ومنها تقدرس تجمعي دوك الفلوس وتمشي من هنا تبداي حياتك فمرة..
فكرت عندها الحق انا مازال خاصيني شوية الفلوس باش نخوي هاد الدار.. وباش نبني حياتي .. مخاصنيش نبقا مع هادي غادي تجيبلي غير العار..
- اناموافقة.. ولكن اخر مرة هي هادي ..
- هكاك نبغيك .. كنحماق عليك مللي كتفهمي .
البارت 20
مشيت وجدت راسي .. لبست كسوة معرية ودرت احسن ما عندي من العطور.. هادي اخر مرة ندير هادشي.. وغانتوب من بعد.. مللي جاو دوك الرجال.. شفت فيهم .. معمري شفتهم من قبل.. قصرو معانا وشطحنا ونشطنا .. دوزنا وقت زوين ليهم .. انا قلبي كان مقبوظ.. كنفكر غير فعصام واش غايقول ليحيى ولا لا.، دازت الليلة .. وانا فأحضان داك الرجل .. محسيتش حتى دخلو علينا البوليس.. منين جاو ومنين دخلو معرفتش.. جاو هزوني هكاك وانا عريانة انا وداك السيد وحتى سحر وصاحبها .. غطاونا بايزار وبقاو كيجرجرو فينا والجيران كلهم كيسبو ويعايرو .. انا كنفكر غير فلفضيحة .. الله يخرج هادشي على خير.. هزونا وبداو يذلو فينا .. مللي وصلنا لكوميسارية بانلي عزيز ... كملت،. هادشي اللي بقا.. بقا كيشوف فيا بديك الحالة .. خلتونا شحال نستناو .. حتا دزنا للنائب العام.. انا قالولي عندك تهمة الفساد والدعارة والخيانة الزوجية..اما سحر فقالوليها عندك تهمة الدعارة والفساد وصاف.. انا قلبي كان غايوقف.. اش غايطرا من بعد.. خرجونا من عندو باش يديونا للحبس لقينا الصحافة فاستقبالنا بداو يصورو فينا .. بديت نغطي وجهي.. يحيى انا صافي خسرتو الى الابد.. عطاونا شي لبسات مقطعين وخانزين،..دارونا فواحد الزنزانة فيها غير الشمكارات ..كلشي عاطية منهم ريحة الكارو والشراب.. والخنز.. محملتش راسي.. اش داني لشي زمر .. انا كنت معززة مكرمة فدار عزيز.. اش داني نخرج لوكان غير عززت راسي عليه داك النهار .. كاع ميوقعلي هادشي كله.. لوكان خلاني با فحمايته من النهار اللول كاع مكنت نوصل لهادشي.. اش جابني لعندك اسحر نتي السبب ديال هادشي.. لوكنت تلاحيت فالزنقة اهون ليا من هاد الكارثة .. نتي السبب ...
- سكتي حنا غانخرجو من هنا .. دوك الرجال اللي كانو معانا غايخرجونا..
- الله ياخد فيك الحق..
بقينا مع هادوك الشمكارات اللي وجههم كيخوف.. كل وحدة كتر من لوخرا .. تكمشت باش حتى وحدة متهجم عليا.. داني النعاس وانا كالسك فالارض والبرد.. وحنا ملابسين والو.. الغد ليه فالصبح جاو داونا .. باش ندوزو على القاضي.. جا حتى عزيز .. وعرفت بعدما دوا القاضي انه هو اللي بلغ البوليس .. ولد الحرام.. واصر على الشكاية ديالو ومبغاش يتنازل .. القاضي ثبت فحقي التهم المنسوبة ليا وحكم عليا بسنتين سجنا نافذا مع الاشغال.. اما سحر حكمو عليها غير بست شهور .. كنت غانسخف تما .. دارولي المينوط وهزوني داوني للحبس .. كلشي طرا بسرعة .. اللي قهرني هو يحيى كيفاش غايكون شعورو مللي غايعرف الحقيقة.. ولكن عزيز باش عرفني مع سحر.. اكيد قلب عليا ولا شافني شي واحد معاها.. وقالهالو.. الله ياخد فيه الحق.. باغي غير ينتاقم مني حيت مرغبتوش.. وحيت بقا بوحده.. دموعي طول الطريق كانت على خدي.. كنبكي وخايفة بزاف.. واش صافي هادي هي نهايتي.. صافي انا غاندوز عامين فالحبس ومللي غانخرج منو غانمشي للزنقة.. علاش .. مللي وصلنا للحبس جرو فيا وعطاوني واحد اللبسة.. دخلت داك البلاصة واسعة بزاف .. حسيت بالضيق مع الدخلة.. بقاو كيجرو فيا حتى عطاوني لواحد الحارسة اخرى.. كل مفتاح كتفتح بيه شي باب كان كبير والصداع ديالو فودني .. محملتش الوضع .. صمت قاتل .. حتى وصلات لواحد الزنزانة دخلاتني بانولي الناموسيات وحدة على وحدة.. وواحد السرجم صغييور مشبك فالقنت.. وفالجنب كاين طواليط وروبيني .. اوو كلشي فالبيت.. مالي بغيت نجي لاوطيل خمس نجوم.. دخلاتني ووراتني ناموسيتي.. وانا مرعوبة.. نقزات واحدة من واخد الناموسية باينة فوجهها شمكارة..
- الصلاة والسلام عليك ارسول الله.. يويويويوي... مرحبا بيك وسط عائلتك احبيبة تفضلي تفضلي .. تبغي نصاوبولك اتاي والملوي باش نرحبو بيك..
انا بقيت جامدة فبلاصتي وخايفة.. اش هاد الاشكال غانعيش معاهم عامين كيفاش غانقدر .. عيطات عليها وحدة قالت ليها .. خليها راها مازال مصدومة وخايفة.. كلنا هاكا كنا نهار دخلنا اول مرة .. متخافيش الساطة دابا تولفي..
انا كان يصحابلي باللي تولدت وعشت فأسوء وسط على وجه الارض.. صدق كاين الوسط اللي خايب كتر منه... مشيت بحذر لبلاصتي وجلست كنبكي.. اش هاد الوحلة رميت راسي فيها .. لوكانت حدايا غير سحر دابا ولكن هي داروها بوحدها وانا داروني مع اللي عندهم حكم قدي.. بقيت مكمشة وخايفة.. شوية فاقت من النعاس وحدة غير شوفاتها كيخلعو وصوتها كتار .. غوتات عليهم كلشي صقلو..نزلات فورمتها دايرا بحال شي دراكولا .. كتخلع شمكارة بمعنى الكلمة.. جات عندي ديريكت.. شافت فيا تخلعت ..
- واش نتي جديدة هنا ؟؟
- اااا اه .. جيت دابا ..
- شحال غاتبقاي معانا ..
- عع عماين..
- شوفي الزوينة.. الى باغا تبقاي بخير ودوزي هاد المدة بخير .. ديري داكشي اللي غانقولك.. وخلصي ثمن حمايتي هنا ..
- واخا غانعطيك اللي بغيتي ولكن حتى تخرج صاحبتي تجيبهوملي حيت معندي حد ..
- شناهوا...كالك نتسناو صاحبتها .. ضحكو البنات ضحكو هاهاهاهاها .. شوت ..
شداتني من الكول ديالي وطلعاتني.. شوفي احبيبة.. الهضرة اللي نقول مكتعاودش .. الى باغا متخلصيش خدمي بدراعك.. سمعتي ..
- ووو واخا ..
- نوضي صبني حوايجي راهم فين موسخين .. واياك نلقا فيهم شي طبعة واخا صغيرة... متلومي الا راسك...