البارت 1
يوم مميز بالنسبة ليا ،..اليوم غنبدا مشروعي ..مشروع حياتي ..اكبر مقاولة فالمدينة ..كلشي كان كيقولي باللي صعيبة عليا وباللي النسا ميقدروش يدخلو مجال البناء ..وانه مقتصر غا على الرجال ..لا انا غنأكد ليهم باللي هادشي مكاينش وباللي حتى النسا عندهم مايكولو ..اه سمحولي درتليكم هاد الدخلة السريعة ..تحمست شوية ..انا سميتي قمر ..قمر ساطع ..هاهاها فعمري 25 سنة ..زوينة على ما يقولون .من عائلة ميسورة ومثقفة وواعية وكتشجع البنت انها توقف وتبني احلامها ...مكانش عندي مشكل من هاد الناحية ولكن المجتمع خايب بزاف وكيطيح المرا مع انها نصف المجتمع.عاونوني قريت وشجعوني نحقق احلامي خصوصا بابا ..استاذ الاجتماعيات المحترم ..ومننساش صديق طفولتي عبده ..اقصد عبد الخالق ..مولفا كنعيطلو عبده ..عزيز عليا بزاف ولكن انا معزيزاش عليه وانما تعداها لشيء اخر ..هادشي اللي كنحس من خلال الغيرة ديالو .ولكن لا عبده صديقي وخويا وغيبقا هكاك وعمر ميتبدل ..بديت مشروعي والخدمة كانت كثيرة..كلشي كان هو هداك وكيما بقيت..صرامتي فالخدمة ومع الرجال هو اللي كان سبب نجاحي ..فاتت الايام وانا كنكبر نهار على نهار وكنتشهر ..وليت ناجحة فعملي بزاف وعبده معايا مساندني دائما ..شحال زوين تكوني ناجحة فحياتك ...الفرحة الكبيرة كانت نهار نجحت فصفقة الوحدات السكنية وخديتها انا ..صفقة تغير مجرى حياتي حيت غتعرف بيا بزاف وغنولي مشهورة وكلشي غيبغي يتعامل معايا ..هي طريقي للنجاح ..بالليل مللي ساليت الخدمة لقيت عبده كيستناني بالطوموبيل وصلني للدار ومللي دخلنا لقيت مفاجأة كتسناني ..عبده وعائلتي كانو موجدين ليا حفلة بمناسبة نجاحي ..محسيتش براسي حتى عنقت عبده ..كلشي فرحان ..حسسوني باللي واقفين معايا ...كلشي كيبارك ليا ..نطقت خالتي ام عبده :تبارك الله على بنتي عقبال نفرحو بيكم فالعمارية انشاءالله ..ضحكت وقلت :انا اللي غنختار لعبده العروسة
ام عبده:وايلي علاه كاين ما حسن منك احبيبة
ماما:غيجيو مع بعضياتهم
انا:هههههههه انا وعبده؟مستحيل واش كاين شي خوت كيتزوجو
تما حسيت بعبده تزير ومعجبوش الحال استأذن وقال :سمحولي غنمشي عييت بزاف وخاصني ننعس ..كلشي حس بيه الا انا ..مكنتش باغا نعطيه امل كاع مع اني اكثر وحدة عارفاه كيفاش كيفكر ولكن انا عمري شفت فيه اكتر من اخ ..انا متأكدة بان الله غيجيبليه شي وحدة احسن مني اللي غيتزوجها وغتبغيه ..
-عند عبده :
معجبنيش الحال مللي صداتني ومبغات تعطيني حتى فرصة انا اكثر واحد كنبغيها فالدنيا ونموت على التراب اللي كتمشى عليه ..
ااااه يا قمر ..فوقاش تحسي بهاد القلب اللي كيتعدب على قبلك ومستعد يموت الف مرة ومتحسي بأي نسمة ..كنبغيك اقمر..
البارت 2
الغد ليه نضت كللي حيوية مشيت لخدمتي ناشطة وانا كنسوg وطالقة الموسيقى ومحيحة ..شوية وهو يخرجلي واحد فالطريق فرانيت بجهد ولكن ضربتو ..خرجت من الطوموبيل بسرعة نشوفو...بقا كيتألم
-واش..واش نتا لاباس ..اش كيضرك نوض نوض نديك لسبيطار ..
ارتبكت وهو كان كيتألم وشاد يدو شديت فيه وتكا عليا ..وركبتو فالطوموبيل معايا وديتو للسبيطار ..بسرعة دخلتو وشافو الطبيب ..طمني عليه وقالي متخافيش كسر خفيف فيدو
دخلت عندو ..هو كان متكي وناعس بحال الى سبع سنين منعس الله يا ربي اش هادا ياك قالك غا كسر بسيط مالو داخل فغيبوبة مشيت عندو شفت فيه يالله اش هاد الملاك ...محسيتش براسي حتى بقيت كندوزلو على شعرو وكنبعبلو فلحيته الخفيفة عجبني الحال بزاف ..اول مرة كنتقرب من شي راجل هاكا واخا خدمتي كلها مع الرجال ولكن هادا غير ..حسيت احساس زوين معاه ..حل عينيه بشوية ..شاف فيا وقالي ..واش مت ومشيت للجنة ولا ؟؟ انا وليت حمرا ديك الساعة ولكن فرحت حسيت بفرحة عارمة ..قال : شكون نتيا واشنو كندير هنا
-انا: نتا فالسبيطار ..انا ضربتك بطوموبيل وجبتك هنا واش معقلتيش؟؟
- اه اه عقلت ..لوكان صحابلي غيوقعلي هاكا كون قطعت الشانطي بلا منشوف شحال هادي
- خلعتيني عليك بزاف ..قولي شنو سميتك ؟
-إياد ..وانتي
-قمر
-اسم على مسمى ..انتي فعلا قمر
حشمت وابتسمت ونضت ..انا غنمشي دابا غندوز عندك فالعشية ..
-واخا
مشيت وانا حاسة براسي باغا نطير ..اش هادشي من امتا وانا كنعرف شي حاجة سميتها المشاعر ولا الاحاسيس الله الله ايلا بقيت على هاد الحال غادي ندير بحال المراهقات ..مفهمتش شنو وقعلي كنت مواجدا راسي ندابز كما العادة ونقولو واش مكتشوفش واش نتا اعور ولكن وقع العكس ..حنين فوجهه وحنين حتى فهضرتو كلشي فيه حنين ..احم احم نمشي نخدم على راسي احسن لي
..وصلت للخدمة كلشي مخلوع وكيقولي مالكي تعطلتي ..
عبده :قمر خلعتيني عليك فين كنتي ..
انا :غا سكت اليوما درت كسيدة
عبده:كسيدة ؟؟😨 موقعلك والو نتي لاباس
انا: لاباس لاباس ..ولكن واحد السيد هو اللي ماشي لاباس ضربتو بالطوموبيل وهو دابا فالسبيطار
اوكي ماشي مشكل ديك الساعة نطمائنو عليه من بعد المهم هو انك لاباس دابا
متسوقتش لكلامو ومشيت للبيرو ديالي وبقيت كنفكر فيه يا ربي اش هادشي خاصني نخدم ..عبده شنو عندنا اليوما
عندي ليك اخبار زوينة بزاف ..مندوب شركة الرضا المعمارية اتاصلو بينا وبغاو اتعاقدو معانا ..درنا معاهم موعد غدا غنتلقاو بالمدير ديالو
-خبر زوين بزاف هادا ..شركة كبيرة فحال هادي ممكن تطلعنا الفوق وغادي تعاونا بزاف ..مزيان غادي نشوفوهم غدا ونتعاقدو معاهم
...وصلت العشية وجيت خارجة وقفني عبده ..اجي اجي اجي ..فين غادية ؟؟
غادية للسبيطار نطل على السيد اللي ضربته الصباح بالطوموبيل واش نسيتي
-لا منسيتش ولكن كنت باغي نتغداو مرة والزيارة غتأجل ماشي كيموت
-لا انا غنمشي حيت واعدته
-صافي واخا هانا جاي معاك باش ميبقالوش منا الحال
مشينا انا وعبده وطليت على اياد ..إياد فرح بزاف مني شافني وانا اطمأنيت عليه ولكن عبده مكانش فرحان ابدا ..مشينا وهو طول الوقت بقا ساكت
-دودو؟ مالك ساكت
-والو ولكن كنتمنى من هنا الفوق متيقيش فأي واحد فين عرفنا هادا شفار ولا من هادوك اللي كيتعرضو للطوموبيلات ..وبغا يبروفيتي منك شي باراكة
-دو كالم احبيبي دو كالم ..مالك على هاد العصبية ..اولا مبايناش فيه شفار ولا نصاب ثانيا انا ماشي درية صغيرة باش تدار بيا ..ثالثا متبقاش تندمتي حيت كندخلك فكل صغيرة وكبيرة فحياتي
-سمحيلي اقمر مقصدتش نرفع صوتي عليك ولكن انا خايف عليك بزاف ونتي عارفة هادشي مزيان
-عارفة ولكن ...
-شششش صافي سمحيلي نمشيو نشربو شي حاجة؟؟
-الخدمة ا عبده الخدمة اهم
البارت 3
عبده:هاد البنت غتسطيني علاش كنضعف معاها حتى هاد الدرجة علاش ..كنبغيك اقمر ..
مشينا انا وعبده كملنا خدمتنا ..الغد ليه يوم جديد نضت صابت راسي وبلا منحس شديد الطريق للسبيطار مللي دخلت سمعت الدباز ..لقيت واحد المرا مع اياد كتبكي غا شافوني سكتو ..
-اياد لاباس عليك ؟ جيت نطمئن عليك ..السلام الالة
-السلام ابنتي ..انا غنمشي تهلا فراسك اولدي ..
مشات المرا ..كانت مرا جميلة بزاف ماباينش فيها السن وانيقة ومهلية فراسها بزاف
-اياد شكون هاد المرا وعلاش كتبكي
-خلينا منها نتي لاباس عليك ..فرحت بزاف ملي شفتك
-جيت نطمائن عليك كبقيتي شوية
-وليت لاباس حيت شفتك
-شنو قالك الطبيب
-قال باللي يمكن نخرج اليوما
-عظيم ..
بقينا كنهضرو شحال محسيناش بالوقت ..تليفوني بقا كيصوني بزاف ..اووف مالهم هادو
-شكون كيصوني عليك ..
-من الخدمة ..
-جاوبي تكون شي حاجة مهمة
-الو عبده
-قمر فينك نتي راه عندنا اجتماع واش نسيتي ..هاد الناس مهمين ومخاصناش نخسرهوم اجي دغيا
-اووو نسيت واخا انا جاية
سمحلي اياد بزاف غنظطر نمشي عندي اجتماع مهم ..
-واخا الخدمة اهم ..بالسلامة عليك ..نتشاوفو
-انا غنخليلك نمرتي ..وقتما عندك الوقت غنكون فرحانة بزاف نتشاوفو
-اكيد
مشيت دغيا وفرحت حيت بديت نهاري بيه ..اول مرة كنرتاح هاكا مع شي انسان ..مشيت للخدمة ديالي دخلت وبدا عبده كيغوت عليا علاش تعطلتي والناس كيستناو ..وانا ماسامعة حتى حاجة ..مشيت دخلت ديريكت لقاعة الاجتماع ..كلشي كانت عيونهم عليا ..
-سمحولي تعطلت عليكم ..انا قمر صاحبة المقاولة ..وكيسعدني نستقبلكم اليوما
-انا نور الدين مدير عام شركة المعمار ..اكيد سمعتي بيها
-اكيد وكيسعدني نتعاقد معاكم ..غيكون شرف كبير ليا ..
داز اجتماع ناجح وقدرت نقنع اعضاء شركة المعمار بالشروط ديالي ..سي نور الدين كان متفاهم جدا ..مللي جاو يخرجو :
-ميسيو نور الدين انا سعيدة حيت اتافقنا
-انسة قمر ..كيسعدني ندعوك للعشا اليوما ..غنكون فرحان بزاف الى قبلتي ..
-امم واخا علاش لا ..غنكون فالموعد انشاء الله
-مزيان بزاف ..غنحجز طاولة فالمطعم الايرلاندي الكبير مع 8 بالليل
-جميل ..غنجي انشاء الله ..بالسلامة عليك
مشا السي نور الدين وتلفت لقيت عبده مورايا
-بسم الله الرحمان الرحيم ..
-مالك شفتي جن
-من امتا وانت هنا ..خلعتيني
-من وقت اللي كنتي كتواعدي مع داك فارس الاحلام
-اويلي شمن فارس الاحلام ..
-منعرف سولي راسك ..بأي مناسبة تقبلي العراضة ديالو للعشا
-عبده..الناس عاد بدينا معاهم ومغنخسرش فرصة بحال هادي على مجرد عشا ..اش عندو ميوقع ياك غا عشا
-ديري اللي عجبك اقمر انا خايف عليك من الذياب
-كون مهني ..انا لحمي مر وحتى واحد ميقدر ياكلو بسهولة
البارت 4
بالليل وجدت راسي وقاديت نمشي نتعشا ..كنبان سيدة اعمال انيقة وخاص نبانلو هكاك ..باش يقتنع باللي انا قد المسؤولية وقد التعاقد اللي دار معايا ...ميمكنش نضيع حاجة بحال هادي
مشيت للمطعم الموعود لقيت السي نور الدين فانتظاري ..استقبلني بسعادة وطلب مني نجلس بعدما جر لي الكرسي ..هادشي كلله مكانش اهمني قد مكان يهمني يقتنع بخدمتي
-جيتي زوينة بزاف
-شكرا ليك ..عرفتي المقاولة ديالي كنخدم فيها بحزم ومعنديش الاخطاء ويمكنليك تتأكد من هادشي
-اه عارف نتي معروفة ..قوليلي فين كدوزي نهاية الاسبوع ..يمكنلينا نديرو رحلة انا وياك نتعارفو اكتر
-حتى نهاية الاسبوع كنخدم فيه ..وقتي كله للخدمة ..انا عندي افكار لمشروعنا المشترك غيعجبوك بزاف وغادي ...
-ممكن منهضروش على الخدمة ..الا سمحتي انا جيت نعرفك نتي حيت مهتم بيك نتي ماشي بالخدمة ..وماتخافيش كلشي غايكون كيما بغيتي
-امم ..كان يصحابلي هادا غايكون عشاء عمل
-لا ابدا ..نتي ..الصراحة انا معجب بيك بزاف ..كلشي كان كينتظر يعرف شكون غيختار هاد رئيس مجلس الادارة لاكبر شركة فالبلاد كلشي كان محتار ..قدامي كل انواع البنات ..ولكن انا كانو عندي مواصفات خاصة ..كان كيهمني نكون المرأة اللي غنختار ناجحة ..وجميلة..وذكية تماما بحالك ..ولحسن الحظ لقيتك ..ومامستاعدش نفرط فيك
جبد شي حاجة من جيبو ..علبة فيها خاتم من الدياموند ..باينة فيه غالي بزاف ..قمر تتزوجي بيا ؟
-صدمتيني وزربتي عليا ..سمحلي خاصني نمشي
شدني من يدي عفاك بقاي ..عارف زربت عليك بزاف ولكن انا فغيمون كنهضر بالصح ..شوفي خودي راحتك فالتفكير انا مبغيتكش تجاوبيني دابا وبغيت تكملي عشاك على خاطرك ..وطبعا هادشي مغيأترش على علاقتنا فالخدمة ..عفاك بغيتك تفكري مزيان ومتسرعيش فالجواب واللي عارفو اني مقتانع بيك نتي 100%
كملت العشا ومهضرتش وهو طول الوقت كان كيهضر وكيحاول يخلق بينا جو وانا كنتصنت بالسيف
وصلني للدار وقالي ..نتمنى تفكري فداكشي اللي قلتلك عفاك قبلي ..
ودعتو وطلعت للدار ..اش هاد الوحلة انا فيها ..السيد باغي يتزوج دغيا ..بقيت كنفكر ومهضرت مع تا واحد ..شوية جا فبالي بابا ..لا مازال الحال على انني نقولهاله ..من الاحسن ننعس
الصبح فقت ولبست حوايجي وقررت ننسى داكشي ديال البارح مؤقتا ..مشيت الخدمة تلاقيت عبده فالباب كيستناني ..الله اكبر واش كنتي بايت هنا
-لا ...ولكن فيا الفضول نعرف كيداز العشا ديال البارح
-عادي عشاء عمل كبغيتيه يكون
-متأكدة ؟
-وفاش هضرتو كاع ..وماعطاك والو ؟
-واش كنتي تما وكتراقبني ولا..وعلاش ماجيتيش تجلس معانا احسن اهون من الفضول ديالك
-لا لا انا فاين نعرف اينا مطعم مشيتو ..غا الفضول وصاف
-اه فضووول ممم الله يجعلني نتيق
-ايوا وشنو قالك وشنو بغا
-عبده باراكة من الاسئلة ماعندي خاطر ليك صباحة لله
-مقلنا والو مالكي معصبة ..صافي تهدني
بقيت خدامة النار كامل ..وانا نسمع تيليفون كيصوني فواحد اللحظة جاوبت ..
البارت 5
الو شكون معايا
-قمر .. انا إياد
-إياااد ..لاباس عليك
-لاباس ..بغيت نشوفك اليوما الا كان عندك الوقت
-اكييد علاش لا
-مزيان اذن نتلاقاو فالحديقة العامة من دابا ساعة
-واخا غنجي انشاء الله
الله يا ربي ..اياد نزلي من السما ..نفوج من هاد الغمة اللي شاداني من الصباح
مشيت تلاقيت اياد
-مواعيدك هي هاديك
-وانا نقدر نتعطل عليك ..كبقيتي شوية لاباس
-انا لاباس الحمد الله ..قوليلي واش بغيتي نمشيو لمدينة الملاهي
-واوو شحال هادي مفكرت فيها ...طبعا بغيت
-مزيان
مشينا لعبنا فكل الالعاب خصوصا اللي كتخلع ..وكنت كل مرة كنتخلع فيها كنشد فإياد كنزير عليه بزاف وكنغوت ..ولكن دوزنا نهار ولا اروع مسخيتش بداك البلاصة ..خرجت فيها هموم وغموم الدنيا كلها ..الله ياربي شحال ارتاحيت
-اياد شكرا بزاف على هاد النهار
-شكرا ليك نتي ..فوجت معاك بزاف
-يالله بالسلامة ونتلاقاو مرة اخرى انشاء الله
-انشاء الله
مشيت للدار وانا الراحة ديال الدنيا فيا دخلت وانا نلقا الدار مقلوبة
بابا: بنتي فين كنتي تخلعنا عليك
عبده :قمر فين كنتي نهار كامل ولاش طافية تليفونك وفين كنتي
انا:مالكم بسم الله عليكم ..اشواقع وعلاش كتسولو اول مرة تسولو فين كنت
بابا:بنتي تخلعنا عليك قالينا عبده باللي النهار كامل مختفية ومكنتيش فالخدمة
انا:عبده ..عاود تاني اعبده ..ياك قلتلك الف مرة انا ماشي درية صغيرة وماشي ضروري تعرف فين مشيت ومنين جيت
عبده:واخا حنا تشوشنا عليك وصاف ..يالله قولي فين كنتي من الصباح وطافية تليفون
انا: كنت...كنت .. ماشي مهم ..تصبحو على خير انا عييت وبغيت ننعس
دخلت لبيتي وخليتهم ...مللي شعلت التليفون لقيت عشرات المكالمات طبعا عبده ..اوووه وحتى سي نور الدين مازال كنتفقد حتى صونا اوووف اش بغا تاني
-الو لاباس عليك السي نور الدين
-لاباس ونتي ..لاش كنتي طافية تيليفونك النهار كامل وانا نصوني
-علاش ياك لاباس واش كنتي باغي شي حاجة
-لا غا تشوشت عليك حيت صونالي عبده كيسول واش نتي معايا وقالي راكي مختافية من الصباح
-عبده عاود تاني ..هو كيكبر الموضوع انا بخير متخافش وماشي ضروري نقول لاي واحد شكاندير وشنو غاندير
-من حقك ..قمر ..واش فكرتي فداكشي ديالنا ..انا مستعد نجي نخطبك رسميا فوقاشما بغيتي
-مازال ..خاصني شوية دالوقت اكتر
-واخا كيما بغيتي خودي راحتك ..كيما قلتلك انا مامزروبش
-واخا تصبح على خير
-تصبحي على خير
سديت معاه ..وفكرت نصوني لاياد
-الو اياد
-قمر لاباس عليك
-لاباس لاباس ..اممم بغيت نشكرك على هاد النهار ..شكرا على كلشي
-معندك علاش تشكريني وايلا بغيتي نعاودوها مرة اخرى معنديش مانع
-اكيد علاش لا
-تصبحي على خير
-وانت بخير
نعست مرتاحة بزاف يمكن حيت حتاجيت يكون صوته اخر صوت نسمعه وننعس
صبح صباح جديد وكما العادة مشيت لخدمتي المتواضعة ..ودوزت نهار زوين حتى جا عندي عبده بدا كيهضر حتى وهو يجبد نور الدين
-مالو عاود
-شنو بغا منك
-بغا يتزوج تهنيتي دابا
سكت شوية وهو يقول :ونتي شنو قولتيلو شنو جوابك واش موافقة تتزوجي بيه
-كنفكر
-يعني ممكن توافقي
-ممكن ..معرفتش
حسيت بيه تزير وخرج
-عبده..عبده
مشا ..اوووف مالو هادا عاود
عند عبده
مستحيل نخليك تكون لشي واحد غيري اقمر مستحيل اما تكوني ليا او مغتكوني لحتى واحد كاع ..
البارت 6
بقيت خدامة حتى جا عندي عبده قالي :قمر بغيت نقولك واحد الحاجة
-قول انا كنسمعك
-انا كنبغي ليك الخير ومبغيتش طيحي فشي حاجة خايبة
-شوشتيني شنو بغيتي تقول
-داك السيد اللي بغا يتزوج بيك راه ميصلاحش ليك
-شكون
-نور الدين
-اه ..وباش عرفتي نتا ميصلاحش ليا ..يمكن يصلاح ليا ..هو ناجح فخدمتو ورئيييس مجموعة شركاااات المعمار ...يمكن هو اللي غيحقق ليا احلامي ويوصلني نولي سيدة اعمال كبيرة ...(بغيت غا نشد فيه )
-ولكن ..وشخصيته والماضي ديالو وشنو كيدير دابا وسمعته ..كاع هادشي مكيهمكش ..كيهمك غا المنصب والفلوس ..
-وشكون قال باللي خايب ..السيد جنتل مان ..ومحترم او..
-لا ماشي محترم
-وفين شفتيه
-شفتو وغاتشوفيه حتى نتي ..يالله معايا
-واخا اسيدي ها حنا موراك ونشوفو شنو كاين
مشينا انا واياه حتى وصلنا لواحد الاوطيل ..مشا عبده بطريقته سول فالغيسيبسيون
-سلام انا موظف عند سي نور الدين ..ممكن نعرف اينا غرفة هو محتاج توقيع ضروري منه
الموظف:تفضل اسيدي ..كما العادة فالغرفة 37
-شكرا بزاف
انا:واش مخفتيش تفضح
عبده:متخافيش انا عرفت باللي هو موصي الاستقبال الى جا عندو شي حد من الشركة يطلع عنده
طلعنا وطلب مني عبده نجلسو نستناو ونراقبو ..بقينا بزاف كنراقبو حتى جاني الملل وقلتلو خلينا نمشيو انا ماعارفا اش جابني معاك ولاش قالي عفاك صبري غا شوية نزيدو نستناو ..انا مازال كنتناقش معاه وهو يتفتح باب الغرفة نااري اش داكشي شفت خارجة واحد البنت قرطاااسة لابسة شوميز مزيرة وصدرها خارج لبرة وصاية قصيرة عندها طاية خطيرة وخرج معاها السي نور الدين لابس غا بينوار كان كيودعها وهي كتحلون عليه وكتقولو نتشاوفو اعمري ..بقيت مصدومة هاد عبده عندو الحق ...
عبده:شفتي هاداك اللي بغيتي تزوجي بيه انا عرفت باللي هو كل نهار مع وحدة فشكل فنفس الغرفة ومازال غنوريك حاجة اخرى بالليل
انا:واش مازال كاين شي حاجة اكتر من هادي
عبده :طبعا ..وغتشوفيها بالليل
وصل الليل وانا كنستنا على احر من الجمر فيا الفضول نعرف شنو هاد الحاجة اللي اكتر من انه يجيب البنات يباتو معاه مع انه مكانش يهمني بقدر ماكنت باغا نلقا عليه شي سبة باش نرفض طلبه ومنها نتهنى من صداعو ..في كل الاحوال ماباغاهش ومغنتزوجش شي حد اللي مكنحس اتجاهه بوالو ..مشيت مع عبده ..حتى لقيتو دخلني لواحد الكازينو ..اوووف انا ماشي ديال هاد لبلايص لاش مدخلني هنا دابا يشوفني شي واحد من اللي كيتعاملو معانا داخلة هنا وغادي تتمس سمعة ديالي فالخدمة
عبده: ماتخافيش اصلا كلهم غاتلقايهم هنا ..حتى واحد ما سوي بحالك
دخلنا حتى شفت اللي ميتشاف منظر مقزز سي نور الدين جالس فالطابلة دالقمار والكارو ففمو وكاس الشراب حداه والكارطة فيديه والبنات العريانات محاوطين بيه كل وحدة منين كتقيسو ..اش هاد بنادم
عبده:هادا اللي بغيتي تتزوجي هاكا عايش حياتو فالسكرة والقمار والبنات والكماية ..كل نهار هنايا ..كل نهار بنفس الحالة ..هادي هي حياتو ونتي بغا يديرك غا بريستيج ماشي كيفما كتخيلي
مخليتش عبده يكمل كلامه حتى مشيت وقفت لنور الدين عند راسو ..هز عينيه شافني مخنزرة فيه تخلع :قمر ..اش كاديري هنا
انا:والو غا كنت باغا نعطيك فرصة ونشوفك واش فغيمون انسان كيستحق يكون راجلي ولا لا ولكن ماراجل ما والو ..سي نور الدين من هنا علاقتنا مغاتكون الا فحدود الخدمة وصاف ..مبغيتش نسمع منك سيرة الزواج مرة اخرى ...مشيت وخليتو كيعيط ..قمر ..قمر ..جريت طيارة وكنت خفيفة عليه حيت كان سكران وماهازينوش رجليه
عبده كان فرحان بزاف ولكن انا كنت كتر منو حيت تهنيت من داك الحمل اللي هزيت فوق كتافي ...
البارت 7
نضت الصباح قاديت راسي وناشطة بزاف ..مشيت لخدمتي كالعادة ولقيت عبده واقف مخنزر فالباب ..مالك اوعدي ؟
-دخلي وتشوفي براسك
دخلت ولقيت السي نور الدين جالس وكيستناني غا شافني وهو ينوض
-قمر ..عفاك سمعيني وعطيني فرصة نشرحليك داكشي اللي شفتي البارح
-اهلا ميسيو نور الدين ..كاين شي حاجة جديدة بخصوص الخدمة
-قمر عفاك متتعامليش معايا هاكا ..عفاك سمعيني
-علاش غنسمع تبارك الله كلشي شفتو بعيني البارح
-لا مشفتي والو هاديك ماشي حقيقتي متحكميش عليا ..شوفي صاحبي هو اللي داني معاه حيت لقاني مهموم وكنفكر واقترح عليا نمشي معاه ولكن انا ندمت عمري نعاود نمشي لدوك البلايص
-مزيان تيقتك ..ايوا والاوطيل ..زوينة داك البنت اللي كانت معاك البارح وحتى الاخريات زوينات ..كتجيب معاك غا الزين وحتى اختيارك لديك الغرفة اللي كل نهار نتا فيها وحتى الكازينو باين مزيان باللي نتا client fidelle عندهم كلشي كيحتارمك وكيدير بحسابك تما وحتى البنات اللي تما كيستناوك كل ليلة
تزنك وحمار مللي قلتلو داكشي..كملت كلامي وشفت فيه بنظرة كلها ثقة ..شوف فيا مزيان السي نور الدين ..انا راه قمر .وعندي عيون فكل بلاصة ...ومتستاهنش بيا ومتفكرش بأنك ممكن تخدعني ولا تدبرها بيا ..
تكيت على الكرسي ديالي وحطيت رجل على الاخرى وشفت فيه وقلت :وبالنسبة للخدمة اللي بيناتنا ..حنا معندنا مانع نلغيو العقد وكل واحد يمشي بحالو
-قمر..انا قلتلك من الاول الخدمة معندها علاقة بالمسائل الشخصية ..انا مللي طلبتك للزواج مطلبتكش فالشركة ..شوفي فيا ..انا معجب بل وطايح حتى الاخر فيك ..شخصيتك القوية وذكائك وجمالك نتي اللي بغيت نتي اللي تمنيت انا ميمكنش نتخلا عليك وعلى حلمي ..قمر انا غنتغير كنواعدك غنتغير ..عفاك متخلايش عليا ..وعطيني فرصة اخيرة
-اللقاء سالا ميسيو نور الدين عندنا الخدمة ..يمكنلك تمشي
ناض وقالي ..مغنتخلاش عليك اقمر ديري هادشي فبالك
خرج ومشا بحالو وانا نتنفس من جديد ناري اش هاد اللصقة ..حياتي كاملة وانا منخلة الرجال وصاداهم غا باش منطيحش فبحال هاد المواقف ولكن هانا طحت مع هادا ...
دخل عندي عبده مغوبش كالعادة :ياكما سمحتي ليه
-واش نتا مسطي واش انا هبيلة نسمح ليه بعدما تفكيت منو ..اش ندير بيه مازال ..
ضحك بلا ميحس ..خليتو حتى هادا واش مبغاش يفهم باللي مكنبغيهش ومغانبغيهش وباللي هو خويا لا اكتر ..وراه انك تكون خويا يعني شي حاجة كبيييرة ..هو مبغاش يفهمها
البارت 8
بقيت كل يوم من الخدمة للداروالسي نور الدين كل نهار كيصوني وكيطلب فرصة اخرى ...مرة كنلقاه كيستناني فالباب مرة كنلقاه كيصوني ..والزوينة كاع هي مللي مشيت نخدم واحد المرة لقيت المكتب ديالي كله مزين بالورد وكل بوكي فيه بطاقة اعتذار والحاجة اللي خلاتني نموت بالضحك هي مللي شاف عبده داك المنظر وناض بطريقة هستيرية كيلوح وكيمزق فداك الورد هههه منظره كان كيقتل بالضحك ..شداته الغيرة ههه صحابليه غنحن على نور الدين بهاد الورد معارفش باللي اصلا ممعمرليش العين ..كما العادة الخدمة اهم شيء عندي كنت كنكمل خدمتي وكانزيد نهار على نهار ..فوسط الخدمة تفكرت انسان كنحس بالراحة بزاف من جيهته إياد طبعا ..كان خاطري نشوفو بلا تردد هزيت تيليفوني وصونيت ليه ...الو اياد لاباس عليك معاك قمر ..
-قمر ؟..فرحت بزاف حيت سمعت صوتك ..كان صحابلي باللي صافي نسيتيني
سولت عليه وهضرنا فالتيليفون حسيت براحة كبيرة واتافقنا نتلاقاو ..وفعلا تلاقينا بلا ما يعرف حتى واحد عاودتلو كلشي عليا وعلى خدمتي وعلى حياتي الشخصية وعلى عبده وعلى طفولتي كنت كنحس راسي بحال شي بنت صغيرة كنعاود بكل تلقائية كنحس راسي طفلة صغيرة معاه كننسا ديك القوة ..وداك الثقة بالنفس ديال الخدمة وكنشوف غا برائته قدامي ..عيونو العسلية ..وذبولها وهو كيهضر معايا قلبه الطيب ..
-قمر..بغيت نوريك واحد الحاجة
-موافقة وريني
-خاصك تمشي معايا
-فين 😮
-ماكاتيقيش فيا
-ممم لا كنتيق فيك
-واش خايفة ولا 😎
-انا مكانخاف من والو زيد نمشي معاك فينما بغيتي
-ممم واخا يالله نمشيو
شديت يدو وتقت فيه ومشيت معاه حتى وصلنا لواحد البلاصة فيها محلات متفرقة دخلنا لواحد البازار هو محل كبير ديال التحف الفنية والديكورات الراقية عجبني بزاف ..
-واو اياد هادشي زوين بزاف ..المكان رائع ..ولكن علاش جينا هنا
-قمر..انا خدام هنا
-واو كدوز الوقت هنا زوين بزاف ..
شوية جا واحد الرجل كبير وشايب وباينة في محياه الوقار شاف اياد وضحك وفتح ليه يديه يعنقو
-ولدي ..
-الحاج ...
باس يديه بعدما عنقو ومشيت نسلم عليه
-لاباس عليك الحاج..انا سميتي قمر
-قمر بنتي ..كما عاودلي عليك اياد بالضبط
استغربت :عاودليك عليا انا ؟ شنو قاليك عليا
-هه هه هه ماقالي غا الخير ..انا سميتي عبد الحميد ...انا هو الاب ديال اياد
-شنو ..شفت ف اياد وابتسمت وحرك راسو بالايجاب ..وقال اه انا خدام انا وبابا هنا وهادا المحل ديال الواليد
ابتسمت لا اراديا وفرحت لاني حسيت اني عندي قيمة كبيرة بزاف حيت عرفني على باباه
اياد:اجي معايا نوريك حاجة اخرى ..بعد اذنك ابابا
شدني من يديا وطلعنا فواحد الدروج ودخلنا لواحد البيت ..تصدمت مللي لقيتو عبارة عن ورشة رسم ..يا الله ..واش نتي كترسم؟
اياد:من صغري وانا كنحماق على شي حاجة سميتها الرسم ..كنلقا فيها راحتي ..
بقيت كندور وكنشوف لوحات فنية رائعة ..اياد نتا فنان بكل معنى الكلمة ..بقيت كنشوف ومنبهرة بداكشي اللي كنشوف حتى لقيت واحد اللوحة مغطية ..
-اياد ..ديالاش هاد اللوحة وعلاش متا مغطيها
- ...عزيزة عليا بزاف هاد اللوحة داكشي علاش غطيتها ..شوفيها ..حيدي عليها الغطا
حيدت عليها الغطا وتفاجأت من داكشي اللي لقيت
-اياد اش هادشي ..هادي،..هادي انا ..رسمتيني ..اياد
-من اول مرة شفتك فيها ..محيدتيش من بالي ..صورتك لاصقة فدماغي ..فا اختاريت اني نجعلها على الورق ومنبقاش نتخيلها وصاف بل نشوف فيها بما اني مكنشوفكش كل نهار ..ورسمتك ..
-اياد..هادشي بزاف عليا ..يمكن كنحلم ..يعني نتا كتفكر فيا كما كنفكر فيك
-نتي كتفكري فيا كما كنفكر فيك ..قمر انا كنبغيك
-ابتسمت لا اراديا ونقزت عليه عنقته ..هو ماكانش متوقع هاد ردة الفعل مني بقا مصدوم
-حتى انا كنبغيك بزاف ..اكيد كنحلم كنحلم هئ هئ
البارت 9
-قمر..واش كتهضري بالصح ..نتي كتبغيني ..مكتضحكيش عليا ياك
-واش نتا حمق ..واش هادشي فيه الضحك
ابتسم وضحك وعنقني ...مستحيل ..ههه قمر نتي اللي يشوفك يقول مستحيل تبغي شي واحد بحالي ..نتي كتبغي الخدمة والاعمال والحركة وانا كنبغي الفن والهدوء ..شكون كان يتيق
ضربتو لدراعو ..وحتا انا كنبغي الفن مالك حكرتيني ..كما بغيتيني نتا انا بغيتك ...الحب يجمع المختلفين ..
-انا اسعد واحد فالدنيا ..قمر انا روحي تولدات اليوم ..كنبغيك بزاف وعمري مغنفرط فيك
-وعد 😉
-وعد
دوزت نهاري مع اياد كان احسن نهار ومللي رجعت للدار لقيت نفس الموال ..عبده يا عبده
-شنو كاين عاود تاني
-فين كنتي
-كنت فأرض الله
-قمر ياكما كنتي مع داك النذل وكتخبي عليا ..
-اينا واحد فيهم ..حيت الانذال كتارو هاد الايام
-بلا مادوخي عليا كتعرفيني شكون كنقصد ..نور الدين
-مممم ماشي مهم وماشي سوقك
جبدني من يدي وقربني ليه والشرارة خارجة من عينيه ...ايلا رجعتي ليه غنقتلو
-اش هاد التصرفات طلق مني والتزم حدودك معايا والا غتشوف الوجه التاني ديالي معاك ..نترت يدي وخنزرت فيه ومشيت ..انا اللي ضسرتو بالحق من هنا الفوق غيشوف قمر وحدة اخرى
الغد ليه مشيت للخدمة كما العادة بعدما هضرت فالتيليفون مع حبيبي ..غا كنسمع صوتو كيعطيني نشاط وحيوية نبدا النهار ديالي ..مشيت دخلت لقيت عبده فالمكتب ديالو شفت فيه وزدت مقلت لا صباح الخير ولا والو..باش يتعلم يلتزم حدودو وميتجاوزهاش ..ومبغيت نعاودلو والو على علاقتي ب ايادحيت عارفة اش غايدير ...غايمشي يقلب ليه على شي مونتيف وانا ماباغاش نتفارق معاه ..ماقلت حتى لقيت اللي تحرك ليه قلبي مامستعداش نبعد عليه تحت اي ظرف ولاي سبب ..الحب كيجي مرة وحدة فالحياة واللي متمسك فيه بيديه وسنانه ميستاهلوش ..الحب تضحية والتضحية كتقول نتجاوزو تفاهات الحياة ..ونتمسكو ببعضنا هذا هو قانون الحب ..ومستعدة ندوس على اي واحد على قبل يعيش هاد الحب ومنسمح لاي واحد يتدخل فيه ..درت الخدمة ديالي ..وكملتها وانا نسمع الدقان فالباب كان عبده ..
-شنو كاين
-بغيت نهضرو على داكشي ديال البارح
-ماعنديش الوقت دابا عندي الخدمة بزاف
-قمر ..
البارت 10
رجعت عند اياد بعدما كملت الحديث ديالي مع امه
-قمر فين كنتي من قبيلة وان كنقلب عليك
-كنت غا هنا قريبة
-فين قريبة ههه راكي بعيدة دابا
-ههه ..بعد مني
-صافي احبيبتي بلا متقلقي ..قوليليا مالكي فاش كتخممي
-قصة لالة هبة وسي عبد الحميد مؤثرة بزاف
-تنهد وقال:هي اللي اختارت
-شكون عرف ظروفها .مخاصش نحكمو على الشخص من خلال تصرفاتو حتى واحد معارف شنو الدافع مور داكشي
-شكون اللي عاودليك هادشي
-هي
-هه اكيد دابا غتقلب على مبررات ليها ..وغتحاول تكسب استعطافك نتي حيت مقدراتش عليا انا
-اياد هاديك اللي كتهضر عليها راها امك كيفاش بغيتيني نأمنك على نفسي وانت كتهضر بهاد الطريقة على المرا اللي ولداتك محنيتيش
-انا آسف ..ولكن حتى انا عندي ظروفي ..هي اتخلات عليا
-لا متخلاتش عليك وها الدليل انها جات وكتجي عندك ومستسلماتش
-قمر عفاك سدي الموضوع
-اياد خاصك تواجه راسك لحد امتا غتبقا هاكا كتهرب من الواقع
-معرفتش ..اللي عارفو اني باغي نرتاح
-وخوك عارف عليه شي حاجة ..عمرك شفتيه
-اه مللي كنا صغار ..كنا كنلعبو وكان كيجيبلي اللعب ديالو ..كنت عزيز عليه بزاف ..ولكن الدنيا هي اللي فرقاتنا
-اش هادشي كيفاش تسمح لراسك تتفارق مع خوك ..اياد اللي بينك وبين ماماك فهمناه ..وخوك شنو ذنبه
-عندك الحق ..
-اياد واعدني انك تعطي فرصة لراسك تفكر وتتعامل مع ماماك وتعطيها فرصة ..واليدينا هما كلشي فالدنيا ..ونهار يفرقو علينا كنحسو الدنيا ضياقت علينا ..عفاك واعدني
-كنواعدك اقمر نفكر ونعطي فرصة لراسي
-كنبغيك بزاف ..يخليلي هاد القلب الحنون
-مدامك معايا عمري نخاف من شي حاجة
مشيت للدار كنفكر فقصة حب العم عبد الحميد ومدام هبة ..عطاتني قوة اني نتمسك بحبي لاياد حسساتني بالخطر ..لانه انا كاين اللي ضايرين بيا وممكن يديرو اي حاجة باش يفرقوني عليه ولكن الواحد خاص يحارب على قبل اللي كيبغي ويدير المستحيل على قبله ..مشيت بست الراس لماما وعنقتها وفكرت باني منقدرش نبعد عليها الام هي كلشي كدير المستحيل على قبل ولادها ..الله يخليهم لينا ..اياد خاصو يسمح لامه ..ضروري وهادشي اللي غندير مجهود باش يوقع
الصبح فقت ..مشيت لخدمتي كما العادة ...صبحنا لله لقيت عبده ..تعاملت برسمية معاه وهو يتبعني
-قمر حتى امتا غتبقاي كتعاملي معايا بهاد الطريقة ..عفاك سمعيني انا مستعد ندير اي حاجة باش تسمحيلي راكي كتقتليني بالبارد بهاد الطريقة
-شوف نتا ..
-انا ندمت ..والله ايلا ندمت عمري مغنبقا نعاود عفاك سمحيلي
-والله يا عبده ومكانت العشرة اللي بنا والثقة اللي كنديرها فيك اما نسمحلك ..وبكن صدقك معايا وعشرتك هما اللي كيشفعو ليك ..هادي الاخرة ليك ديرها فبالك
-فرح وناض:اخر مرة والله متشوفي مني الحاجة الخايبة ابدا
-سير لخدمتك
مشا وخلاني كنفكر هاد عبده منه الخوف الا ساق الخبار بعلاقتي ب اياد غيدير اي حاجة يفرقني عليه ..وحكاية مدام هبة خوفاتني بزاف ..ضروري نخبي علاقتي بيه ..دازو الايام وانا مخبية علاقتي ب اياد وكيزيد حبي ليه نهار على نهار حتى كنتفاجئ واحد النهار ب نور الدين
-قمر مازال مبغيتي تحني عليا ..انا تغيرت على قبلك ..ووليت واحد اخور ..
نور الدين عفاك الا ما نسا عليك داك الموضوع ..انا راه منصلاحش ليك انا وياك غنتفاهمو غا فالخدمة صافي
-علاش كل هاد الجفاء منك ..مبغيتيش تعطيني حتى فرصة ..انا عييت..وقررت ندخل الباب من بابو انا غنجيب الوالدة ديالي وغنجي نخطبك من والديك .. ستنايني غدا فالعشية وعلمي عائلتك ..ومشا
-نور الدين ستنا ...نور الدين
عيطت عليه مجاوبنيش ..اش هاد الوحلة عاود تاني ..مبغاش يفهم باللي انا مبغيتوش اووف
سكتت وماقلت حتى حاجة لعائلتي ولا لعبده وبقيت كنحاول نقنعو اتاصلت بيه والو مجاوبش
الغد ليه دوزت النهار وانا مشوشة مشيت للدار فالعشية لقيت شي ناس فالصابون مع بابا وماما عرفت باللي نور الدين هو اللي جاب عائلته ..طلعت لبيتي نيشان ..وشوية طلعت ماما عندي ..
-بنتي نزلي تشوفي الناس جاو على قبلك
-اووف انا قلت لداك بنادم لا هلاش كيحرج راسو
-علاش احبيبة هو باينة فيه شاب محترم ..وعائلته محترمة وكلاس ..جايب معاه ماماه وعمه ..نزلي تتعرفي عليهم غيدخلو ليك لقلبك ..عفاك ابنتي ..وعطيه فرصة يتعرف عليك حتى واحد مغايبزز عليك شي حاجة ..مقلنالكش غتزوجي غدا نزلي دابا بوجه باباك ومن بعد يحلها الله
درت الخاطر لماما وبدلت حوايجي نزلت بانلي نور الدين غا شافني ناض وقف دخلت سلمت وتصدمت من اللي شفتو
-
😳 مدام هبة ؟ -قمر ..واش نتي هي العروسة
-ا ا لا ...اه انا اللي بغا يتزوج نور الدين ولكن نتي هي ماماه ..
نور الدين : واش كتعرفو بعضياتكم ؟
-مدام هبة ممكن نهضرو بوحدنا ..
-اه طبعا
نضنا ومشينا للصالون لاخور
البارت 11
نضنا انا ومدام هبة للصالون بعدما مسحت دموعي وغا شافنا نور الدين ابتسم مع انا معالم الاستغراب كانت بادية على وجهه ..نطق عم نور الدين وقال فين كتعرفو بعضياتكم
هبة :سبقلينا تلاقينا فواحد الجمعية ..
نور الدين :هادشي مزيان ،.. يعجبني مي ومراتي يكونو متفاهمين
انا: حتى نكون مرتك بعدا
هو ولا حمر ورجعت كملت كلامي
اه اسي نور الدين سبقلي ورفضت طلبك بالزواج وهانا كنعاودوليك ..انا ماباغاش نتزوج بيك مموافقاش
كلشي بقا مصدوم من الهضرة ديالي الا مدام هبة بان على وجهها الارتياح مللي قلت ديك الهضرة انا قلبي كانت شاعلة فيه العافية كيفاش يوقع هادشي ..نهار نبغي نبغي الشخص الخطأ ..العقدة ديالي ماعندها حل ..اياد كيفاش غنقدر نتفارق معاك ..مشاو الناس وكعطيتش لنور الدين الفرصة يدوي ...بقيت كنبكي وعائلتي مفاهمة والو ..مكليت مخرجت من بيتي ..علده ساق الخبار باللي نور الدين جاب عائلته وفرح بزاف حيت رفضتهم ..بقيت كنتأمل وكنبكي و اياد كيصوني وانا مكانجاوبوش ...بقا كيصوني بزاف ومفاهم والو مالي وشنو واقع لي ..فواحد اللحظة جاوبت ودموعي فعيني
-قمر فينك وعلاش مكتجاوبيش
-والو غا كنت ناعسة عيانة شوية
-حبيبة مالكي ..نجيبليك شي دوا شنو كيضرك
-والو احبيبي غا خاصني ننعس ..
-قمر ..حاسة بيك ماراكيش مزيانة ..هضري مالك
-والو ..قلتلك خاصني ننعس بالسلامة
طفيت التيليفون واطلقت العنان للبكا ..يا ربي اش هاد الزهر ..بقيت كنبكي حتى الصباح نضت مشيت للخدمة وتلاقاني عبده فالباب ..قالي شي حد كيستناك ..
-اووف ياكما داك نور الدين عاود تاني
-لا واحد اخور معرفتوش حتى هادا شنو باغي
دخلت ولقيت اياد ..
-ويلي اش كادير هنا وشنو قلتي لهادا اللي برا
-متخافيش قلتلو بغيت غا نعرضها للمعرض ديالي ..قمر ..مال عينيك منفوخين كنتي كتبكي ياك شكون قلقك عفاك قوليلي ..واش درتليك شي حاجة اللي خسراتلك خاطرك
-والو مكاين والو ..اياد خاصني نهضر معاك فشي حاجة مهمة ولكن ماشي هنا ..غنجي عندك العشية للمرسم واخا؟
-واخا الله يسمعنا خبار الخير
-نتلاقاو ..
-بالسلامة
مشا ومشا معاه قلبي كيف نقدر نقوليك مكنبغيكش ..كيفاش نقدر نعيش بلا بيه....ميمكنليش الله يا ربي عاوني
فالعشية تسحبت كما العادة ومشيت عنده للمرسم ..استقبلني بفرحة كبيرة ..وانا شاعلة فقلبي النار ...
-اياد حنا خاصنا نتفارقو
-هه قمر واش هادا شي مقلب
-لا انا ميمكنليش نكمل معاك القصة ..انا وياك مختلفين ومغنتوالموش
-قمر اش هادشي كتقوليه ..شوفي فيا انا اياد حبيبك
-لا ..انا كنت كنضحك عليك وعمري بغيتك ..انا انسانة اللي همي هو الخدمة والفلوس وصاف ..الحب اخر اهتماماتي ..دوزت معاك وقت زوين ..مكيعنيش اني بغيتك
-ممصدقش هادشي اللي كنسمع ..قمر ..حرام عليك علاش ديري بيا هاكا ..واش راكي فرحانة تشوفيني كنتعدب واش معارفاش باللي انا كنبغيك حتى الموت ..واش باغا تقتليني بهادشي ..حرام عليك ..(بداو دموعو كيطيحو بحال الشتا ) حرام عليك الكدابة نتوما كلكم بحال بحال ..بحالك بحال مي بحال جميع العيالات على وجه الارض غدارات ومكتسواوش وهمكم الوحيد تلعبو بمشاعر الاخرين
انا كنسمع كلامو وكنشوفو كيبكي وكيتعدب قدامي وكنتحرق ..ومقادراش نهضر دموعي طاحو بلا منحس ..
-خرجي عليا مبغيتش نشوفك مرة اخرى ..
خرجت حيت مقدرتش نصبر لداك المنظر ..قلبي شاعلة فيه العافية ..روحي كتخرج ..علاش الدنيا هاكا النهار اللي كنفرحو فيه مكتخليهش لينا ..علاش
بقيت كنتمشا وساهية فالدنيا ..وكارهة ..حتى حاجة معندها قيمة هاد الساعة ..كلشي بالنسبة ليا سالا ..قلبي ورميتو ..حاولت نرجع لحالتي العادية مقدرتش ..كيفاش نقدر ننساه ...مشيت لدارنا مباشرة وسديت عليا الباب ...وبقيت نعيش الكآبة ..الغد ليه مقدرتش نمشي الخدمة ..ومبغيتش ناكل وسديت تيليفوني ...شوية هي تجي عندي ماما ..جابتلي تليفون ديال الدار
-بنتي عبده كيتاصل بيك وكيقولك بغاك فشي حاجة مهمة
-اوووف اش بغا مني ...خديت تليفون منها وجاوبت ..الو شنو كاين
-قمر كاين واحد السيد بغا يشوفك قالي فشي حاجة مهمة وماقالش شنو هي
-عطيه موعد وقيلني عليك هاد الساعة
-مبغاش قالي شي حاجة ضرورية ومكتنتاظرش التأخير
-ومقالكش سميتو
-اه قال سميتو عبد الحميد
قفزت بسرعة عمي عبد الحميد ..اه قولو دابا تجي ..يستناني
جريت بسرعة بدلت حوايجي ..ومشيت كنجري عندو دخلت بسرعة ..عمي :
-بنتي لاباس عليك
-الحمد لله ..و اياد لاباس عليه
-لا ..داكشي علاش جيت اليوما ..بغيت نعرف شنو وقع بيناتكم ..كنتو مزيانين بزاف ..بنتي انا كما كتعرفي معندي حد فالدنيا من غير ولدي اياد ..وهو نوارة حياتي واللي علاطيني امل .. صعيب عليا نشوفو دخل فنوبة اكتئاب قوية ..طبعا نتي حاسة بيا ...عفاك يالله معايا هضري وتفاهمي نتي وياه واللي بغيتيها هي اللي غاتكون
-ياريت لوكان الامر ساهل اعمي ..وقعات شي حاجة اللي مكناش دايرين بحسابها ..خو اياد نور الدين جا خطبني وباغي يتزوج بيا ...وانا ماباغاش نفارق الخوت بغيتهم يتجمعو ماشي يتفارقو بسبابي
-مستحيل ..اش هاد الصدفة
-هانتا تشوف واضطريت نقول ل اياد باللي انا مكنبغيهش باش نبعد ليه حسن مانصدقو فشي طاب وشي ما طاب
-شوفي ابنتي نتي بهادشي اللي درتي ما حليتيش الموضوع حيت نتي كتبغيه ..سمعيني ابنتي ..انا عندي تجربة حيت تكويت بنار الحب من زمان ..خوديها وفكري فيها مزيان ..الحب كيجي مرة وحدة فالعمر ومكاين حتى مبرر فالدنيا كيما كان يخلي جوج كيبغيو بعضياتهم يتفارقو ..واللي تخلا على الاخر يعني مكيبغيهش ..
البارت 12
كلام العم عبد الحميد خلاني نعيد حساباتي ..هو على حق ..علاش نضحي بحياتي كلها على قبل ناس اخرين هما اصلا مامجموعينش ..علاش نضحي بحب عمرو مايتكرر ومستحيل ننساه على قبل شي حاجة اللي ممكن تكون وممكن ما تكونش انا شكون ضمنلي باللي اياد غيتصالح مع عائلته ..جمعت الوقفة ومشيت لحقت على العم ..مشيت دخلت للدار ملقيناش اياد قالي باباه اكيد هو فالمرسم ..دخلت وانا تجي عيني على اللوحة اللي رسمحلي طايحة فالارض ومهرسة قلبي تحرك قدامها حتى هاد الدرجة غضبه كبير مني ..بقا فيا الحال حيت ديك اللوحة كانت حاجة كبيرة بالنسبة ليا ومني هرسها حسيت تهرس معاها قلبي ..لقيت اياد مهموم ..شاف فيا وكانو عينيه حمرين وعامرين بالدموع
-لاش جاية باقي شي حاجة اللي ماقلتيهاش
-اياد لاش درتي فراسك هاكا
-ماشي شغلك ..ولا عجبك مازال تلعبي وتشوفيني هاكا كنتعدب
-انا كنتعدب كتر منك ..ومكنلعبش نتا ماعارفش ظروفي ..
-شنو هي الظروف اللي تخلي جوج يتفارقو مكاين حتى مبرر
-اه عندك الحق مكاين حتى مبرر ..وانا قررت اني مغانتفارقش معاك
-شنو اللي يضمنلي انك مغتفارقيش معايا مرة اخرى ..شنو اللي يضمنلي باللي مغتلعبيش ومغنتجرحش مرة اخرى
-اياد انا معاك ..
-لا نتي ماشي معايا
-اياد
-الا كتبغيني بالصح نتزوجو (شدني من كتافي )
-ولكن اياد عائلتي وعائلتك وماماك؟
-انا عندي بابا وهو موافق
-واخا ..انا غنحدد ليكم موعد وغتجيو تهضرو مع عائلتي
مللي سمعني قلتلو داك الهضرة عنقني بزاف وقالي :كنت عارفك كتبغيني ومغاتخلايش عليا
وانا فالداخل ديالي :الله يستر ويجيب العاقبة على خير وصاف
علمت باب باللي شي ناس باغين يجيو يخطبوني وطبعا عبده ساق الخبار ومتسرطاتش ليه ..الله يستر يدير شي حاجة وفعلا جاو اياد وباباه ورحبو بيهم عائلتي ..العم عبد الحميد وبابا تفاهمو بزاف حيت هما فنفس السن ونفس التفكير ونفس الحكمة ..كان التعارف زوين وانا واياد فرحنا كان كل مرة كيغمزني ..ولكن ماما مكانتش مرتاحة وقالتلي باللي هو ماشي من مستواي انا صاحبة مقاولة كبيرة وهو خدام مع باباه فبازار ولكن مكانش يهمني هادشي اللي كيهمني هو حبي لاياد ..مشاو الناس واتافقو على كلشي وحددو موعد للخطبة ..الغد ليه مشفتش عبده فالشركة ومكانش يهمني نشوفو دوزت نهاري عادي والعشية مللي مشيت للدار مع الدخلة كنلقا مدام هبة خارجة وشافت فيا بواحد الشوفة وقالت : خسرتي اتفاقنا ا قمر ..تحملي مسؤوليتك
مشات وخلاتني مرعوبة من ديك الشوفة ..دخلت لقيت بابا معصب وقالي باللي هضر مع دوك الناس ولغا كل دوك الاتفاقات اللي دار البارح ..بنتي انا ربيتك انك تكوني قد المسؤولية وعطيتك حريتك ولكن ماشي انك تلعبي على جوج حبال جايبالي جوج خوت وباغا تفارقيهم ..انا معمري نسمح بهادشي
-باب عفاك فهمني
-هادشي سالا اقمر ومنسمعكش هضرتي فيه مرة اخرى
طلعت لبيتي وانا شاعلة فيا العافية ..لا انا ميمكنش نستسلم ..صونيت لاياد
-قمر باباك رفض زواجنا شنو وقع انا مافهمت والو
-اياد عفاك ..غدا نتلاقاو ونهضرو ..معرفتش شنو قالوليه عليك ولكن خاصنا نهضرو
-واخا
الغد ليه مامشيتش للخدمة ومشيت تلاقيت اياد
-اياد قلتلك القضية ماساهلاش
-علاش شنو وقع مفهمت والو
-بابا مستحيل يوافق نتزوجو ..معرفتش معطانيش فرصة نعرف باينة شي حد لعبلو بعقلو ..حيت كان واحد السيد خاطبني وهو اللي كيدير هادشي
-شكون هادا وعلاش معاودتيلي والو
-عفاك متعصبش ..شوف راه علا هادشي كنت معصبة داك النهار حيت كانو باغين يبززو عليا الزواج انا تالفة ومعرفتش شنو ندير
-انا عارف شنو نديرو ..غنمشيو دابا للعدول نتزوجو بزاز عليهم ونحطوهم امام الامر الواقع
-لا منقدرش عائلتي ولكن
-اذا مكتبغينيش وممستعداش تغامري على قبلي
-انا كنبغيك بزاف ..ومستعدة نمشي معاك للجحيم ومبغيتش نسمعك قلتي داك الهضرة مرة اخرى
-يعني غتمشي معايا
-واه
عنقني وقال:عمرك مغاتندمي كنواعدك
كنت خايفة بزاف جبت الواثائق اللي نحتاج ومشيت معاه كنت مزيرة على يدو وخايفة وهو كيطمني متخافيش ...عقد لينا العدول وتزوجنا ..وانا حسيت بقلبي تزير وطاحت دمعة من عيني ..شاف فيا اياد وقال
-واش ندمانة؟
-لا . انا كنبغيك بزاف ولكن مكرهتش لوكان معايا عائلتي ولوكان تزوجنا بحال الناس ولكن..
-ما ولكن والو ..كنبغيك وكتبغيني ..خاصنا نكونو مع بعضنا ..زيدي الالة لعروسة مسحيلي دوك الدميعات ويالله نمشيو لدارنا
-ا دارنا ..اشمن دار .. اياد انا مازال مموجدا راسي خاصنا نخبيو هاد الزواج مؤقتا ... حتى نلقا الفرصة اللي نخبر بيها عائيلتي
-واخا ..خاطرك المهم اننا تزوجنا امرتي
كنت خايفة بزاف مشيت للدار ولقيت بابا وماما كما العادة ..وحسيت براسي بحال اللي دار شي زبلة وخايف تبان عليه مشيت لبيتي باش منفضحش راسي ..بقيت كنهضر مع اياد فالتليفون ..زواج ديال التخبية ..نعست بعد ساعات من الحديث ..وطفين الضو .. بالليل وانا ناعسة حسيت شي حد معايا فالبيت حليت عيني عاد باغا نغوت وهو يسد ليا فمي ..
-سكتي متغوتيش انا مغانآديكش
- 😰 نور الدين اش كادير هنا
البارت 13
-متخافيش جيت حيت بغيت نعرف ..علاش درتيلي هاكا ..قمر انا مستعد نعطيك الدنيا كلها ..
-نور الدين عفاك سير بحالك ..عفاك
-مغانمشي حتى تديري معايا حل ..واش مكنعجبكش ولا فحياتك واحد اخور ..عبده ياك هو ...
-انا كنبغي واحد اخور ولكن ماشي عبده ..نور الدين عفاك بغيتك تتقبل الموضوع انا ماشي ليك ومعمري نكون ليك
-قوليلي شكون هادا ..
-خوك
-واش كضحكي عليا واش شايفاني دري صغير هضري نيشان
-نتا بهاد التصرفات وليتي دري صغير ..سير بحالك ولا غنغوت ونجمع عليك الدار
-شنو اللي فيه حسن مني ..لاباس عليه انا مستعد نكتبليك شركتي كلها باسميتك
-بالعكس هو ما غني ما والو ولكن القلب وما بغا ..عفاك قدر الموضوع ونساني انا متأكد غادي تلقا الف وحدة تتمناك من غيري ..واللي تبغيك وتعيش حياتها ليك وبالمواصفات اللي بغيتي
-انا غنمشي..ولكن مازال ماكملنا هضرتنا ..وغانعرف كيفاش نقنعك
طلق مني ومشا ..الله يا ربي هاد الدار عندنا واش ميتين ولا ..ميسمعو واش دخل شفار ولا شي حد اخور اووف ..خاصني نسيكوريزي بيتي
الصباح مشيت نتلاقا اياد ..بقينا النهار كامل مع بعضنا وكل مرة كيقتارح عليا نقولو لمالين الدار على زواجنا ..انا كنرفض مكايعرف حتى واحد بهاد الموضوع الا العم عبد الحميد ..وحتى هو كيأكد علينا نواجهو ماشي نتهربو ..مشينا انا واياد للحديقة العامة نشمو شوية الهوا وكما العادة مشبكين يدينا وفرحانين و اياد كيضحك عليا ويقولي مرتي لعزيزة وفجأة تجمدت فبلاصتي ..شفت قدامي واحد الانسان اللي جعلني نخاف فديك الساعة ويجمدلي الما فركابي ..شفت قدامي نور الدين كان واقف كيشوف فيا بواحد النظرة اللي فيها صدمة ودهشة ..كنت خايفة يجي يدابز مع نور الدين ولكن لا مشا بحالو وحنا راسو ..عرفت راسي تفضحت مع ان اياد مشافش نور الدين ولكن خفت لا يوقع شي حاجة اللي تفرقني مع اياد ..مضمنتش ..شفت فاياد وقلتله زيد نمشيو لدارنا نقولولهم بزواجنا ..هو بقا مستغرب من داك القرار المفاجئ ديالي وقالي اه ..مشينا للدار وانا ساكتة طول الطريق ..وخايفة نظرة نور الدين لينا خوفاتني ..داك الغموض اللي فيها خوفني بزاف بل ورعبني ..مشيت لدارنا غا شافني بابا وهو يقول
-علاش جاي ..قمر هضرنا فهاد الموضوع علاش مازال راكي معاه
-بابا ..انا كنبغي اياد ومغنتفارقش معاه
-شنو كتعني هاد الهضرة
-بابا انا واياد تزوجنا
-بابا تصدم وبقا ساكت ..وهو يقول : طالما ختاريتي ..لاش جاية
-بابا..
-سيري معاه ..ومنبغيش نشوفك نتي وياه مرة اخرى
-بابا عفاك سمعني
مشا وهلاني كنبكي وماما مصدومة وحتى واحد منهم مبغا يسمعني نطقت ماما وقالت :مابقا ليك مكان معانا اقمر جمعي حوايجك وسيري مع اللي اختاريتيه وتحملي العواقب ..زادت كملات عليا ماما بديك الهضرة واياد كيهدن فيا ..ملقيت حتى واحد قدامي مبغاوش يسمعوني ..مشيت جمعت حوايجي من البيت ..ونزلت عند اياد اللي كان كيستنا فيا ..خسرت عائيلتي على قبلو وهو وقف معايا ..مشيت معاه وانا دموعي مبغاوش ينشفو ..مهما كانت الدنيا عائلتك هي نقطة ضعفك ونقطة انكسارك ...مشيت مع اياد لدارو وبقيت معاه ..هو كيحاول يفوج عليا وانا قلبي شاعلة فيه النار من جهة عائلتي ومن جهة خايفة على اياد لا يدير فيه شي حاجة نور الدين ..دوزت ديك الليلة فالخوف ..الغد ليه مشيت للخدمة ولقيت كلشي كيشوفو فيا وعبده مكاينش سولت فيه قالولي باللي مجاش والغريب ان كلشي فخبارهم تزوجت ..شكون وصل ليهم الخبار منعرف ..بقيت خدامة نهار كامل وفكرت نمشي نشوف نور الدين حيت الخوف عندي زاد حدودو مشيت عندو للشركة ودخلت عندو
-نور الدين
-اهلا لاباس عليك
-الحمد لله ..جيت نهضر معاك على القضية ديال البارح
-اه ..مقدما مبروك الزواج ..
-وصلك الخبار
-اكيد ..فرحتلك ..خصوصا وانك متزوجتيش شي حد اللي غريب ..تزوجتي خويا
-نتا عارف باللي هداك خوك
-اه خويا
-وعلاش ممشيتيش عندو ..
-هادشي مكيهمكش ..نتي ختاريتيه هو ..مبروك عليكم
-نور الدين ..نتا مغاتآديش خوك ياك
-اكيد لا ..ومغنسمح لاي واحد يآديه
-فرحتيني شكرا بزاف ..وتأكد انك غتلقا بنت الناس اللي غتواتيك
-انشاء الله ..بالسلامة
البارت 14
فرحت حيت رتاحيت من جهة ومن جهة اخرى مازال عندي شوية ديال التحفظ حيت جاتني غريبة يتنازل نور الدين بهاد السهولة ..ربما حبه لخوه اقوى مكيهمنيش ..الاهم دابا هو نتصالح مع عائلتي ..دازو شهور كنحاول نتواصل مع بابا ولكن مقبلش ..خاب طنه فيا على حسب تعبيره ..دازو شهور حملت فيهم ..وعبده رجع يخدم ولكن التزم فالتعامل دياله معايا وولا كيتعامل معايا برسميات ..الصراحة كان كيفوج عليا وكيريحني مللي كنت كنعاودلو اسراري ..فعلا الصديق مكانتو كبيرة فحياة الفرد ..اياد بعد ما حملت ولا كيعاملني برقة اكثر ومكيخلينيش نتعدب..وكان كيتقلق مللي كنفورصي على راسي فالخدمة ..دازو ايام وولا نور الدين كيجي عندنا ..وعرفت من اياد انهم تصالحو هو واياه ..كان فكل مرة كيجي فيها عندنا كيخوفني ..معرفتش علاش مع انه كان مسالم جدا ...دازو شهور الحمل حتى جاني وجع الولادة ..ولدت بعد مخاض عسير بنت كتحمق ..عمي عبد الحميد واياد كانو فرحانين بزاف بيا مسايعاهم فرحة ..انا بقدر ما فرحت ببنتي بقدر ما كان قلبي حزين على فراق واليديا حسيت براسي يتيمة ..ومقطوعة من شجرة ..فلحظة مهمة بحال هادي حسيت باللي محتاجة عائيلتي نبكي ليهم ..فرحة اياد كانت كبيرة :
-حبيبة ديالي نتي ليوما قدمتي ليا احسن هدية فالدنيا ..ولدتي ثمرة حبنا ..حتى انا غنعطيك هدية كبيرة ..عدباتني هاد الهدية وكان صعيب عليا نجيبها ولكن على ودك نتي ندير المستحيل
-شنو هي هاد الهدية احياتي
مشا فتح الباب ودخل منو بابا وماما ..مشاعري فداك اللحظة مقدرتش نفسرها ..تخلطو عليا مشاعر البكا والحنين والم عميق ..كنشوف فيهم حتى هما كيبكيو ومشتاقين لبنتهم اللي بالرغم من غضبهم عليها الا انها قطعة من روحهم ..تعانقنا وكان الشوق والدموع سيد الموقف ..بكينا ..وفحضن واليديا فشيت الكمية ديال الدموع اللي كنت مخبية هادي عام تقريبا ..سنة من الفراق ..مللي شافو بنتي زاد بكاهم ..وزادو تأثرو هادي قطعة منهم ..شفت ف اياد ديك اللحظة بنظرة كتشكرو على هاد الهدية اللي واخا معرفت شنو درت فالدنيا منقدرش نردهالو ..كانت احسن واجمل هدية ..واكتملات الفرحة ديالي ..بقيت فالمستشفى يومان..وجات زارتني مدام هبة ..
-انا فرحانة بزاف حيت جيتي عندي وجيتي تشوفي حفيدتك
-الحمد لله على سلامتك ..بغيتك تتهلاي فيها
-غنتهلا فيها ..وف اياد ..الحمد لله كلشي مشا كيف بغينا اياد ونور الدين تصالحو ونور الدين نسا الموضوع وعن قريب غنصالحكم نتي واياد ونوليو عائلة .
-نور الدين؟... منظنش باللي نسا ..ولدي وكنعرفو اكتر من اي حد فالدنيا
-شنو كتقصدي..
-كنقصد باللي نتي اقمر فتحتي علينا ابواب جهنم كلنا نهار تزوجتي باياد ..ونهار اللي مسمعتيش بهضرتي ..تحملي العواقب اذا
-مدام هبة ..شنو كتعني هاد الهضرة ..واش نور الدين ممكن يدير شي حاجة ممكن يآدي خوه
-ميمكنش يآدي خوه ..خافي من شي حد اخور ..ردي بالك لبنتك
-مفهمتش شكون كتقصدي
-بالسلامة عليك هاد الساعة ..
مشات وخلاتني حايرة وخايفة ..اش ممكن يوقع ..اش ممكن يكون ..الله ياربي ...هزيت بنتي عندي من الخوف ..كنقسم بالله الا حاول شي حد يآذيلي بنتي غنمحيه من على وجه الارض وشكون ما كان ..جا عندي اياد ..مالكي احبيبة ..مابغيت نقولو والو هاد الصراع هو من الاول مكانش فيه ..قلتله والو ومشينا لدارنا والرعب فالداخل ديالي ساكن ..
البارت 15
دازو ايام وليت فيهم لاباس وكنمشي مرة مرة للخدمة ديالي ..معتمدة على عبده فيها انا عطيت اغلب وقتي لبنتي وكنمشي للخدمة الا اذا كانو شي وراق خاصهم التوقيع ولا شي حاجة ..وخوفي على بنتي كان هو اكتر حاجة شاغلاني خايفة لا يمشيو يديرولي فيها شي حاجة ..خصوصا بعد تلميحات مدام هبة ..كان نور الدين كيجي عندنا ..وداكشي اللي كنشوف كان مختالف حيت هو كان كيحب بنتي بزاف ومتعلق بها ..وكان كيضل يلعب معاها ..دازو ايام وانا هكاك وموقع والو لبنتي واياد معايا وكيزيد حبه ليا ..دوزنا ايام مع بعضنا كنطلب فيها غير راحة البال وانه يخليونا انا وبنتي فالتيقار ...واحد النهار وجدت سهرة لينا انا واياد وديت بنتي عند ماما ..قالي اياد باللي غيتلاقا بخوه نور الدين ..استغليت الفرصة باش نوجد لعشا والشموع ولبست كسوة زوينة وقصيرة وحمرا وزينت الغرفة وجلست كنستناه ...حسيت بالنعاس مقدرتش نقاومو..وتكيت شوية حتى داني النعاس ....
مللي حليت عينيا ..لقيت راسي فنموسيتي ..ولقيت راسي عريانة وعليا يد ..
-هه هه اياد المشاغب جبتيني للناموسية
تقلب عندو ..😱 شكون نتا؟
كان معايا واحد الراجل مكنعرفوش شكون نتا وشنو كادير هنا ..شوية لقيت البوليس داخلين عليا للغرفة وكيعاملوني بواحد الحقارة وبغاو يخرجوني يديوني للكوميسارية وانا مافاهمة والو من هادشي اللي واقع ..بانلي اياد فالباب مصدوم وعينيه عامرين بالدموع ومزير على يديه ونور الدين كيواسيه وكيشدو ..انا محملتش راسي فداك المنظر والبوليس جاريني لقيت حدايا جلابة هزيتها وقلت ليهم غنلبسا خلاولي لبستها وخرجوني هزوني فالسطافيط ..مللي مشيت الكوميسارية ..قلت ليهم راني مولات مقاولة كبيرة ومكانتي فالمجتمع متسمحش ندير هادشي وطلبت يتفتح تحقيق فهادشي اللي وقع ويعرفو شكون هاداك ومنين دخل وانا فدار راجلي وكيفاش محسيت بوالو مللي دخل ..معاملونيش مزيان نهائيا وقالولي نتي متهمة بجريمة الخيانة الزوجية وبالفساد وباللي الجيران هما اللي بلغو بيا حيت ديما مدخلة راجل فشكل للدار ..غوتت وقلت هادشي كله كدوب وانا عمري مدخلت شي راجل ..التحقيق طول ومتيقونيش فداكشي للي قلت كله ..وقالولي باللي غنتعرض على انظار وكيل الملك ..هادشي كله مكانش يهمني قد مكان يهمني اياد واش غيتيقني ...من حقي نطلب محامي ..صونيت لمسؤولة الشؤون القانونية فالمقاولة ديالي اللي هي فنفس الوقت محامية وطلبتها تجي وفعلا متعطلاتش ..جات وعاودتليها كلشي ..وعطاتني خبر اسوء من الاول قالتلي باللي تم الحجز على entreprise ديالي بتهمة اختلاس الاموال وباللي شي مستندات كتحمل التوقيع ديالي هي اللي كتثبت الادانة ديالي ..فهمت تما باللي العديان ضربو وعرفو كيفاش يضربو ..الغد ليه بعد ما بت ليلة فالحبس ..دوزوني لوكيل الملك ..جات المحامية ديالي وقالتلي كان عندنا حل وهو ان اياد يجي يخرجني وباللي هي مشات عندو ورفض يجي .. كنت عارفة باللي مغايتيقش بيا الصدمة كانت قوية عليه ولكن غا بلاتي انا غانعرف كيفاش نرد ليهم الصاع صاعين ..كلشي بوقته
البارت 16
هضرنا انا والمحامية وقنعات وكيل الملك اني ندير تحليل للكشف عن مادة مخدرة فالدم ديالي استغرقت النتيجة يوم اخور فالحبس ..فهاد المدة ماشفت حد من غير المحامية لا اياد ولا واليديا ولا حتى عبده ...يوم مر عليا كانه سنة ...العد ليه كان موعد الجلسة.. وبعد الكشف عن التحليل تبين اني كنت مخدرة وهادا كان دليل برائتي ولكن الرجل اللي لقاوه معايا مطلقوهش ..خصوصا وانه قال اني كنعرفو وانه مداوم على الحضور عندي للدار..حتى انا مغنطلقش منو ..حيت هو اللي غيوصلني للي عمل فيا هادشي ..وقررت النيابة العامة متابعتي في حالة سراح في قضية الاختلاس ..مشيت بعد الخروج ..للدار تلاقيت العم عبد الحميد فالدار ..
-انا خرجت براءة
-وفاش كيهم تكوني براءة ..عطا الله الحيل باش تخرجو ..نتوما مالين البزنس ماصعيب عليكم والو ..والخدمة ديالك شنو درتي فيها حتى هي براءة ولا
-هادا اكبر دليل انه شي حد باغيها فيا ..ضربني فداري وفخدمتي
-سيري بحالك اقمر ..وخللي عليك ولدي فالتيقار باراكة غا داكشي اللي شاف منك ..باراكة عليه ..انا حاس بيه وبالالم اللي فقلبو نتوما كلكم بحال بحال كلكم ..
-بغيت بنتي
-بنتك من الاحسن ليها تتربى بعيد عليك حيت وليتي موسخة وكلشي كيهضر عليك .. حنا غنمشيو من هاد البلاصا غي بسبابك حتى البازار ديالي مابقا حد يدخل ليه ..بسبابك نتي ..
-انا غنمشي وغنتبت براءتي وغنبينها قدامكم
-سيري بحالك ..
جيت نخرج وانا نلقا اياد شفت فيه وفشلت فين هي ديك الثقة بالنفس فالهضرة ..كنضعف حداه ..كان حالته تشفي العدو وعينيه عامرين بالدموع
-اياد ..
جيت نهضر وهو يصرفقني بكل ما اوتي من قوة ..انا ديك الساعة ماحسيتش بيها ومدرت حتى ردة فعل معدرو شاف منظر خايب بزاف ..ديك اللحظة عرفت باللي واخا نبقا نهار كامل كنشرح ليه مغيتيقنيش فاختاريت نسكت فديك اللحظة ونمشي ..
هو شعور خايب بزاف انك تتظلم وحتى واحد ميتيقك ..مشيت عند واليديا للدار كان نفس الشيء كيستناني حتى واحد فيهم متيقني وسمعت كلمة من بابا اللي خلات كياني كله يتحرك ..انا ندمت على النهار اللي ولدتك فيه ..من اليوم مبقات عندي بنت سميتها قمر ...
حتى واحد متيقني ..مشيت للشركة نشوف شنو كاين ..مخلاونيش ندخل ..وكشيت عند عبده نعرف شنو كاين ..قالي باللي معارف حتى حاجة وباللي مسبقلوش شاف هاد الملفات وباللي هو كيحملو توقيعي ..
دازو ايام حكمت المحكمة باقفال المقاولة ..يعني انهيار مشروع حياتي ..كان موقف صعيب بزاف بالنسبة ليا ..كان من الضروري نبقا بوحدي باش نعيد حيساباتي الراجل اللي حصلوه معايا معرفتش كيدار خرج وفين مشا مبانش ليه اثر..
دوزت فترة كئيبة وكنت كنفكر فحاجة وحدة هي ننتاقم من هادو اللي دارو ليا هادشي ...واحد النهار مشيت باش نشوف بنتي ولكن ملقيتهاش وقالي جدها باللي هي وباباها انتاقلو يعيشو مع مدام هبة حيت اياد رجع اتصالح مع مو بفضل خوه نور الدين ..بقيت كنضحك ..السي نور الدين بدا كيشتغل كحمامة السلام..نضت مشيت للفيلا ديالهم ..بثقة طلبت نتلاقا مدام هبة..دخلاتني وجلست معاها
-مبروك عليك ولدك رجع لحضنك
-الله يبارك فيك ..لاش جاية اقمر
-حتى انا بغيت بنتي ترجعلي
-بنتك ..نتي اللي محافظتيش عليها فحضنك ..خليها لباباها احسن ليها
-نتي اكتر وحدة فالدنيا عارفة باللي انا مظلومة ..وباللي مخنتش اياد ..ولا نسيتي باللي حتى نتي تظلمتي بحالي فصغرك ..
-ميهمش نعرف انا ..المهم يعرف اياد
-غيعرف كنواعدك بهادشي
-يمكنلك تشوفي بنتك ولكن مغتديهاش من هنا ..هادو اوامر باباها
-اوامر باباها ..ممم واخا ..كلشي كيجي بالصبر
البارت 17
شفت بنتي اللي توحشتها بزاف ومقدرتش على فراقها ..وفكرت فخطة اللي نوصل بها لمول لفعلة ..مللي جا اياد شاف فيا بواحد الاحتقار ..مقدرت نخرج حتى كلمة ..
-شنو جاية ديري هنا
-اياد ..واش تيقتي باني ممكن نخونك ...نتا كتبغيني المفروض تكون اول واحد يتيقني ..
-لقيتك فالفراش ديالي مع واحد اخور وبغيتيني نتيقك ..سكتي ..ومبغيتكش تهضري..حيت كتزيدي تدمريني
-متيقنيش ..ولكن غنثبت برائتي قدامك ..وقدام كل العالم ...
-وانا كنستنا داك النهار ..
-مزيان ..دابا بغيت بنتي ناخدها معايا
-مستحيل ..بنتي غتبقا معايا
-هاديك بنتي حتى انا ..واش تصطيتي تبعدها عليا واش نسيتي باللي مازال كترضع ومحتاجاني
-اذا بقاي تجي ترضعيها هنا
-نبقا نجي حتا فنص الليل ؟
-واخا ..يمكنليك تنتاقلي تعيشي هنا .. ولكن غا تتفطم البنت تمشي بحالك
-متافقين ..
مشا وخلاني ..مزيان داكشي اللي قلبت عليه لقيتو ..هادي فرصة ليا باش ننفذ الخطة ديالي ونثبت لاياد برائتي ..مشيت هزيت حوايجي وجيت تلاقيت بنور الدين فالباب
-اش كاديري هنا
-علاه مفخباركش ..جيت نسكن معاكم
-واش حماقيتي ..خرجي من عنا سيري بحالك ..
-حيد من طريقي وحسابك معايا هو الاخر نتا ..انا جاية على قبل بنتي واتافقت مع اياد على هادشي ..والا غاناخد بنتي ونمشي
-هاكداك ..وامزيان عنداكي غا دخلي لينا شي راجل هنايا للفيلا
-حيد من قدامي ..واللي يضحك فالاخر هو اللي يضحك كتر ...
سكنت معاهم ..ومكان حتى واحد كيحملني انا مع بنتي ولكن عيني على اياد اللي بانلي كتحوم عليه واحد خيتي بنت عم نور الدين واللي ساكنة معاهم فالفيلا ...كانت كتستافزني وانا مقادراش نقرب ليها ..كانت كتشعل فيا العافية مللي كنشوفها معاه ..سميتها فردوس ..بقيت كنستغل فرصة نتصاحب مع الخدامات بطريقتي كاين اللي كتبغي غا دوري معاها باش تجيبليك الاخبار كلها ..وكيجيبولي اخبار نور الدين ...واحد النهار جات عندي وحدة من الخدامات اللي كلفتها تراقبلي نور الدين وقالت باللي سمعاتو كيهضر مع واحد فالتليفون وكيهضرو عليا وكيقولو خاص نلقاو طريقة تخرج من هنا ..وباللي كيوجدو شي خطة يخرجوني بها ..طلبتها تمشي تجيبلي الرقم ديال الشخص اللي هضر معاه مكانش صعيب عليها تجيبو ..تصدمت مللي لقيتو ديال عبده .. مكنتش كنتوقع باللي الكره غيخليه يوسخ السمعة ديالي باش ينتاقم حيت رفضتو ..اشمن كره هو كان كيقول كنبغيك ومنخلي حتى نسمة اللي تمسك ..واخا دورك جاي اعبده وبلا شك هو السبب فالمشكل ديال الاختلاس ..اكيد هو حيت اسرار الشركة كلها فيدو والتوقيعات كنت كنتيق فيه ثقة عمية ..
خليت نور الدين والدور جاي عليه ...مشيت اتاصلت بالمحامية وطلبتها تجيبلي خبار على عبده شنو كيدير دابا وفين ..وافقات بسرعة حيت هي مكانتش كتحامل هي وياه وكانت باغاها فيه ..مكملتش ساعة صوناتلي وعطاتني جميع المعلومات اللي بقيت حالة فمي ..هو دار مشروع ديالو ..مشروع ديال بيع السيارات الفارهة ..ههه باعني وشد التمن ..تلاقينا انا وفاتن المحامية وبقينا كنفكرو..طاحت فكرة على فاتن اننا نستأجرو شي وحدة اللي مومس وتمشي تحلون ليه تما ويصورهم شي واحد ونهددوه بالتصاور ..وافقت على الفور ..وفعلا عطيت ليها الفلوس اللي تحتاجهم فهادشي ..
رجعت للدار وبقا راسي كيحرق بقوة ما كنفكر بأني محاط بالذئاب انا فحرب وخاصني نكون مسلحة وموجدة للحرب
البارت 18
بقيت مع بنتي فالبيت وفيا هدوء يخبئ بركان ...حتى نعست بنتي ونزلت نشم الهوا فالجردة ..بقيت جالسة وكنفكر فهادشي اللي وصلت ليه وحتى لقيت اياد راجع هو وديك خيتي اللي اسمها فردوس باينة كانو سهرانين ..هادي اش باغا مني ..كتقلب عليا..شاف فيا ودار راسو ماشافنيش وبقا كيتعمد يضحك معاها ويهضر بحال الا متعمد يفقصني .. دخلو وانا شاعلة فيا العافية ..بقيت شوية تفكرت عنداك يدخلها لبيتو مشيت بلا منحس دقيت عليه وفتحلي ودخلت بسرعة كنقلب فالغرفة نلقاها ..ولكن مكان معاه حتى واحد ..تنفست الصعداء ..وهو مستغرب:
-مالك علاياش كتقلبي ؟
-والو ..تصبح على خير
جيت نخرج وهو يوقفني ..صحابليك بحالك نتي كدخلي الرجال للدار ..انا ماشي موسخ
-اياد ..شوفليا فعيني واش عمري كدبت عليك ..واش عيني كيكدبو انا عمري ما خنتك وعمري منخونك
-مابقيتش كنتيق فدوك العينين ..
بديت نبكي ..واخا متافقين ..ماتيقش بيا ولكن بغيت نعرف علاش خرجتي مع ديك خيتي واش بغيتي دير معاها علاقة
-علاش لا
-مغنسمحش بهادشي ..
-شكون نتي باش تسمحي ولا لا
-انا مراتك واش نسيتي
بقا ساكت شحال وهو يقول :سيري لبيتك اقمر
خرجت كنبكي..وقلبي شاعلة فيه العافية ..وكنواعد كل واحد كان السبب فهاد الحزن وعاد لعداب انه يشوف مني اللي مشافوش...
الغد ليه اتصلات بيا فاتن وقالتلي باللي خاص نمشي عندها ضروري ..لبست حوايجي ومشيت وقالتلي باللي درنا الخطة كما اتافقنا ولكن وقع شي حاجة اللي مكانش بالحسبان :
-شنو وقع ...
-هاكي شوفي هاد التصاور
-وايلي ..
لقيت فالتصاور داك الشماتة اللي شدوه فييتي ولكن اش كايدير مع عبده..توضحات الصورة مزيان دابا ..عبده هو اللي مور اللي جرالي ..هادشي الى وربتو لاياد ممكن يتيقني بيه ..
-مدام قمر انا موجدة ليك مفاجأة احسن من هادي ..ديك خيتي اللي صيفتنا قالتلي راه هاداك معروف كيبتز العيالات ..وكياخد منهم الفلوس..كيخدرهم وكيصورهم ...وبزاف ديال الضحايا عنده ..
-مزيان غنمشيو عندو ونتفاهمو معاه ونهددوه
مشينا عنده بعدما ساعدتنا ديك البنت نلقاو بلاصته ..ابتزيناه بالتصاور اللي عندنا حتى قال كلشي ..واعترف بالواقعة كاملة وباللي عبده هو اللي عطالو الفلوس باش يدير داكشي اللي دارو وطبعا الكلميرامان كان حاضر معانا وصور كلشي بلا ميعيق لاخور الاعتراف صوت وصورة..انا عارفة باللي عبده دارها ولكن متأكدة باللي نور الدين هو اللي عطاه الفلوس وهو اللي اتافق معاه بقالي الدليل على نور الدين ..مشديت اي دليل ملموس ..
مشيت عند عبده بهدوء للمحل ديالو ودخلت ..
-تبارك الله عليك دغيا قدرتي توقف على رجليك ..
-قمر!!.. توحشتك بزاف كنت عارف باللي متقدريش تستغناي علي ..
-صحيح.. ملقيت خدمة وقلت نجي نخدم معاك
-المحل ديالك ..يحصلي الشرف
-مم اكيد المحل ديالي ..حيت نتا مين غتجيب الفلوس باش دير هادشي كله الا اذا كان اختلاس او ..سرقة او رشوة ..
-قمر ..dodi elaissati
-من اين لك هذا اسي عبده
-انا ماشي مقطوع ..وبرزقي الحمد لله
-الله..من امتا كتعرف الله ..بالمناسبة ..كيسلن عليك صاحبك ..هاداك اللي صيفطيلي داك المرة يشوهني عقلتي
-انا ماصيفط حد ..ومكنعرف حد
-مم بالصح ..شوف هاد التصاور ..شنو كيدير عندك هنا كتناقشو الازمة العالمية للسيارات ..
-قمر 😓
-هو اعتارف عليك بكلشي صوت وصورة وعطانا جميع الادلة اللي كتتبت باللي قدمتي ليه الفلوس باش يبتزني ..وهو اصلا صاحبنا معروف ودوسيه عند البوليس ..شنو رأيك نخليوه يقول باللي نتا هو الشاف ديالو وكونتو عصابة للابتزاز والتهديد ..وغندخل ختى انا فالخط ونرفع قضية رد اعتبار
-قمر كنترجاك ..انا ماعندي دخل فهادشي
-وشكون
-نتي عارفة شكون ..انا مستعد ندير اي حاجة ولكن عفاك الحبس لا ..
-شرفي اعبده مغنتهاونش فيه .كنواعدك هادي غا البدية غتشوف مني نتا والباطرون ديالك اللي عمرك ماشفتيه
-قمر ..واش نسيتي طفولتنا ..واش حتا حاجة مكتشفعلي علاش وليتي هكا مكترحميش واللي لقيتيه قدامك كتنحيه ...
-سول راسك ..
خليته ومشيت بلغت بيهم البوليس ومشيت لداري نتفرج وطلبت من فاتن تتكلف بالباقي
البارت 19
بقيت فالدار ومع بنتي وكما العادة اياد كيدير نفس الشيء باش يفقصني ..غا بلاتي عليك دابا نتا اللي غتفقص.. شوية كنسمع شي صداع طليت وانا نسمع الحوار ..كلشي كان جالس حتى جاو البوليس
-سي نور الدين خاصك تجي معانا
-علاش شنو كاين واش عارفين راسكم مع من داويين
-عارفين اسيدي تفضل معانا معانا استدعاء ليك للتحقيق معاك في قضية عصابة الابتزاز
-اينا عصابة
-سي نور الدين كتعرف هاد السيد اللي فالصورة
-فايت شفتو مع مرات خويا كانت دخلاتو لبيتها وشدوهم البوليس
-للاسف هادا راه نصاب كبير كيصور العيالات بعدما يخدرهم وكيصورهم وكيبتزهم ..وهو اعتارف بكلشي واعتارف حتى باللي شد الفلوس باش يشوه مدام قمر ..وجبدك حتى نتا فالتحقيق اسي نور الدين لذلك ضروري تجي معانا
اياد: يعني مراتي معندها حتى علاقة بداك الراجل
-لا اسيدي هاداك غا نصاب
ديك الهضرة خلاتني نعللي راسي الفوق ..وهضرت حتى مع الصحافة يكونو واجدين فكوميساريا باش كلشي يعرف بأني كنت ضحية لعبة خبيثة وسمعتي ترجعلي ..
بقيت فالبيت مع بنتي ..حتى كنسمع الباب تفتح ..هادا اياد جاي ملهوف
-قمر .. بانت البراءة ديالك
-مزيان
-كنت عارف باللي ميمكنلكش تغدريني ..كنت حاس
-لا..مكنتيش عارف ومتيقتينيش ا اياد ..وهادشي عمري ننساه ليك ..الوقت اللي كنت محتاجاك تيقني فيه نتا كدبتيني وتخليتي عليا ..
-قمر ديري راسك بلاصتي ..شوفي متخليش هادوك اللي بغاو يفرقونا يفرحو ..خاصنا نرجعو لبعضنا حنا كنبغيو بعضياتنا خلينا ننساو اللي فات ونبداو من جديد
-شرفي ا اياد ..شكيتي فشرفي ..انا اللي عطيتك حياتي وتخليت على كلشي فالدنيا على ودك نتا ..ولكن نتا شنو درتي اتهامتيني ومتيقتينيش مع اني حلفت ليك الف مرة ..ولا مرة عطيتيني فرصة نشرح ليك ..سمعتي لعدياني ..انا هنا على قبل بنتي ماشي عليك نتا ..
خرجتو من بيتي وسديت الباب ..ضروري تدوق شوية من عذاب الضمير ا اياد ..حيت اللي عشتو انا حتى واحد ميتحملو ..كنبغيك اه ..ولكن عزة نفسي مكتسمحليش نرجع عندك بسهولة...
مدام هبة متسرطاتش ليها اني جبدت حتى ولدها ..ووراتني الوجه الخايب ديالها ..ولكن على قبل اياد مقدراتش تقرب مني ..على العموم نور الدين خرج من القضية كما العادة كيدار ليها منعرف ..حصل فيها غير عبده كان اشد انتقام ..هو اللي بدا وليت واحد الشخص اللي مكنعرفش الرحمة ..مستعدة نقتل اللي يقرب مني
بقينا ايام كل نهار كيحاول اياد يقرب مني وانا كنفقصو مزيااان وفردوس كتغلي قدامي كل ما شافتني ..خصوصا وان اياد مبقاش كيديها فيها كاع ..هو كان من اللول باغي غير يفقصني بها ..واخد التهار لقيت الغرفة ديالي عامرة بالورد بقيت كنشوف فداك الورد حتى لقيتو مورايا وكيبوس كتفي ..عجبك الورد
-اه عجبني بزاف
-بدا كيعنقني وانا نضور عندو ونخرجو ..صافي سير تنعس فبيتك
-قمر
-ماشي الورد اللي غيراديني وننسا كلشي ..تصبح على خير
ههه خربشت ليه لي سونتيمون
البارت 20
عائيلتي جاو طلبو مني السماحة وسمحتليهم وحتى العم ابو اياد حيت كلشي عرف باللي ديم التهمة اتلفقات لي وصاف ماما مكانتش فرحانة من جهة عبده حيت كتقول عليه ولدي التاني وحيت تشد للحبس بقا فيها الحال ...بقيت كنفقص فاياد وهو كل نهار فحالة جديدة باش نرجعلو وانا كنزيد نفقصو مع انني كنموت عليه ..نور الدين رجع للدار وعينيه عامرين شر كتر من الاول ..معرفتوش اش غايدير هاد المرة ولكن انا موجدة راسي لاي حاجة ..على قبل اياد مستعدة ندير اي حاجة... فردوس زدتها حتى هي فالحساب ..بدات كتخطط باش تخرجني من هنا ولكن مع من جات ... دخلت فيهم الرعب ..وليت كنبان ليهم شوكة فحلقهم ..حتى من امهم ..واحد النهار قالي عقلي نديرها بفردوس كان اياد حدايا وكيرغب كالعادة وهي جاية وانا نقز عليه عنقتو وبستو ...هو معرف باش تبلا وهي تصدمات وكانت غترطق ...مشات بسرعة لبيتها وانا نطلق من اياد وقلتله ممم مازال مسمحتلك غا توحشتك ...
هو فرح حيت عارف باللي كنبغيه وغا بغيت نفقصه ..حتى لواحد النهار ..شفت فردوس كتسحب وغادية لبيت اياد ..دخلات وانا نتبعها هو ماكانش تما لحسن الحظ لحقت عليها وقلتليها اش كديري هنا ..بدات كتمتم وهي تقولي ..انا كنجي كل ليلة عند اياد ..بديت كنضحك بهستيرية هههه ..واخا بغيتي تكدبي مكتعرفيلهمش..شوفي ابنتي سيري تلعبي مع قرانك وبعدي ليك على الشبوقات ..حسن ماتجيبيها فراسك ..حسيت بيها غترطق حيت قلت ليها ديك الهظرة وهي تضربني بطرشة محسيتش براسي حتى نقزت عليها ونتفتها مخليتش فيها غواتها فيق الميتين كلشي جا يجري يشوف شنو واقع اياد هو اللي عتقها مني خليتها كلها دمايات حتى ولات كتخاف مني هربات.. كلشي بقا حال فمو.،. بقا كيدابز معايا اياد واش هادشي درتي .، شفت فيه وقلتله نتا ديالي انا واللي قربات منك غنقتلها فهمتي .. هو ضحك ديك الساعة جيت نمشي وهو يشدني من دراعي وقربني ليه ..وقال نموت انا على المغيار ..كملو من عندكم 😛..تأليف دودي
حليت عيني على اجمل وجه فالدنيا .. بقينا كنضحكو ونلعبو ..نضنا فطرنا واقترحت عليه نمشيو نتساراو شوية ..خرجنا بنتنا ومشينا نتساراو ..دوزنا نهار زوين مللي رجعنا للفيلا لقينا كلشي كيهضر عليا وعلى القتلة دالعصا اللي عطيت لفردوس ههه باش متعاودش تقربل لعمري ..الغد ليه ناضت مدام هبة كتعيط لاياد وكتقولو باللي فردوس كتقول باللي هي حاملة منك وهو كينكر وكيشوف فيا..جا عندي وبدا يحلف باللي عمرو قاسها ولا قرب عندها ..حطيت يدي على خدو وقلتلو
-اياد ..انا كنبغيك ونتيق اي حاجة قلتيها نتا ..انا متيقاك اعمري
هو فرح بزاف وبقا كيعنقني وكيطلب مني السماحة حيت النهار اللول هو متيقنيش وانا دابا تيقتو وكان ضروري نوقف فردوس عند حدها ..كان الحل هو اني نقلب على شي ثغرة فحياتها ولفت الابتزاز حتى انا تعلمتو ..دويت مع الخدامات بغدما دورت معاهم وجابولي ضوسيها كامل بالديطاي .
البارت 21
قالولي باللي كانت مصاحبة مع واحد خينة اللي كان كيستغلها وكياخد منها زبالة الفلوس وكانت كتبغيه ولكن هو لا وباللي حملت منو وطيحاتو ..هنا مربط الفرس ... طلبت منهم يقلبولي فالغرفة ديالها على اي دليل بغيت نوصل للمصحة اللي دارت فيها الاجهاض ..فعلا مشاو يقلبو حتى لقاو لاسم وجابوهلي وانا بدوري مشيت لديك المصحة جبت منها الضوسي كامل بالفلوس كلشي ساهل خاص غا تكون ذكي ..دابا جا الدور ديالها هي ..مشيت عندها ودخلت
-مبروك عليك الحمل اضرتي
-الله يبارك فيك ..وانا ماشي ضرتك حيت غنقولو يطلقك
-يا روحي ..عرفتي افردوس نتي كان خاصك تدخلي لشي كلية ديال الغباء ..حيت نتي اغبى وحدة شفتها على وجه الارض ..
-وعلاش ..حيت غنديلك الراجل
-برااااافو ..بدا شوية الغباء كيخدم
-اه غيخدم حيت مرت عمي غتبزاز على اياد يتزوجني حيت بابا الا عرف بقضية الحمل مغيعجبو حال وغينوض الصدام ومرت عمي مبغاتش هادشي
-اه عندك الحق باباك الا ساق الخبار غيتعصب ..خصوصا الا عرف باللي نتي درتيلو الاجهاض
-اجهاض؟؟
-امم ماقلتلكش باللي نتي غبية ..جاية حتى عندي وباغا تتحدايني ونتي ضوسيك بحال الزفت ..
-شكون اللي قالك هاد الهضرة ..بابا مغيتيقش وحدة بحالك
-لا مغيتيقنيش ولكن غيتيق هاد الملف.....هاد الملف فيه كلشي من نهار حملتي لنهار درتي فيه الاجهاض بالساعة والدقيقة ..
-فين لقيتيه ..
-ماشي مهم
-شنو بغيتي مقابل تسكتي
-بغيتك تمشي من هنا وتقوليلهم مكاين لا حمل ولا هم يحزنون
-ولكن غنبان كدابة و
-حين ماتموتي فيد باباك بسبب هاد الملف
بقات مصدومة من داكشي اللي قلت ليها ..باش تحرم تلعب مع اللي كبار منها ..جمعت حوايجها واعترفات باللي بغات غا ديرلي مشاكل انا واياد حيت ضربتها ومشات من الفيلا بصفة نهائيا ..ورتاحيت حيت تخلصت منها ...بعد داكشي اللي وقع ولا كلشي كيهضر عليا وكلشي كيخاف مني وحتى وحدة من بنات العائلة ديالهم مكيقربو ليه حيت كيخافو مني ..احسن حاجة هي هادي ..باش حتى واحد ميفكر يتطاول عليك ...
البارت 22
وليت وحدة قلبها قاسي حيت عايشة مع الذياب وخاصني نكول بحالهم باش حتى واحد ماياكلني ..نور الدين بقا حالف فيا ..ولكن انا كنتفاداه وكنحاول نوطد العلاقة ديالي ب اياد كتر باش منخليش شي حاجة تفارقنا ومكرهتش نمشي من ديك الفيلا ..كان تفكيري اذكى من ديالهم بحيث تصاحبت مع الخدامات وكنتهلا فيهم وحتى العساسة والجارديني كنتهلا فيهم باش يقدمو ولاءهم ليا وهادي كانت مصدر قوتي اللي معارفها وماعاق بيها حتى واحد .. فوسط هادشي كله كان الجاردينيي رجل شارف وكيتحرك بصعوبة وكان كيبقا فيا ..واحد النهار خرجت نشم الهوا وانا يبانلي كيكح وشاد على صدرو بقا فيا ومشيت نعاونو . ..بعد الحاح طلبت منه يرتاح وصونيت للطبيب جا دغيا وفحصو ..مشيت جبتلو الدوا وعطيتو راحة حتى يولي مزيان ...وجبت واحد يرومبلاسيه ..كنت كنطل عليه وكبعجبو الحال حتى واحد النهار جبد معايا موضوع مهم :
-نتي ابنتي قلبك طيب ..ولكن محاوطة بالوحوش ..نفس السيناريو كيتكرر قدامي ..مغايعطيوكش بالتيساع للاسف ومازال غتعدبي فحياتك ..اما غتستسلمي واما غتبقاي كتحاربي طول حياتك
-اينا سيناريو اعمي
-قصتك بحالها بحال هبة ..كانت شابة زوينة وقلبها ابيض ..انا كنت خدام من زمان عند باها المرحوم وكنت كنشوفها ملاك قدام عيني لحد ما استسلمات ليهم
-يعني نتا عارف قصتها كلها
-كلها ..كنت ديما بجنبها ولكن ولا مرة قدرت نهضر وندافع عليها من نهار تزوجات عبد الحميد الى يومنا هذا ..وانا عارف مزيان ان قلبها كيتعذب واخا كتبان قوية ولكن قلبها انا اللي عارفو ولات قاسية ولكن الحب فقلبها مازال بحال نهار الاول
-وكيفاش حتى تفارقت هي وعمي عبد الحميد
-كانو مزوجين وعايشين هانيين مع ان باها مكانش موافق على زواجهم حتى واحد النهار اللي جا فيه الاب ديال نور الدين بقاو كيهضرو معرفتش اش كيقولو ..من بعد هبة جات تزور عائيلتها وبقات مع ماماها ..جا باباها قال للخدامة سيري عيطي عليها وقولي ليها باللي عبد الحميد كيستناها فغرفة المكتب..مشات كتجري ودخلات للغرفة ولكن عبد الحميد مكانش تما كان تما الاب ديال نور الدين اللي كان كيحاول يتقرب منها ..المشهد كان قدام عيني مللي جا عبد الحميد يسول عليها وقاليه باباها بكل برود راها فغرفة المكتب سير عندها ..مشا عبد الحميد ولقا مراتو فوضعية خايبة مكانش يمكن يصدق معاها باللي مكتخونوش ..وطلقها مع انها حاولات بكل الطرق تثبت ليه باللي مخانتوش ولكن هو متيقهاش وبقا باها كيطلب منها تتزوج بالراجل اللي بغاه ليها باش تحميه ويقدر يحصل على ثروة ديال اب نور الدين ..وللاسف وافقات لانها تقهرات وعيات وياريتها ما وافقت حيت اكدات الشكوك ديال عبد الحميد ..وبعدها
-وبعدها عرفت شنو وقع ..ولكن علاش محاولتيش تهضر وتعارد لعمي عبد الحميد على الحقيقة
- معاودتش ليه حيت كنت خايف ابنتي انا ماشي قد هاد الناس ..ومنقدرش عليهم ..ونتي شايفة شنو كيديرو معاك
-فهمت ..المهم دابا هو تبرأ وانا غنكون حماية ليك متخافش تهلا فراسك وشرب دواك
نضت من عندو وانا كنفكر ..يعني حتى مدام هبة لقيت دليل برائتها بعد كل هاد السنين ..