البارت 23
بقينا انا واياد عايشين مزيانين ..الحب والحياة الزوجية وبنتنا معانا ..واحد النهار جات واحد الضيفة ..من العائلة ..هاد الفيلا ولات بحال دار الفتاة شي داخل شي خارج ..ومللي شافت اياد بغات تحماق عليه ..انا ديك الساعة شدتتي الغيرة وبقيت كندابز معاه وهو يضحك ويقولي اش ندير زوين وكيحماقو عليا البنات ههههه وانا مفقوصة ..ولكن وصلني الخبار ان كلشي حذرها مني وقاليها باللي انا ماشي ساهلة ومستحيل نتنازل ليك عليه هاه مزيان مللي وصلات ليهم فردوس الخبار وعرفو باللي الحاجة ديالي اللي يقيسهالي نقرصو ..بقيت مضاربة مع هاد الناس ..واحد النهار ماشية فالكولوار وانا نحس بشي يد جبداتني
-نور الدين اش كدير
-انا قلتلك النهار الاول مغنحيدكش من بالي ومغانتنازلش عليك ..بلا متمثلي دور العاشقة ..نتي فالاخر غتكوني ديالي ..نور الدين حيدني من بالك ..انا محرمة عليك حيت مزوجة بخوك يعني عمري غنكون ليك ...حلمك مستحيل بلا متحاول
-لا يمكن لحلمي غيتحقق ..وحلال نتزوج بيك الا مات اياد
-اش كتقول....واش باغي تآذي خوكً واش تصطيتي..اش بغيتي تدير
-هه ايلا كيهمك الامر اجي عندي مع التمانية دالليل تشوفي شكون كيخطط لراجلك ..
-فين نجي
-لهاد العنوان
-اش هادا دار؟ ..انا مكنمشيش للديور
-مزيان احسن ..
مشا وخلاني غنحماق اش بغا يدير ..خاصني نحمي اياد اش بغا يدير هادا نخاف لا يكون شي فخ عاود ولكن هاد نور الدين يدير اي حاجة ..قالي بالفم ديالو راه ايلا مات اياد غنكون ديالو مستحيل اياد مغايموتش ..ايلا وقعات ليه شي حاجة انا اللي غنموت ..ومغنقدرش نعيش بعده ..
بقيت النهار كله وانا مدابزة مع خاطري واياد كل مرة يسولني مالك وانا مكنلقا اش نقوله .. هاد المرة حسيت يدي مربوطين وماقادرة ندير حتى حاجة ..
الله يخرج العاقبة على خير ..وصلت الثمانية واتخذت القرار انا خاصني نمشي ونتفاهم معاه ونعرف اش بغا ..اتصلت بفاتن وعاودتليها كلشي وطلبتها تجي معايا وفعلا مشات معايا وبقات لتحت ..قلتليها الا لقيتيني تعطلت ..اجي قلبي عليا ..طلعت فالعمارة ودقيت الباب وفتحلي نور الدين اللي على ما يبدو كان كيستناني ..
-دخلي ..
-لا مغندخلش قولي شنو عندك بسرعة
-واش نتي حمقة غيسمعونا الجيران
اضطريت ندخل وطلبت منو ميسدش الباب وبسرعة لصقتي مع الحيط وبدا يبوس ليا فعنقي وانا كنحاول نبعدو غليا وكنسب فيه ..وبدون مقدمات لقيت شي حد جبدو وبدا كيضرب فيه حتى ولا كله دمايات ..هادا كان اياد ..بقيت خايفة ومعارفاش كيفاش وصل لهنا ولا شكون قالهاليه ..المهم انه جا فالوقت المناسب اللي يعنقني من نور الدين ..سمعوهوم الجيران وفكوهم ..نور الدين بالدم ناض يضحك واياد كان النار شاعلة فيه شاف فيا وجرني ومشينا للفيلا وطول الطريق مهضرش ..
البارت 24
خرج من الطوموبيل ودخل دغيا للفيلا ..وانا موراه كنعيط عليه ومكايجاوبنيش ودخل بسرعة تلاقات ليه ماماه ..
-مالك اولدي
-انا غنجمع حوايجي ونمشي من هنا ومبقيتش باغي نعرفكم فحياتي
-شنو واقع ..ستنا شرحلي ..ولدك خلا عيالات الدنيا كلها وما لقا قدامه غا مراتي ..علاش ..
مازال كيهضر مع مو حتى لقينا نور الدين جا وبدا يضحك ويقول
-هادي كانت حبيلتي انا قبل ماتكون مرتك ونت اللي خديتيها مني
انا: سكت الكداب ..سكت
اياد: علاش يسكت واش خايفة يفضح علاقتكم ..وانا ديما كنتساءل شنو سر العداوة اللي بيناتكم عاد عرفت السبب ..
نور الدين : انا وقمر كانت بينا علاقة قبل حتى نتا ما تجي وتبان فحياتنا وتفارقنا وبغات تفقصني تزوجات بيك نتا ولكن كما شفتي ماسخاتش بحبيبها الاول ..ومازال كنتلاقاو فالدار اللي شفتينا فيها .. وانا شاك باللي البنت بنتي انا ماشي بنتك نتا
انا: مستحيل هاداك كله كمين .. اياد نتا اكيد مغاتيقش هادشي ...
مدام هبة: وعلاش مغيتيقش.. ماشي جيت خطبتك لنور الدين ولا حتى انا غتكدبيني فهادي ..هو كان كيبغيك ونتي لعبتي عليهم بجوج انا حذرتك وقلتلك بغدي لولادي ومتفرقيهمليش ولكن نتي اللي فبالك درتيه ..والديك مكانوش موفقين بزواجك باياد حيت عارفين علاقتك بخوه ..
نور الدين : شوف ا اياد تصاورنا
انا: اينا تصاور ..اياد انا مظلومة ..انا غنشرحليك
شد اياد التصاور ..كانو تصاوري فعلا انا ونور الدين نهار عرض عليا العشا .. ومللي عطاني الخاتم وشد فيدي ... انا تما طاحو ركابيا .. هادا دليل كامل وكلشي شاهد عليا ..
اياد شاف فيا وعينيه عامرين دموع ..: حتى هادشي لفقوهلك .. مصرة تذبحيني ..
-ايااد لا عفاك انا نشرحليك سمع مني عفاك ..
مدام هبة : ولدي سمع مني..
اياد: سكتي .. مبغيت نسمع والو .. حتى نتي مامختالفاش عليها حتى نتي .. كلكم بحال بحال كلكم ..
عم الصمت واحد اللحظة وجرني اياد بواحد الهمجية ولاحني فالطوموبيل وانا كنبكي وهو كتر .. بقا كيسوg بواحد السرعة ووانا قلبي غيوقف ومعرفتوش فين غادي .. خرج من المدينة بقا غادي شحال حتى وقف فواحد البلاصة كلها خلا وجرني من الطوموبيل بواحد الوحشية .. هادا ماشي اياد اللي كنعرف ماشي هو ولا واحد اخور .. الغضب ملأ قلبو ومبقا يشوف قدامو ... جرني ولاحني فالارض وجبد واحد الحبل وجا بدا كيقيدني ..وليت مشدودة من يديا عند الشجرة ومقادا نتحرك ... وبدا يبكي .. علاش اقمر علاش .. عطيتك قلبي ديري فيا هاكا .. انا غنحماق علاش تلعبي بيا ،.. من الاول كنت بالنسبة ليك لعبة تتسلاي بها .. كنت وسيلة تنتاقمي بها من نور الدين علاش .. خليتيني نحلم .، خليتيني نولي نشوفك حياتي.. علاش تقتلي حياتي علاش
- اياد .. عفاك
-سكتي .. مبغيت نسمع منك والو .. حيت غنتيقك مرة اخرى .. وانا مبغيتش نتيقك حيت غنتصدم .. انا غندير نهاية لهاد العذاب
- اش غادير 😰
ناض من حدايا ودخل لواحد الخربة مهجورة وجاب منها فأس .. وبدا يحفر ..
البارت 25
بدا يحفر بواحد الغضب والعرق والدموع مخالطين ليه .. انا غنحفر قبر ليك نتي لابد تموتي باش يوقف عدابنا بجوج .. انا غندفنك حية اقمر غندفنك ....نتي غيكون قبرك هو هادا باش نسالي من هاد العداب
- اياااااد عفاك سمع مني ومتضلمنيش انا مظلومة كنقسم ليك الموضوع ماشي كما كتعتقد .. ايااااد... بقيت كنغوت عليه وهو كأنه فعالم اخور كيحفر وكيحفر ...
انا حسيت نهايتي هي هادي نور الدين خطط ونفذ المخطط ديالو بإتقان .. مجاش فبالي انه ممكن يستغل الماضي ضدي هو كان فموضع القوة حيت امه شهدات معاه واكدلت كلشي لاياد .. شنو غيوقع من بعد معرفتش .. اياد مكيشوفش قدامه وهادا اسوء شيء فالموضوع .. فضل الخوف اللي كنت فيه اياد كمل الحفر وناض عندي كيحيد لي الحبال من يدي وانا كنبكي وكنزاوكو عفاك عطيني فرصة نشرحليك .. غتندم حيت مسمعتيش مني الحقيقة .. ضربني بطرشة حتى شفت النجوم قدامي ..
-. انا مندمان فحياتي الا على حاجة وحدة وهي اني عرفتك وحبيتك نتي
-شدني من شعري وبدا يجر فيا وانا كنتألم ورجليا كيتحكو مع الارض وراسي كيحرقلي .. ولاحني فديك الحفرة ..
-اياد .. متقتلنيش ا اياد .. على قبل بنتنا
بدا كيلوح عليا التراب وكيبكي : بنتنا احسن ليها تتربى يتيمة .. احسن ما تكبر تلقا ام بحالك نتي .. كيلوح وانا كنغوت ونحاول نطلع من الحفرة وهو كيلوحني فيا برجلو .. حسيت الموت قريبة مني بزاف ... شوية سمعت واحد الصوت : اياااد ...
داك الصوت رد فيا الروح ...
- عرفت باللي غنلقاك هنا .. اش هادشي كادير واش تسطيتي
- بابا لاش جاي ..
- اياد ولدي .. هي الا خانتك فالموت رحمة ليها .. متوسخش يديك بيها
- انا اصلا ميت .. هي قتلاتني بتصرفها
انا: عمي .. عمي نتا عارف باللي انا معنديش علاقة بنور الدين وعاودتلك هادشي ... عقلتي .. عقلتي اهئ اهئ نتا اللي قلتيلي رجعي لاياد وماشي سوقك يبغيك نور الدين ولا لا المهم انك كتبغي اياد اهئ اهئ
عبد الحميد : هادشي صحيح .. قمر خبراتني بكلشي فداك الوقت ..
اياد : وشنو كانت كادير معاه دابا فدارو اش داها ليه ..
انا: هداك فخ ا اياد عفاك خليني نشرح ليك ..
عبد الحميد : نوضي ابنتي سيري بحالك .. نوضي وغيتوضح كلشي من بعد نوضي ...
عاوني عمي باش نخرج من الحفرة وانا كلي دم وجروح فرجليا مقدرتش نوقف عليهم .. عطاني مفاتيح سيارتو وقالي غبري هاد الساعة ولدي ماشي فوعيو وانا غنحاول نقنعو يعرف الحقيقة .. مشيت بواحد الحريق كنحس بالدات ديالي كلها كتحرق بحال الا كنت فحرب .. معرفتش شكون اللي قال للعم انا فديك البلاصة يمكن حس بولدو واللي عارفاه ان الله كتبلي عمر جديد باش نثبت فيه برائتي ..
البارت 26
وصلت للمدينة بصعوبة اول شخص جا فبالي هي فاتن .. مشيت لدارها دقيت وفتحاتلي وهي مخلوعة عليا .. دخلاتني
- الله يا ربي اش دار فيك هاكا غنصوني للطبيب.. اكيد اياد حيت شفتو البارح دخل موراك وداك الطريقة اللي خرجك بيها عرفت باللي غيديرلك شي حاجة
جا الطبيب وداوا الجروح اللي كانو فيا ولكن الجرح اللي الداخل شكون غيداويه ... بقيت كنفر وكنبكي وحاقدة على الوضعية وعلى نور الدين بالخصوص بعدما عاودت لفاتن على اللي وقع خافت عليا ومخلاتنيش نمشي للفيلا ..طلبتها تمشي تجيبلي بنتي حيت خفت عليها ولا يمشي يديرولي فيها شي حاجة اتاصلت بوحدة من الخدامات وقلت ليها .. باللي غاتجي عندها فاتن تاخد منها بنتي ورغبتها تعطيهالها بلا ما يشوفها شي حد .. وفعلا داكشي اللي دارت مشات جابتلي بنتي لحضني وسديت التليفون وطلبت فاتن متقول لحتى وحدة على بلاصتي او اي معلومة عليا ..دازو يوماين لاول مرة كنحس فيهم باللي بغيت نرتاح وباللي ماقادراش نزيد .. تأزمت وبقا فيا راسي .. علاش انا اللي ديما خاصني نضحي على قبل حبنا .. وعلاش هو ديما مكيتيقنيش .. انا ضحيت بالدنيا كلها على ودو .. هو شنو دار .. كان بغا يقتلني بلا ميسمع الحقيقة مني انا ... بقيت فديك الحالة حتى نضت واحد النهار لقيت فاتن جاية وجايبة اشعار من المحكمة :
-هادا استداء ليك اقمر
_ اكيد اياد رفع قضية طلاق
- هو اياد رفع قضية اه ولكن ماشي ديال الطلاق
- ديالاش
- ديال اثبات النسب ديال بنتو
انا ديك الساعة حسيت الدنيا كضور .. مستحيل واش حتا هاد الدرجة .. وصلت بيه الدرجة يشك فنسب بنتو .. مشيت كنجري بلا منحس للفيلا .. دخلت ... وبقيت كنعيط بدوك الاعصاب اللي فيا وديك الفقصة ... وملقيتش اياد.. جات ماماه :
- اشنو اللي جابك .. شنو مازال باغا من بعد ما فارقتي الخوت
- ونتي السبب لقيتيها سبة باش تكدبي على اياد ومتقوليلوش الحقيقة
- انا حذرتك النهار الاول اقمر ونتي اللي بغيتي تلعبي بالنار
- انا بغيت ولدك .. مبغيت حتى واحد من غيرو فالدنيا ... مرتكبتش جريمة .. ونتي خاص اول وحدة تحس بيا حيت حتى نتي لعبو بيك فصغرك
- انا .. قلبي مات ومبقالي منخسر من غير ولادي .. وداكشي مات وفات
- لا ماماتش وباباك هو اللي دارها بيك مللي قالك باللي عبد الجميد كيستناك فالغرفة .. ولقيتي تما راجل اخور من غيرو
تصدمات بهاد الهضرة
- شكون اللي قالك هادشي .. هادا سر معارفو الا انا والمرحوم
البارت 27
-انا ونتي والمرحوم
- شنو كتقصدي بالهضرة ديالك
- كنقصد باللي عندي دليل براءتك كما نتي عندك دليل برائتي ... طبعا نتي اكيد مازال عندك امل ترجعي لحبيبك القديم
- شنو المطلوب مني ..
- بغيتك تحكي لاياد الحقيقة كلها ..
- مستحيل .. انا غنخسر اياد ونور الدين بجوج ديك الساعة
- ممم نتي حرة .. المهم عندك الوقت باش تفكري ..
جيت وهي تعيطلي .. اياد مابقاش هنا .. هو رجع يعيش مع باباه من نهار وقع داكشي ... شفت فيها ومشيت .. شديت الطريق لعند دارنا القديمة .. دقيت وفتحلي عمي عبد الحميد .. دخلني وبقا كيهضر معايا وكيحاول يهدني مللي جا اياد شاف فيا وقال :
- علاش جايا .. واش باغا تموتي
- انا باغة نعرف علاش رفعتي داك القضية ديال النسب واش وصلات بيك تشك فبنتك
- انا كلشي نتوقعو منك .. كيما خنتيني .. انا خاصني نعرف هاديك واش بنتي انا ولا بنت نور الدين كيما كيقول ولا.. بنت شي واحد اخور ..
- سكوت وباراكا متتاهمني فشرفي .. حتى لهنا وخلاص سالا كلشي .. طلقني وبنتك مابغيتكش تعتارف بيها ومتحلمش اني نوافق ندي بنتي دير شي تحليل .. بغيتي تيق هو هاداك مبغيتيش تيق..
- علاش .. خايفة يعني راكي فالشك .. نتي براسك معارفاش شكون باها ..
- سكوووت ... باراكة .. حتى لهنا وباراكة .. طالما تلاشات بنا الثقة .. كلشي سالا .. غيجي النهار اللي غتعرف فيه باللي نتا ظلمتيني بزاف وغتجي تطلب مني نسمحلك .. ديك الساعة مغتلقانيش ...
مشيت كنبكي وقلبي شاعلة فيه النار .. بكيت حيت وصل بنا الحال حتى هاد الدرجة ... ولكن انا مغنتهنا حتى ناخد حقي من اللي ظلموني .. نور الدين كيستناه مني كادو كبير وزوين غندمو على كل دمعة نزلت مني ...
البارت 28
كان كل يوم كيجيني استدعاد من المحكمة باش نمشي نحضر جلسة اثبات النسب انا وبنتي ولكن كنت كنتجاهلها .. غنكون كنهين بنتي وكنثبت ليهم باللي درت شي حاجة .. انا متأكدة باللي اياد هو باها وميمكنش ندير التحليل ... بقيت انا وبنتي مع فاتن فدارها حتى والديا مسولوش فيا واللي عرفتو ان اياد مشا لعندهم ومقدروش ينكرو باللي هما رفضوه من الاول غا حيت خطبني نور الدين حتى هو .. بقوة التفكير والصمت اللي كنت فيه نضت مشيت هزيت صاكي ومشيت للشركة عند نور الدين دخلت
- يا الف مرحبا .. كنقول مال الشركة دخل فيها نور فجأة .. هي غا قمر اللي طلات
- هادي راها الطلمة وهي اللي غتظلم ليك حياتك
- على قلبي بحال العسل
- شنو بغيتي مني انور الدين مازال مكفاكش داكشي اللي درتيه معايا كله شنو مازال بقالك مدرتيهش
- بزاف .. مازال بقالي بزاف
- وعلاش هادشي كله .. حيت رفضتك
- مازال متولداتش بنت المرا اللي تتحداني انا وتقولي لا ..
- شنو المطلوب مني
- باش نبعد منك للابد ومنبقاش نقرب ليه
- نطق شنو بغيتي طلقني
- ليلة .. بغيت ليلة معاك ومستاعد ننسا بعدها كلشي داكشي وكل العداوة اللي بينا
- نتا اقذر انسان شفتو على وجه الارض .. نضت ووجهت ليه نظرات قاسية بكل ثقة .. واخا تبقا نتا اخر راجل على واجه الارض انور الدين عمرك ماتحلم تقيستي او نتنازل ليك على راسي .. احلم
خرجت كاعية من تما .. كنواعدك باللي مغاتشوف مني غا اللي يقتلك ... نهايتك غتكون على يدي انا
خرجت من تما ومشيت بحالي واياد مازال مصر يدير التحليل لبنتو.. وللاسف المحكمة فرضات عليا اجباريا ندير التحليل لبنتي .. ومشيت لقيت كيستناني اياد فالمحكمة ماجاش يبوس بنتو كان كيكتفي فقط بتوجيه بنظرات حادة ليا خداو العينة من الدم ديالو هو ومن ديال بنتي .. ومشيت بحالي فانتظار نتائج التحليل بعد 10 ايام ..
مشيت بحالي انا وبنتي بلا منشوفو فاياد ..
بقيت شحال وانا كنخطط هاد نور الدين فالصراحة مالقيت منين نشدو والامل الوحيد اللي عندي دابا هي امه وعلى مابانلي طال تفكيرها ..
واحد النهار اتاصلات بيا مدام هبة وقالتلي باللي باغا تشوفني ضروري .. مشيت تلاقيتها فواحد الكافي :
- الله يسمعنا خبار الخير
- قمر انا فكرت فالعرض ديالك .. انا ولادي تفارقو ومابانليش فيهم غيرجعو .. والفرصة اللي عشت كنستناها تجي جات وخاصني نقرر انها توقع .. ومن جهة كنشوف ولدي اياد كيتعدب .. وخاصني يرتاح .. انا قررت نعاودلو كلشي وفالمقابل تبيني الدليل دالبراءة ديالي اللي عندك ..
- انا موافقة ولكن بغيت هادشي كلشي يوقع فالنهار اللي تبان فيه النتيجة ديال ADN ديال بنتي .. بغيتو يعرف ...
- متافقين .. وحتى انا بغيت عبد الحميد يعرف فنفس النهار
اتافقنا انا ومدتم هبة على كلشي ومن جهة مشيت للعجوز الجاردينيي وطلبتو يعاود كلشي للعم عبد الحميد مللي نطلب منو انا .. وباللي حان الوقت يكفر على الذنب اللي شغلو سنين هادا ..
البارت 29
دازت عشر ايام وجا اليوم الموعود .. مامشيتش للمحكمة باش نعرف نتيجة التحليلة ولا نشوف تعبير وجه اياد مللي يعرف باللي شك فبنتو .. اكتفيت فقط باني صيفط فاتن تنوب عني فالقضية وتجيبلي الاخبار بما انها المحامية ديالي .. مشات بقيت كنستنا تجي وفعلا مللي جات ..
- فاتن على سلامتك عاوديلي شنو وقع
- القاضي اعلن على نتيجة التحاليل وثبت نسب البنت لابوها رسميا ..
- وشنو كانت ردة فعل اياد
- شفت فيه بحال الا رجعت فيه الروح وتنفس من جديد .. وضحك وبالمناسبة هو من اول الجلسة كيقلب بعينيه عليك وكيستناك تجي
- مزيان .. هادا اول دليل على براءتي ..
- ونزيدك .. جا عندي وبقا كيسولني عليك ..
- ومن بعد
- قالي بغيت بنتي
- هه قولو بنتك نكرتيها ..
- ايوا الالة قالي فين هي قمر
- شنو قولتلو .. ياكما قلتيليه على بلاصتي
- لا متخافيش .. قلتله انا كنتواصل معاك غا بالتليفون ..
- مزيان .. تبارك الله عليك
ودابا غنفذ اتفاقي مع مدام هبة اتصلت بها وقلت ليها تدير داكشي اللي اتافقنا عليه باش ندير حتى انا اتفاقي ... ووافقات وعرفت من الخدامة انها قالت كلشي لاياد وباللي انا مكنتش عارفاهم خوت وباللي مدرت والو مع نور الدين ... تقلق اياد بزاف ... جا الدور ديالي اتاصلت بالعجوز وستنيتو فبواحد البلاصة بالطوموبيل وهزيتو معايا واتاصلت بالعم عبد الحميد طلبت منو يجي لواحد البلاصا .. مللي جا
- عمي طبعا نتا مستغرب علاش عيطت عليك اليوما .. ولكن انا ضميري مسمحش ليا نخبي شي حاجة بحال هادي .. الحاج غيعاودليك شي حاجة مهمة كنترجاك تسمعو حتى الاخر ..
بدا السيد كيعاود وعبد الحميد مصدوم من داكشي اللي كيسمع .. عيطت على مدام هبة .. مللي جات كان اللقاء حزين والدموع هي اللي سيطرات فيه عليها .. كل هاد المدة .. طلبو السماح من بعضياتهم وبقا الحب قائم .. شكروني حيت جمعتهم ودعاو معايا نرجع انا واياد قريبا ...
مشيت ومبنتش حدا اياد خليتو يتكوا كما تكويت انا .. حليتو يحماق
البارت 30
بقيت مختفية من على الجميع وصلني الخبار باللي اياد كيقلب عليا فكل مكان وكيسول عليا كلشي الناس ووصلني ايضا باللي دابز مع نور الدين شي مدابزة كبيرة ...واحد النهار سمعت الدقان فالباب مكانتش فاتن فالدار .. مبغيتش نفتح شوية شي حد هرس الباب ودخل واحد الراجل ضخم خلعني دفعني وهز بنتي انا شديتو معرفت منين جاتني ديك القوة بديت كنقمشو وكنضربو بكل ما عندي من قوة حط البنت وبدا يضرب فيا باش يتفك مني شوية جبدو شي حد وبدا يدابز معاه ويتضارب معاه .. كان اياد ديما كيجي فالوقت المناسب .. بحال الافلام الهندية .. انا هزيت بنتي دغبا لحضني بالخوف ..دقة فداك الضخم ودقة فاياد ولكن داك الرجل غلب وهرب ... انا خفت بزاف .. ناض اياد جرني وقالي يالله نمشيو من هنا .. مشينا وانا الخوف راكبني .. داني للدار عندو فين كان باه وامه .. شافونا تخلعو .. بهدما هدنوني بداو يداويو الجروح اللي فوجهي وفوجه اياد .. عاودتليهم كلشي وبأن الراجل كان مستهدف بنتي وباغي يخطفها .. لوكان ماجاش اياد يفكني كان اول واحد غنشك فيه .. نطقت امه : شكون يبغي يدير هاد الفعلة
- مكاين من غيرو .. نور الدين طبعا
- الله ابنتي ومال نور الدين مسطي علاش غيدير هاد الفعلة
- هو انا متأكدة وكنقسم ليكم ايلا مبعدش من طريقي انا غنقتلو .. سمعتو غنقتلو
كنت هايجة بزاف فديك الساعة ومكنشوفش قدامي .. المهم ان بنتي معايا .. اضطريت نبقا معاهم فالدار واعتذرت لفاتن على الروينة اللي درتليها فالدار .. بقينا ستكتين مشحال انا واياد وهو ينطق
- لوكان مجيتش فالوقت المناسب .. بنتي معرفتش فين غتكون دابا
- بنتك؟ ماشي هادي اللي نكرتي .. واجي لهنا شكون قالك باللي انا فدار فاتن وعلاش جبتي فداك الوقت بالضبط .. هادشي غريب اولا
- انا من نهار غبرتي وانا شاك باللي نتي مع فاتن وديما كنت كنسولها وكتقولي باللي معارفا عليك والو هادشي كان كيثر شكوكي كل نهار كنت كنراقب دارها على امل نشوفك .. والبارح شفت داك الراجل وجاني غريب وبقيت كنراقبو مللي لقيتو جاي عندك وكيدابز معاك مصبرتش جيت وعتقتك منه ..
داز داك النهار فالرعب وبقا نور الدين فبالي .. اكيد هو وبقيت كنفكر فحل للانتقام منو .. واحد النهار بقيت جالسة حتى لقيتو كيتاصل بيا:
- الو حبيبة لاباس عليك ..
- كلب .. مازال عندك الوجه تتاصل
- وعلاش منتاصلش .. بغيت نتمئن على بنت خويا
- كنقسم ليه بالله انور الدين الى قربتي لبنتي مرة اخرى غنقتلك
- شنو كتقصدي بمرة اخرى .. واش كتاهميني باللي انا اللي حاولت نخطفها .. واش ممكن نآدي بنت خويا ... هاديك راه بنتي حتى انا
- سكوت .. وباراكة متمثل عليا دور البراءة
- شوفي ا قمر .. نتي اعداءك كترو بزاف .. تبتي وفكري شكون عندو مصلحة بدير هادشي وحضي راسك منه حيت بانلي مبغاش يبعدليك حتى يصفيهالك .
البارت 31
- واش كتهددني .. وشكون هادا اللي غيصفيهالي ..
- الى بغيتي تعرفي اجي عندي .. الهضرة ماشي فالتيلفون
- واش مغاتساليش من القذارة ديالك .. بغيتي ديرلي شي كمين عاود تاني ..
- لا .. مكاين لا كمين ولا والو .. هاد المرة كنقولك الصراحة لمصلاحتك عتقي راسك
- هانا جايا دابا
- واخا
باش منطيحش فالغلط اللي طحت فيه المرة الاولى مشيت عند اياد وقلتله كلشي قالي نمشي معاك رفضت حيت لوكان نور الدين بغا يقولها فالعلن ميطلبش مني نجي .. وافق ولكن بشرط انه يمشي معايا ويبقا فالطوموبيل .. داكشي اللي درنا طلعت انا لعند نور الدين وانا خايفة .. لقيت الباب محلولة ترددت بزاف قبل مندخل و.. دخلت وانا خايفة لا يكون موجد ليا شي كمين ولا شي فخ كما العادة ... دخلت وعيطت نور الدين .. شوية وانا نتصدمت .. لقيت نور الدين مرمي فالارض وغارق فالدم مضروب بالموس .. فشلو عليا رجليا وبقيت كنغوت نور الدين نوض عفاك شكون اللي دار فيك هادشي .. نطق بصعوبة .. قمر عتقيني .. مبغيتش نموت عفاك .. مشيت بسرعة طليت من السرجم وغوتت اياااد عتقني عفاك ... هو تخلع جا كيجري شاف داك المنظر تصدم ... تعاونا انا وياه وهزينا نورالدين للطوموبيل مشينا بيه بسرعة للسبيطار وهو كان كيقول كلمة وحدة قمر قمر ..
وصلنا للسبيطار دخلناه دغيا وديركت دخلوه لغرفة العمليات انا مقدرتش نوقف كنت خايفة بزاف اياد اتاصل بامه وباه جاو بسرعة وحتى واحد مفاهم شنو واقع .. كلشي كان كيستنا على نار وخايفين على نور الدين .. بعد ساعة خرجوه وجا الطبيب قالينا باللي دخل فغيبوبة ومعارفينش فوقاش غيفيق منها ... كلشي فشل تما وجاو البوليس بداو يسولو شنو وقع .. شاف فيا اياد بخوف .. قمر شنو تراا بيناتكم .. شنو وقع .. شفت فيه بصدمة : اياد .. انا لقيتو هكاك انا مدرت والو ..
غوتات عليا ماماه وجات تنتفني وعتقني منها اياد قالت .. كلنا سمعناك كتقولي غنقتلو .. كان صحابلك هو اللي بغا يخطف بنتك علاش علاش درتي هاكا المجرمة .. جاو عندي البوليس وطلبو مني نمشي معاهم يكملو التحقيق حيت انا اول مشتبه به فالجريمة بسبب اني هددته بشهادة الجميع بالقتل ... انا متيقتش واش راني فحلم .. اياد جا معايا فالكوميسارية خداو اقوال اياد بما انه اللي هز نور الدين للسبيطار وبعد استجوابي قرر يحبسوني اربع ايام على ذمة .. انا متيقتش راسي .. فاتن حضرات على الفور بعدما طلبت منها تجي .. اياد بقا معايا وقالي باللي هو غيدير جهدو يثبت براءتي .. تصدمت من قرارو غريب اول مرة كيتيق فيا .. مع انه مشافش ما يثبت برائتي .. هادي حاجة زوينة على العموم...
البارت 32
بقيت فالحبس كنستنا مصيري .. هادشي مكتوب عليا وللاسف انا مهددة بالسجن المؤبد الى مشا حتى مات نور الدين .. بقيت تما حتى جاو خرجوني السجانات وداوني لعند النائب العام .. شافني وقالي مبروك .. تم الافراج عليك .. متيقتش راسي .. ولكن كيفاش .. وهو يقولي نور الدين فاق وقال باللي ماشي نتي اللي حاولتي تقتليه وبالعكس عتقتيه .. دخلات المحامية ديالي وعنقاتني هي واياد وهما فرحانين .. وخرجنا وقلتليهم ولكن شنو هادا اللي حاول يقتل نور الدين وعلاش .. سكتو بجوج بيهم وشيرولي براسهم للجهة الاخرى وانا نتصدم شفت عبده .. كانو جايبينو البوليس .. هو اللي دارها مستحيل .. داز من حدايا وداير فيا شوفة ديال الحزن مشيت عنده وقفتو .. وعينيا مغرغرين بالدموع
- عبده .. علاش .. علاش ضيع حياتك هاكا
- غنبقا نبغيك اقمر حتى اخر نفس فيا .. كما نتي ضحيتي بحياتك على ود الحب حتى انا درتها .. وغامرت بحياتك على ودك نتي ولكن موصلتش ليك .. حياتي كانت من الاول مرهونة بيك نتي وبلا بيك غتكمل .. جروه البوليس وداوه وانا عينيا كيبكيو .. هادا صديق طفولتي عبد الخالق اللي كان الشادة والفادة فحياتي كنعاودها ليه مر شريط طفولتنا قدام عيني فلحظة واحنا صغار وحنا فالثانوية وحنا فالجامعة .. واش غنضحي بيه بسهولة .. مقديتش نحبس دموعي واياد كيعنقني وكيواسي .. بعد خروجي من تما طلبت من اياد يديني لعند نور الدين نشوفو .. وفعلا مشينا عندو دخلت لقيت كلشي معاه وطلب من كلشي يخليونا نهضرو بوحدنا .. كلشي خرج وبقينا انا وياه ..
- قمر .. انا مدين ليك بحياتي .. لوكان معتقتينيش مكنتش غنبقا حي
- انا كنت غندير نفس الحاجة مع اي واحد اخور فبلاصتك
- اي واحد اخور اه ولكن انا لا .. انا عاديتك وظلمتك بزاف فحياتك .. وحولت حياتك لجحيم .. كنت اناني .. وكنبغي الحاجة ليا .. قمر كنطلبك تسامحيني على كل ما درتلك فحياتك وعفاك خلينا نبداو صفحة جديدة كأصدقاء ..
- موافقة اصدقاء
تعنقنا وسمحتليه على كلشي .. وسولته
- نور الدين شنو وقع عاودلي كلشي عفاك
- عبده هو اللي رسل داك الراجل كان باغي يخطف بنتك انا عرفت هادشي مللي جا عندي يعرض عليا نتافقو انا وياه من جديد عليك حيت نار الانتقام كانت شاعلة فيه وكان غرضو يقتل اياد ... انا كنت نقبل اي حاجة الا ان خويا يتصاب بأذى ومللي رفضت هددني .. انا كنت باغي نوصليك الخبار باش تحضي راسك منه لانه كان متوحش .. ولكن مللي قلتلو راه غنوقفليك بالمرصاد الى حاولتي تآذي خويا طعني وكان غيقتلني
- نور الدين انا باغا نطلب منك واحد الطلب
- اه طلبي
- انا بغيتك تسمحلو مبغيتش يقضي حياتو فالحبس .. هو ماشي خايب وميستاهلش داكشي وانا اللي كنتحمل المسؤولية ديال هادشي اللي وصل ليه
- فهمت .. هو صديقك .. وعارفة باش كتحسي
- عفاك فكر فالموضوع ومغتندمش باراكة من العداوة
- يكون خير
دخل المغيار د اياد .. واش مازال مطول مع مرتي .. راني كنغير هاا
ضحكنا انا ونور الدين .. فرحت حيت سالات العداوة اللي بنا .. هاد المرة حسيت بنور الدين تغير .. دوز نور الدين مدة فالمستشفى كنا كنزوروه وكانت كتزورو معايا حتى فاتن .. وتوطدات العلاقة بناتهم .. اكيد هادي هي البنت اللي كانت كيتمناها نور الدين شابة زوينة وقوية ودكية .. هي تماما ..
البارت 33 الاخير
خرج نور الدين من السبيطار ومدام هبة اعتاذرات لي على اتهامها ليا بمحاولة قتل ولدها .. انا سمحتليها لانها مكانتش واعية بداكشي اللي كتقول ولدها هاداك وكتشوفو كيموت قدامها ...انا واياد رجعنا كيف قبل .. نور الدين وفى بالعهد ديالو ومشا تنازل على الدعوى وبالتالي عبد خدا حكم مخفف .. اليوم هو يوم مميز حيت غنمشيو نخطبو لنور الدين غنخطبوليه فاتن طبعا .. العريس مرعوب وحنا كنضحكو عليه لبس كوستوم جا معاه بزاف مشيت انا ومدام هبة وعمي عبد الحميد وحبيب قلبي اياد .. دخلنا بالصلاة والسلام .. نور الدين حشم بزاف .. ههه ونهار العرس وقفت مع فاتن حتى جات حماتي جابتلي واحد الصندوق كبير قالتلي هادا ليك .. مللي فتحتو .. حليت فمي بداكشي اللي شفت .. اش هادشي كسوة دالعرس
- نتي ملبستيش كسوة دالعرس ومفرحناش بيكم نتي واياد وحان الوقت نفرحو بيكم .. كانت فرحة ماليها مثيل .. لبستو وقادولي شعري ولينا جوج عرايس انا وفاتن .. جا نور الدين باس مرتو وعبر عن اعجابه بفستاني .. ودخل حتى اياد شفتو لابس الكستيم دمعو عينيا وعنقتو ..
- حلمنا تحقق اخيرا .. كنا احلى عرسان داز عرس اسطوري شطحنا ونشطنا .. وبعد العرس مشينا باربعة بينا ندوزو شهر العسل كان من احسن ما يكون ... dodi elaissati
حاربت بزاف على ود الحب ديالي لاياد كلشي على قبل الجملة اللي سمعتها من حماتي وحماي ... اللي ميضحيش على قبل يعيش الحب ديالو ميستاهلوش ..
هادي قصتي قمر .. واياد ❤ النهاية