البارت 21
نضت وانا مرعوبة منها خديت حوايجها وبديت نصبن .. خانزين حوايجها.. الذل كيداير.. انا اللي كنت كنغوت على عزيز ونقولك صبن لراسك انا مجبتينيش خدامة عندك .. بقيت كنصبن وكنبكي .. شوية وهي تغوت عليا صوتها كيخلع .. دغياااا .. بديت كنصبن دغيا وكنرجف.. حتى كملت .. نشرتهوملا تما.. عيطو علينا فالغدا خرجت مشينا وانا كلبارح مكليت .. دخلنا بالصف هزينا صينيات دالحديد .. بقينا كندوزو على هادوك اللي كيعمرو الماكلة .. حطو لينا العدس .. وعصير وخبزة .. وشوية داللحم مطايبش .. واش هادي ماكلة.. محملتش راسي .. جلست بالجوع كليت داكشي.. حيت كرشي كانت كتصفر.. مللي كملنا الماكلة عيطو عليا السجانات بالسمية قالولي اجي تغسلي الماعن .. كنت ناسية باللي محكوم عليا بالاشغال الشاقة.. المواعن تابعيني حتى الحبس.. تقهرت بقيت كنغسل ونشلل.. حتى عييت.. كنت باغا غير فوقاش نطيح ننعس.. مللي مشيت للزنزانة لقيت السيدة الشمكارة في انتظاري.. شنقات عليا.. واش عادا تصبين .. واش كتفلاي عليا .. واش مشلاهم كتوهميني باللي صبنتيهم .. بقيت خايفة ومعرفت مانقول.. وهي تشدني عطاتني قتلة دالعصا.. ضلوعي بقاو كيحرقو كلهم.. الله يا ربي هادي غي البدية .. خايفة منخرج من هنا الى مكفنة.. بقيت كنعاود التصبين لدوك الحوايج.. تقهرت .. كلشي نعسو ورتاحو الا انا .. بقيت فرك ياما فرك باليدين.. من نهار تزاديت وانا فالمشاكل .. وجهي غا ديال المشاكل.. عمري غانرتاح.. نهار اللي تلاقيت يحيى واخيرا قلت ضحكاتلي الدنيا.. ضحكات عليا ديك الساعة وقالت لي والله لا كان ليك.. اه يا دنيا علاش،، مشيت ننعس وانا رجليا ماقادا نوقف عليهم.. طحت كوم فالنعاس... بالعيا.. الصباح بكري بديت نسمع الصداع.. واش هادو مكينعسوش.. فيقونا وعيطو علينا نمشيو نفطرو.. نفس الشيء .. ماكلة ديال الحباسات... مافيها ميتاكل.. غير كملت الفطور ديريكت للخدمة.. صيفطوني هاد المرك نقي الطواليطات.. اي عقاب هذا... بعد هاشي اللي كيصرا ليل عمري نفكر فالدعارة .. الخنز هو هادا .. الذل بعينه.. الروايح والخنز فكل بلاصة.. بديت كنطلق فالما وكنسيق.. بالفقصة... علاش ايحيى علاش .. ياك كان قلبي مات فهاد الدنيا علاش عاودتي حيتيه علاش ...كملت داك الخنز حتى تقييت الف مرة .. تمشيت شوية فالكولوار شفت انواع واشكال ديال المحابسيات... شمكارات وكمايات...كل وحدة وقصتها... شوية جات عندي وحدة من السجانات قالتلي عندك زيارة.. تفاجأت واش يكون زعما عزيز.. مشيت معاها انا غانرغبو يتنازل على الدعوة وغادي نفذ للي بغا المهم منزيدش نهار فهاد الحبس...مللي مشيت كان غايطيح مني النص مللي شفتو..
- 😰يحيىى..
ماض وشاف فيا وعينيه فيهم دموع..
- ملاك.. ولا بغيتي نقولك اعايدة..
مقدرتش نهضر .. كنت كنحس غير بالعرق كيجري بحال الشلال فوجهي..
- علاش درتي هاكا .. علاش كدبتي عليا.. شنو درتلك.. انا بغيتك من قلبي وعمري آذيتك.. علاش كسرتي قلبي علاش تقتليني هاكا حرام عليك.. كدابة.. ومزوجة.. وعاهرة!!! .. عاهرة املاك.. وانا اللي كنت كنخاف حتى نشدلك فيدك.. كنت كنخاف عليك.. علاش درتي فيا هاكا ،.. حرام عليك.. مالك ساكتة هضري دافعي على راسك وقولي باللي هادشي كله كدوب وباللي انا كنكدب.. قولي باللي هادشي غير متلفق ليك وباللي نتي ملاك اللي كنعرف .. انا غانتيقك ... قوليها عفاك..
- لا.. هادشي كله كاين .. انا عاهرة وكدابة .. ومزوجة بشارف بزاز عليا.. ومكنتاميش للوسط ديالك كاع.. انا مشابعة حتى الماكلة.. انا بنت حي شعبي بسيط وبا جرا عليا من الدار وزوجني وانا بنت 15 عام بشارف بزاز عليا.. ونزيدك... انا دوزت بزاف دالرجال غير على قبل الفلوس.. اللي فنظرك عاشت هادشي كله .. واش غاتكون ملاك.. لا .. انا ماشي ملاك.. انا عايدة..
- كيفاش كنت اعمى حتى هاد الدرجة.. كيفاش كنت غبي .. كيفاش ملاحظتش كاع هادشي.. بغيتك ومفكرتش انك ممكن تكوني اكبر جرح ليا فالدنيا.. انا .. كنت كنشوف فيك احلامي كلها .. واش مبقيتش فيك.. اينا نوع من البشر نتي.. نتي شيطان .. ماشي بنادم.. نتي بلاصتك هي هادي .. الحبس للي بحالك..
بدا كيبكي ودموعو شلال .. عمري شفتو كيبكي ولكن كل دمعة نزلات منه كانت بحال السيف فقلبي .. جات السجانة جراتني وقالتلي كملت الزيارة.. جريت رجلي وانا معاها وانا قلبي محروق.. وغانموت من الداخل ديالي ..
البارت 22
فقدت وخسرت يحيى الى الابد .. انا حياتي سالات صافي .. انا نتاهيت.. حياتي مابقا بيها حتى معنى.. دموعي شلال .، حسيت جسمي تقال عليا عادية حتى غييبت.. حليت عيني على واحد الناموسية.. وحدايا واحد البيت لابسة طابلية ..
- فين انا ..
- نتي فالمصحة ديال الحبس.. على سلامتك..
بديت كنبكي عاود تاني مللي تفكرت يحيى..
- هدئي اعصابك.. رتاحي هنا اليوما.. عارفة باللي الحبس صعيب ونتي اول مرة كتدخلي ليه .. ولكن دغيا غايدوزو هاد الايام..
خرجات وخلاتني ،. كنبكي وكنفكر فيحيى.. انا حياتي مكتسوا والو بلا بيه.. كيفاش غايكون داير دابا .. كيفاش غاتكون حالتو.. قلبي تقبط.. وبديت نبكي من جديد.. حسيت راسي عيانة بزاف .. حاولت ننعس ولكن ماجانيش النعاس.. بقيت فالمصحة داك النهار وانا كنفكر فيحيى.. مكليت والو.. معندو منين يدوزلي .. مللي خرجت من تما محملتش راسي.. داوني للزنزانة دخلت ديريكت لفراشي .. وانا نلقا عند راسي ديك السخط ..
- نوضي البقرة .. نوضي نقيلي بلاصتي ..
- انا مريضة عاد خارجة من المصحة .. ماقاداش
- انا غانوريك دابا ماقاداش ..
جبداتني وبدات كتركل فيا وانا مافياش القوة.. الكلبة محناتش فيا.. نضت وبديت نخمل ليها وانا الجهد مافياش كاع.. انا اللي درتها لراسي .. اش خديت من هادشي كله .. والو.. كنت دايراه باش نبقا بجنب يحيى صدقت خاسرة كلشي.. لوكان استغليت عزيز من اللول .. كاع منوصل لهاد الذل كله.. عامين.. عاد دازت غا يوماين وانا ماقاداش نكمل .. مقاداش نصبر لهاد الذل وهاد المهانة.. كملت بزاز .. مشيت دغيا ننعس.. طحت كومة.. مللي فقت سمعت الصداع وكلشي فين ملهي .. جات عندي واحد البنت..
- ختي لاباس عليك.. كبقيتي شوية..
- الحمد لله..
- انا سميتي سلمى.. ونتي ..
- انا عايدة..
- متشرفين اعايدة.. علاش جاية هنا بأي تهمة..
- خيانة زوجية.. عامين ونتي..
- انا على المخدرات.. خمس سنين .. دوزت منهم عام بقات ليا اربعة..
- كيكاتقدري تعيشي مع هادو.. انا حاسة راسي غانموت..
- هنا احبيبة الى باغا تعيشي مخاصكش تحني الراس.. خاص ديري بلاصتك حتى نتي.. وتدابزي وتضاربي .. باش يديرولك الحساب.. اللي كيحشم ويخاف من هادو راه غايركبو على ضهرو ..
فكرت فهادشي اللي كتقول سلمى.. عندها الحق .. انا مابقالي منخسر فالدنيا.. علاش مازال خايفة من هادو .. يا ذبحة يا ربحة..
نضت مع سلمى مشينا نتغداو.. نفس الماكلة ولكن حاولت نولف راسي بيها .. وكليت باش تدير فيا القوة.. تقهرت بيحيى.. خاصني ننساه.. حيت صافي عمرو ماغيرجعلي .. من سابع المستحيلات.. كملت الماكلة عيطو عليها نسيق.. مشيت سيقت ولكن هاد المرة بشوية عليا باش منعييش ونفورصي على راسي.. حتى كملت على خاطري.. كاين بزاف اللي محكوم عليهم بالاشغال.. كل واحدة شنو كانت كادير.. مللي كملت.. مشيت لبلاصتي لقيت لالاهم كتسناني باش تضسر عليا اليوما عاود .. قالتلي ديريلي مساج .. قلتليها لا .. ناضت عندي باش تضربني وانا نشد فيها خرجت فيها غدايدي كلهم .. عضيتها وقمشتها ونتفتها مزيان وهي كتغوت ياك هي اللي باغا المساج.. هاهو احسن مساج فالدنيا .. خرجت فيها غدايدي مزيان ومقدرتش نوض من عندها كلشي كيفكو وانا شادة فيها.. حتى جاتني واحد الضربة فالظهر هي اللي فشلاتني.. تلفت نشوف شكون لقيتها وحدة من السجانات .. قالتليهم جيبوها.. جروني وداتني عن الشاف ديالهم.. شبعني سبان ومعيور.. كل انواع الاهانة.. ولكن انا مكانش كيهمني المهم شفيت غليلي منها .. كاع داكشي اللي دوزات عليا خرجتو منها.. مابقات حتى حاجة كتهمني فالدنيا .. ايلا بغاو يقتلوني فهاد الحبس غير يقتلوني .. مكيهمنيش.. الحاجة اللي كنت عايشة على قبلها فالدنيا مشات خلاص.. حبي خسرتو.. اذا حتى حاجة مكتستاهل نعيش على قبلها.. بقا هاداك كيسب ويعاير فاللخر قال للسجانة تديني للحبس الانفرادي.. ماكيهمش المهم ننعس شوية ونرتاح منهم.. دخلتني مكان فيه لا سرجم ولا ضو ولا كاشة ولا نموسية.. نجلس وننعس فالارض .. جلست وبقيت كنفكر فيحيى من جديد.. نقطة ضعفي الوحيدة فالدنيا.. جمعت رجلي عندي وتكمشت حيت كنت كنحس بالبرد.. بقيت كنردد .. يحيى.. كنبغيك بزاف.. عفاك سمحلي.. كنواعدك عمري ماغادي نخبي عليك شي حاجة.. كنواعدك.. سمحلي عفاك.. عمري نكدب عليك.. اخر مرة عمري نعاود..
البارت 23
قيت فالسجن الانفرادي والبرد قاتلني والجوع.. حتى تجمدت وداني النعاس هاكاك.. حتى الليل دخلولي واحد الطبسيل فيه شوية دالماكلة والخبز.. كليتهم .. ورجعت تكمشت من جديد.. حتى داني النعاس.. الصباح فقت بكري .. مكان عندي ماندبر بقيت كنشوف فالحيوط.. لقيت واحد الطبشور تما وبديت كنكتب يحيى.. كنبغيك.. اه يا يحيى علاش حتى سكنتي الجوارح ديالي عاد مشيتي.. دوزت النهار كنفكر فيه .. وغادية جاية فداك البيت الصغييور.. شوية تفتح عليا داك الباب اللي غا الصوت ديالو كيخلع.. دخل منه هاداك ديال البارح اللي شبعني سبان..
- وقفي ..شنو داك الروينة اللي نوضتي البارح..
- ديك السيدة ديما كتضربني وكتظلمني.. وانا مكندير ليها والو.. البارح خديت حقي...
- خافي على راسك بلا متزيدي المدة اللي راكي هنا.. خليها تنقص بدل ماتزيد.. انا غانعفو عليك هاد المرة حيت اول مرة.. ولكن المرة الجاية متلومي غير راسك.. داوني للزنزانة مع البنات .. غير دخلت وهو يشوفو فيا .. دخلت نافخة صدري ورافعة راسي.. بداو كيجيو يهضرو بهدوء ويقولولي على سلامتك.. درت بلاصتي دابا مللي ضربت ديك خيتي ولا كلشي خايف مني.. حتى ديك خيتي ماشافتش جيهتي.. جلست نرتاح.. الحبس مافيهش امان.. خاص بنادم يبقى فايق باش مياكلوهش وباش ميقتلوهش ومن جهة اخرى.. مخاصش يحني راسو.. ويبين دائما باللي ماراهش خايف منهم.. رتاحيت مزيان.. جاو عندي الحبس بقاو كيتمسكنو وباغين يتصاحبو معايا.. وانا مطنشاهم كلهم.. جا وقت الغدا مشيت كليت حتى كملت ومشيت نصبن هاد المرة .. ملي ساليت جيت نرتاح وحتى وحدة مقدرات تأمرني هاد المرة .. تهنيت من الصداع فالعشا تعشينا ونعست.. فالليل جات عندي السجانة.. قالتلي اجي معايا.. معرفت هادي مالها واش ضربها حمار الليل ولا.. مشيت معاها وانا مقلوبة بالنعاس.. حتى وصلنا للشاف .. خلاتني معاه ومشات..
-عايدة لاباس عليك..
- اه لاباس.. شنو كاين علاش جايبني هنا بالليل ..
- والو غا بغيت نتونس بيك شوية..
جا كيضحك قرب مني يبوسني من عنقي وانا نبعد .. هو صحابلو غير كنتفشش عليه بدا كيقرب من جديد وانا نغوت عليه
-بعد مني الحمار..
- شنو صحابليك راسك جاية تمثلي هنا عليا دور العفيفة.. نتي غير عاهرة.. بنت ليل معندك قيمة... جرحني بداك الهضرة ومحملتش راسي.. وانا نجاوبو..
- واخا نكون عاهرة وبنت ليل.. نبغي ندوز رجال الدنيا كلهم الا نتا .. مستحيل نقبل تقيسني.. عرفتي علاش .. حيت نتا ماشي راجل اصلا..
غير قلتلو ديك الهضرة وهو يشدني من حوايجي علقني حتى كنحس بالدخان كيخرج من نيفو وسنانو مزير عليهم .. وهو يلوحني جيت على داك البيرو ديالو .. جا شدني من شعري .. وبدا يجرني فالكولوار ديال الحبس .. انا غانوريك الكلبة.. انا غنوريك .. مشا بيا للسجن الانفرادي من جديد .. حلوليه الباب ولاحني تما .. وسد الباب.. يعلم الله اشنو كيستناني مع هادا عاود ...
البارت 24
بقيت فداك الحبس عاود تاني والبرد فيه .. الليل كامل وانا كنترعد وكنحاول ننعس مكنقدرش.. صباح الصباح بأعجوبة وانا كنترعد.. دابا عاد عرفت علاش سمحلي داك النهار.. غير حيت طمع فيا السيد.. صبح الصباح كنسمع للسجينات كيخرجو باش يفطرو وانا باقا تما ماسول فيا حتى واحد.. داز النهار وانا الجوع كيقطع فيا.. فالعشية وانا نسمع الباب كيتفتح.. جا داك الهم عاود تاني.. شاف فيا وهو كيخنزر..جا بدا كيسب فيا وانا ساكتة .. طلق مني عيط على شي وحدة.. جراتني وداتني لواحد البلاصة معرفتهاش .. جبت التيو دالما وبدا يرشني بالما كان الما مجهد بزاف حسيتو فرعني بزاف اما هو بانلي بحال الى كيستمتع وانا كتعدب هاكاك.. كرهتو .. مللي كمل جرني بديك الحالة عاود تاني ولاحني فالحبس الانفرادي ديك الساعة بديت كنترعد بالبرد عاود تاني .. حسيت بحال الا الموت وصلاتني .. بقيت كنرجف وكنبرد.. دوزت داك الليلة كلها وانا كنرجف وكنترعد وكنموت.. الله يا ربي واش انا مكتوب عليها العذاب فينما مشيت من نهار تزاديت.. صباح عليا الصباح وانا حاسة الجسم ديالي كله كيضرني .. وثقيل عليا .. يدي مقاداش نهزها.. جا عاود تاني جلادي دخل عندي وانا فالارض مقاداش نوض تحنى عندي وجلس القرفصاء.. وبقا كيشوف فيا..
- عجبك الحال دابا.. واش مازال كتشوفيني ماشي راجل ولا بدلتي رأيك ..
مقدرتش نجاوبو .. بقيت كنتفادا الشوفة فيه .. شدني من الفك ديالي وزير عليه:
- شوفي فيا.. واش انا راجل ولا لا ..
- اه اه راجل راجل.. وسيد الرجال (هادي فخاطر سارة ابو جاد ههه).. ابتاسم وناض وقف بقا كيشوف فيا ..
- اه انا راجل بزاز عليك ... مازال غانربيك مزيان .. باش تعرفي من هنا الفوق اش كنسوا ..
- عفاك.. بغيت شربة دالما .. جغمة .. كنترجاك..
- جيبولي الما ..
جابوليه قرعة دالما جا قرب مني وانا كنفتح فمي بصعوبة باش نشرب وهو يخويه ليا على وجهي كله وبقا كيضحك.. هادا مستحيل كيملك ذرة وحدة من الانسانية.. حيوان ناض وخرج سد عليا الباب من جديد.. انا بقيت شادة كرشي ميتة بالجوع .. وميتة بالعطش .. وميتة بالبرد.. واش صافي غاتسالي بيا هنا .. يا ريتني وافقت على داك النهار.. واش بقات فيه غير هو.. ياك دوزت رجال اشكال والوان وعمري قبلت شي واحد منهم.. لا باراكة عليا داكشي اللي داز وكيدوز عليا بسبب الدعارة.. باراكة.. انا غانتوب من هادشي .. والله يسمحلي فداكشي اللي داز .. بقيت مكمشة الجوع والعطش والبرد.. معرفتش شحال من نهار داز دابا وانا هنا مابقيتش كنحسب... جا داك المسموم عاود تاني دخل شفت فيه ضحك .. معرفتش اش مخبي ليا عاود هادا.. -كتخافي من الكلاب اعايدة..
- اه ..
- دخووول ..
دخل عندي واحد شاد واحد الكلب سنانو خارجين وكيخلع وكيزير عندي سنانو انا القوة فشلات عليا.. خفت بزاف .. وداك الكلب كينبح عليا وانا مزيرة راسي عند الحيط خايفة .. وهو غا زايد فيهم .. والويل كيضحك بالجهد وعاجبو الحال ... حسيت راسي غانموت فداك الساعة.. قلبي خرج من بلاصتو .. بقوة الخلعة غيبت ومبقيتش حاسة براسي ..
البارت 25
- الله يخليك اسيدي بغيت ندير زيارة لواحد المسجونة هنا عندكم..
- اسمها من فضلك..
- سميتها عايدة.. معرفتها كنيتها ولكن هي عاد داخلة للحبس جديدة شي سيمانة هادي فقضية خيانة زوجية.. والدعارة..
- صافي عرفت شكون كتقصد.. ستنى شوية..
ناض الموظف خرج تعطل واحد 10 دقايق ورجع
- سيدي ميمكنش تشوفها دابا .. الزيارة ممنوعة عليها ..
- وعلاش؟
- هي مريضة شوية وراها فالمصحة والطبيب عندو اوامر انه حتى واحد ميشوفها..
- ماشي سوقي فهاد الهضرة انا باغي نشوفها شنو درتو ليها..
- سير بحالك اسيدي ولا نعيط للامن يجيو يخرجوك..
- هاد الهضرة قولها لشي واحد اخور.. ماشي ليا انا.. انا غانوريك ..
جبد التلفون وبدا كيصوني هضر مع شي واحد وفورا جا اتصال للموظف خلاه يخاف ..
- سمحلي اسيدي معرفتكش شكون فالاول .. انا كنعتذر ليك.. وغادي تشوف المسجونة فورا ..
انا غادي نخبر بالمسؤول عليهم .. يجي تهضر معاه.. وغادي تشوفها انشاء الله..
شوية جا المسموم ..
- سلام انا العقيد معتز باش يمكن ليا نخدمك اسيدي..
- بغيت نشوف عايدة ..
- فالحقيقة عايدة دابزات مع شي سجينات وراها فالمصحة دابا .. ناعسة والطبيبة مانعة عليها اي زيارة..
- اشنو .. ونتوما شنو دوركم هنا.. كنقسم ليكم الى مشا حتى وقع ليها شي حاجة انا غادي ندمكم..
- تهدن اسيدي .. مغايوقع ليها والو.. كنصحك تمشي دابا ورجع فوقت اخور تشوفها .. تكون ولات لاباس ..
- واش كنبانليك دري صغير .. واش عرفتي معامن كتهضر .. انا راه باتصال واحد نغبركم كلكم من هنا.. انا باغي نشوف عايدة حالا..
- واخا اسيدي تفضل جلس وانا غانهضر مع الطبيبة تشوفها..
حليت عيني لقيت نفسي فالمصحة .. الله ياخد الحق فيك مقادا نوقف على رجليا.. ولا نتحرك..بقيت كنبكي على زهري .. ومابقالي حد فالدنيا .. شكون يعتقني من هاد الناس.. يا ربي عتقني .. عارفة اني عصيتك وذنوبي كتيرة .. ولكن معندي حد من غيرك يا رب .. دخلات عندي الممرضة..
- ختي لاباس عليك.. كيبقيتي شوية خاصاك شي حاجة..
- لاباس ..
- خاصك تاكلي حيت الجسم ديالك ضعيف بزاف .. والقوة مافيكش خاصك تاكلي باش ترجعليك الطاقة..
- عفاك انا مابغيتش نرجع لداك السجن الانفرادي .. عاونيني .. انا الى بقيت تما غادي نموت..
- انا غانهضر مع الطبيبة ديرلك تقرير فصالحك .. متخافيش دابا رتاحي..
بقيت متكية وفشلانة حتى شفت داك المسموم داخل من الباب .. اووف واش جاي يكمل على داكشي اللي بداه..
- عايدة.. كبقيتي لاباس..
- 😔
- نتي طبعا مغاتقولي والو على داكشي اللي وقعلك.. نتي دابزتي مع البنات فالحبس.. متافقين.. Dodi elaissati
- ولكن انا ..
- شوووت.. اي واحد جا عندك قوليلو هاد الهضرة.. احسن ليك.. واكي مازال معانا هنا فالحبس باقيليك عامين.. خدمي عقلك احسن.. دابزتي مع البنات وهما اللي دارو فيك هاد الحالة.. واش متافقين..
- واخا..
- هاكا نبغيك.. شري رضايا حسن ليك .. مكاين حد غايوقف معاك فهاد الحبس من غيري انا..
بقيت غا كنشوف فهاد بنادم الدي معندو حتى ذرة ديال الانسانية.. يخ كيداير
البارت 26
- امضرا ..
- تفضل اسيدي .. يمكنلك تشوف عايدة..
بقيت جالسة حتى دخل عندي واحد الانسان اللي متوقعتش اني نشوفو..
- 😰 عصاام ..
- عايدة..
جا عندي عنقني حتى انا زيرت عليه بزاف .. حسيت بواحد الاحساس بحال الطمائنينة.. واخيرا فكر فيا شي واحد فهاد الدنيا بعد ما كنت حاسة راسي بوحدي .. زيرت عليه وعنقتو بشدة..
- عصام .. عفاك متخلاش عليا 😭 انا محتاجاك .. انا بقيت بوحدي فهاد الدنيا ..
- متخافيش انا معاك.. مغانخليكش ..
بقينا معانقين شحال .. انا كنت بحال شي غريق ولقا شي قشة ولصق فيها وتعلق فيها .. عصام بالنسبة ليا هو املي الوحيد اللي لقيتو دابا ..
- عايدة شوفي فيا .. شكون دار فيك هاد الحالة.. عاوديلي ..
- انا ..
جيت نهضر وانا نلقا داك الويل قدامي معرفتش من امتا وهو كيشوف فينا هاكاك.. خفت منه ورجعت لهدرتي ..
- انا ضربوني شي بنات .. فالحبس..
- شكون هاد البنات وعلاش يضربوك خاصهم يتعاقبو..
ناض عند معتز ووجهلو الكلام..
- واش درتي شي اجراء فحق دوك البنات .. انا باغي نشوفهم..
- امم اه درنا اجراء نتا متخمم لوالو.. حنا عاقبناهم..
- ممكن تخرج وتخليني بوحدي معاها.. من حقي نهضر معاها على انفراد او لا؟ ..
- طبعا طبعا .. انا غانخرج حالا..
شاف فيا وخرج.. رجع عندي عصام وتكى حدايا .. وشدلي فيدي وبدا يهضر ..
- عايدة شوفي فيا .. انا ماداخلاش ليا لراسي هاد القضية دالبنات .. قوليلي الحقيقة.. شكون دار فيك هاد الحالة..
-😭😭😭 هو .. هو داك معتز هو اللي دار فيا هادشي .. عذبني وضربني وجاب ليا الكلاب ..
زير عصام على سنانو وعقد حجبانه.. وفنفس الوقت بدا كيواسيني وكيدوز يدو على خدي ..
- وعلاش دار فيك هادشي.. علاش..
- حيت مابغيتش ندير معاه علاقة.. وكينتقم مني..
- كنت عارف.. انا غاندمو.. ولا عليك .. انا غاناخد ليك حقك منو.. ومتخافيش انا غانوكليك احسن محامي فالبلاد وغايخرجك من هنا ..
- عصام كنشكرك بزاف.. مع اني معارفاش علاش كدير معايا هادشي كله..
- حيت نتي من البداية صارحتيني .. وحيت ظروفك هي اللي وصلاتك لهادشي.. ماشي بحال ناس اخرين.. وحيت نتي مأذيتي حتى واحد بهادشي.. بزاف دالحوايج.. ومن بعد غاتفهمي علاش كتر ..
- شكرا ليك بزاف.. معرفتش كيفاش غانردليك هاد الخير ديالك..
- متفكريش فهادشي دابا.. فكري فصحتك كولي مزيان باش ترجعي لينا منورة كما كنتي..
- واخا ..
- متخميش من ناحية داك الزفت انا غانكلف بيه..
عنقتو وناض مشا .. انا حسيت راسي رتاحيت شوية ورجعلي واحد البصيص من الامل صغير.. علقت كل امالي فعصام.. ويلا طلب مني نقتل راسي غانقتلها.. حيت هو اللي لقيت فاكتر وقت حتاجيت الناس فيه.. بقيت متكية فالمصحة بالليل جا داك الويل وزدح الباب ودخل عندي خوفني..
- اجي نتي واش قلتي شي حاجة عليا لداك عصام ديالك..
- شنو .. انا مقلت والو.. طلق مني..
- الادارة كتتاصل بيا باغيني نمشي عندهم ... والله ويكون عندك دخل فهادشي حتى نوريك...
خرج كيعاير .. سير لهلا يردك.. الله يغبرك..
شحالما دعيت عليه قليلة فحقو.. الكلب لاخور.. نعست فبلاصتي .. الغد ليه حليت عيني وانا نلقا عصام ..
- لاباس..
- اش كدير هنا .. اه لاباس..
- انا جبتليك المحامي .. غيهضر معاك.. وجبتلك خبار زوينة.. داك المسموم ديال معتز مابقاش هنا فالمؤسسة.. داروليه التوقيف..
- الله شحال زوينة هاد الخبيرة.. وشحال زوينة نفيق على وجهك..
معنديش مانع نصبح عليك كل نهار ..
- مالي فاوطيل ههه ..
- غاندخل من السرجم ماتخافيش ..
- هههه
- يالله غانخليك مع المحامي .. وانشاء الله يكون خير..
- واخا .. Dodi elaissati
بقبت مع المحامي عاودت ليه القضية من الاول حتى اللخر.. بتفاصيلها.. عيط على عصام جا دخل
- سي عصام متخافش انشاء الله غنربحو القضية انا غاندير الطعن فالحكم الاول وغادي نربحوها انشاء الله.. حنا غادي نقنعو عزيز يتنازل على الدعوة ولا غادي نرفعو عليه قضية ديال طرد الزوجة من بيت الزوجية .. اما قضية الفساد فحلها ساهل ..
- فرحتيني .. شكرا بزاف استاذ..
خرج المحامي وانا جلست مع عصام..
- قلتلك غادي نخرجك من هنا..
- انا فرحانة بزاف اعصام .. شكرا بزاف
البارت 27
فرحت بزاف بهضرة المحامي .. معرفتش عصام علاش تفكرني دابا باش يعتقني ولكن الحاجة الوحيدة اللي عارفاها هي اني عمري مغانساليه هاد الخير خرجت من المصحة ومشيت للزنزانة ديالي .. رتاحيت جزءا ما .. دازت يوماين كانت جلسة المحاكمة.. المحامي استطاع يقنع القاضي وقنع حتى عزيز يتنازل على الدعوة.. حكم ليا القاضي بالافراج والغرامة .. عصام تكلف بيها .. الله على راحة طعم الحرية شحال زوين .. كملت الاجراءات .. وكان عصام فاستقبالي .. ركبت معاه ومشيت وانا فرحاانة.. مشينا لدارو اللي ولات عندي معروفة دابا.. دخلت ومشيت درت حمام نقيت راسي من تبعات السجن.. مللي كملت خرجت عند عصام باش ناكل لقيتو موجد الماكلة.. بديت ناكل واخيرا كليت ماكلة نقية وزوينة ماشي بحال هاديك دالحبس ..
- عصام .. بغيت نسولك .. واش كاين شي خبار على يحيى..
- حتى تكملي الماكلة ديك الساعة نقوليك اللي بغيتي ..
درت هاطرو وانا متشوقة نعرف شي حاجة على يحيى واخا عارفة راسي قفرتها معاه .. ولكن قلبي مانساهش .. مللي كملت الماكلة دغيا .. جلسنا انا وعصام وبديت كننتاظر منه يهضر..
- عصام انا كنستناك تهضر..
- انا تعمدت منهضر حتى تكملي الماكلة حيت عارف الهضرة اللي غانقولك غاتسد ليك الشهية..
- عصام هضر شنو كاين ..
- يحيى واليف تخطبو..
حسيت قلبي تضرب فجأة .. هادشي كان متوقع .. شنو كنت كنستنى يجي يخطبني انا .. طاحت من عيني دمعة .. وكملت الهضرة..
- مبروك عليهم..
- انا مازال مكملت الهضرة.. انا غانعاود ليك كلشي باش تعرفي شنو خاصك ديري من هنا الفوق.. ومنه باش نطلب منك تسامحيني..
- كنسمعك..
- انا من صغري وانا كنبغي واحد البنت حب مجنون .. وسبقلي عاودتليك عليها ..هاد البنت هي اليف .. ولكن هي كانت كتبغي يحيى.. هادشي كان كيعصبني ديما وكيخليني نحقد على يحيى.. واخا كنبانو صحاب ولكن قلبي كان كيحترق مللي كنت كنشوفو مع اليف .. مللي عرفتو كيبغي بنت اخرى من غير اليف فرحت وحييت صداقتي معاه.. مكاينش سبب علاش نكرهو .. هو كيبغي بنت اخرى ومغايتخدليش حبيبتي.. نهار عرفت حقيقتك.. وعرفت باللي نتي هي البنت اللي كيبغي يحيى .. ترددت فقول الحقيقة.. بقا فيا من جهة لانه كيتخدع منك.. ومن جهة اخرى خفت لا تمشي نتي وتضيع مني اليف .. واحد النهار كنت سهران انا واليف.. معرفتش كفاش قلتليها كلشي عليك.. وعنوانك وكلشي.. هي مشات هضرات مع سحر وقنعاتها توريها دار راجلك.. وعطات الفلوس لعزيز ووراتو شنو يدير .. وعطات الفلوس لسحر باش تقنعك تقصرو ديك الليلة.. باش تكمل الخطة ديالها مللي تشديتو مشات لعند يحيى عاوداتلو كلشي..
- يعني سحر هي الي غدرات بيا..
- اه سحر.. واليف..
- انا غانوريك اسحر الكلبة..
- ماشي من مصلاحتي ترجع اليف ليحيى.. من مصلاحتي تكوني نتي مع يحيى.. انا غانعاونك ترجعي ليه.. انا وياه مازال فداك المشروع دالمنتجعات السياحية .. نتي غاتكوني معايا باش تكوني قريبة ليه.. ونتي وريني شطارتك كغاديري ترجعيه ليك.. فرصة بين يديك..
- بغيت نتطلق من عزيز هو الاول..
- ساهلة .. المحامي مازال فيدك وهو اللي غايتكلف بكلشي..
- مزيان وانا معاك.. الحساب تقال.. كل واحد غاياخد حقو.. وجزاءه..
البارت 28
بقيت كنفكر الف مرة.. سحر.. اليف.. عزيز..الواليد.. مرتو.. كل واحد من هادو ليه عندي حساب .. كلهم غايجي النهار اللي غانتفاهم منهم فيه..وغنشفي غليلي.. بقيت فالدار باش نستعد نفسيا للحرب للي كتسناني .. دازت يوماين والمحامي رفعلي دعوة على عزيز .. نهار الجلسة مشيت جا عندي عزيز وبدا يخطب..
- عايدة لاباس عليك..
- كنت لاباس قبل مانشوف وجهك..
- غا سمعيني عفاك.. انا فهاد الفترة اللي عشتها بعيد عليك عرفت قيمتك.. وتوحشتك بزاف وعرفت باللي منقدرش نعيش بلا بيك.. انا مستعد ننسى كلشي ونبداو حياتنا من جديد..
- نسا كلشي اعزيز ونساني حتى انا.. حيت عمري مغانسا هادشي اللي درتي فيا .. وعمري مغانرجعليك.. ونزيدك انا غادي ندمك على كل يوم اسود شفتو بسبابك..
- عايدة.. فكري مزيان ..
- فكرت .. ومبغيتش نشوف كمارتك مرة اخرى..
بدات الجلسة.. والطلاق تم دغيا .. بفضل المحامي اللي قنع القاضي..عزيز بقا غا كيشوف فيا .. اخيرا رتاحيت منو.. مشيت لدار عصام اللي استقريت فيها مؤخرا.. بديت كنخطط لسحر خاص نوجد ليها شي حاجة زوينة باش مللي تخرج من الحبس نوجدهاليها .. مشيت زرتها فالحبس ومابينتش ليها باللي عارفة شي حاجة.. عجبها الحال ولكن استغربات كيفاش حتى خرجت .. ووراتلي فين نلقا الساروت مشبت لدارها بقيت كنقلب فحوايجها حتى لقيت النمرة ديال هاداك اللي مخدمها وريتها لعصام اللي تكلف وعرف كلشي عليه .. ماضيه كله ..صونيتلو هددته اني عارفة عليه كلشي وباللي سحر هي اللي قالتلي هادشي.. بعد يوماين عرفنا ان سحر تزادت ليها قضية اخرى ديال الاتجار فالمخدرات .. وانهم لقاو عندها كمية مهمة فحوايجها .. وتحكم عليها ب 10 سنين .. هادا اقل انتقام ليها .. الاشتياق قهرني .. وكان خاصني نمشي نشوف يحيى .. عرفت اني غانلقاه فالشركة الجديدة اللي اسسوها هو وعصام.. مشيت عندو ..
السكرتيرة: باش يمكنلي نساعدك الالة..
عايدة: بغيت نشوف يحيى..
السكرتيرة: عندك شي موعد معاه..
عايدة: قوليلو ملاك.. وهو غايعرفني..
دخلات السكرتيرة عند يحيى وبسرعة حل الباب دغيا وشاف فيا شوفة الولهان.. والمشتاق.. قلبي كان غايخرج من بلاصتو.. بسرعة تحكم فنفسو وقالي دخلي ..
دخلت وجلست وانا رجليا ماقادا نوقف عليهم.. خايفة من ردة فعله خايفة مبقاش باغيني..
- يحيى انا خرجت ..
- على سلامتك.. وعلاش جاية عندي .. فكرتي فشي كدبة اخرى جاية تقوليهالي؟
- نتا اللي قلتيلي راك بغيتيني لشخصي ماشي لاني بنت من وشنو عندي .. واش نسيتي .. انا مازال نفس الشخص غير فقيرة..
- نتي عيشتيني فالوهم وكدبتي عليا.. وخدمتي فالدعارة.. نتي صدقتي حقيرة بزاف وماشي داك الملاك اللي بغيت .. شنو مازال باغا عندي .. نتي سببتي ليا اكبر جرح فحياتي .. اللي عمري مغانقدر ننساه ولا نقدر مازال نبغي ولا نتيق فشي وحدة..
- لا تيق .. وبغي اليف اللي خطبتيها..
- هي على الاقل مغدراتنيش ومكدباتش عليا..
- ولكن انا .. انا دخلاتني للحبس ومشات عطات الفلوس لصحبتي وطيحاتني فالفخ ورشات داك الزفت اللي تزوجت بيه.. باش يبلغ بيا البوليس.. واش هادشي مكافيش ..
- سيري بحالك املاك.. ولا نقولك اعايدة احسن...
مقدرتش نزيد شي كلمة مازال .. خرجت وانا كنبكي وانا نتلقا ديك اليف .. شافتني تصدمات .. وانا نكمل طريقي دورها جاي .. انا غانطيح كرامتها فالارض كما طيحاتهالي انا ..
وجع قلبي زاد .. وانتفض هذا القلب باكيا .. يرجو لقاء عشق كان له مُتٓيّم .. ااايه وليت كنقول اشعار .. فهاد الحب اللي ولا كيبانلي مستحيل .. الله يذكرك بالخير اخالتي كانت كتقول حتى حاجة مامستحيلة فهاد الدنيا .. ممكن فيوم من الايام يرجعلي يحيى؟..الى كان ممكن فأنا غانبقى نستنى يحيى طووول حياتي ..
البارت 29
دابا وقت الخدمة .. انا غانخدم باش نجمع شوية دالفلوس.. ولكن هاد المرة بالحلال.. غانخدم مساعدة لعصام.. نضت فقت بكري ولبست حوايج كنت شريتهم جداد .. حوايج الخدمة .. وصاوبت راسي .. لقيت عصام كيستنى فيا .. ركبت معاه ومشينا وصلنا للشركة.. دخلت معاه .. سلم على كلشي .. كان تما يحيى وشي مهندسين ومحاسبين خدامين فالشركة هما اللي غايكونو فالاجتماع .. شافني يحيى خنزر فيا .. وهو يهضر عصام : كنقدم ليكم المساعدة ديالي عايدة..
يحيى تشوكا .. بحال الى مكانش كينتظر من عصام يخدمني معاه .. بداو الاجتماع ويحيى مغوبش .. ولكنه محافظ على هدوءه.. بداو كيشرحو المشروع .. انا فواحد اللحظة استأذنت وخرجت .. مشيت نشم شوية الهوا فالبالكون.. حتا كنلقاه شدني من دراعي :
- واش كملتي مني انا دابا جا دور عصام باش تتفلاي عليه..
- كنقسم ليك مابيني وبين عصام والو.. انا محتاجة نخدم طلبت منه مساعدة وهو وافق .. كنقسم ليك ايحيى انا مكنبغي فالدنيا الا نتا..
- انا كنحذرك .. الا حاولتي تلعبي مرة اخرى.. ديك الساعة انا اللي غاتلقايني فوجهك..
طلق مني ومشا.. الله ياربي علاش كنضعاف معاه.. عندو الحق يدير فيا هادشي كله .. حيت جرحي ليه كبير.، انا ندمت .. والله مكان بيدي ظروفي هي اللي وصلاتني لهادشي.. اش غاندير.. سالا الاجتماع وخرجت مع عصام مشينا للدار ..
- عصام ..
- ويي ..
- يحيى صحابليه باللي انا وياك بيناتنا شي حاجة..
- هادشي اللي بغيت حتى انا .. بغيتو يحس بداكشي اللي كنحس بيه انا ..
- ولكن كيتعدب..
- بقا فيك؟
- اه ..
- ههه متخافيش قريب تكوني معاه..
- نتا كيفاش غاتقدر تكون مع شي وحدة مكتبغيكش..
وقف الطوموبيل فجأة ودار الفران .. خلعني
- سمحلي اعصام مقصدتش نجرحك..
- متهضريش فهاد الموضوع مرة اخرى..
- واخا سمحلي ..
كمل الطريق حتى وصلنا للدار.. تغديت وخرجت نتمشى شوية.. حتى كتوقف عليا واحد الطوموبيل مغريباش علي..
- يحيى !!
- طلعي..
طلعت معاه .. وانا بحال الى فمي شداتو اللقوى.. مقديتش نهضر.. وقف الطوموبيل حدا البحر ومنزلش ..
- شنو بغيتي اعايدة..
- كنبغيك نتا ..
- كدوب .. نتي كتبغي الفلوس .. الى باغا الفلوس غانعطيك اللي بغيتي .. وتفارقي علينا ..
- شحال وانا معاك.. واش عمري خديت من عندك شي فلوس .. شوف ليا فعينيا .. واش مابقيتيش باغي تكون حدايا.. واش مبقيتيش كتبغيني .. قولها ..
بعد عينيه عليا وسكت شوية ..
- كنترجاك املاك .. خليني نعيش .. انا مستحيل نسمحليك.. بعدي عليا..
- .. حتى انا كنتعدب .. ومليون مرة كتر منك.. واش هادالحب اللي بينا ميستاهلش منك تضحي وتسمحلي ..ميستاهلش
- لا نتي متستاهليش ... انا غانبدا حياتي وغانتزوج وحدة اخرى..
- 😢 اذن حتى انا غانعيش حياتي .. وغاندير داكشي اللي بغيت .. وانا بغيت نبقا خدامة مع عصام..
نزلت من الطوموبيل وخليتو .. تمشيت وبعدت على الطوموبيل والدموع فعيني .. ضميري كيأنبني بزاف .. علاش بغيتو ياك كنت مهنية .. واش انا كان خاصني شي حب مازال على المشاكل ديالي .. واش اللي بحالي من حقها تعيش شي قصة حب ولا تحلم بشي واحد بحال يحيى ..
البارت 30
قلبي كيتوجع والندم كيقطع فيه .. كنشوف يحيى قدامي وانا مكنقدرش نقرب منه.. كنشوف داك إليف ديما شادة فيه وانا قلبي كيتقطع من الداخل ديالو.. بداو فتنفيذ المشروع.. وانا ديما مع عصام واحد النهار جات ام يحيى ولقاتني تما فالشركة
- ملاك..
- لاباس عليك..
- تفاجأت مللي شفتك هنا ..
- انا خدامة هنا ..
- مم .. انا تأسفت بزاف مللي عرفت حقيقتك.. خسارة كنتو كوبل زوين نتي ويحيى.. وهو كان كيبغيك بزاف.. وتعدب بزاف ومازال كيتعدب بسبابك.. علاش درتي هادشي كله..
بدون شعور بديت كنبكي ..
- اهئ اهئ والله مالخاطري .. هادشي وصلت ليه بسبب بابا.. هو اللي زوجني بزاز علي وانا صغيرة.. 😭😭 والله ايلا كنبغي يحيى ومكدبتش عليه فمشاعري .. انا كنبغيه.. حتى انا تعدبت ومازال كنتعدب .. انا مكيهمونيش الفلوس.. انا باغا غير يحيى.. حياتي كاملة وانا عايشة غير بالحاجة اللي ماباغاش .. يحيى هو الحاجة الوحيدة اللي بغيتها فحياتي ..
- صافي باراكة من البكا.. انا حاسة بيك .. المهم هو يحيى يقدر يسامحك.. الرجال مكيفهموش هادشي ومكيقدروش الظروف.. بالنسبة ليه طيحتي من كرامته مللي خدمتي فالدعارة.. وهادا اكبر غلط درتيه.. لوكان خديتي الفلوس من عندو ولا جيتي طلبتي مني انا .. كنا غانعاونوك اكيد..
- كنرجاكي.. انا معقلتش على امي .. ولداتني وماتت .. كنترجاكي متتخلايش عليا .. واش ممكن نعتبرك بحال ماما ..
- اكيد احبيبة.. حتى انا ماولدتش بنت .. وغانفرح بزاف تكوني ليا بنت ولكن كما قلت ليك .. خاص يحيى يسمحليك ..
- عمري ننسى ليك هاد الخير نتي فعلا رائعة..
حديث ام يحيى معايا كان بمثابة شرارة الضوء اللي عطاتني الامل .. هاد المرا رائعة .. واخا عرفات حقيقتي وباني كدبت على ولدها وعرفات المستوى الدنيئ ديالي .. الا انها اختارت تفكر فيا من الجانب الانساني وتعطيني فرصة..
دوزت نهاري عادي .. حتى جا عندي عصام قالي باللي راه معروض عند عائلة يحيى طلب مني نمشي معاه .. وافقت اكيد بالليل صاوبت راسي ..ومشيت مع عصام وشديت فيه .. مللي دخلنا يحيى بقا غير كيشوف فيا .. واخا اليف كتحاول دير اللي فجهدها باش تخليه يديها فيها ولكن والو.. قلبو معايا .. طول السهرة وانا وعصام مع بعض .. شوية ناضت اليف هي ويحيى كيشطحو.. انا ديك الساعة مقدرتش نصبر .. حسيت بالنار شاعلة فيا .. خرجت وتمشيت فالجردة وانا كنبكي .. علاش ازهري.. الحاجة اللي بغيتها ديما ماشي من حقي ..😭 خرجت من الفيلا وتمشيت بزاف بلا مانشوف فين كنحط رجلي .. وكنبكي حتى سمعت الكلاكسون مجهد وشي واحد جرني فجأة قبل ماتضربني طوموبيل .. طلعت عيني فيه .. يحيى .. شفت فعينيه خوف.. صوت انفاسه تعالى وبديت كنسمعو .. مهضرش وهو كيشوف فيا فعينيا وكيتفقدني واش طراتلي شي حاجة.. يحيى 😭.. بلا منحس تخشيت فيه وفأحضانه.. وهو حاوطني بيديه بجوج ..حتى حسيت بلأمان .. رفعت عيني فيه من جديد .. تمشينا بجوج للفيلا وانا مقاداش نطلق منه.. تمشينا ولكن مدخلناش للفيلا .. مشا ديريكت لطوموبيلته وركبني فيها .. وركب حتى هو .. ديمارا الطوموبيل ومشا..
- يحيى .. انا كنبغيك بزاف ..
شاف فيا بأسى ومهضرش .. وكمل طريقو.. معرفتش علاياش ناوي .. طول الطريق كان ساكت .. شفتو خرج من المدينة.. معرفتش فين غادي بالضبط.. تكيت ودرت راسي على الزاج.. حتى سمعتو هضر..
- شنو بينك وبين يحيى..
- والو.. مابيناتنا والو.. هو عاوني وصاف حيت حتى واحد مابغا يعاوني..
- من اليوم ماغاتبقايش معاه فالدار..
- واخا اللي بغيتيها .. ندير اي حاجة .. المهم نرجعو انا وياك ..
- هادشي اللي كتقولي صعيب بزاف .. خاص ترجعي ملاك اللي عرفتها النهار الاول باش يمكن لينا نرجعو ..
- يحيى .. انا .. انا كنموت بلا بيك .. انا والله حتى ندمت بزاف.. ندمت ..
- الندم مغاينفعنا بوالو.. كاينة حقيقة وحدة.. وهي انك نتي عايدة .. العاهرة.. الكدابة .. والمخادعة..
- يحيى 😢.. نتا كتجرحني بهاد الهضرة..
- شووت.. نتي اخر وحدة تهضري على الجرح..
- تبدلتي 😢
وقف الطوموبيل بجهد ودار عندي ..
- اللي يعيش وهم ويبغي بنت يتخيلها ملاك قدامه .. ويعرف من بعد انها عاهرة دوزات الموسخين ديال الدنيا كلهم .. واش غايتبدل ولا لا.. انا اللي تعدبت ودوزت ليالي كنبكي فيهم كل ما فكرت فحقيقتك .. انا اللي عشت اسوء ايام حياتي بعدما عرفت حقيقتك وصلت اني نفكر نتتاحر بسبابك نتي .. بعد كل هادشي .. فنظرك غانبقى يحيى لقديم .. مستحيل .. عطيتك قلبي ونتي باش جازيتيني .. فنظرك واش غانقدر نقدمك لعائلتي وصحابي وانا كنفكر انك ممكن تكوني دوزتي واحد منهم فيوم من الايام.. اللي بيناتنا مات .. مستحيل يرجع فيوم من الايام..
صدمني مللي خرج هاد الهضرة من فمو.. مقدرتش نهضر.. عندو الحق فكل كلمة قالها .. انا موسخة .. عاهرة.. منستاهل حتى حاجة فهاد الدنيا .. شكون انا باش نهضر معاه..
البارت 31
بقاو دموعي كينزلو بصمت شديد .. وقلبي كيتقطع من الداخل .. وفمي تسد .. اما يحيى كمل السوكان ومعاودش هضر عندي .. عندو الحق اللي بيناتنا مات .، وعمرو ماغايعاود يحيى من جديد .. وصل لواحد الفيرمة خارج المدينة .. تفتحات ابوابها .. ودخل بالطوموبيل ... كانت خاوية ومافيها حد غير العساس .. نزلت من الطوموبيل واشار عندي ننزل .. دخلت معاه وانا وجهي كله خسر بالماكياج دخلت معاه .. جلس قالي جلسي.. وجلست ..
- بيتك راه الفوق.. فيه كل ما غاتحتاجي .. نتي غاتبقاي هنا..
- واخا .. ولكن نتا واش غاتبقا معايا..
- انا غانبقا نجي عندك.. ولكن اهم شيء هو حتى واحد ميعرف باللي نتي هنا..
- واخا ..
- نوضي تنعسي..
شفت فيه مشيت لبيتي شفت راسي فالمراية كنخلع.. اكيد كان كيضحك عليا .. غسلت حالتي ودرت دوش .. خرجت لقيت الحوايج موجودين .. لبست بيجامة جات قدي .. بحال الى هادشي كان موجدو ليا انا.. شكون عرف .. يمكن كان كيوجد نعيشو هنا قبل مايعرف حقيقتي.. نزلت باش نشوف واش مازال كاين هنا.. لقيتو كيوجد فالعشا..
- نعاونك..
- لا جلسي..
كيهضر معايا ببرود وبحدة غير معهودة.. انا كنت كنعرفو حنين ولكن هادا اللي شايف قدامي دابا مختلف.. بقيت كنستناه وكنشوف فيه كيصاوب لعشا.. تخيلت راسي معاه ..وهادي دارنا ومزوجين.. وهو كيصاوب العشا وانا كنعاونو.. ويجيو ولادنا يقولولنا فينا الجوع.. ولكن هادا غير خيال وعمرو ماغايتحقق.. تخيلت حتى كمل ..وحط على الطبلة وقالي ببرود: نوضي تاكلي..
بديت الماكلة وانا كنشوف فيه وهو كياكل .. وكنتخيلو فهاد اللحظة كيوكلني وكنوكلو.. حركات رومانسية.. غمضت عيوني بالفقصة وفقت.. واش غانبقا حياتي كاملة غير كنتخيل .. عمري منعيش السعادة فشي نهار واش ديما غانبقى نحلم.. وانا نهضر بلا شعور..
- عصام ..
- مالو عصام..
- كيبغي اليف..
- الله يربحو بيها..
- يعني نتا مكتهمكش اليف 😃
كمل ماكلته ومهضرش .. شوية وهو يهضر..
- انا مبقات كتهمني حتى بنت على وجه الارض..
رجعت نتغوبش من جديد .. ولا كينتاقم مني بالبارد ولكن لا انا مكنستاهلش هادشي .. حتى انا تعدبت بزاف واش غاندوز حياتي كلها عذاب..
- انا غادي نمشي .. نتي بقاي هنا والى خصاتك شي حاجة راكي عارفة نمرتي..
- واش غانبقا هنا بوحدي.. انا كنخاف..
- اه بقاي هنا بوحدك.. المحابسيات مكايخافوش..
كل مرة يلوح عليا شي هضرة ديال السم كتدخل لقلبي كتقطعو.. وانا عليا نصبر .. اكيد حيت انا اللي درتها لراسي.. وجرحتو اللول.. مشا ومازاد حتى هضرة.. طلعت للبيت .. ونعست .. اكيد قبل مايديني النعاس بقيت كنبكي على حالتي .. وعلى يحيى اللي ولا كيبانلي باللي عمرو ماغايقدر يسامحني مازال.. داني النعاس .. فالصبح فقت بكري .. فقت على صوت الدجاج .. كان وقت الشروق.. الشمس مازال كتطلع .. طليت بانلي الجو زوين .. والريحة ديال الفيرمة والهوا الطبيعي .. فكرني بالعروبية.. بدلت حوايجي .. وخرجت بانولي شي دجاجات مشيت شديت وحدة فيهم وهي كتقاقي.. وانا ندوز .. هزيت ليها بيضها درتو فالسلة.. كان كيبانلي راسي بحال داكشي دالرسوم المتحركة.. تمنيت نبقى نعيش مع يحيى هنا حياتي كلها.. خديت البيض ومشيت بانولي اشجار وكل حاجة زوينة وكلشي طايب.. خديت تفاحة من الشجرة باقا طرية ودرتها فالسلة بانلي العساس كيحلب البقر مشيت عندو .. علمني كيفاش ندير ليها وعطاني الجبن والزبدة والحليب .. دخلت حطيت داكشي فالتلاجة.. وعجنت وطيبت الخبز تماما بحال العروبية.. عمرت براد صغير بأتاي .. وقليت البيض .. صاوبت الزيتون .. والزبدة .. صينية معتبرة .. خرجت بداكشي للفيرمة فرشت فالارض .. مع داك الهوا يا سلام.. كبيت لراسي اتاي .. مم ما اجمله.. وانا نسمع صوت الطوموبيل .. هادا اكيد يحيى .. جريت لقيتو نزل من الطوموبيل..
- جابك الله اجي معايا ..
جريتو معايا وهو مافاهم والو.. ديتو للبلاصة اللي فرشت فيها ..
- كيجيتك .. هادا هو اللي كيسميوه فطور بلدي ..
ضحك وجلس كبيتلو اتاي .. وبدا ياكل مع الخبز السخون والبيض البلدي والزيتون.. ومرة مرة كناكلو الزبدة.. عمرت الكريشة مزيااان.. يحيى عجبو داك الفطور..
- شحال هادي كنت كنحماق على هاد البراءة ديالك.. ولكن دابا مابقيتش كنقدر نتيقك اعايدة.. كلما فكرت انك ماشي ملاك.. وباللي نتي عايدة..
تبدلات فيا الضحكة لحزن.. شنو مادرت ..مستحيل يحيى يرجعلي..
البارت 32
ناض من الفطور وبقا كيتمشا .. وقفت حتى انا مشيت معاه..
- يحيى..
- مم ،.
- انا عمري مغانعاود نخبي عليك شي حاجة ..
شاف فيا بزاف وسكت ومهضرش وكمل المشي ديالو..
- ستنايني هنا انا راجع ..
دخل لواحد البيت شوية وهو يخرج لابس بوط .. وحوايج اخرى.. وهاز حوايج الزرع.. اوااه يحيى ولد الارستوقراطيين كينزل لمستوى يخدم بيديه فالفيرمة..
- جلسي .. انا عندي مايدار..
- حتى انا بغيت نخدم معاك ..
مشيت حتى انا لداك البيت لقيت تما شي بوط لبستو جاني كبير بزاف.. لقيت شاشية لبستها وخرجت عندو .. شاف فيا حبس الضحكة.. وتمشا وانا تابعاه هازة حاطة فداك البوط.. اللي ثقال عليا.. مشا لشي شجرات وبدا كيقطع فالاغصان الميتة فيها وكينقي بواحد الاحترافية.. جاني هادشي عجب.. اللي يشوفو قبل يقول كيليميني كيعرف غا الموس والفرشيطة.. صدق بلدي .. حتى انا بديت كنخدم معاه.. دوزنا النهار فالفيرمة.. حتى عييت .. وحسيت بالجوع .. والمشكل حاسة راسي مقاداش نتحرك.. ولا نصاوب شي ماكلة مازال .. شفت فيه هو مازال قادر يوقف على راجليه .. هو راجل ... اش داني لهاد الحماس كله اش جابلي ..
- واش نتي لاباس ..
- لا عييت بزاف ..
جا عندي عطاني ظهري وقالي ركبي على ظهري انا غانهزك للدار.. مقدرتش نقولو لا .. طحت على ظهري نيشان هو هزني ودخلني للدار.. طلعني لبيتي ..
- ديري دوش سخون وغاتكوني لاباس .. انا غانوجد الماكلة..
دخلت للدوش طلقت الما السخون وجلست تحتو.. حاسة راسي غانعس هنا .. درت دوش سخون وتعطلت فيه .. خرجت منو لبست حوايجي .. خاصني غير النعاس دابا.. تخشيت فالناموسية .. قلت ننعس شوية على ما يوجد يحيى الماكلة .. يالله باغا ننعس حتى لقيتو داخل عليا .. مدوش ولابس حوايجو ..
- نوضي الماكلة واجدة..
اواه فوقاش لحق يدير كاع هادشي..
- عفاك ننعس غا شوية ونوض..
- نوووضي ..
جا حيد الغدا من عليا مكان عندي حتى حل من غير اني نوض.، نضت نزلت معاه.. جلسنا وبدا كيديني النعاس .. وهو شابع ضحك عليا .. كيجي يديني نعاس حتى كيخلعني ..
- فيييقي ..
والمشكل كنجي ننعس والماكلة ففمي.. كنمضغ غير بزاز.. كليت بزاز والنعاس متمكن مني محسيتش براسي حتى داني النعاس على الطبلة.. فقت شوية على يحيى وهو هازني وطالع بيا لبيتي .. حطني على الناموسية وبقا كيدوز على شعري .. عارفاه كيبغيني بزاف .، ومقادرش يبين ضعفو قدامي حيت كبريائو مكيسمحلوش.. داني النعاس .. فقت فنص الليل لقيت يحيى جالس حدايا فالناموسية وداه النعاس .. نضت صاوبتلو وحيدت صباطو وهو محاس بوالو.. نعاسو تقيل .. غطيتو ورجعت نعست على صدرو وانا فرحانة.. على الاقل نعس حدايا.. كملت نعاسي ولكن لاول مرة كننعس مرتاحة.. حيت مع يحيى.. الصباح فقت شفت فيه لقيتو كيشوف فيا ..
- من امتا ونتا فايق ..
- غا دابا ..
جا بغا ينوض وانا نشدو .. يحيى عفاك ماتنوضش.. بقا معايا ..
- مبقيتش قادر اعايدة.. كلما جيت نقرب ليك كنفكر شحال من واحد داز فحضنك من غيري.. هادشي كيقتلني ..
- واش غاتبقا حياتك كاملة هاكة .. انا صافي مبقيتش هاكاك.. صافي دابا مبقا فحياتي حتى واحد من غيرك..
- حتى حاجة مغاتبدل الحقيقة..
- اذا كانت الحقيقة مغاتبدلش 😭 فماكاين قدامي غير نقتل راسي.. حيت انا مستحيل نقدر نعيش بلا امل رجوعنا لبعضنا .. انا غانموت..
بديت كنبكي هو شاف فيا بزاف وقرب عندي ومسح دموعي وقبلني .. انا بحال الى رجعات فيا الروح.. يعني مابقاش داك الحاجز .. يحيى اما غايكون ليا ولا عمره مغايكون لوحدة اخرى من غيري..
لاول مرة.. كيكون يحيى ديالي.. عشت كنستنى هاد اللحظة.. معرفتش احساسه هو كيف كان ...واش سمحلي ولا مازال كيعيفني .. ولا خاف فقط من اني نفذ تهديدي ونقتل راسي.. افكار كلها جات فبالي وانا ناعسة على صدرو.. كنبغيه بزاف والفراق عليه بالنسبة ليا ولا ليه معنى واحد وهو الموت.. مدونة ..
- عايدة انا خاصني نمشي .. من البارح وانا هنا ..
- متعطلش عليا عفاك .. كنتوحشك..
- يكون خير..
ناض لبس حوايجو وخرج .. وانا بقيت كنفكر فيه .. يحيى ديالي .. واخيرا رجع ليا..
البارت 33
نضت كنقز وفرحانة .. بديت كنوجد ونخمل .. وكنستنى يحيى على احر من الجمر.. قريب مبقاش بزاف ويحيى غايكون معايا للابد.. مللي كملت مشيت تهليت فراسي.. وصاوبت راسي.. مشيت صونيتلو ..
- الو يحيى.. واش غاتجي ..
- حتى العشا .. دابا راني مشغول ..
- واخا .. غانستناك.. كنبغيك بزاف..
- بالسلامة..
قطع .. كنواعدك ايحيى غانرجعك تحماق عليا بحال الاول ولا كتر.. نضت مشيت صاوبت الشهيوات اللي كنعرف كلهم.. كنستنى يجي حبيب القلب .. النهار جاني طويييل وانا كنستناه.. فالليل لبست كسوة زوينة ووجدت الطبلة والشموع .. وجلست كنستناه.. مللي جا تفاجأ بداكشي اللي وجدتله.. جلسنا وجها لوجه.. تعشينا والكلام كان قليل فالعشا .. مبقيتش كنبزز عليه الهضرة.. المهم هو الاحساس.. بغيتو يستمع لدقات قلبي .. ويعرف باللي كنبغيه وعمري مافكرت اني نخدعو .. تعشا وناض قالي غانمشي ..
- عفاك بقا تبات معايا هاد الليلة عفاك..
- لا مبغيتش
- شوف فيا .. خدر كبريائك دابا .. وسمع معايا لصوت قلبك..
بقا كيشوف فيا واستسلم.. عارفة انه مغايقدرش يقاومني .. عشقي دار جذور عميقة فقلبو.. ميمكنش يتحيدو في يوم من الايام.. دوز معايا ديك الليلة .. بقيت فايقة كنشوف فوجهه الملائكي وهو ناعس .. وكندوز عليه يدي .. كأني مامصدقاش نفسي.. خوف ساكن قلبي من اني نفيق ومنلقاهش .. خايفة يبعد ويخليني كنتعدب بفراقو.. كنبغيه بزاف .. فالصبح فاق لقاني كنشوف فيه.. مهضرش عنقني بزاف.. وناض دوش ولبس حوايجو وجا يخرج..
- يحيى..
- نعم..
- غانستاك..
- مشغول ليوما .. يمكن مانجيش..
بقيت مغوبشة ... مكرهتش لوكان يجي يدوز معايا النهار.. بقيت قنطانة .. حتى سمعت الدقان .. يكون يحيى اللي جا .. مشيت فتحت الباب وكانت الصدمة .. لقيت هاداك اللي كان مخدم سحر .. اشنو اللي جابو عندي واشنو بغا واشنو بيني وبينو.. وكيفاش عرف هاد البلاصة..
-واش غاتخليني واقف فالباب..
- اش بيني وبينك.. شنو بغيتي
دخل بلا مايستأذن وجلس .. اجي جلسي وتعرفي .. مشيت جلست وانا خايفة منه.،
- شنو بغيتي ..
- عايدة الزوينة.. واش صحابليك غانخليك هاكاك .. مكاينش شي وحدة تخدم معايا وتخرج الوقت اللي بغات.. وبما ان صاحبتك ماصدقاتش .. نتي غاتاخدي بلاصتها.. وراني شايف عندك كليانات صحاح ..مول هاد الفيرمة واحد منهم..
- هاد الهضرة اللي كتقول مستحيلة.. انا داك الخدمة بعدت ليها من نهار دخلت الحبس.. ومازال كندفع ثمنها .. مستحيل نرجع ..
- واش دخول الحمام بحال خروجو... ايلا بغيتي تخرجي راكي غاتخلصي الغرامة..
- شحال بغيتي ..
-بزاف..
- انا غانعطيك اللي بغيتي وعطيني بالتيساع..
- هاكا نبغيك.. مرة جاية مللي نجي نلقا فلوسي واجدين..
ناض وخلاني غانتفيا منه.. اش غاندير دابا .. واش غانقولها ليحيى ؟.. لا لا الى قولتهاله غادي يعرف تفاصيل الماضي ديالي وغايزيد يبعد .. عصام.. عصام هو اللي غايعتقني .
البارت 34
- سلام..
- عصام انا عايدة..
- عايدة!! فين غبرتي .. شحال وانا كنقلب عليك..
- راني فالفيرمة ديال يحيى..هو اللي داني عندها.. عصام انا محتاجاك..
- شنو كاين..
- عقلتي على مول الفيلا اللي تلاقيتك فيها اول مرة..
- اه عرفتو مالو هاداك..
- هو اللي كان مخدمنا .. دابا كيهددني يا نرجع للخدمة يا نعطيه الفلوس..
- واخا انا غانعطيه اللي بغا.. الى عاود جا عندك قوليهالي ..
- الله لا يخطيك علي اعصام.. الخير ديالك عمري ننساه..
- مابيناتناش ..
بقيت خايفة لا يجي يحيى ولا يعرف باللي جا عندي داك الويل حتى لهنا.. بقيت فالدار بالليل بقيت نتفرج واحد الفيلم .. حتى جاني نعاس على الفوتوي .. مافقت الى على شي حد هازني وكيتمشى بيا .. حليت عيني لقيتو يحيى .. فرحت وتخشيت فعنقو ويديا بجوج شديتو بيهم .. حتى حطني فالناموسية.. هاد المرة بلا منرغبو ينعس حدايا جا تخشا حدا وحط راسي على صدرو.. حسيت بأمان من نهار خلاقيت لهاد الدنيا محسيتو.. نعست فراحة عمري حسيتها لا فدار با ولا فدار راجلي .. الصباح فقت بكري .. كان نور عيوني مازال ناعس.. نضت بسرعة وجدتلو فطور وقطفت وردة من الفيرمة وديتلو الفطور للناموسية.. اييه فالعادة الراجل هو اللي كيدير هاكا للمرا ولكن انا درت العكس .. مستاعدة ندير المستحيل باش يرجعلي.. دخلتلو الفطور حطيتو وخديت الوردة بديت ندوزها على خدو.. حتى فاق .. شاف فيا وضحك .. شدني من خصري وطلعني معاه للناموسية.. احلى احساس.. بدا يضحك معايا ويهرني.. حسيت يحيى رجعليا.. كنبغيك بزاف ايحيى.. مللي كمل الضحك ناض غسل وجهه..وجا يفطر معايا.. حسيت راسي مرتو.. واش غايطلب مني نتزوجو ولا نبقا هكا عشيقة ليه.. ولا غايصتعر مني .. حيت انا كنت عاهرة وكلشي عارفين هادشي بعد الفضيحة ديال الحبس.. لا منقوله والو.. المهم هو نكون مع يحيى.. كيما كان الحال.. اللهم هكا ولا بلاش.. منقدرش نعيش بلا بيه كما كان الحال..
- يحيى.. شنو رأيك نمشيو نخدمو فلاحة فحال المرة الفايتة..
- ممم باش تسخفيلي تما عاود..
- ههه لا غا عجبني نعيش دور مرت الفلاح..
سكت شوية وهضر: ولكن انا ماشي راجلك.. ونتي ماشي مرتي ..
ملقيت منقول.. سكت حيت عندو الحق..
- يحيى انا كنعتبرك كل حياتي .. انا معندي حتى واحد فالدنيا..نتا اللي كتهمني..
- وانا كنتمنى نرجع نشوفك ملاك بحال قبل.. نتمنى نشوف فيك ببراءة وانا شايف فعيونك داك الغموض وداك العمق..
بعدما قلت راه نسا.. وقع العكس .. مستحيل فيوم من الايام ينسى .. حنيت راسي.. ورفع لي راسي بيديه وقال..
- مبغيتيش تكوني ليوما مرت الفلاح..
ضحكت وحركت راسي بالايجاب ..
- نوضي وجدي راسك..
نضت ولبست حوايج الفلاحة ونزلت مع يحيى دوزنا النهار بين الاشجار والزرع.. حتى عيينا بجوج .. دخلنا وتعشينا .. دوشنا ونعسنا.. فالداخل ديالي خوف من اني نتفارق مع يحيى..يمكن حيت مازال مضمنتو معايا.. الغد ليه فاق قبل مني .. لقيتو كيلبس هضرت معاه وانا عينيا مغمضين.. وخاملة بالنعاس..
- حياتي فين غادي ..
- عندي الخدمة .. انا غادي ومغانجيش اليوما.. وليت كنبات عندك هنا بزاف.. نخاف ليعيقو بغيابي..
- واخا اعمري للي بغيتيها..
خرج وانا بقيت متكية وكملت على نعاسي .. حتى فقت على الدقان .. فقت بزاز مشيت للبالكون نطل حتى كنلقا داك اللي ميتسماش جا عاود صبحنا لله.، هادا واش كيراقب يحيى ولا .. نزلت دغيا قبل منفتحلو صونيت لعصام وعاودتلو على كلشي.. ديك الساعة فتحتلو.. دخل وجلس..
- ايوا الالة عايدة واش فكرتي فداكشي اللي قلتلك ولا لا...
- فكرت وغانعطيك الفلوس.. وعطيني التيساع..
- واخا الالة.. بغيت فلوسي هي اللولة..
سمعت الدقان ونضت نفتح دغيا هادا اكيد عصام جا وجاب الفلوس.. فعلا دخل وبدا كيخنزر فداك الزمر:
- غاتعطيها التيساع .. هاك فلوسك وتلاح من هنا .. ومنعاودش نشوفك مرة اخرى ولا نهرسليك رجليك..
- برد.. لالة عايدة دايرة البوديكارد..
شد ديك الجوا ديال الفلوس وبدا يحسبهم وانا محاملاش راسي.. مكرهتش يمشي دغيا.. حتى كنسمع باب الدار كيتفتح كان غايوقف لي القلب لا .. يحيى .. دخل يحيى وتصدم من داكشي اللي شافو..
- ممكن نفهم شنو واقع هنا .. عصام وهادا اش كيديرو فداري ومعاك اعايدة..
- يحيى انا غانشرحليك..
نقز داك الزبل وهضر..
انا غانشرحليك شنو كاين اسيدي .. انا هو اللي كنت مخدم عايدة وكنضبرليها فالكليان وانا اللي ضبرت ليها على هاد عصام حتى دوزات معاه ليلة وخلصها .. ودابا جيت ناخد فلوسي ..
يحيى حسيت بيه تزير وغاينفاجر شاف فيا وسكت شحال وانا كنحرك راسي بلا .. متيقوش .. شوية وهو يهضر ويغوت فودني بحال الرعد..
- خرجو عليا براااد،،
- عفاك ايحيى خليني غا نشرح ليك ...
جا عندي والحرارة دالاعصاب كتخرج من وجهو .. عمري شفتو فهاد الحالة.. شدني من حوايجي وطلعني 😡 انا خفت وحسيت رجليا فشلو عليا بالخلعة منقدرش نتحمل يحيى يضيع مني مرة اخرى.. مستحيل نقدر.. يحيى .. وانا نغيب .. طحت وهو يشدني .. حسيت القوة ديالي فشلات وماقادا نتحرك ولا نحل عيني ويحيى كيحرك فوجهي وكيعيط .. عايدة عايدة..
هزني وداني لطوموبيلتو بسرعة وكسيرا بجهد داني للسبيطار.. فقت على هضرة الطبيب ..
- واش نتا راجلها ..
- اه .. انا راجلها ..
طاحو مني دموع بلا منحس .. يعني يحيى مازال كيبغيني وكيعتبرني بحال مرتو.. فيقاتني كلمة الطبيب للي قال..
- مبروك اسيدي مراتك حاملة..
تصدمت .. غانولد من يحيى.. هادا اجمل خبر سمعتو فحياتي..
البارت 35
فرحت بزاف ولكن معرفتش واش الكلمة كان ليها نفس الوقع على يحيى.. حليت عيني لقيتو مصدوم.. شاف فيا وانا نضحك ونبكي فنفس الوقت وقولتلو.
- غايكون عندنا ولد او بنت ايحيى..
مهضرش وجا عندي وحط راسو عندي .. بقا بزاف هاكاك وهو يطلع راسو..
- مبقيتش تايق فيك اعايدة.. نتي كل مرة تصدميني .. حتى عصام .. صديقي وخدعتيني معاه.. كيفاش غانتيق فيك ونتيق باللي هاد الولد اللي فكرشك ولدي..
- يحيى 😭😭
- انا غانتصرف.. وغانعرف بطريقتي .. نتي رتاحي دابا .. حيت الى عرفت باللي هاداك ولدي كيخصك تتهلاي فيه بزاف..
عندو الحق .. كيفاش بغيتو يتيق فيا وانا كل الادلة ضدي.. انا عاذراه.. بقيت مدة فالسبيطار .. كانو مهليين فيا بزاف.. وكل مرة ياخدو مني تحليلة.. حتى مليت .. جات عندي ام يحيى..
- بنتي .. يحيى عاودلي كلشي..
- ماما .. انا مضلومة والله .. داك الويل كان باغي الفلوس.. وانا طلبتهم من عصام باش نتفك منو.. عصام عاوني وصاف ..
- ياك اتافقنا تطلبي مني انا ..
- سمحيلي .. ولكن مكانش عندي الوقت وعصام كان كيعرف هاداك.. ومبغيتش نورطك مع داك النوع.. انا خايفة ..
- متخافيش .. انا راني معاك.. غاتجي تعيشي معانا فالفيلا.. غانتهلاو فيك نتي والبيبي..
فرحت بزاف حيت ام يحيى فصفي.. جا يحيى عندي ..
-وجدي راسك .. غاتخرجي من السبيطار..
حركت راسي بالايجاب .. شدات فيا ام وخرجت ركبنا فالطوموبيل ومشينا .. تكيت راسي على كتف ماما اما يحيى مهضرش طول الطريق .. وصلنا للفيلا.. وانا نتذكر اول مرة جيت هنا .. وكيف كان يحيى كيشوف فيا.. اما دابا كلشي تبدل .. دخلت ولقيت الجدة .. مطولاتش معايا لهضرة من غير انها سولات على صحتي .. طلعت للبيت اللي كانو موجدينو على حد تعبير ماما.. رتاحيت ونعست.. خاصني نأكد ليحيى باللي انا مخلصة ليه .. ماشي كيف كيظن.. صحيح ان الماضي ديالي اسود مافيه مايتشاف ولكن دابا تبدلت وغانتبدل اكتر مللي يتزاد البيبي .. نعست ورتاحيت وانا نفيق كان مازال العشية .. جاني الجوع ونزلت نقلب ماناكل ..
- عايدة علاش نايضة من فراشك .. الى محتاجة شي حاجة طلبيها مني انا .. نجيبها حتى لعندك والخدامات كاينين..
- غا قنطت فالفراش .. لاهما نتحرك شوية..
كليت حتى شبعت .. وطلعت لبلاصتي حيت ولا كيجيني النعاس بزاف.. نعست حتى فقت فوسط الليل وانا كنفكر فيحيى.. توحشتو وليوما مشفتوش .. كيفاش غاندير .. واشمن سبب غانمشي ليه..ياه على هبيلة.. ياك انا حاملة .. والحاملة كتوحم.. خرجت من بيني ومشيت لبيتو ودقيت حتى واحد محليا الباب.. وانا ندخل لقيتو فسبعين نومة.. نقزت على الناموسية وانا كنتفشش .. وكنفيقو..
- يحيىىىى .. فيق .. يحيى يحيى .. يااااحيىىى ..
- شنو كاين 😨 شنو واقع..
- نتا كاع مجايب للدنيا خبار.. ولدك كيتشرط ونتا مفخبارك والو..
- ولدي؟؟ اااه اللي فكرشك.. واش قالتلك ماما شي حاجة.. واش نتي عارفة اللي فكرشك مني..
- ماماك!! لا مكالتلي والو.. زايدون انا عارفك الولد منك نتا ..المهم خلينا من هادشي.. انا كنتوحم..
- وهاد الوحم ماجاك غي فنص الليل ..
- اه .. نوض جيبلي داكشي اللي بغيت ولا بغيتي ولدك تخرج فيه شي توحيمة..
- لا لا .. قوليلي شنو مشهية..
- مشهيا تديني نكلو الحوت.. حدا البحر..
- فهاد الوقت..
- اه فهادالوقت ولا بغيتي ولدك تخرج فيه شي توحيمة..
- صافي هانا نايض دابا.. سيري لبسي على ما نوجد راسي ..
مشيت بدلت وصاوبت راسي .. لقيت يحيى كيستناني .. خرجت معاه وشديت فيه وكنتبوحط.. وهو كيحاول عليا باش مانتقصحش.. تمشاي بشوية .. ديري بشوية .. رتاحي .. شدي فيا.. كان كيعاملني بحال الما لقليل.. شحال زوين تكوني حاملة ويتهلاو فيك.. مشينا لواحد الرسطرون لقيناه تقريبا ساد.. مشا هضر معاهم يحيى .. حتى جا عندي وقالي نزلي .. نزلت وجلست مقابلة معاه.. دايرا يدي على خدي وكنشوف فيه .. اماهو كيتفادا يشوف فيا..
حطو لينا العشا.. وبديت كناكل شوية جاني داكشي باسل ..
- كولي ..
- مبغيتش ناكل ..
- واش مفيقاني فوسط الليل وجايباني هنا باش تقوليلي مابغيتش ..
بديت نبكي .. 😭😭 متغوتش عليا الوحم هو هادا .. ماشي لخاطري..
- صافي متبكيش .. صافي عفاك.. سمحيلي ..مقصدتش نغوت عليك.. سمحيلي ..
- ايلا بغيتي نسمحلك اجي نزلو لبحر بغيت نقيس الما..
- بففف .. واخا
ناض معايا وانا شادة فيدو.. دارلي الخاطر وانا مشيت قصت الما وهو غا كيشوف فيا .. مالو صحابليه ساهلة ولا .. ماشي غا اجي وسمع كلمة بابا.. مطلع من تما حتا فقصتو.. ركبنا فالطوموبيل وجينا .. وانا ناشطة وكنتفشش .. وهو ساكت ومفقوص..
- تصبحي على خير ..
- انا خايفة.. خليني ننعس حداك ليوما ..
- عايدااة..
- صافي مقلتلك والو..
دخلت لبيتي لقيتو تبعني نعسني وغطاني ومشا.. مازال كيحن فيا واخا كاع داكشي اللي فات..
البارت 36
الغد ليه نضت دوشت ولبست كسوة قصيرة.. خاصني نوجد راسي ونشري كسوات الحوامل.. نزلت لقيتهم كيفطرو.. شافتني ماما..
- اجي بنتي جلسي.. واش مشهية شي حاجة نقول للخدامات يجيبوهالك..
- لا بغيت غا نفطر عادي ..
- شربي الحليب راه زوين للحوامل .. تهلاي لينا فولي العهد..
- واخا اماما..
بقا يحيى كيشوف فينا ولكن مضحكش.. كنت كنتمنى تعجبو علاقتي بماماه.. فرق كبير بينها وبين عجوزتي اللولى كانت شعالة العوافي.. اما هادي كتهلا فيا وحاسباني بنتها.. صمتو كان كيقتلني .. مكرهتوش يضربني .. ويغوت عليا ولكن ميسكوتش.. خايفة من الفراق وشادة قلبي بيدي.. القدر باغينا نتجمعو عليها حملت فهاد الوقت بالضبط.. مللي كملت الفطور ناض يحيى وانا نتبعو..
- يحيى..
- نعام ..
- فين غادي ..
- غادي للخدمة.. بغيتي نجيبلك شي حاجة..
- لا .. تهلا فراسك..
مشا ودا قلبي معاه.. الله يا ربي واش غانبقا هاكا .. علاش الزهر معاكس معايا .. انا مابغيت والو من هاد الدنيا غير نكون مع يحيى .. واش حتى هاد الدرجة حلمي صعيب.. دوزت نهاري فالحديقة جالسة فالارجوحة .. حتى بانلي واحد بنادم داخل .. اوووف اش جاية دير هادي ..
- اش كاديري هنا نتي يا هاد الموسخة..
- اهلا بلالة اليف .. النقية .. نتي اللي اش جاية ديري هنا .. انا هنا فدار راجلي ..
- 😳 كيفاش راجلك..
- زيدي عندك حتى هادي .. بعد تسع شهور غادي يولي عندنا ولد ولا بنت.. حفيد لهاد العائلة..
حسيتها تزيرات ومحملات راسها .. خرجات دغيا .. عجبني الحال فيها.. شكون صحابليها راسها..
فلعشية جا يحيى .. جا عندي جاعر..
- علاش قلتي لاليف باللي حنا مزوجين ..
- علاش شنو فيها .. ياك انا مامات ولدك ولا بنتك
- ام ولدي اه ولكن ماشي مرتي .. واش بغيتي تشوهيني .. باراكة غا سيرتك ديال الزفت .. علاش توسخيني حتا انا معاك..
داك الهضرة ماخلاتنيش نزيد نهضر.. واش حتى لهاد الدرجة .. واش كيحشم يقول للناس عليا.. واش غانبقا هكا ندفع الثمن الى الابد.. خلاني ودخل .. وانا مقدرتش لا نبكي ولا نتحرك من بلاصتي .. كل ما كنفكر فيه دابا هو ان قلبي شاعلة فيه العافية.. بركان من الغضب من الداخل ديالي .. انا مجرد ام لولدو.. اش غايوقع من بعد .. مللي يتزاد البيبي .. طلعت لبيتي وانا محاملة حتى حاجة.. تكيت وانا مقاداش نغمض عيني .. فزكت المخدة بالدموع بعدما قدرتش نحبسهم .. حسيت بالحكرة.. انا عايدة.. الانسانة اللي تزادت لهاد الدنيا فنهار كحل .. اللي من نهار تزادت وهي منحوسة.. ماتت امها وهي كتولدها .. وباها كرهها بعد داكشي.. ولا كيضربها وتزوج جاب ليها المرا اللي تتكرفص عليها وكأنه كينتقم منها .. مللي وصلات 15 عام زوجها بشارف اللي طفا طفولتها فليلة.. واللي عاشت معاه فقرف.. حتى جا النهار اللي شافت فيه يحيى.. تبدلات فيه وحيا قلبها من جديد.. ولكن الدعارة والحبس خلاها تخسره.. الامل الوحيد اللي عندها هو الولد اللي فكرشها .. واش غايخلي يحيى ينسى الماضي .. ويرجع من جديد .. بقيت كنبكي .. وانا مقادا نهضر .. تخشيت فالكاشة.. حتى جات عندي الخدامة..
- لالة .. راه العائلة كيستناوك لتحت باش تتغداو..
- مبغيتش ناكل .. معنديش الشهية..
مشات وانا بقيت فالناموسية .. كنفكر .. كان عندي امل مللي غانحمل انه غيتزوجني.. ولكن الحمل ديالي مشفعليش .. شوية سمعت الباب تحلات عليا وصوت خطوات جاي لعندي .. جلس حدايا ومسحلي دمعة من عيني .. كان يحيى.. انا عينيا تنفخو بالبكا ونيفي حمر..
- علاش كتبكي..
مقدرتش نجاوبو وغا زدت فالبكا ..
- عارف راني قصحت معاك فالهضرة.. ولكن.. حتى انا قلبي شاعلة فيه العافية.. ونتي السبب .. جرحي معندو دوا للاسف..
- يحيى انا ندمت وكنتعذب وكارهة راسي .. انا حياتي هي نتا .. وبلا بيك متسوا والو.. واش يصحابليك انا كان عاجبني الحال.. كنت كنموت الف مرة وانا كنكدب عليك .. كنت كنكره داك المستنقع اللي كنت فيه وكنلعن الف مرة النهار اللي تزاديت فيه..
شاف فيا وناض..
- نوضي خاصك تاكلي .. ولا عرفتي انا غانقول للخدامة تجيبلك هنا .. خاصك تتهلاي فداكشي اللي فكرشك.. ومغانسمحليكش تهمليه...
خرج وانا شديت على راسي .. يا ربي فوقاش غايسالي هادشي.. انا صافي عييت .. جابتلي الخدامة الماكلة وانا ماحاملاش راسي .. كليت بزاز على قبل ولدي .. اما انا راه معندو منين يدوزلي ..
البارت 37
بقيت هكاك مقادا نتحرك من بلاصتي .. حتى داني النعاس .. فقت على لمسات يحيى .. كان كيدوز على خدي .. مبغيتش نبين بللي فقت بغيتو يبقى هكاك.. عارفاه كيبغيني .. وميقدرش يعيش بلا بيا والا .. علاش غايجيبني نعيش معاهم فالفيلا.. شوية ناض غطاني وخرج.. تمنيت لوكان بقا معايا .. مكرهتش نعيش معاه ونتهنى.. نعست والغد ليه فقت بكري .. حيت نعست بزاف يمكن.. نضت دوشت وخرجت .. مشيت لنفس الارجوحة.. جلست فيه وهي كتحرك.. جا فبالي اسماعيل واشنو كيدير دابا.. شوية لقيت يحيى جاي عندي
- علاش نايضة فهاد الوقت باقي الحال ..
- حيت نعست وشبعت النعاس.. ونتا اشنو اللي مفيقك فهاد الوقت.. - انا منعستش اصلا .. ومبقيتش كنعس..
- يحيى انا..
- شووت عفاك سكتي.. انا وليت كنمرض بهضرتك...
- واخا الى كان سكاتي غيريحك.. غانسكت ..
جلس حدايا على الارجوحة وحاوطني بواحد اليد .. فرحت ونعست على صدرو .. يحيى واخا كيجرحني وكيحسسني باللي عمرو مغايسمحلي ولكن بعض المرات كيفيض منو احساسو اتجاهي.. وكيضعف .. بقينا بجوج هكاك مدة طويلة.. مقدرتش نهضر .. من بعد تشجعت..
- يحيى انا كنبغيك بزاف .. وعمري ماغانخبي عليك شي مرة شي حاجة.. كنواعدك غانبقى نصارحك بكلشي ،. عطيني فرصة كنترجاك..
مجاوبنيش .. رفعت راسي لقيتو ناعس .. رجعت نعست على صدرو .. اللهم العمش ولا العمى.. الله ياخد فيك الحق اسحر.. واخا نبقى ندعي عليك من هنا حتى نموت مغايكفينيش.. داني حتى انا النعاس تما .. فقت على يحيى وهو كيقولي نوضي تفطري .. نضت مشيت معاه فطرنا .. الله يا ربي باغا منه غير نظرة.. جات اليف .. هاد المرة ضاحكة.. جلست وبداو كيهضرو معاها .. وانا مفقوصة منها .. وبغيت نفقصها ..
- اي ..
تلفت عندي يحيى مخلوع : مالك شنو كيضرك واش بغيتي نديك للطبيب ..
بديت كنتبوحط.. لا لا راني سافا.. غا خليك معايا .. حسيت اليف تقهرات مللي شافت يحيى مخلوع عليا وبدات تهضر مع باباه..
- عمي كنتي قلتيلي خاصك شي جارديني .. انا لقيت واحد سيد مفحالوش .. وكيقلب على خدمة
- واخا .. علاش لا .. قوليلو يجي ..
ماديتهاش فهضرتها وهمست فودن يحيى وقلتلو بغيت نطلع لبيتي نرتاح.. حيت بصراحة مابقيتش كنقدر نتحمل وجود هاد الانسانة هنا .. شد فيا يحيى وطلعني لبيتي وهي متبعة نظراتها ليا .. طلعت لبيتي .. وتكيت على الناموسية وجا يحيى يخرج..
- يحيى .. ستنى عفاك .. بقا معايا ..
- شنو ..
- جلس معايا ..
- عارفك مابغيتينيش نجلس مع اليف.. متخافيش انا خارج.. غانمشي لخدمتي ..
تنفست الصعداء مللي قالي ديك الهضرة .. ابتسمت ليه وخرج.. انا رتاحيت وبديت كنفكر فيه كالعادة.. داز نهاري عادي .. الغد ليه فقت نزلت نفطر تشهيت الملوي طلبت من الخدامة تصاوبولي فطرت وجلست .. حتى جات ديك اليف .. استقبلها عمي .. باينة عزيزة عليه بزاف كيفاش لا وهي بنت شريكو واعز صديق ليه.. ولكن انا مكنحمل فيها الشعرة.. يخخ على جنس كيدايرا .. السيد مكايبغيهاش علاش مازال لاصقة فيه..
- عمي انا جبت ليك داك السيد وجات حتى مرتو غاتعاون فالشقا .. هي مرا بدراعها وباغيا تخدم بالحلال..
شافت فيا بعد ديك الهضرة .. كأنها قاصداني .. انا اللي خدمت فالحرام.. ناضت مشات تعيط ليهم دخل الراجل ومعاه مرتو .. احساسي تبدل ديك الساعة ورجع خنجر قديم كنت تخلصت منو نغزني فقلبي .. مستحيل .. نطقت والدمعة نازلة من عيني بألم : بابا ..
مقدرتش نتحرك فديك الساعة تصدمت .. هو شافني وتصدم .. ومرتو كذلك..
اليف: هادو هما اعمي ..
اب يحيى: مرحبا بيك ..
اليف بغات تنتاقم مني جابت بابا باش تذلني وانا كنشوفو خدام هنا .. وانا نهضر .. ممكن تخليوني معاهم شوية بوحدنا ..
تفاجئو بهضرتي .. وخرجو خلاوني معاهم..
مرت با : اش كاديري هنا واش خدامة هنا؟
انا : واش صحابليك انا بحالك.. انا مزوجة بولدهم .. وقريب غانولد ليهم حفيدهم.. المهم .. نتوما مغاتبقاوش هنا سيرو بحالكم ..
مرت با: ايوا هي لا صرفتي علينا نتي .. راجلك لاباس عليه.. عندو كاع هادشي ونتي تخلي باك كيتمحن..
-ماشي سوقي .. كما جريتو عليا من الدار داك المرة ولحتوني فالزنقة .. واش نسيتو.. واش باغي تعذبني حياتي كاملة .. انا وياك ابا بحال شوكة فقلب كل واحد فينا .. غير كنتلاقاو كتجرح الشوكة القلب .. وكيتألم.. سير بحالك وخليني نعيش .. علاش مازال تابعني .. ياك خليتلك الدنيا كلها ..
سكت ومهضرش بقا كيشوف فيا وناض قال لمرتو نوضي .. هي تفاجأت وقالت ليا .. ياكي اعايدة هادا هو جزائي للي ربيتك ودرتك بنتي..
مجاوبتهاش خرج با ومشات تبعاتو هي .. حسيت بغصة فقلبي .. كل واحد فينا عندو حاجة كتخليه يتألم.. وكيسد عليها قلبو حيت كتعذبو.
البارت 38
طلعت لبيتي ومخرجتش منه النهار كله .. حتى جات عندي ام يحيى..
-بنتي .. مالكي سادة عليك..
- اليف عرفات نقطة ضعفي .. بغات تذلني ببابا..
- متقوليش هاكا .. حتى واحد مكيختار والديه.. مهما كان هداك راه باك.. ومخاصش تحشمي منو.. هو كان يقلب على خدمة شنو فيها هادي..
- قلبي كيحترق.. مللي كنتفكرو.. تمنيت نعقل على ذكرى زوينة ليا معاه.. شي نهار دوزلي على راسي فيه.. شي نهار عنقني فيه.. شي نهار شرالي شي حاجة.. كنعقل غير على الحوايج الخايبين.. الضرب والتجريح.. هو اللي دمرلي حياتي .. هو سبابي ..
- رتاحي ومتفكريش فالحوايج السلبين .. نعسي..
غطاتني وخرجات وانا مقدرتش ننعس .. شوية سمعت الدقان فالباب .. قلت دخول .. وانا نشوف اب يحيى هو اللي جا .. جاب كرسي وجا جلس قبالتي..
- لاباس عليك..
- شوية..
- انا عرفت باللي الناس اللي جاو يقلبو على خدمة الصباح عائلتك.. انا ممكن نعاونهم..
- لا لا هما مامجتاجينش..
- واخا.. كيبقيتي مع الحمل .. كتهلاي شوية فحفيدي..
- اه الحمد لله ..
- مزيان هاكاك نبغيك.. شوفي ابنتي .. بغيت نهضر معاك شوية ولكن بغيتك تفهميني.. وتتفهمي هاد الهضرة اللي كنقولك وتعرفي باللي هي لمصلاحتك...
- كنسمعك..
- عارف باللي نتي تورطي فالدعارة بلا خاطرك ودخلتي للحبس .. كل واحد فينا كيدير اخطاء فحياتو.. كاين اللي كينساوها الناس وكاين اللي مكاينساوهاش.. ونتي عارفة باللي حنا خدامين بسمعتنا .. والشركات كيتعاونو معانا بسبب سيرتنا الطيبة.. لذالك فزواجك من يحيى مستحيل .. حيت هادشي غادي يقلل من قيمتنا فالمجتمع .. نتي ماضيك خايب بزاف .. وكلشي غايهضر علينا .. ولكن نتي حاملة بولدنا اللي ميمكنش نفرطو فيه فنفس الوقت .. لذلك حنا فموقف محرج بزاف وبين نارين.. لذا عندي ليك اقتراح ..
- اما هو 😢
- نتي غانبقاي معانا طول فترة الحمل وغانتهلاو فيك .. مللي غايتزاد ولي العهد.. ديك الساعة غاتمضي لينا تنازل عليه.. غانسجلو باسم اليف حيت هي ويحيى غادي يتزوجو قريب .. وفالمقابل غادي نعطيك مبلغ غادي يعيشك كما بغيتي .. عارف هاد الهضرة صعيبة عليك .. ولكن فكري بشوية عليك .. مازال عندنا الوقت .. فكري على خاطرك واتاخذي القرار المناسب..
ناض وخرج وخلاني كنندب على حالتي .. انا اللي درتها لراسي .. علاش .. اهئ اهئ بقيت كنبكي ونندب فزهري مدة حتى فشلت القوة ديالي .. وحسيت بحال السخفة .. حليت عيني ويحيى كيدوز على شعري ومقدرتش نتحرك ولا نهضر ..
- عايدة.. عايدة نتي لاباس .. هضري معايا عايدة..
هزني بسرعة وجرا بيا غوت على الشيفور .. ركبني فالطوموبيل مشا بينا الشيفور للمصحة.. دارولي الاسعافات الاولية والفحوصات وقال ليحيى باللي الجنين لاباس عليه.. وباللي خاصني نبعد على اي انفعال فهاد الفترة.. جا عندي يحيى وشدلي فيدي .. وانا مقدرتش نهضر يا ترى واش غادي نقولو العرض ديال باباه.. واش هو موافق على هادشي.. شوف دابا كيفاش مخلوع عليا يعني كيبغيني .. واش غايقدر يعيش بلا بيا ..
بقيت ساكتة ومكنهضرش ويحيى حاول يبقى معايا.. خرجت من المصحة.. ورجعني للفيلا.. جا عندي باه قالي على سلامتك.. مجاوبتوش.. محملتوش .. شوية يحيى جاه اتصال وخرج وجا عندي باه
- ايوا واش فكرتي فالعرض ديالي ..
- اه فكرت.. انا رافضة .. مغانبيعش ولدي .. ويلا بغيتو تجريو عليا من دابا معنديش مانع..
- كنت عارفك مغاتوافقيش .. عموما الهضرة فهاد الموضوع مازال الحال عليها.. على سلامتك..
ناض وخرج .. يا خوفي من هاد الناس .. انا حريرتي حريرة.. دخلت عندي يحيى وجا كيطمئن عليا ..
- حبيبة لاباس.. سافا شوية ..
- 😳
- مالكي ..
- قولتي حبيبة .. والله حتى قولتيها .. ياااااي
نقزت عليه وعنقتو بالفرحة..
- اه اه بشوية عليك راه قالك الطبيب متحركيش ..
- واخا مغنتحركش بشرط الى غاتبقا تقولي حبيبة كل نهار..
- واخا .. حتى انا عندي شرط ..
- تشرط كما بغيتي ..
- مبغيتكش تكدبي عليا مرة اخرى.، ولا تخبي عليا حتى حاجة واخا كانت صغيرة..
- عمري نخبي عليك شي حاجة .. كنبغيك بزاف ..
تأكدت باللي يحيى كيبغيني ولكن كيفاش غايقدر يقنع باباه يتزوجني ..
البارت 39
بقا معايا يحيى فبيتي ومامشاش ينعس فبيتو .. حتى لعشا .. جابولي حتى لعندي .. الصباح فقت بكري لقيتو بحال شي دري صغير ناعس وحال فمو .. جابلي الضحك فنفس الوقت مكرهتش ندخلو فقلبي ونسد عليه الباب .. باش حتى وحدة متشوفلي فيه.. فاق لقاني كنلعبلو فشعرو ..
- صباح العسل ..
- صباح النور احبيبة..
- ياااه شحال زوينة من فمك..
- ساهلة حبيبة حبيبة ..
- ههه كنحماق عليك..
- حتى انا كنبغيك بزاف ..
نضنا فطرنا .. دوزنا نهار زوين .. كلشي لاحظ علاقتي بيحيى اللي تصلحات .. مو عاجبها الحال اما باه وجداتو لا.. دوزت خمس شهور يحيى كان كيعاملني فيهم بحال شي ملاك.. وكان يتهلا فيا .. درنا الايكوغرفي وعرفنا باللي عندي ولدي .. يحيى فرح بزاف وحتى باه عجبو الحال مللي عرف باللي حفيده ولد.. طول الوقت كان يحيى كيعاملني مزيان باستثناء بعض المرات اللي كيفلتو منو شي كلمات .. كيعايرني بالماضي ديالي .. كنت دائما كنسكت وكنحني راسي .. ومكنجاوبوش .. علاش غانجاوبو وهو مكايقول غا الحقيقة.. هو مللي كيلقاني سكت كينساحب .. وكيرجع يصالحني من بعد .. كيعرف راسو شنو دار.. وانا بدوري كنرجع ليه كأن شيئا لم يقع .. مكتوب عليا ندفع ثمن اخطائي فالماضي واخا مكانوش فيدي .. مستعدة نتحمل واخا عمرو مغاينسا.. ماعليش المهم هو يكون معايا.. كرشي كبرات .. وولدي كيتحرك وكنحس بيه.. مكرهتش يجي النهار اللي يطلب مني يحيى فيه الزواج .. غانبقا نحلم بداك النهار .. حتى يجي .. مع انه عمرو ماجبدو معايا .. يمكن مستحيل كما كيقول باباه.. واحد النهار كنت كنت فالدار حتى كنسمع يحيى وباه كيتناقشو معرفتش علاياش.. خرج يحيى لقاني فالباب ..
- يحيى مالك .. علاش بابك معصب..
- والو رتاحي وتهلاي فولدي ..
عنقتو .. وقلتلو كلشي بيدك ايحيى.. حياتي بيدك وموتي بيدك..
بقات علاقتي بيحيى مستقرة حتى النهار اللي غاتجمع فيه العائلة على غير العادة .. شي حاجة ماشي حتى لتما.. تجمعو وكانت حتى اليف وجا عصام اللي مقدرتش نهضر عندو .. خفت من يحيى .. كنخاف على علاقتي بيه .. الاب ديال يحيى كان فرحان على غير عادته .. مللي تجمعو كلهم بدا باباه كيهضر..
- انا جمعتكم اليوما باش نقوليكم خبار زوين.. بغيت نقوليكم باللي قريب غايتزاد عندنا حفيد جديد ..،
مالو هادا عاد تفات عليه الشمعة ولا .. شنو الجديد هادي قديمة.. شوية وهو يكمل كلامو..
- قررت نعلن ليكم ليوما ان السيمانة الجاية غادي نحتافلو بعرس اليف ويحيى..
تصدمت مللي قال هاد الهضرة تلفت عند يحيى لقيتو حاني راسو.. واش كان عارف هادشي.. وشنو رأيو فهادشي.. واش موافق على هادشي اللي كيقول باباه.. مهضرش ومدار حتى ردة فعل..
- يحيى .. ميمكنش انا اللي حاملة بولدك ماشي هي ..
اليف: لا احبيبة ماشي غا نتي .. حتى انا حاملة منو وقريب غانولد ليه ..
- كيفاش حاملة منو ميمكنش.. يحيى قول شي حاجة..
باباه: متخافيش هو مغاينكرش ولدو.. حتا ولدك اللي فكرشك غايسجلو بسميتو... وغايصرف عليه.. نتي غاتبقاي هنا لغاية متولدي .. ولدنا غايبقا معانا ونتي فوقما بغيتي تشوفيه حتى واحد مغايمنعو.. هو غايتربا مع خوه ولا خوتو..
مقدرتش نستوعب داكشي اللي سمعتو.. مستحيل .. خرجت من داك الجماعة وتمشيت لبيتي .. يحيى تبعني .. تلفت عندو وهضرت من جديد..
- ممكن تشرحلي شنو واقع ...
- مكنتش فالوعي ديالي .. مكنتش عارف راسي اش كندير.. وقع اللي وقع .. للاسف بابا فصفها ومافيدي والو.. غايخسر الصفقات اللي دار مع باباها الى رفضت الزواج منها ..
مقديتش نهضر .. جلست على الناموسية.. بالصدمة..
البارت 40
تصدمت .. مقديتش نهضر.. شكون انا فلحظة مر شريط حياتي قدام عيني ..معمرك درتي قيمة لراسك اعايدة.. من نهار تزاديتي .. كان مصيرك يجفو بيك ويمسحو فيك الناس رجليهم.. لاول مرة كيعز عليا راسي .. انا اللي عمري متمنيت غير اني نفرح... حتى الفرحة كانت غالية عليا بزاف.. اليف .. بنت الناس هي اللي تصلاح تكون زوجة ليحيى.. هي اللي يفتخر بها ويبان معاها قدام الناس.. اما انا من ديما كيشوف فيا عاهرة وغايبقا هكاك.. كنبغيه اه .. وهو؟ اكيد لا .. حب يحيى ليا طفا من نهار عرف حقيقتي.. ومن تما وهو كيشوفني مجرد عشيقة لا غير.. شديته بهاد الولد ... اما لوكان جات عليه هو كان لاحك فالزنقة.. شديتيه .. هه واش كتضحكي على راسك اعايدة.. باش شديتيه .. هو غايتزوج خلاص .. ومللي غاتولدي غاياخدو ولدك وغايلوحوك فالزنقة.. لا مغاياخدوش ولدي ومغانسمحش ليهم.. فيقي اعايدة ومتخليش العاطفة تلعب بيك.. فيقي قبل متلقاي راسك مليوحة فالزنقة وكبيدتك خداوها ليك.. يحيى باعني .. جا الوقت اللي خاصني ندير فيه قيمة لراسي .. باراكة من الذل .. باراكة خلاص.. وباراكة من الاخطاء .. باراكة من الحقارة.. غلطت بزاف فحياتي ودابا كندفع ثمنهم.. يا ربي سمحلي يا ربي .. عارفة اني عصيتك ماشي مرة ماشي جوج .. عفو عليا يا ربي .. انا غانتوب مابقيت باغا والو.. غير متحرمنيش من ولدي .. هو اللي عندي فهاد الدنيا.. انا غانتوب وتعلمت من اخطاءي .. اخطاء خسرت فيها كرامتي .. ولكن تعلمت من اخطاءي .. تعلمت يا ربي .. اللي مادارش قيمة لراسو .. مستحيل يديرهالو شي حد اخور.. بقيت فبيتي .. وانا كنفكر بزاف .. قلبي طايب .. وشاعلة فيه العافية.. حلمت فوق القياس .. خاصني نوعى .. حطيت يدي على كرشي : ولدي الحبيب.. كنواعدك احياتي غاندير المستحيل باش نعيشك مزيان .. باش متعدبش كما تعدبت انا غانعيش حياتي ليك.. مبقيت باغا والو من الدنيا غيرك..
بقاو مجموعين وكنسمع صوت ضحكاتهم .. اما انا بقيت فبيتي .. متحركتش منه.. لبست حوايجي.. ووجدت وراقي .. خاصني نمشي من هنا .. وعمرهم مغايعاودو يشوفوني.. غايتهناو مني.. فوسط هادشي كنتذكر كلام يحيى وهو حاني راسو.. "مكنتش فالوعي ديالي .. كنت سكران حتى فقت الصباح لقيت راسي معاها فالفراش.." كرهت هاد الجملة ولكن للاسف هي اللي بقات كتعاود فودني.. تكيت فالناموسية .. وغمضت عيني وانا كنستنى هاد القصارة تسالي.. سمعتهم صوتهم صقل.. تكعدت وانا نسمع صوت خطوات قريب من بيتي .. رجعت تكيت وغمضت عيني .. معنديش الخاطر نهضر مع حتى واحد.. تفتح الباب ديال الغرفة .. وبدات الخطوات كتقرب مني حتى جلس حدايا .. وانا مازال مغمضة عيني .. يحيى هادا هو يحيى كنحس بيه على بعد امتار .. ودابا ولا قريب ليا بزاف.. بدا كيدوز يديه على خدي وكيبعد شعري على وجهي .. حتى قرب وباسني فجبهتي .. قلبي كان غايوقف .. ولكن مفتحتش عيني .. مقدرتش نواجهو خفت لا نضعف .. ونتراجع على قرار المغادرة.. ولكن لا من هنا لفوق خاصني نتحكم فمشاعري ونفكر بالعقل .. عارفة صعيبة عليا ولكن اهون من هاد الذل اللي راني عايشاه.. غطاني وناض خرج وسد مورايا الباب .. ااه يا قلبي تحمل كنترجاك.. تسنيت شوية حتى تأكدت باللي يحيى دخل لبيتو .. لبست المونطو حيت كان البرد .. وخرجت .. بالحس باش حتى واحد مايشوفني .. حليت الباب وضربت نسمات الهوا الباردة وجهي .. تخبيت فالمونطو وتمشيت الى وجهة غير معلومة.. مكنتش عارفة فين غادية ولا فين غادي نمشي .تمشيت بزاف .. كان الليل والدنيا خاوية ...خفت صوت الكلاب بوحدو اللي كيتسمع.. محسيتش براسي حتى لقيت رجليا غاديين بيا للحومة ديالنا.. واش ندق على اسماعيل ..هاد المرة باه غايجري عليا الى لقاني بكرش وفالحرام..واش ندق على عزيز .. نخاف يلقاها سبة يذلني ويشوهني فالحومة كتر.. بقيت فموقف لا احسد عليه.. من اش خايفة اعايدة.. اش غايوقعليك كتار من داكشي اللي وقع .. تلفت باش نمشي ونخرج من الحومة باش نتلاقا مصيري وكيفما كان .. دوزت فحياتي اسوء الاشياء على الاطلاق.. ربما غاتكون الزنقة عليا ارحم انا وولدي من الحقد ديال البشر..
- عايدة..
هادا صوت جا من مورايا بعد ما كنت تايهة فعالم التفكير واللي اهتز ليه كياني .. كنعرف هاد الصوت مزيان .. كيفاش غانقدر ننساه وهو محفور فذاكرتي .. ترددت بزاف قبل مانتلفت ليه.. اش بغا عندي ..
البارت 41
تلفت ببطئ وشفتو هو ..
-با 😢
- بنتي عايدة ..
- ياااااه .. بنتي عايدة.. عشت حياتي كنستنى نسمع هاد الكلمة منك .. تعطلتي بزاف ..
قرب مني حتى ولاو عينيا كيشوفو فعينيه ..
- بنتي .. سمحيلي ابنتي .. انا السبب .. انا السبب فكل لحظة عذاب دازت عليك فحياتك.. اجي عندي ابنتي ..
فتحلي يديه وانا مصدومة .. واش كنحلم فهاد الليل .. واش بالصح هو بابا .. بعد كل هاد السنين واش ممكن يرجع ويطلب مني نسامحو .. بابا اللي تزاديت ولقيتو كيضرب ويعنف فيا .. دابا يجي يطلب مني نسامحو ونعنقو.. مقدرتش نصبر مشيت عنقتو وطلقت دموعي بديت كنبكي بحال شي دري صغير عاد لقا والديه .. بابا 😭😭 كنبكي بالجهد ومقدرتش نشد راسي ..
- سمحيلي ابنتي .. كنواعدك عمري مغانتخلا عليك من هنا الفوق .. سمحيلي ..
- سمحتليك ابا .. سمحتليك ..
احساسي فهاد اللحظة هو احساس بنت متعطشة لحنان من باها ومفتقدة عطفه.. مكنش عندي الوقت نفكر لقيت راسي لا اراديا كنتعلق بيه وكنسمحلو.. هادي هي عاطفة الابناء اتجاه الاباء.. ضعف شديد واحتياج.. هما السقف اللي كنتغطاو بيه.. مهما فعلو ..
- اجي ابنتي .. اجي دخلي لدارك..
- لا ابابا مبغيتش نسببليك شي مشكل مع مراتك..
- نتي بنتي وعمري مغانخليك تحتاجي شي حاجة فالدنيا وغانصرف عليك نتي وداكشي اللي فكرشك..
غا قالي كرشك وانا نغطيها حشمت من راسي.. على اخر الزمان كنلزم با يتهلا فولد من الحرام..
- انا السبب ابنتي انا اللي وصلتك لهادشي كله.. وخاصني نصلحو.. ونتحمل مسؤوليتي فيه ..
- ولكن ابابا .. نسيبك ومرتو مازال فالدار..
- ونتي مالك بيهم .. هاديك دارك قبل ماتكون دارهم ..نتي غاتنعسي مع خوتك ..
تمشيت معاه حل الباب رجعت بيا الذاكرة فكل لحظة فهاد الدار.. كيف كنت .. مللي كنت صغيرة وكنلعب فيها والنهار تزوجت منها .. واخيرا نهار جرا عليا با منها فنص الليل .. دخلت كان كلشي ناعس .. فاقت داك الحيزبون غا شافتني بحال الى شافت شي جن قدامها .. وزادت كتر مللي شافت كرشي ..
- ياك ابنت الحرام .. جريتي علينا من دار الاكابر .. لاش جاية دابا وبكرش ..
هضر بابا بصوت فيه حزم عجبني فيها الحال سكتها ..
- غادي تزمي فمك ولا غاتجمعي عليا نتي وتريكتك قشاوشكم وتخرجو عليا .. هادي بنتي وانا اللي مسؤول عليها وهادي دارها ..
تلفت عندي وقال: سيري ابنتي رتاحي ونعسي مع خوتك.. دخلت لقيتهم ناعسين.. وانا مكنعرف حتى واحد فيهم.. اخر مرة شفتهم كانو صغار بزاف .. وحتى امهم مكانتش كتخليني نشوفهم.. عنقتهم ونعست لاول مرة مرتاحة .. ومخايفاش .. يمكن حيت معايا بابا للي هو اكتر واحد ممكن يحميني فهاد الدنيا ..
من جهة اخرى..
فاق يحيى الصباح .. بدل حوايجو وخرج من بيتو.. مقدرش ينسى داكشي اللي وقع البارح.. اكيد عايدة غاتكون حالتها خايبة بعد داكشي اللي وقع البارح.. خاصني نكون بجنبها .. ونأكدليها باللي غا هي اللي كنبغي .. مهما كانت الظروف غاتبقا معايا .. هي مسألة وقت وصاف وغانرجع انا وياها .. نسافرو من هنا ونربيو ولدنا بجوج بعيد على هاد الناس.. ياريت لوكان مشيت من هنا قبل مايوقع داكشي ..
بقا غادي مشا دق عليها باباها مجاوباتش اكيد مازال ناعسة.. حل عليها الباب ملقاهاش .. اكيد نزلات تفطر .. حوايجها كلهم مازالين فبلاصتهم.. نزل ..
- ماما .. ماما ..
- نعام اولدي ..
- مابانتلكش عايدة..
- لا اولدي مازال راها فبيتها مخرجاتش منو..
- عايدة مكايناش فبيتها ..
- غاتكون غا فالجردة شوفها اولدي ..
بقا كيقلب ملقاهاش .. عايدة مشات .. خدات ولدي وخدات قلبي علاش اعايدة علاش ..
- فين ممكن تكون مشات ..
- انا غانمشي عند عصام اكيد مشات عندو حيت هما صحاب ..
مشا عند عصام وملقاهاش .. فينك اعايدة .. علاش مشيتي .. انا السبب .. انا اللي محافظتش عليك .. انا غانقلب عليك ومنتهنى حتى نلقاك ..
البارت 42
فقت لقيت خوتي مصدومين وكيشوفو فيا ..
- هه مالكم ..
شادي : شكون نتيا ..
انا : انا عايدة .. ختكم الكبيرة واش معرفتونيش
مريم: اه ختي .. نتي زوينة علاش مكتجيش عندنا .. ماما قالتلي باللي نتي خايبة ..
انا : ونتي شنو لقيتي .. واش بصح اناخايبة؟
شادي : لا نتي زوينة بزاف ..
بقيت كنلعب معاهم.. كيحمقو وفيهم براءة زوينة.. مختلفين بزاف على مهم .. نضت غسلت وجهي وخرجت انا وياهم لقينا الوليد كيفطر شافني ابتسم ليا مشيت عندو بستو وصبحت عليه .. شفت فالويل ديال نسيبو ومرتو لقيتهم حالين فيا فمهم .. محملتهمش سكتو وانا جلست مع الدراري .. نفطرو ..
مرت با: هادشي اللي بقا يهضرو فينا الناس دابا ويقولو جابت ليهم كرش فالحرام..
با : سكتي ولا نوضي من حدايا ..
مرت با : هانا ساكتة..
با : نعستي شوية مزيان ابنتي .. ياك ما عدبوك الدراري ..
عايدة: اه ابابا نعست بالعكس حسيت معاهم بالامان .. الله يحفظك ليا ابابا ..
بابا : امين ابنتي ..
شحال كنت مشتاقة لهاد النهار .. فهاد اللحظة بالضبط حسيت نسيت عذابي كله .. ورجعت قيمتي لهاد الدنيا ..
مخرجتش من الدار وحتى الدراري فرحو بزاف حيت انا معاهم .. وكل مرة يقيسو فكرشي ويقولولي مالها منفوخة.. كنقوليهم راه فيها بيبي .. كيفرحو وكيقولولي فوقاش غاتجيبيه .. عقلية الاطفال .. حتى عرفت باللي لحومة كلها عرفات باللي رجعت لدار با بكرش من الحرام.. ناري هاد مرت با شحال فيها ديال الهضرة.. مخرجتش مع انه كلشي جاه الفضول يشوفني.. كلشي بغا يشمت .. داز نهاري فدار با عادي .. كنت كنتفادا تلميحات مراتو.. عادي انا داز عليا الويل فحياتي .. مغانموتش بسبب كلمات جارحة منها .. المهم هو با .. اما هي فستين داهية.. نظرات خوها مازالت كتلاحقني.. ولكن هاد المرة مزعمش عليا .. حيت كيشوف با فصفي .. يخاف يجري عليه هو ومرتو.. حتى جا واحد الضيف غير متوقع.. عزيز .. معرفتش لاش جاي واش حتى هو جاي يشمت ولا ساق الخبار باللي حاملة.. جاب قوالب السكر وجاب مو وجلسو وانا كنطل عليه:
- اش جابك اعزيز .. شنو باغي تاني .. ياك بنتي وطلقتيها .. شنو مازال باغي ..
- جاي وطالب يد بنتك من جديد .. انا من نهار خرجت من داري وانا عايش وحداني .. كيما كتشوف دابا كنكبر وحتى مي كبرات بزاف وماقادة عليا .. وانا مبقيتش قادر نعيش بوحدي . انا عرفت باللي عايدة رجعات .. ومكرهتش ترجع لداري .. غانتهلا فيها وفولدها .. غانتهلا فيهم بجوج ..
- عايدة . اجي ابنتي .. اجي جلسي حدايا ابنتي ..
مشيت جلست حدا با .. ودار يدو عاى كتفي.
- سمعتيه شنو قال ابنتي .. القرار فيدك.. انا مغنبزز عليك والو..
- هو اللي جرا عليا ابا مخرجتش بخاطري .. حتى دابا مبقيتش محتاجاه.. ولدي انا اللي غانتهلا فيه لراسي .. انا رافضة نرجعليه..
-با: سمعتيها .. يالله درك زلافتك عليا.. خرج من داري ومبغيتكش تدوز بطريق بنتي شي مرة..
عزيز : عايدة عافاك .. انا غانديرلك اللي بغيتي .. نبوس يدك
با: برا خرج من داري وخود معاك هاد القوالب اللي جايب .. برا
بقا بابا كيدفع فيه حتى خرج وهو مازايد كيزاوك .. شدني الضحك على حالتو.. وعجبني الحال .. حيت حامة علي با ماشي بحال المرة اللولة.. شوية لقيت داك كحل العفطة جا كيجري اللي ميتسمى ديال خو مرت با .. خسرلي الضحكة اللي كانت فوجهي ..
- عايدة..
- شنو بغيتي ..
- قالولي عزيز جاي كيخطب فيك عنداااكي توافقي..
- ونتا مالك سوقك..
- انا اعايدة بغيت نتزوج بيك.. وولدك غانديرو بسميتي..
- شناهوا .. انا نتزوج بلك نتا الموسخ .. وزايدون نتا مزوج..
- الشرع عطا ربعة.. وانا قادر نعدل بينكم ..
- هههه 😂😂😂 قالك قادر يعدل .. ونتا معدلتي راسك غا مع وحدة .. سير بحالك قبل مانتطرطق عليك سير 😡 ..
- صافي بلا متعصبي .. والله حتى غاتندمي عليا
- سير يا القرع على زينك غاندم عليك..
ولد يحيى شحال عندو القيمة قبل حتى ميتزاد .. بحال باه.. كلشي باغين يسجلوه بسميتهم.. قالك نعدل .. مقدر يعدل حتى سروالو .. حوايجو خارجين منه .. غايعدل بيني وبين مرتو .. الحماق هادا ..
البارت 43
دوزت يوماين وانا مرتاحة فدار با .. حتى واحد النهار جاو الدراري كيغوتو ..
- عايدة عايدة.. واحد الطوموبيل كبييرة خرج منها واحد الراجل زوين ونقي .. وكيسول عليك ..
حطيت يدي على قلبي .. يحيى.. حتى دخل صاحب الضل الطويل ..
- عصاام !!!
- عايدة .. هادا هو الوعد ديالك ..
- سمحلي اعصام .. مقدرتش .. منقدرش نطيح كرامتي كتر من هاكا .. يحيى عمرو مغايكون ليا .. كما اليف عمرها مغاتكون ليك..
- لا .. هاد الهضرة ماشي صحيحة .. اليف الى مكانتش ليا عمرها تكون ليحيى.. وحتى نتي يحيى ليك نتي والدليل على هادشي انه غايحماق باش يلقاك ..
- 😳واش بالصح ..
- اه جا كيقلب عليك وطلبلي عنوان دار باك قلتله معرفتهاش .. وقلتله محال تكون تما حيت باباها متبرئ منها ..
- مزية درتي .. مبقيتش قادرة نتحمل .. هو كيقلب عليا غا على ود ولدي .. وانا مغانسمحش ليه ياخدو مني.. وزايدون هو قريب غايتزاد عندو ولد اخور..
- نتي طبعا تيقتي باللي هاداك ولدو..
- شنو كتقصد ..
- انا غانعاودلك كلشي .. شهر هادا باش وقع هادشي .. جات عندي اليف .. كتبكي ومنهارة حيت يحيى رفضها .. مشينا بجوج سهرنا فواحد نايت كلوب .. شربات بزاف مع اني حاولت نمنعها.. حيت كانت كتبانلي مقهورة بزاف .. حتى سكرات ومقدراتش تمشي لدارهم .. ديتها معايا لداري وهي مكانتش فوعيها .. وانا مقدرتش نقاوم راسي .. وقع للي وقع فاقت الصباح بدات كتدابز معايا .. وطلبات مني ننسى هادشي اللي وقع .. حتى النهار اللي علن فيه الاب ديال يحيى داك الخبر وعرفت باللي اليف لعباتها على كلشي .. مشيت عندها وقلتليها باللي داك الولد اللي فكرشها ولدي انا ومغانسمحش ليها تنسبو ليحيى .. انا عندي الحق فولدي .. ولكن هي نكرات..
-يعني الولد ولدك ماشي ولد يحيى..
- تماما .. وخاصني نثبت هادشي ..
- ولكن كيفاش غاتدير حتى تثبت هادشي ..
- انا عندي فكرة .. اتاصلي بها وقوليلها تجي عندك هنا .. وقدمي ليها شي حاجة تشربها وانا غانعطيك واحد الدوا ديريه ليها .. غايجيها حريق فكرشها غاتمشي للسبيطار وانا تما غانهضر مع الطبيب يدير ليها التحليل بلا متحس.. مللي تكون النتيجة فيدنا ديك الساعة كلشي غايولي كما بغينا..
- موافقة..
فعلا داكشي اللي درنا اتاصلت باليف وطلبتها تجي عندي .. باش نقوليها واحد الحاجة على يحيى كتهمها ..جات كتجري .. بقات كتطلع وتهبط فيا ..وانا كندخل ونخرج فالهضرة.. كانت علاين تفشل الخطة لولا اني فكرت ندير الدوا فالما اللي فأخر لحظة شرباتو.. عاد رتاحيت.. مشات بعدما قالتلي متحلميش بيحيى..
واخا الالة اليف ديك الساعة نشوفو شكون فينا اللي متحلمش بيحيى.. راني قلت ليكم من الاول غاندير ليكم مسلسل تركي ههه
البارت 44
مشات اليف والباقي على عصام.. دازت 15 يوم لا حس فيه ولا خبر من عصام حتى اتاصل بيا ..
- عايدة.. كنت متأكد اعايدة... الولد ولدي انا ماشي ولد يحيى..
- كنت عارفة .. كنت عارفة يحيى مستحيل يديرها
- انا غانمشي نقوله كلشي ..
- واخا ..
عصام مشا عند يحيى وعاودليه كلشي .. وهو فرح وخدا التحاليل مشا داهم لاليف وفجرها فوجها هي بدات كتزاوك وتنكر.، ولكن هو متيقهاش ..
يحيى: عصام .. انا متأكد باللي نتا عارف بلاصة عايدة .. عفاك قولي ..
عصام: واخا هي مكانتش باغاك تعرف .. ولكن انا غانقولك.. هي راها فدار باها .. اجي نديك عندها ..
بقيت فدارنا حتى كنسمع الدقان مشيت فتحت وانا كنلقا الراجل اللي حياتي عشتها كنستناه..
- 😢 يحيى!!
بدون سابق انذار جا عنقني .. وانا بقيت مسمرة فبلاصتي ..
- سمحيلي اعايدة .. عمري مغانفرط فيك.. انا عرفت قيمتك .. ومن هنا الفوق حتى حاجة مغتفرقنا غانعيشو انا وياك وولدنا ..
- شنو اللي تبدل دابا .. ياك انا مازال عايدة العاهرة الكدابة ..
- نتي حبيبتي .. ومنسمعكش تقولي على راسك هاد الهضرة مرة اخرى..
- عشت كنزاوك منك كلمة زوينة.. نتا زطمتي عليا بزاف .. وكرامتي نقصتي منها .. مع اني رجعتليك وانا تايبة وندمانة..
- عفاك اعايدة خلينا نبداو صفحة جديدة.. وكنواعدك عمرك مغاتسمعي مني كلمة ناقصة.. غانديرك نتي وولدنا فوق راسي..
-😭😭😭
- صافي عفاك متبكيش ..
بقا كيرغب فيا وعصام كيشوف فينا وكيضحك.. الجيران شي كيشوف من السراجم شي من حدا الباب .. كلشي تجمع يشوف هاد عايدة شكون جا عندها .. مرت با كتغوت فالحومة وكتقول مرحبا بنسابنا اللي لاباس عليهم .. شوهاتني .. حتى وقع ما لم يكن بالحسبان.،
اليف : عايدة.. انا غانقتلك نتي وولدك ..
رفعات باتجاهي فردي .. ويحيى تخلع ردني مور ظهرو..
يحيى: اليف اش كديري حطي من يدك واش حماقيتي ..
اليف : اه حماقيت .. من نهار بغيتك نتا وانا حماقيت .. شنو فيها احسن مني .. شوف على بيئة راها ساكنة فيها .. شنو عجبك فيها .. انا درت على قبلك اللي مايدارش .. اما نتا حتى حاجة مشفتيها ..انا غانرتاح منها ومن ولدها .. نتا الى مكنتيش ليا عمرك تكون ليها ..
يحيى : ديري عقلك .. نزلي الفردي ..
اليف : لا مغانزلوش.. سمعو يا ناس .. انا كنبغي هادالراجل .. وهاد خطافة الرجالة خداتو مني .. مسكنين فوسطكم بنت ليل..
فجأة معرفناش كيدار عصام تشاد معاها .. وبدا كينزل من يدها الفردي وهي مزيرة معاه.. حتى سمعنا صوت طلق ناري وانا نغوت لاااااا عصااااااام ..
البارت 45
الرصاصة خرجات من الفردي .. شفت مشهد قدامي .. طاحت اليف .. لا القرطاسة جات فكرشها.. شدها عصام بين يديه وحالتو مايعلم بها الا الله .. اليف فيقي كنترجاك.. مشينا كنجريو عندها لقيناها مكتحركش وكتنزف .. هزها عصام .. ركبنا فالطوموبيل وكسيرا دغيا يحيى فاتجاه السبيطار .. دخلناها ديريكت دخلوها لغرفة العمليات بقينا ساعات كنستناو .. عصام كانت حالتو خايبة بزاف..اما يحيى كان شاد فيدي وكيخفف عليا .. حتى خرج عندنا الطبيب ..قالينا خبر اللي غايهتز ليه كياننا .. للاسف اليف فقدات الجنين ديالها ودخلات فغيبوبة..
الخبر نزل فحال الصاعقة على عصام اللي كان الولد هو امله مع اليف .. جاتو هيستيرية .. محملتش نشوفو هكاك .. من بعد خرجو اليف .. وهو بقا تابعها بحال شي هبيل .. حالتو صعيبة بزاف .. شوية وهما يجيو البوليس عندنا .. شدو عصام وقالو لينا باللي غاياخدو اقوالنا.. عصام لا عصام ميستاهلش الحبس .. هو بقا كيغوت وكيتراجهم يخليوه حتى يطمئن عليها ولكن هما مسمعوش منو .. انا مللي شفتو بداك الحالة مقدرتش نصبر شوية حسيت بحريق فكرشي .. تزيرت وحسيت الما كينزل مني .. لا اولدي عفاك ماشي وقتك .. زاد الالم وانا شديت فيحيى وكنغوت وهو مخلوع..
- يحيى انا كنولد .. عاوني ..
عيط دغيا للفرمليات .. جاو دخلوني لصالة الولادة .. دوزت ساعتين فالحريق .. ويحيى كيستنى فيا .. جاو عائلته وبابا وكلشي كيترقب ولادة ولي العهد .. وابن الوريث الوحيد للعائلة.. بعد ساعات خرج عندهم الطبيب .. وبشرهم باللي الولد بصحة جيدة .. ولكن الام ديالو جسمها ضعيف وخاصها العناية .. خرجوني وداوني لغرفة خاصة .. حسيت راسي مافيا حتى جرام دالقوة وماقادة حتى نهز ولدي بين يدي .. واش غانعيش حتى نربيه .. حسيت بيحيى كيدوز يديه على راسي وشاد فيدي وحط راسو عندي .. باس يدي ومن تما محسيتش بشي حاجة اخرى..
فين انا .. كانت مروج خضرا والرياح خفيفة ..فين انا .. تمشيت بشوية.. كتبانلي دار .. قربت منها كنتفقد .. كنسمع صوت كان السرجم مفتوح.. طليت منو كايبانلي مهد فيه طفل .. ولدي .. هادا ولدي .. متبكيش اولدي انا جاية ناخدك .. حاولت ندخل مقدرتش .. انا حاسة باللي شي قوة كترجعني اللور .. شوية وهي تبانلي شي وحدة .. جات عند ولدي هزاتو .. مستحيل .. اليف .. حطي ولدي .. ابتسمات ابتسامة صفرا.. تلفتات عندي .. شوية دخل يحيى .. لا ولدي ويحيى واليف .. مستحيل يتجمعو .. مستحيل .. لا .. لاااااا ..
فقت من نعاس .. نضت بسرعة شفت ولدي ملقيتوش .. مستحيل .. ولدي .. بديت كنغوت خرجت بسرعة كنجري ولدي.. كنغوت .، حتى خرج من واحد الشومبر .. يحيى .. مشيت عندو شديتو من حوايجو ..
- فين درتي ولدي .. فين ولدي 😭😭
- عايدة تهدني .. ولدنا راه بخير .. غا ارتفعات شوية حرارتو .. جبناه للحضانة ... متخافيش اجي تشوفيه ..
دخلني شفت ولدي باقي صغير بزاف .. هزيتو بين يدي وعنقتو ومقاداش نحبس من دموعي .. تلفت لعند يحيى وانا مازال معنقة ولدي:
البارت 46
- نتا واليف باغين تاخدو مني ولدي انا مغانسمحش ليكم ..
- اليف!!
😔- اه اليف .. - اليف مشات عند اللي خلقها ..
- شنو
😳 - للاسف هادشي البارح بالليل ..
- وعصام
- عصام غايتحاكم بتهمة القتل غير العمد..
- لا .. عصام ميستاهلش ..
- اكيد غايكون الحكم مخفف لبزاف ديال الظروف..
تأسفت بزاف على عصام .. عاش حياتو وفي لحبها وفلخر نهايتو تكون هاكا .. بقيت فالمستشفى حتى وليت لاباس .. يحيى كان معايا لحظة بلحظة .. وكان فرحان بزاف بولدو .. حتى عائلته كانو كيزوروني كل يوم ..حتى نهار خروجي من المستشفى..
يحيى: زيدي احياتي .. نمشيو لدارنا .. وحتى ولدي وجدت ليه غرفة ديالو فيها كلشي ..
بابا : بنتي غاتمشي لدار باها .. حتى تما غاترتاح ..
يحيى : كيفاش .. ميمكنش ..
عايدة: بابا عندو الحق .. بأي صفة نمشي معاك وانا ماشي مرتك ..
يحيى : اه حنا غانتزوجو وغان..
عايدة: حتى تبغي تتزوجني .. اجي مرحبا بيك راني فدار با .. خطبني منو..
هزيت ولدي وشديت فبابا وخليتو مصدوم .. انا واعدت راسي .. ندير ليها قيمة ونحفظ كرامتها .. كلشي بالاصول .. والحب بلا كرامة .. مكيتسماش حب .. كيتسمى ذل ..
مشيت لدار بابا اللي فرح بزاف مللي سمعت كلامو وحتى انا فرحت بزاف حيت واخيرا حسيت عندي سقف نتحاما فيه .. الناس زادت هضرتهم عليا فالحومة وانا محاملاش نشوف حتى واحد كما مرت با محاملاش وجودي بولد فالدار .. حتى واحد مبقا كيهمني .. اللي كيهمني هو ولدي ..
شادي : ختي عايدة شحال صغيور ولدك ..
مريم : اه صغيور عطيني نلعب معاه ..
عايدة : هو مازال صغير بزاف .. حتى يكبر شوية ويلعب معاكم ..
شادي : واخا انا غانعطيه الحلوة ..
عايدة: هو مازال مكياكل الحلوة حيت صغير ومازال مكبروليه السنان ..
مريم : وشنو كياكل ..
عايدة : كيشرب غا الحليب ..
شادي: اوووف حنا نسينا مشرينا الحليب ..
عايدة: هههههه انا شريتو صافي .. هههه
البارت 47
بقيت فدار بابا حتى سمعنا الصوت ديال الدقة المراكشية فالحومة .. ناري اشكون كيتزوج.. سمعتها كتقرب لدارنا .. قالي بابا راه يحيى وعائلته هما اللي جاو .. مشيت تخبيت فبيتي .. ولبست قفطان وصاوبت شعري وبدلت لولدي .. وهما دخلو للصالون واستقبلهم بابا :
بابا : مرحبا بيكم ..
اب يحيى : الله يبارك فيك .. حنا اسيدي جايين طالبين راغبين فيد بنتكم عايدة لولدنا يحيى على سنة الله ورسوله .. وطامعين فموافقتكم .. وحنا موافقين على جميع الشروط ديالكم ...
بابا : مقلتو عيب .. والاصول هي هادي ..
خرجت انا ماكانش فيدي العصير كالعادة ولكن كان فيدي ولدي .. اللي كنت متأكدة انه نور عيونهم .. فرحو بزاف .. عجبني ليهم بابا .. مخلاش من جهدو المرا هي اللي تخرج من دار باها بالعز ديالها .. ماشي بالاوهام.. تافقو على كلشي .. الصداق والعرس .. وحتى السبوع لولدي .. اللي قررنا نسميو ادم .. وصل نهار العرس .. اللي تقام فالحومة .. ايييه ولد الارستوقراطيين جا وتنازل لحومة شعبية باش ياخد مرتو منها .. كلشي فرح ونشط .. وكلشي عجبو الحال .. درنا عرس كبير .. وكلشي بقا فخاطرو.. سالا العرس ويحيى فرحان .. طلعت لبيتي .. ونعست ولدي وجا عندي يحيى كيفرنس..
- انا اسعد واحد فالدنيا ..
- مفهمتش علاش راك فرحان .. هه
- مالك بغيتيني نبكي .. راني عريس .. واليوما الدخلة ديالي ..
- دخلة !! هههه ضحكتيني ..
- علاش كتضحكي ..
- ايوا احياتي خاصك تستنى واحد شهر ... حيت راني مازال نفساء..
دار يديه على راسو بالصدمة .. وانا بقيت كنضحك .. لا زربة على صلاح احبيبي..
حسيت بيه شداتو الفقصة .. ههه احياني ..
البارت 48
بقيت فدار يحيى وعائلته غايحماقو على ادم ولدي هو عينيهم .. اما انا بقيت كنفكر
فواحد الانسان اللي تظلم .. كل ذنبه انه حب انسانة مابادلاتوش نفس الشعور .. عصام .. طلبت من يحيى نمشيو نشوفوه .. سمحولنا بالزيارة غا بزاز .. شفتو كانت حالتو خايبة .. عصام ماشي ديال الحبس .. انا اللي عارفة كيداير هاد الوسط ..
فواحد الانسان اللي تظلم .. كل ذنبه انه حب انسانة مابادلاتوش نفس الشعور .. عصام .. طلبت من يحيى نمشيو نشوفوه .. سمحولنا بالزيارة غا بزاز .. شفتو كانت حالتو خايبة .. عصام ماشي ديال الحبس .. انا اللي عارفة كيداير هاد الوسط ..
- شكرا ليك حيت جيتي تشوفيني
- كيداير اخويا ..
- كيف غانكون .. املي فالحياة تسالا من نهار ماتت .. وانا اللي قتلتها بيدي ..
- صبر .. انشاء الله غاتخرج من هنا وغاتبدا حياة جديدة.. مسألة وقت وصاف ..
- انشاء الله .. غانحاول ..
خرجت من عندو كنبكي .. هو ضحى على قبلي .. وخرج من المعركة خسران وانا اللي رابحة..
بقا يحيى كيواسيني ومشينا .. نهار المحاكمة كنا كلنا بجنبو .. والمحامي ديالو دار اللي فجهدو باش يخرج براءة ولكن حكمو عليه بخمس سنين بتهمة القتل غير العمد.. قلبي كان غايخرج من بلاصتو مللي سمعت داك الحكم .. بقا فيا بزاف ميستاهلش حيت هو ماشي مجرم.. قدرو.. يمكن هاد الخمس سنين غايكونو دوا لجروحو .. للحظة رجعات بيا الذاكرة للنار اللي كنا انا وياه فمرزوكة فوق الجمل..
{{- عايدة .. نتي عمرك بغيتي فحياتك.،
- ههه اه .. ونتا..
- حتى انا.. الحب هو اللي معدبني..
- الله يا ربي .. شكون اللي يعدب هاد الزين..
- وحدة عمية .. مكتشوفش .. ومبدلاني بواحد اخور.. معرفتش شنو فيه هو انا مافياش..
- الحب هو هادا .. علاش نتا ماتشوفش وحدة غيرها..
- عميت ههه ..
- ههههه ..قوللي هادشي اللي مسبب ليك ازمة نفسية هاد الايام..
- اه .. حاولت نبدلها والو.. حتى وحدة ماداخلة عقلي من غيرها..
- الصراحة هبيلة هاد البنت ..
- ههه اه ... ونتي اعايدة .. مازال راكي مع الحب ديالك..
- انا حريرتي حريرة.. انا كنت مزوجة وراجلي جرا عليا للزنقة.. ومازال باغا نطلق منه .. واش تعاوني ..
- نعاونك..
- مزيان.. باش نمشي نعيش مع حبيبي بلا قيود ديك الساعة..
- واش داك للدومين ديال الدعارة..
- الازمة والفلوس والفقر..
- مفهوم.. }}
الدنيا خايبة بزاف .. مكتعطيناش دايما داكشي اللي كنتمناو ..
- عايدة ..
- ممم
- فاش كتفكري ..
- والو .. غا كنفكر فعصام .. بقا فيا بزاف ..
- قدره هو هادا ..
- صحيح .. القدر .. معرفنا شنو مخبي لينا .. كما انا كان مقدر اني نتلقاك ونتزوجك.. بعدما كنت عايشة فوسط فقير بزاف ومزوجة بواحد الراجل شارف ..
- شششوت .. نساي عليك الماضي .. خلينا فالحاضر ..
البارت 49
دازو ايام وليت فيهم سيدة وحرم السي يحيى.. وكلشي كيحتارمني .. ويحيى مبقاش كيحشم من الماضي ديالي .. بالعكس .. زاد حبه ليا يوم بعد يوم .. ولدي كبر حتى هو وكبر سنيناتو .. وخوتي كيجيو يلعبو معاه كل مرة وفرحانين بيه.. ويحيى كمل مشروعه.. دازت اربعة سنين ولدي كبر وبدا يمشي للمدرسة..
- حياتي .. شنو رأيك نسافرو نرتاحو شوية ..
- واخا حتى ندوزو العراضة ديال ليوما ونسافرو فينما بغيتي ..
- شكون غايجي كاع ..
- غا عصام ..
- مازال مبغا يضبر على راسو بشي عروسة يهنينا من العزوبية ديالو .. لوكان يعرف الزواج شحال زوين يطير يتزوج دغيا ..
- يحيى .. ههه على نتا كنتي باغي غا تتزوج ولا كنتي كتقلب على الحب ..
- لا عندك الحق .. الزواج بلا حب ميمكنش ..
- يالله زيد قدامي مازال خاصانا شحال من حاجة ..
فالليل تجمعو العائلة كلها وعصام العزري .. كان مرتاح معانا .. ولكن انا اللي عارفة قلبو كيداير .. وفاجأنا كتر مللي قرر يسافر لامريكا .. كان قراره صعيب بزاف ولكن احتارمناه حيت ضروري خاصو يبدا حياة جديدة ويلا بقا هنا غايبقا يتذكر الماضي .. وغايعقدو فحياتو.. صفا امواله وشراكته مع يحيى .. وودعنا ومشا ..
الحياة مهما كانت قاسية علينا .. الا انها كتعلمنا من كل تجربة قاسية دروس .. بابا ولا مستقر ومرتاح نفسيا بعدما تصالح مع نفسه ومعايا .. ربما العقدة الكبرى فحياتي هي بابا .. بمجرد ماتحلات رتاحيت وتحل كل شيء بعدها .. يحيى ولا رجل اعمال ناجح .. وحبه ليا كيزيد يكبر .. ولدي وفلذة كبدي كيكبر قدام عيني .. فالعام الموالي ودعنا الجدة .. وسلمت روحها الى بارئها .. فراقها كان صعيب علينا بزاف .. اما عزيز فمعاودتش تزوج بعدي .. وامه ماتت وبقا ساكن بوحده.. اسماعيل تزوج وخدم خدمة محترمة .. وولد ولاد وبنات .. وكنزور عائلته مرة مرة.. اما سحر فخرجات من الحبس وجات تطلب مني نسمحليها على كاع داكشي اللي دارتوليا .. وانا بدوري ضبرت ليها خدمة فالمنتجع السياحي ديال يحيى.. على الاقل تخدم بالحلال وبشرف .. كل واحد خدا مكانه الطبيعي .. انا عايدة اللي عشت كنقلب على ذاتي .. لقيتها اخيرا .. وعرفت قيمة راسي .. الى اللقاء مع دودي العيساتي .. يسعدني زيارتكم لمدونتي .. مدونة قصص دودي dodi elaissati مع قصص اخرى النهاية ..