البارت 1
- اعيشة .. فينك اجي عاونيني ..
- هاني جاية اخالتي .. هاني جاية ..
خرجت من بيت ولد خالتي قبل متشوفني .. ميمشيش بالكم بعيد .. كنت فالبيت بوحدي كنشوف الذكريات .. وكنفكر فحبيب قلبي .. ولد خالتي العزيز .. نعرفكم براسي .. انا عيشة .. فعمري 17 عام بنت العروبية .. نوصف ليكم راسي .. انا بيضة وزيني عروبي وبريئ .. باينة من وجهي الطيبة ..شعري كحل وعينية عسلين .. فمي حمر .. ما رقيقة ما غليضة .. شادة فراسي بقوة ما خدامة كنشقى .. كلشي كيقولهالي حياتي كلها اما كنعجن او نخمل او نسرح الغنم .. او نحلب البقر ونجمع الخشب من الغابة .. قريت حتى السادس .. باراكة عليا حيت البنات عندنا مكيمشيوش يقراو الاعدادي فالمدينة .. عايشة مع خالتي .. مكنعقل لا على اب ولا على ام ليا .. رباتي خالتي وعاملاتني بحال بنتها .. عايشة انا وبنتها فاطمة مع بعض وكنعسو فبيت واحد .. كنتقاسمو كلشي ..هي طويلة وسميمرة شوية .. ولكن زوينة .. رموشها كبار وعينيها كوحل وشعرها كحل .. بحال هادوك البنات اللي كيبانو فالتلفزة .. زوينة بزاف .. كبرت وانا كنبغي علي .. مكنعرف حتى واحد فالدنيا من غيرو .. Dodi elaissati هو طويل وكيشبه لختو .. سمر شوية وعينيه كوحل وزوين .. عامر شوية .. زين عروبي حتى هو ..فعمره 23 سنة هو مشا يقرا فالمدينة .. وكيجي كل سيمانة .. كيكون بالنسبة ليا هاداك هو النهار الكبير .. كنفرح حيت غانشوفو .. مشيت لخالتي اللي كانت تعيطلي عاونتها فالتصبين ..
- عاونيني ابنتي راه الخير فيك ومكاينش فداك القردة دفاطمة ..
- خليها اخالتي ترتاح ..
- ونهار غاتزوج اش غادير فدار راجلها ..
- زهرها زوين اخالتي باينة فيها غاتزوج شي واحد لاباس عليه غادي يتهلا فيها .. وغايجيب ليها كلشي حتى للدار
- هههه ضحكتيني الزغبية.. والله ايلا المعجازات بزهرهم .. هي قوليلي نتي غاتزوجي شي واحد اللي يتكرفص عليك
- الله يستر .. انا غانتزوج واحد كيبغيني وكنبغيه (كنمعني على علي 😍)
- ايوا الله يجيب لولدي علي شي وحدة بحالك
-(الله ياربي اخالتي قولي الله يزوجك بعلي .. اشمن شي وحدة بحالي .. انا مكاينش بحالي فالدنيا)
بقيت كنخمل مع خالتي .. مللي كملت مشيت للبيت ديال علي من جديد .. بقيت كنقيص كل حاجة من حوايجو .. وكنشم فيها ريحتو .. حليت الماريو وخديت قاميجة ديالو .. درتها على نيفي وبقيت كنشمها وانا مغمضة عيني وكنفكر فيه ..
- عيشة اش كاديري هنا ..
تخلعت وتلفت بسرعة وخبيت القميجة مور ظهري .. هادا كان راجل خالتي ..
- عمي انا جاية نخمل البيت ..
- وجاية تخمليه فالظلام ..
-اه ههه لا .. بغيت نقول دزت من هنا بانتلي القميجة طايحة فالارض وقلت نهزها نخبعها ..
- واخا ابنتي .. باراكة عليك من الشقا ونوضي تنعسي ..
- واخا اعمي تصبح على خير ..
جريت بسرعة للبيت .. وانا مخلوعة ..
فاطمة : امالك اهاد الهيشة .. خلعتيني ..
عيشة : والو والو تصبحي على خير ..
فاطمة : شمن تصبحي على خير .. نوضي باغا ندوي معاك
عيشة : شنو هانا
فاطمة : كيف كيجيك مراد
عيشة : شكون مراد
فاطمة : داك الشاب ولد عائلة الريان ..
عيشة : اينا ريان معرفتهمش
فاطمة : اااوووف .. شوفي نفهمك .. فالدوار كاين شي حد لاباس عليه ياك ؟
عيشة :اه اه عرفتو .. هاداك اللي ديما نافخ راسو مكنحملوش .. حاس براسه بزااف ..
فاطمة : ولكن كيحمق ..
عيشة : وانوووضي تي شكون داها فيك .. هاداك يمكن عندو شي وحدة اللي لاباس عليها غاتزوج بيه ..
فاطمة : تفو عليك .. نعسي بعدي مني ..
عيشة : هانا ناعسة .. بعدي مني .. متعاوديش تصدعيني مازال .. تأليف دودي العيساتي
البارت 2
اليوما غايجي حب حياتي حيت عندو عطلة .. فرحت بزاف .. نضت بكري ومشيت خملت وصاوبت بيتو وصاوبت كل ما كيبغي من شهيوات .. بحال شي مرا كتستنى راجلها .. احساس زوين بزاف .. ملي وصل كنت اول وحدة تتلقاه مقديتش حتى نسلم عليه بالفرحة كنت حاسة راسي طايرة بالفرحة
عيشة : على سلامتك اعلي
علي : عويشة الزوينة .. توحشتك بزاف ..
عيشة : (حشمت) حتى انا توحشتك بزاف .. ارا نهز معاك حوايجك ..
علي: نتي خاصك تكوني مبرعة .. اعيون علي ..
خالتي : وتوما مالكوم مناويش دخلو ولا .. كاع هادشي سلام برا ..
علي : هاني امي جاي غا عييت بالطريق وصاف .. عويشتي مازال مسخيت منك .. انا راجع ليك وغانتشاوفو فالمكان المعتاد ..
دخل علي عند خالتي وسلم على عائلته اللي توحشهم .. وانا بقا كيتعاود فعقلي كلامه .. فالمكان المعتاد .. دخلت وانا كنستنى بفارغ الصبر يكمل كلامه مع عائلته .. ويتلاهاو شوية فراسهم باش نقدر انا نشوفه براحتي .. مشيت حدا الواد نستناه .. ديما كنلقاو راحتنا هنا .. بلاصتنا المعتادة .. حتى جا عندي ..شدلي فيدي وبقا كيشوف فعيني ..
عيشة : ☺️ علي عفاك متشوفش فيا هكا راني كنحشم ..
علي : ماشي لخاطري .. انا كنتوحش عويناتك..
عيشة : حتى انا كنتوحشك بزاف ..
علي : عيشة انا .. مكرهتش نرجع نعيش معاكم هنا .. مليت العيشة فالمدينة ..
عيشة : صبر احياتي غا حتى تسالي قرايتك .. باش تجي مرفوع الراس ..
علي : على قبلك نتي .. غانصبر .. وغادي نجي نتزوج بيك ونولدو وليدات .. كنبغيك بزاف ..
عيشة : حتى انا كنبغيك بزاف .. وكنستناك ..
دوزت نهاري وانا مقاداني فرحة .. حبيب القلب بجنبي .. دوزنا نهارنا على اجمل ما يرام وتجمعنا وقصرنا بالليل .. وبدا علي يوريلنا فحوايج جابهم لينا من المدينة انا وختو .. فرحتي كانت مكتصورش .. وانا كنشوفه بطل قدامي .. ومندمتش على اني بغيته فيوم من الايام .... نعست بزاز مع اني مللي كنكون فرحانة مكنقدرش ننعس .. بقيت كنفكر فحياتي .،. الغد ليه فقت بكري .. مشيت كنوجد ليه الفطور .. مشيت نفيقو ملقيتوش ..
- خالتي .. فين هو علي ياكما مشا بحالو
- عندك تسخفيلي هنا .. لا مامشاش .. خرج بكري مع باه مشاو يخدمو تراكتور حيت هو اللي كيعرف ليه .. راه خاصهم يخدمو شوية ديك الارض اللي بارت بقوة ماسمحنا فيها ..
- اه واخا .. انا وجدتلو الفطور .. بغيت نقول وجدت ليهم الفطور باش مللي يجيو يلقاوه واجد ..
خرجت وانا كنشوف على امل نلمحو وهو جاي .. اكيد غانبغي نكون قريبة ليه .. خفت لا تفهمني خالتي غلط اما انا كنت غادي نقوليها واش ندي ليهم الفطور فالارض باش يفطرو تما .. شوية لمحت واحد الولد كيجري وكيغوت بانلي بعيد ومسمعتش اش كيقول .. والناس كيطلو من الديور المتباعدة على بعض مللي كيسمعو الدري .. وكيخرجو يجريو لنفس الوجهة .. مفهمت والو ..بقيت كنشوف وانا محتارة .. شوية بانلي علي كيجري .. تصدمت وجهه مخطوف ..جا شاف فيا بصدمة ومقدرش يهضر .. ديك الشوفة عمري ننساها .. كان مخلوع وماعارفش اش غايدير .. دخل دغيا للدار وانا تابعاه ..
- علي .. علي مالك جاوبني .. علي ..
هو اتاجه لبيته بسرعة .. دخليه وبدا يجمع فحوايجه ..
- علي اش كادير مالك شنو واقع عفاك .. قولي شنو كاين ..
جرات امه دغيا وبدات تغوت مالك اش واقع فينو باك ياكما واقعة ليه شي حاجة ..
مجاوبناش بجوج .. وكمل الجميع دالحوايج .. وخرج بسرعة وانا تابعاه .. بدا يجري ومادارش موراه يشوفني .. بقيت تابعاه وانا كنبكي حتى مقدرتش نلحق عليه وجلست الارض وانا كنبكي .. علاش اعلي علاش ميشيتي وانا باقي ماشبعت منك .. بقيت كنتخصص وكنمسح دموعي حتا بانولي الجماعة كيجريو باتجاه الدار .. خلعوني .. كانو معصبين بزاف .. جريت بسرعة باش منخليش خالتي بوحدها .. واستجمعت القوة ديالي باش نهضر خصوصا بعدما بداو يغوتو ويعيطو على علي وشي وحدين تماداو باغين يدخلو للدار ..
عيشة :علي مكاينش .. مشا بحالو ..
الراجل : وشكون ضمن لينا انه بالصح مكاينش ..
عيشة : واش الضمان ليكم هو تدخلو على دار عندها الحرمة ديالها .. وفيها غير العيالات .. قتلوني عاد دخلو ..
الهضرة ديالي بحال الا فيقاتهم وبداو يتراجعو ويمشيو .. شوية بانلي راجل خالتي جاي وهو كيجر فرجليه .. وحالته حالة .. بحال الا هاز هموم الدنيا على قلبو .. ووجهه حزين بزاف ..
البارت 3
مشيت كنجري عند راجل خالتي .. وبديت كنهضر
- عفاك اعمي قوليا شنو كاين .. شنو واقع ..
مبغاش يجاوني وكمل طريقو للدار حتى انا تبعتو كان كيتمشى بصعوبة ومكانش قادر يتمشى ولا يوقف متوازن .. كمل دخل للدار وتلقات ليه خالتي
- العربي .. شنو واقع .. مال علي مشا ..
طاح عمي على ركابيه ونزلو دموعه اللي و لاول مرة كنشوفها فحياتي .. وقال ..
- علي ضاع .. علي ضيع راسه وضيع حياته ..
- شنووو 😱 كيفاش ضيع راسو ..
- كنا كنخدمو التراكتور .. وفعلا خدم .. وعلي قرر يتمشى بيه شوية باش يخدم الموطور دياله بحكم انه شحال هادي مخدم .. شوية وهو يخرج من الارض للبيستا.. انا حذرته ولكن هو مسمعش .. قرب من الارض ديال الريان .. معرفتش منين خرجلو واحد الولد .. طحنو تحت الروايض ديال التراكتور .. 😭😭😭 الولد مات .. وعرفنا الولد الصغير ديال عائلة الريان .. طلبت منه يهرب دغيا .. حيت الى لقاوه عائلته غايقتلوه بلا نقاش ..
انا صدمتي كانت كبيرة .. اش هاد الزهر .. واش زهرنا مطاح غير فهاد الناس .. وباغين يقتلوه .. انا مستحيل نخليهم يقتلو علي .. انا الى وقعات ليه شي حاجة غانموت ..نزلو دموعي وانا حاسة راسي مكتفة مقادرا ندير حتى ردة فعل .. الصدمة كانت قوية .. شوية سمعنا شي حد كيهرس الباب وكيغوت .. علي خرج هنا اشماتة انا ليوما غانقتلك ..
خفنا بزاف .. حيت الصوت ديالو مرعب وباينة فيه جاعر .. دوات فاطمة وقالت : هادا مراد الريان ...
مشات دغيا فتحات الباب وياريتها مافتحاته .. دخل بسرعة وكان فواحد الغضب كبير كيخوف وحتى واحد منا مقدر يهضر .. بدا يقلب فالدار وبنفس الطريقة كيغوت على علي .. اما حنا مقدرناش نهضرو .. جا شنق على عمي العربي .. وماراعاش كونه راجل كبير
- فين هو ولدك .. دوي ..
- مشا مازال معرفت فين مشا ... هرب ..
- انا غانقتلكم كلكم .. 😡 .. فهمتي غانقتلكم ..
محملتش الطريقة اللي عامل بها راجل خالتي ومشيت عندو بديت نضرب فيه ونقوليه طلق منه الكلب طلق منه .. ولكن ضرباتي ليه كانو بحال ديال شي بنيتة صغيرة ... بيد وحدة قدر يدفعني حتى تقصحت وانا كنطيح .. اش هاد الهمجي .. حتى سمعنا كلنا شي حد كيعيطليه بحزم : مرااد.. كلنا تلفتنا جهة الباب كان واقف تما واحد الراجل كبير .. وانيق مايكون غا باه ..كمل كلامه الموجه لمراد وقال :
- اشنو اللي جايبك هنا ؟
- انا جاي نشد حق خويا بيدي ..
- حق خوك ماشي نتا اللي غاتشدو .. الدراري الصغار مكيحكموش ..
- ولكن ابابا
- خرج من هنا .. دابا
جا يهضر عمي العربي..
- السي الريان .. البركة فراسك ولكن ..
- العزا مغايكون حتى تشد الحق دولدي .. غانتجمعو اعيان القبيلة عند الشيخ .. جيب ولدك واجي .. واللي عندو شي حق ياخدو ..
مشاو وحنا بقينا مقادرينش نشوفو فوجه بعضياتنا والصدمة متمكنة منا.. كيفاش غا نتصرفو .. اتجه راجل خالتي للباب ووقفاته خالتي : 😭 العربي .. عفاك متحرمنيش من ولدي .. هو اللي عندي فالدنيا ..
مقدرش يجاوبها نزلو دموعه وخرج كمل طريقه .. اما هي طاحت على ركابيها .. وحنا كنبكيو مقادريش نتحركو ولا مستوعبين شنو واقع .. فين وصل علي معارفينش .. واش يكونو لحقو عليه حتى هي معارفينهاش ..
عند الشيخ
وصل العربي عند شيخ القبيلة واللي لقا تما اكبر الاعيان كيستناو يناقشو شنو اللي وقع .. هو كان وسطهم صغير بزاف كل واحد منهم كلمتو تهز الاركان ..
الشيخ : فين هو ولدك العربي
العربي : والله معرفتو فين .. راه هرب
الريان : هرب ولا هربتيه نتا ..
بداو يتناقشو بحدة .. لقرابة اكثر من ساعتين .. والريان كيطالب بالقصاص ..
انا عيشة اللي عشت حياتي كنستنى ولد خالتي واللي كنشوفو ليوم ضايع قدامي .. تبعت عمي العربي.. قلبي تمشى بيا للبلاصة فين تجمعو الاعيان باش يناقشو مصير حبيب عمري .. ومصيري حتى انا معاه .. كنسمع النقاش ديالهم وصل للحدة ديالو .. وداك الريان وولدو كيطالبو بالقصاص .. مستحيل .. شوية بانلي شي رجال جايين فطوموبيل كحلة وقفوها ونزلو ونزلو معاهم علي .. كان كله مضروب .. وجارينه بجال شي بهيمة .. ومدخلينه للمجلس ديال الشيخ
البارت 4
جروه بحال شي عجل وانا ديك الساعة ركابيا فشلو عليا وانا كنشوفهم جارينه وكيضربو فيه وهو كله دمايات ومقادرش يوقف على رجليه .. بقيت كنطل عليه وعمي العربي تصدم ملي شاف ولده قدامه .. مليوح .. ناض اللي سميتو مراد ضربو برجله لوجهه حتى طاح وخرج الدم من فمو .. انا ديك الساعة بحال الى خشيتي موس فقلبي مكرهتش كون شديته نقتلو على ديك الحالة اللي دار فيه .. بداو يسبو فيه ومخلاوهش يهضر كاع .. انا رجليا كانو كياكلوني وباغ ندخل ..
الشيخ : هضر اعلي .. علاش قتلتي ولد الريان
علي : ماشي بالعاني والله مشفته ..
الشيخ : يعني قتلتيه بالخطأ
علي : والله مابخاطري ..
مراد: اشمن خطأ .. هاد الحيوان خاصه يتقتل .. وانا غادي نقتله ..
جبد من جيبو فردي وصوبه لراس علي .. مقدرتش نتحمل نشوفه ديك الساعة خفت بزاف بدون شعور دخل وانا كنغوت : لاااااا متقتلوش عفاك .. كنترجاك
الشيخ : شكون نتي واش دخلك لمجلس الرجالة
العربي : عيشة شنو اللي جابك هنا .. سيري بحالك .. سيدي هادي بنتي وخايفة عدروها .. هاهيا غاتخرج دابا .. سيري بحالك اعيشة سيري ..
بقاو كلشي حالين فمهم كيفاش مرا غاتدخل لمجلس كله رجال .. محسيتش براسي وانا شوقي وحبي وقلبي هو اللي دخلني لهنا بلا منحس .. مقدرتش نرفض طلب عمي العربي وخرجت باش منزيدش نحشمهم كتر .. خرجت ولكن مامشيتش .. بقيت كنتصنت وكنشوف تقرير مصير حب حياتي ..
الشيخ : اذا نتا عندك بنت العربي وعندك ارض .. وعلي كيقول ان هاد كان غا قتل خطأ ..
الريان : جلس امراد .. واللي يحكم بيه الشيخ انا موافق عليه ..
العربي : انا مستعد نعطيكم ارضي كلها .. وتعفيو على ولدي ..
مراد : هه ارضك .. ارضك بالنسبة لينا غا نقطة فبحر اراضينا .. متسوا حتى شعرة من خويا ..
الشيخ : ولكن البنت تسوا ..
العربي : شنو ؟؟؟
الشيخ : القتل الخطأ المقابل دياله كايكون دية .. والدية فهاد الحالة غاتكون بنتكم والارض ديالكم
العربي : ولكن البنت ..
الشيخ : الا اذا بغيتي علي يموت ..
الريان : وانا موافق ..
حنا عمي العربي راسه .. وانا ديك الساعة مفهمت حتى حاجة .. اش كيقصدو بالدية .. مشيت بسرعة لدار خالتي .. حيت رجليا طابو ومقدرتش مازال نسمع الحديث الممل ديالهم .. بقات كتردد فوديا ديك جملة بنتكم وارضكم هي الدية .. الدية .. شنا هي الدية .. وصلت للدار ولقيت خالتي حاطة يديها على خدها .. ومن الصبح محطات اللقمة ففمها .. ملقيت مندير حتى انا وبقيت كنستنى .. طولو حتى كنت غانمشي عاود لعندهم ولكن بقيت كنستنى .. لقيت عمي العربي وعلي جايين فرحت وغوت خالتي علي رجع
نقزات بسرعة وجرات للباب لقاتو جاي عنقاتو بلا متسول .. وبدات تقيس فالضربات فوجهه .. انا فرحت مشيت لعندو .. هو شاف فيا بنظرة فيها دمعة .. وحيد عينيه مني لاول مرة معرفتش علاش .. مغانكدبش ونقول اني متجرحتش فديك اللحظة .. حيت مكنتش كنستنى انه يقدر خوفي عليه ويطمني ولو بعينيه .. ولكن هو مادارهاش وتهرب حتى من النظر فيا .. طمن امه ومشا دخل لبيته وانا تابعاه بعينيا حتى سد الباب .. رجعت بصري خائب .. وشفت فعمي اللي لقيتو كيشوف فيا حتى هو بتمعن وعيونه عامرين دموع ..
- علاش جيتي لتما ..
- حيت خفت لا يقتلو علي ..
- جيتي تنقذي علي وخرجتي على راسك نتي ..
حنيت الراس وانا مفاهمة والو جات خالتي هضرات ..
خالتي : فهموني شنو وقع ..
العربي : طالبين الدية باش يعفو على علي .. والديك هي الارض والمرا .،
خالتي : كيفاش .. غايتخدو بنتي مني ؟؟؟
العربي : هما بغاو عيشة .. حيت شافوها تما وصحابليهم بنتي
بقيت مصدومة .، علاش باغيني ..
العربي : الدية كتمشي ومعندهاش الحق ترجع .. معندها حق فوالو .. كتبقى دية حياتها كاملة ..
تصدمت بداكشي اللي سمعت .. يعني غانختار بين موت او الموت .. فكلتا الحالتين غانتفارق مع علي .. الى وافقت غادي نمشي ومغانعاودش نشوفو والو والى موافقتش غادي يقتلوه .. دابا هاد فهمت النظرة ديالو فيا .. مقدرتش نستوعب .. دخلت للبيت جات عندي فاطمة الزهرا ..
- شوفي فيا .. نتي ماشي ذنبك .. انا اللي غانمشي فبلاصتك .. نتي غاتبقاي هنا وتتزوجي بخويا ..
- ولكن نتي شنو ذنبك ..
- انا غانتحمل مراد .. حيت كنبغيه .، وباغا نكون معاه واخا بزاز .. ولكن نتي مغاتقدريش حيت مكتبغيهش ..
هضرة فاطمة الزهرا نزلت عليا بحال الرحمة .. الى وافقات هي تمشي غانكون انا فأمان .. وغانقدر نحقق حلمي مع علي .. غانكون تنقذت من الموت .. هادا هو العدل
البارت 5
منعستش ديك الليلة ومقدرتش ننعس .. فكرت نمشي لعند علي ولكن مقدرتش .. خفت لا يحصلني شي واحد .. الصباح طلبت من فاطمة الزهرا تمشي تقول لماماها داكشي اللي قالت البارح وفعلا مشات ..
فاطمة الزهرا: ماما .. بغيت نهضر معاك ..
خالتي : شنو بغيتي
فاطمة الزهرا : ماما .. ماشي ضروري تمشي عيشة دية .. انا هي ختو وانا اللي نتحمل المسؤولية .. هي شنو ذنبها ..
خالتي : واش نتي مسطية .. واش يا نخسر ولدي يا نخسر بنتي .. متجبديش هاد الموضوع مرة اخرى ..
فاطمة الزهرا : اماما عيشة ماباغاش تمشي وانا خايفة على خويا
خالتي : غاتمشي بزاز عليها وزايدون هما اللي طالبينها .. لومامشات داك النهار وشافوها كانو غايقبلو الارض وصاف دية .. ولكن هي غلطات ودخلات بيناتهم .. دابا الحكم وقع صافي .. منبغيش نسمع هضرة فهاد الموضوع ..
انا كنت كنتصنط عليهم وفشلو عليا ركابيا .. انا اللي غلط مللي تدخلت بين الرجال .. خرجت عندي فاطمة الزهرا .. وهي محبطة .. دخلنا لواحد البيت باش نهضرو ..
فاطمة الزهرا : بكي وغوتي وقوليلهم مغانمشيش
عيشة : ولكن .. خايفة ..
جات خالتي .. حلات علينا الباب وحنا نسكتو ..
خالتي : فاطمة الزهرا .. خرجي بغيت نهضر مع عيشة بوحدنا ..
خرجت فاطمة الزهرا وخلاتني مع خالتي جات عندي شدات يدي وبدات تبوسها وانا كنحيدها ليها وبدات تبكي ..
خالتي : كنترجاك ابنتي .. مبغيتش نخسر ولادي .. نتي يتيمة وغادي يحنو فيك ماشي بحال بنتي غايتكرفسو عليها .. كنترجاك سيري .. وربي غايديرلك تاويل دالخير .. نتي معندك متخسري وتما غاتعيشي مزيانة .. انا راني غانموت الى شفت ولادي فالعداب .. فيدك تعتقينا .. فيدك تضحي على قبلنا .، تفكري غا الخير اللي درت فيك من صغرك حتى لدابا .. تهليت فيك .. ودرتك بنتي .. واش هادشي ميشفعليش تضحي على قبلنا ..
بقيت كنسمع ليها وقلبي كيتقطع .. هادي ضريبة اليتم .. شكون غايخاف عليا .. خالتي خايفة على ولادها .. انا ماشي بنتها باش تخاف عليا .. وضحات بيا بكل بساطة .. صدمة قلبي كانت كبيرة .. حسيت راسي بلا قيمة فالدنيا.. سكتت ومهضرتش .. شوية دخلات فاطمة الزهرا وقالت لماماها راه شي حد كيسول فالباب .،نضنا نشوفو شكون .. لقينا خادم شيخ القبيلة
- الشيخ كيطلب منكم تسلمو الدية لاهلها دغيا .. وريقات الارض والمرا ..
قلبي تقهر ديك الساعة وبدا العد العكسي .. خرج علي وسمع داكشي .. شفت فيه نظرة توسل .. انه ميتخلاش عليا .. ويعتقني ويغوت ويقول لا .. ولكن مقالش .. تهرب بعينيه مني .. ودخل لبيته .. وسد الباب ... فشلت ومقدرتش نهضر ..الخادم كان مازال كيستنى .. شوية بان اللي مكنتش دايرة بحسابه .. السي مراد الريان .. داخل بعجاجته ..
مراد : انا راني واجد باش نقتل ولدكم الى ماناوينش تسلمو الدية ..
صدمنا بداك الهضرة ومقدرتش نزيد نهضر ولا نفكر مازال .. جرا راجل خالتي دغيا عطا وراق الارض ديالو لمراد .. وشاف فيا بنظرة كتقول سيري معاه .. وليت شيء بحالي بحال الارض معندي مشاعر ولا رأي .. تقدمت باتجاه الباب بلا مناخد اي حاجة من حوايجي .. اصلا اش عندي .. انا معندي والو فالدنيا .. والو .،
مراد : حاجة اخرى .، مبقات عندكم ارض فهاد الدوار .. من الاحسن تخويوه ..
خالتي طاحو دموعها حيت هادي بلادها وعاشت هنا .. ولا راجلها اللي ارضو وارض جدادو مشات من بين يديه ولا فاطمة الزهرا اللي كتشوف حب حياتها وحلمها ضاع فلحظة .. او علي اللي ضحى باللي كان يقوليها حياتي هي نتي والموت هو البعد منك .. الهضرة سالات مني وشدني الطم .. فين غادية .. وشنو غادي يوقعلي من بعد هادشي .. شنو مصيري .. غادية للمجهول .. خرجت من دار خالتي اللي مكنتش كنتوقع فيوم من الايام اني غادي نخرج منها الا لقبري .. اليوم كنخرج منها دية واحلامي كلها تبخرات مني... خرج مراد وشدني من دراعي بواحد الحزم بحال الى جار شي بهيمة .. حل ليا الباب اللوراني ديال الطوموبيل ولاحني فيها وانا ساكتة وخايفة .. ركب هو والخادم ديال الشيخ وبداو يهضرو .. وانا بحال شي نكرة مدارلي حتى واحد قيمة .. فين غادي بيا قدري .. اش غايوقع لعيشة .. وشنو غايدوز عليها .. كلشي غادي نكتاشفوه فالحلقات المقبلة .. من قصة الدية تأليف دودي العيساتي
البارت 6
بزاف اللي غايقولو هادي مبالغة ولكن كما عودتكم كنستوحي القصص دائما من الواقع .. والقصة مستوحاة من الواقع .. عودة الى القصة .. معرفتش فين كانو غاديين .. ولكن بعد فترة قصيرة عرفت انهم غاديين لدويرة الشيخ .. مللي وصلو نزلو وجا مراد فتح الباب ديال الطوموبيل وبنفس الهمجية شدني من دراعي ونزلني بالجهد ..دخلني للدار لقيت الشيخ والريان جالسين وتما شي رجال اخرين مكنعرفهمش ..
الشيخ : استلمتو الدية ؟ مزيان ..
شاف فيا وقال
- عارفة راسك وليتي دية دابا .. يعني عنقك معلق بيد مراد ..من حقو يدير بيك اللي بغا .. بيدو يعتقك وبيدو يخليك امة ليه ..
وليت جارية .. دابا فهمت كلشي .، اصلا انا من نهار تزاديت وانا كنرضى بالقليل .وديما كتجيني قد راسي .. شكون غايعتقني ..
كملو هضرتهم وانا مفاهمة والو ومبغيت نفهم والو .. حيت الصدمة كانت قوية عليا فين تلات بيا الايام .. وانا اللي كنت كنحلم نعيش الحياة مع علي .. دابا غانعيش الجحيم .. شفت لقيت مراد مطول فيا النظرة ومكانتش اي نظرة .. هادي كانت نظرة توعد ..ديال مازال مشفتي والو .. اش مازال كيستناني كتر من هادشي .. الحياة هزاتني لفوق وضرباتني مع الارض بجهد .. ناضو بعد ما كملو الهضرة وقراو الفاتحة .. طبعا على روحي .. حيت غاندخل لجهنم .. جا عندي جرني كالعادة ولاحني فالطوموبيل .. على معاملة تقول انا اللي قتلت خوه .. ركب معاه باه .. ومشاو باتجاه القصر ديالهم .. اللي عمري متخيلت راسي غادي ندخل ليه .. وعمري مكان من احلامي على عكس فاطمة الزهرا اللي كانت كتتمنى تدخل ليه .. وتتمنى تتزوج هاد الهمجي اللي وليت جارية عندو .. نزلت من الطوموبيل .. وركابيا كيرجفو .. حسيت راسي داخلة لشي عالام اخور .. عييط بصوته اللي داير بحال الرعد .. على شي خدامات .. جاو داوني دخلوني وانا نلقا قدامي مرا كبيرة باينة هي الام وجوج بنات .. وحدة كبيرة وهازة دري صغير ووحدة اخرى شابة حتى هي باينة كبر مني .. اللي كانت هازة الولد عطاتو لوحدة من الخدامات وجات عندي .. بدات كتعبرني من التحت لفوق.. وانا كنبان بحال شي بنيتة صغيرة حداها .. اصلا راه كنت بنت صغيرة 17 عام اش غاتكون .. شافت فيا بواحد الاحتقار .. وقالت
- لا نتي ولا عائلتك متسواو شعرة وحدة من خويا اللي قتلتوه الحيوانات ..
مقدرت حتى نرفع وجهي فيها.. احتقرتني وحسساتني اني حشرة مكنسوا والو .. عيطات لواحد الخدامة وقالت ليها
- ديرها دوشو ليها ونقيو حالتها .. راه ريحة البهايم عاطية منها .. وعطيوها متلبس ..
مشيت معاهم .. على الاقل نبعد على اي احتكاك ليا معاهم .. دخلوني الخدامات وبلا ميهضرو معايا للحمام اللي كان كبير وعمري مشفت بحالو .. فحياتي .. فيه واحد البانيو كبير .. عمراتولي بالما ديك البنت وعطاتني شي قراعي قالتلي هادا ديريه للراس وهادا للجسم .. وعطاتني شي قراعي اخرين مفهمت حتى حاجة من داكشي اللي قالتلي عليهم .. محملتش راسي ولكن كان ضروري نساير هاد الناس .. حيت انا ماشي قدهم .. ومعندي اللي يدافع عليا .. دوشت ولبست الحوايج اللي عطاتني الخدامة .. وخرجت وانا ماعارفة فين نمشي فهاد القصر .. بقيت كنتمشى .. حتى ماعرفت منين خرجلي .. السي مراد .. خلعني ونظراته فيا كتخلعني لدرجة مكنقدرش نشوف فيه ..
- اش كاديري هنا ..
مجاوبتوش .. حيت انا براسي ماعارفاش فين غادية .. ولا فين انا .. هو مغايفهمش هادشي .. هو سكاتي استفزه قرب مني وضربني مع الحيط بواحد الهمجية .. حتى حسيت ضلوعي تهزو كلهم .. شدني من الفك ديالي وزير عليه وخنزر فيا ..
- داك التمسكين ديالك ماشي علي انا .. اتريكة القتالة .. انا غانخليك تتمناي الموت ومغاتلقايهش .. غاتتمناي لو انك متزاديتيش لهاد الدنيا .. دفعني ديك الساعة حتى جيت فالارض .. بنفس الغل وقسوة القلب .. يا ربي اش كيستناني مع هاد الناس .. وشنو غانشوف مازال فحياتي ..
البارت 7
حسيت براسي منحطة .. وبقا فيا راسي .. هو غا دفعني مشا .. بقيت فالارض ودموعي فعيني .. حتى لقيت يد تحطات علي .. تخلعت شكون رفعت راسي دغيا .. لقيت ديك البنت اللي شفتها مللي دخلت .. ماشي اللي هضرات عندي انما الاخرى .،
- نوضي .. بلاتي نعاونك ..
خفت بزاف .. حسيت راسي فدوامة وصعيب نتيق انه كاين شي حد فهاد الدار ممكن يعاملني مزيان .. ولكن هاد البنت اختلف معاها الامر ..حتى نظراتها من اول مرة كانت مختلفة بزاف .. ومكانش فعينيها ديك الشرارة .. نضت معاها وانا خايفة وعينيا فيهم دموع ..
- اجي معايا ..
مشيت معاها حتى دخلات لواحد البيت باينة ديالها .. نفس المعاملة داللطف ..
- جلسي .. شنو سميتك ؟ ☺️
- 😢 عيشة ..
- عيشة نتي زوينة وباينة فيك طيبة .. وماشي ذنبك هادشي اللي وقع نتي غا ضحية ..
هضرتها رجعات فيا الروح .. واخيرا لقيت شي حد اللي حس بيا فهاد الدار ..،
- انا لينا .. بنت الريان .. واخت مراد ..
غا ذكراتلي اسم داك المسموم وانا نتغوبش
- انا عارفة خويا مكيعاملكش مزيان .. ولكن عذريه .. هو كان متعلق بزاف بخويا انس .. الله يرحمه ..
- هاداك قدره .. انا ماشي ذنبي انه مات
- عارفة .. ومكرهتش نتخلصو من هاد التقاليد دالزفت .. ولكن لا حياة لمن تنادي ..
بقيت ساكتة ومالقيت منقول ليها .. شافت فيا وقالت
- قوليلي كيفاش نقدر نشوف الضحكة على وجهك
معرفتش شنو نقول ليها ولكن انا الضحكة ماتت فقلبي وموحال واش ترجع فيوم من الايام .. بقيت ساكتة وكنشوف فيها ..
- انا غانكون فجنبك ويلا حتاجيتي شي حاجة طلبيها مني .. اتافقنا؟
- واخا .. شكرا
نضنا مشيت معاها وراتلي البيت اللي غانعس فيه كان كبير ومرتب بزاف .. والاثاث دياله زوين .. فيه ناموسية كبيرة وماريو كبير ..وفوتوي والستائر .. دخلت بقيت حالة فمي انا عمري ما شفت بحال هادشي.. واش هاد البيت غانعس فيه انا .. اكيد كنحلم ..
لينا : هادا بيتك .. خودي راحتك فيه .. قوليلي فين حوايجك ..
حنيت راسي وانا حشمانة .. اشمن حوايج .. انا حوايجي تحشم تبينهم على الستائر احسن من حوايجي .. لينا فهمات سكوتي وقالت .،
- صافي فهمت .. نتي اكيد مكانش عندك الوقت نجيبي حوايجك .. ولكن معليش انا كنواعدك غدا الصباح غادي غانمشيو انا وياك نشريو الحوايج اللي تحتاجيهم ..يالله رتاحي دابا والى حتاجيتي اي حاجة انا راني فبيتي .. وراكي عارفة طريقه
خلاتني فالبيت ومشات .. وانا بقيت كنتأمل وكنشوف كل بلاصة فالبيت .. اش كيستناني مازال فهاد الدار .. بقيت تما قرابة ساعة وانا كنفكر فعلي .. يا ترى واش بقا فيه فراقي .. واش هو معدب .. واش كيفكر فيا كما كنفكر فيه .. علاش مكتوب عليا الفراق .. حبي ليه كان بريئ ومتمنيت حتى حاجة فالدنيا من غيرو .. ولكن القدر بعدني عليه ببساطة .. علاش .. بقيت كنفكر فيه حتى دخل اللي اسمه مراد اش جا يدير وشنو مازال باغي ..
- اهلا بالبرينسيسة .. اش كاديري هنا ..
- نتا اللي اش كادير هنا ..
- اووه عندك اللسان باش تهضري .. انا كان يصحابلي زيزونة
سكتت عاود حيت حسيت شخصيتي ضعيفة بزاف ومقدرتش نهضر ..
- نوضي من ناموسيتي واش تيقتي راسك ..
نضت وانا مصدومة كيفاش ناموسيته ..
- ووواش هادا بيتك ؟
- اه بيتي كيما نتي ديالي ..
- انا ما ديال حتى واحد ..
جا عندي ودفعني على الناموسية
- دابا تشوفي نتي ديالمن .. الى قدرتي تحبسيني حبسيني وشوفي شكون غايعتقك مني ..
بوحشية كبيرة شدني ومارس عليا الجنس .. اما انا ما قدرتش ندافع على راسي او نقاومه .. حسيت بألم كبير ولكن مقدرتش نغوت هي صرخة وحدة كانت للداخل ديالي وللاسف خنقها هاد الحيوان .. كمل مني وناض وهو محاملش راسو شاف فيا نظرة قرف بحال الى شايف قدامه شي طارو دالزبل .. يمكن هو تكون عندو قيمة كتر مني فهاد اللحظة .. انا اللي حسيت راسي لاول مرة فحياتي يتيمة .. واول مرة كنحس اني باغا نبكي فحضن امي ..اللي عمري فحياتي ما شفتها .. مقدرتش نوصف احساسي فهاد اللحظة .. حيت واخا نوصف ما غانوفيش حق نفسي اللي وصلات لاعلى مراتب الالم .. حسيت جسمي اللي حافظت عليه طول حياتي حتى من اكتر انسان بغيته .. ضاع مني فلحظة .. احساس خايب بزاف تحس انك فقدتي شي حاجة غالية عليك .. ناض مراد ودخل للحمام .. وانا بقيت كنحضن جسمي وكنترعد .. وماقادرة تنزل مني حتى دمعة .. لاني مقادراش نستوعب هادشي اللي طرالي ..علاش .. انا ماشي ديالو .. فجأة انفجرت بالبكا وسديت على فمي باش مايسمعني حتى واحد لاني خايفة .. خايفة من شي حاجة كتر من هادي .. حيت انا ماشي شي وحدة اللي ممكن تستنى الافضل .. طول حياتي كنرضى بالقليل .. وكنخاف من الفرحة ..
البارت 8
من داخل الحمام كان حوض استحمام كبير عامر بالما .. فيه مراد متكي وطالق يديه ومغمض عينيه .. ولكنه مزير على سنانه .. ولا تخفى ملامح الغضب عن وجهه .. انا مراد .. الابن الاكبر لعائلة الريان .. تزاديت وسط القتيل .. والتقاليد الخبيثة لهاد المجتمع .. من نهاري وانا كنشوف جور الوليد ديالي على الناس ونزع اراضي البسطاء .. اختاريت نبعد واحد المدة .. مشيت نقرا ففرنسا .. ولكن داكشي اللي شفتو فصغري مقدرش يتمحالي من بالي .. ومقدرتش نصيطر على راسي ونكون انسان سوي .. بركان من الغضب فالداخل ديالي .. ونار كتحرق كل من قرب مني .. مكنعرفش اي نوع من الرحمة .. ولكن اللي وقع ليوما مختلف بزاف .. شكون هادي وعلاش انا كنهتم بأمرها .. الناس اللي بحالها عبيد عندي والمفروض يكونو هكاك .. ولكن هي ، بقيت حاير فأمرها .. علاش مقاوماتنيش .. وعلاش مغوتاتش .. خلاتني نعدبها .. وسكتات .. اي نوع من البشر هي؟
انا الدية .. اللي معندها ذنب .. اشناهيا الدية .. هي عادة يتعارف عليها .. عادة غبية .. كيستعبدو بيها المرا .. ديما المراة .. كيعتبروها حاجة.. بحالها بحال الماريو والكرسي .. الى تهرس يجيبو واحد اخور .. طول الوقت هي اللي معندها رأي وهي اللي مفروض عليها تخدم وتاكل وتسكت .. مع انها اللي كتولد هاد الراجل .. الدية هي تعويض على شي حد مات .. المرأة حاجة .. انا الدية .. عايشة اللي عاشت حياتها كتقبل بالقليل .. وبغات شخص واحد .. تمنات تعيش معاه فالقليل .. كلشي مشا .. وبقيت دية .. فالاخير .. بقيت حاضنة فالناموسية حتى خرج مراد .. كينشف فشعره ونفس التغوبيشة على وجهه .. شاف فيا واتجه لعندي .. ديك الساعة تزادت دقات قلبي .. اش بغا مني تاني .. جا شدني من دراعي .. وانا حاسة القوة معنديش حسها ..
- نوضي تدوشي وحيدي منك الخنز ديالك ..
جرني ووجني للحمام .. مارضيتش ؟ شكون انا باش منرضاش .. هادا من كرم اخلاقه انه خلاني نبقى معاه فالبيت .. هاد مراد حسسني وعرفني بقيمتي الحقيقية مزيان .. دخلت للحمام وبقيت كنتأمل نفسي فالمرايا.. وكنقيص فوجهي .. هادي هي نهايتي .. شنو مازال كيستناني .. واش فعلا هادي غا البداية .. غمضت عيني .. وقررت نتجاهل كلشي.. نشد فمي .. ونسكت .. حيت هادا قدر وحدة بحالي .. حليت الما كان بارد .. حسيت بالبرد .. مازال كنحس .. مازال عندي احساس .. انا خايفة من المجهول .. حاولت نخدم الما السخون معرفتش .. كانت وراتلي الخدامة كيفاش ولكن معرفتش .. اضطريت ندوش بالما البارد .. اصلا مكاينش فرق .. كملت ومكرهتش نبقى هنا ومنخرجش عند داك الحيوان .. ملقيت منلبس .. لقيت غا واحد البينوار .. لبسته وخرجت .. لقيت مراد ناعس .. واش قدر يجيه النعاس وهو داير فيا كاع هادشي .. على قلب عنده ..مقدرتش نقرب منه .. خوف كان كيبعدني منه .. مشيت جلست فوق الفوتوي .. وبقيت كنسترجع ذكرياتي .. واش املي فأني نرجع نعيش مع علي ضاع .. واش مازال غايقبل بيا علي كزوجة ليه .. وانا اللي تمكن مني هاد الحيوان وخدا مني كلشي .. عمري مغانفقد الامل فأني غانرجعليه .. مقدرتش ننعس ولا يغمضلي جفن .. بقيت كنشوف فيه وانا حاسة اني مكتوفة الايدي .. سؤال كيتبادر للذهن ديالي .. اش غاتكون نهايتي .. بقيت كنتأمل الليل كامل حتى طلعات الشمس .. وانا عينيا مازال مغمضتهم .. فقط كنت كنحس باحساس غريب .. جسمي ولا تقيل عليا وضيق فالصدر .. فاق مراد شاف فيا .. وناض بلا ميهضر ودخل للطواليط .. انا مشفتش فيه ومحملتش نشوف وجهه .. متعطلش بزاف خرج .. شاف فيا وقال
- واش صحابلك راسك اميرة هنا .. نوضي مسحي صباطي ..
مكانش صعيب عليا نمسح صباطه حيت من صغري ولفت الشقا وكنت كنديرو بكل فرح .. نضت ولكن جسمي حسيت غا زايد يتقال هزيت صباطه اللي كان لابس البارح .. بقيت كنقلب على شي خرقة نمسح بيها الصباط ملقيتش مابانليا غا الزيف اللي كنت حاطة لشعري البارح مشيت نهزو ونزلت على ركابيا نمسح الصباط جا عندي ودفعني برجليه حتى طحت
- يا هاد الموسخة .. واش باغا تمسحيهم ولا تزيدي توسخيهم ..
مشا لواحد المجر هز منه واحد البواطة ولاحها عليا ..
- مسحي بهادي الجاهلة ..
هزيت البواطة حليتها كانت فيها واحد البونجة فهمت اني غانمسح بيها الصباط .. بديت نمسح والعيا كايتزاد عليا .. مفهمتش مالي .. جا حيدهم من يدي ولبسهم بعد ما لبس حوايجو وخرج .. نضت بتثاقل ورجعت للفوتوي وتكيت هاد المرة حيت حسيت الجسم ديالي تقيل بزاف .. داني النعاس شوية
البارت 9
فقت على صوت الدقان فالباب .. كانت وحدة من الخدامات .. حلات عليا الباب وكانت هازة فيديها شي حوايج
- انسة لينا صيفطاتليك هادشي ..
حطاتهم وخرجات .. بغيت نوض نشوف اش جابت ولكن مقدرتش .. جسمي زاد تقال عليا .. وحاسة بحرارتي حتى هي مرتفعة .. تكيت وداني النعاس من جديد ... بقيت كنحلم بشي احلام مخربقة .. شي داخل فشي .. حتى تفزعت من النعاس مللي سمعت الباب تضرب بالجهد .. مراد داخل وماداير بحساب والو .. انا مازال كنت ناعسة بالبينوار .. ولون جسمي مختلف على لون وجهي اللي تحرق بشمس الدوار .. اتاجه عندي مباشرة .. وهبط عندي وعينيه فعينيا اللي مقدرتش نحلهم بقوة العيا اللي فيا ..
- شفتك عاجباك النعسة على الفوتوي .. مكنتيش موالفاها ياك .. كنتي موالفة النعسة فالارض .. جرني وطيحني فالارض .. وانا بقوة مكيحرقوني ضلوعي حيت الوجع مضاعف .. لسوء الحظ تفتحلي البينوار اللي كنت لابسة .. يديا كانو تقال لدرجة مقدرت حتى نسدو .. شاف فيا بنظرة خبيثة حسيت راسي كنترتفع بعدما هزني ولاحني فالناموسية وبدا يحيد فحوايجه .. وصلت فدرجة الالم اني غيبت .. ومبقيت عاقلة على والو ..
فتحت عيني ولقيت راسي مازال فوق الناموسية وكنحس بألم فكل انحاء جسمي ...اما مراد مكانش فالبيت .. حاولت نوض مقدرتش جسمي كله مضروب .. اش دار فيا هاد الحيوان .. قلبتها بكا على حالتي .. الحالة اللي وصلت ليها.. سمعت الدقان فالباب .. غاتكون شي وحدة من الخدامات حاولت نغطي راسي .. تفتح الباب كانت لينا ..
- سلام .. لاباس عليك
شافت فيا تصدمات مللي شافتني .. حالتي كانت تشفي العدو .. جرات عندي
- عايشة .. شكون دار فيك هاد الحالة ..
مكان قدامي الا اني نبكي وننفجر بالدموع .. حيت حتى البكا مبقيت كنقدر نبكي قدام شي حد
- واش مراد اللي دارلك هكا .. هضري .. عفاك متبكيش .. اجي نوضي معايا ..
لقات البينوار دالحمام حداها لبساتولي ونوضاتني بزاز شدات فيا ومشيت معاها لبيتها على الاقل هروب من هاد الجحيم اللي تحطيت فيه .. مشيت لبيتها تكيت فالناموسية وغطاتني خرجات وانا بقيت كنتحسر على حالتي اللي وصلت ليها .. حياتي اللي تمنيتها وبقبت كنستنى يجيو فيها احلى ايام عمري ماجاوش .. كلشي تقلب فجأة وصارت فصول حياتي كلها فصل واحد اللي هو الخريف ... واللي كتساقط فيه ايام عمري .. جات لينا وجابت معاها واحد المرا ..
-عايشة انا جبتلك الطبيبة غاتفحصك وغاتكوني لاباس انشاء الله
جات عندي الطبيبة وبدات كتفحصني وكتسولني وانا الهضرة محبوسة فحلقي مبغاتش تخرج ..
الطبيبة : هادشي خطير الانسة .. البنت تعرضات لاعتداء كبير .. شوفي الضربات فكل انحاء جسمها .. الى جانب الاعتداء الجنسي .. شكون اللي دار فيها هاد الحالة
لينا : عفاك ادكتورة .. الهضرة مخاصش تخرج .. نتي عارفة شنو كاين .. كنواعد انا غانحميها من هنا لفوق ..
الطبيبة : تحملي مسؤوليتك .. المهم هي خاصها تاكل حيت جسمها ضعيف وعندها نزلة برد قوية .. انا غانكتب ليها مقويات وفيتامينات غاتكون لاباس انشاء الله ..
ناضت الطبيبة وخرجات .. خرجات معاها لينا اللي متعطلاتش ورجعات وجات موراها الخدامة جايبة الماكلة .. مقدرتش ناكل بقات كتبزز عليا لينا .. كليت شوية وشربت الدوا .. جابلي حوايج لبستهم وحيدت عليا هاد البينوار .. ونعست حسيت راسي مرتاحة وانا معاها .. شوية وانا نفيق على صداع .. صوت مراد اللي كان كيقلب عليا ..
- ماشي سوقك الينا ..
- اه سوقي .. كنتي غاتقتل البنت واش نتا انسان ولا حيوان .. شوف على حالة راها فيها ..
- انا حر .. هاديك راها دية وما منحقها حتى حاجة ويلا بغيت حتى نقتلها غانقتلها ..
- ديك الساعة قتلني انا اللولة عاد قتلها هي..
انا مقدرت الا اني نزير على الكاشة بقوة الخوف اللي كان فيا منو .. مبغيتش نرجع عندو .. شاف فيا بنظرة حادة وخرج .. هي سدات الباب موراه وجات عندي ..
- متخافيش .. نتي فحمايتي ومغايقدر حتى واحد يآذيك ..
حسيت بالامان شوية .. ورجعت نعست وانا عندي امل بسيط فلينا انها تعتقني ..
البارت 10
داز نهاري ونعست مزيان .. لينا نعست حدايا .. فقت الصبح لقيت راسي مزيانة .. ماموالفاش النعاس انا .. نضت تقابلت مع المرايا .. وبقيت كنشوف فراسي بانلي عنقي زرق ..بديت كنشوف فجسمي كدمات متفرقة فكل انحاء جسمي .. الحقير ضربني .. علاش اش درت ليه 😭.. خرجت من الطواليط وصليت .. وبديت نخمل ليها البيت هي فاقت ولقاتني هكاك .. عجبها الحال ..
- صباح الخير كنشوفك مزيانة اليوما ..
- اه مزيانة
- هكاك نبغيك .. اجي نفطرو ..
بدلات حوايجها وخرجنا من البيت تبعتها وانا خايفة .. لقينا كلشي جالس ومجموعين كيفطرو وحتى اللي سميتو مراد ..
لينا : صباح الخير ، اجي اعايشة جلسي حدايا
الام : الدية مكتجلس مع العائلة ..
مراد : مالك نتي مضصرة ديك الكلبة ..
محملتش راسي .. ومشيت بلا منشوف مورايا .. انا غانبقا فعينيهم دية مهما وقع .. لقيت مورايا لينا تبعاتني ..
لينا : انا عارفة انه صعيب عليك تتحملي داكشي اللي كيقولوه ... ولكن غايفهمو في يوم من الايام انه ماشي ذنبك داكشي اللي طرا .. وانك غير ضحية .. شوفي انا غادي نفطر معاك ..
طلبات من الخدامات يوجدولنا فطور .. معرفتش علاش كدير معايا هادشي .. ولكن هي بالنسبة ليا القشة اللي نشد فيها وانا غريقة فهاد البحر ..
فطرنا وبقات لينا كتهضر معايا .. وكتسولني على كل حاجة ..اما انا فكنت كنجاوبها ببراءة .. وكنتكلو فنفس الوقت .. شفتها فجأ علات راسها الفوق وبدلات الضحكة .. ديك الساعة وحلات ليا الدغمة فالحلق .. عرفتو .. ريحته مبقاتش كتخفى عليا .. مقدرتش نتلفت تمنيت لوكان الزمان يوقف على اني نشوف فيه ..
لينا : شنو بغيتي ..
مراد : متبقايش تقربي لحوايجي ...
لينا : عايشة ماشي حاجة .. هادي انسانة وما ملك حتى واحد ..
مراد : دابا نشوفو ..
مشا وانا طول الوقت مشفتش فيه .. واخيرا لقيت شي حد فصفي .. فرحت بزاف حيت قدرات تحميني منه .. هاذا جميل عمري مغاننساه ليها
عائشة : كنشكرك بزاف .. عمري غاننسا ليك هادشي اللي كديري معايا ..
لينا : مدرت حتى حاجة .. ولكن مستعدة ندير .. طلبي مني اي حاجة بغيتيها شنو كتتمناي فهاد اللحظة وانا غانفذو ليك ..
عايشة : كنتمنى ...
جا فبالي حلم واحد وهو نكون مع علي .. قهرني الفراق وانا عارفة اني مغانشوفوش مرة اخرى ...
لينا : شنو .. مم
عائشة : كنتمنى نشوف عائلتي . توحشتهم ..😞
لينا : نوضي نمشيو تشوفيهم ..
عائشة : 😳 كيفاش .. واش نقدر نشوفهم ،.
لينا : نوضي مكنتفلاش .. خلينا نمشيو دغيا ..
نضت معاها .. ومشيت وانا فرحانة .. حلات الطوموبيل ركبت سديت الباب .. وانا مامتيقاش اني غادية نشوف عائلتي وخصوصا علي .. فجأة تفتح علي الباب وشفت داك الوجه اللي مابغيتش نشوفو .. كان اللي سميتو مراد كيدير فيا شي شوفات لوكانو قرطاس اكيد كنت غانكون دابا فعداد الموتى ..
مراد ؛ فين غادية الالة ..
جرني من دراعي وخرجني من الطوموبيل ..
لينا : خليها غانخرجو غا نتساراو شوية ..
مراد : ماشي نتي اللي كتقرري .. زيدي قدامي
بقات لينا كتغوت عليه اما هو جرني بحال شي بهيمة .. محنش فيا ابدا .. دخلني للدار ولاحني
مراد : شوفي فيا مزيان .. نتي دية .. عرفتي اشناهيا دية .. معندك الحق فحتى حاجة .. سكتي واللي امرتك بيها نفذيها ..
مشا وخلاني مصدومة من هادشي اللي وقع .. هاد الانسان مريض .. انا متأكدة .. مستحيل انسان طبيعي يدير هادشي .. عييت من التحسر على نفسي .. واش انا غانبقى هاكا كيفاش غانقدر نصبر.. والاشكال فاني مكندير حتى حاجة .. بقيت شهور على هاد الحال .. ممنوع عليا نحتك مع لينا .. كنخاف منه .. حيت مجرد ماكنهضر معاها كيكون عقابي اليم بزاف كيوصل للضرب .. عمري 18 سنة .. والضرب اللي كليته لحد دابا عمري كليته فحياتي كلها .. حتى طاب جسمي .. ولدرجة الى شفت غا حوايجه قدامي كنتخلع .. واحد النهار سمعته كيهضر فالتلفون على شي صفقة مفهمت حتى زفتة فداكشي اللي كان كيقول .. ولكن الشيء الوحيد اللي فهمته هو انه غادي يسافر .. واخيرا غادي نرتاح شوية .. النهار اللي سافر كان اسعد يوم فحياتي .. رتاحيت من تجبره وقدرت نتنفس .. واخا امه واخته كانو مكيحملوش في الشعرة ولكن مكانوش قد مراد اللي كان كيمنعني حتى اني نتنفس .. بقيت فالبيت اللي كان يشهد على ضربه واغتصابه الا انه المكان الوحيد اللي كنقدر نهرب فيه ونتخبى من تسلط هاد العائلة ومن عينيها .. شوية سمعت الدقان فالباب .. دخلت لينا .. اللي كنت كنخاف نهضر معاها ..
لينا : انا باقية على وعدي ليك .. اجي معايا متخافيش مغايشوفنا حتى واحد .. وغادي نحاول نرجعو قبل ميفتقدنا شي واحد ..
مقدرتش نمنع حنيني من اني نمشي ونشوف عائلتي اللي تسنيت شحال باش تفتحلي الباب ليهم .. مشيت معاها وكلي خوف ورجليا كيرجفو .. وصلت للدار كان كلشي ساد .. ما موالفاش ليهم يسدو السراجم .. نزلت بقيت كندق الباب ..ولا مجيب للاسف .. جات واحد جارتنا سلمات عليا ولاحت عليا الجملة اللي زعزعاتني "واش مفخباركش باللي هاجرو من هنا هادي كتر من 3 شهور ".. تما طحت الارض ومبقيت قادرة نوقف .. واش تخلاو عليا .. واش مبقا عندي حتى واحد فهاد الدنيا .. علاش 😢 .. جات عندي لينا وبقات كترغب فيا نوض .. بقيت فيها .. انا محط شفقة تأليف دودي العيساتي
البارت 11
صدمتي كانت كبيرة .. واش صافي بقيت فالدنيا بوحدي ..
لينا : نوضي نمشيو دغيا قبل ما يعيقو بينا ..
نضت معاها وانا الصدمة متمكنة مني ومستسلمة للموت البطيء .. واش صافي عمري نعاود نشوف عائلتي مرة اخرى .. واش صافي هادي .. ركبت معاها ومشينا وانا طول الوقت كنفكر .. واش مغانبقاش نشوف علي مرة اخرى ... وصلنا للدار وانا بالي مراهش معايا .. حاسة راسي مرفوعة على هاد العالم .. نزلنا من الطوموبيل وانا نشوف قدامي صدمة اخرى هاد النهار .. السي مراد فالدار وكيستنى فيا وملامحه غاضبة بزاف .. اش غايوقعلي مزال وانا اللي وليت بوحدي فهاد الدنيا .. جا عندي وعطاني طرشة طيحاتني الارض مباشرة ..
لينا : حيوان اش دارتلك البنت .. غا خرجت تونسني لاش تضربها ..
مراد : حتى التنفس ديالها خاص يكون بخاطري انا .. هي ديالي انا فهمتي
لينا : لا ماشي ديالك .. ويلا هضرنا بمنطق انها دية فهي دية للعائلة .. وماشي غا نتا اللي تحتكرها ..
مراد : الهضرة معاك غادي غاتضرلي راسي .. فوتيني ..
جا عندي وهزني بحال شي نكرة مرة اخرى ودخلنا للدار .. بدا عليا بالسبان بابشع الصفات اللي عمري شفتهم فحياتي .. انا مفهمتش علاش كيدير معايا هكا .. ولكن كلشي طلعلي للراس .. صافي للصبر حدود .. وانا صبري مع هاد الانسان تسالا .. خصوصا بعدما مشاو عائلتي من هنا .. ومابقا ليا حتى واحد فالدنيا .. بقا كيهيني بابشع الاهانات .. وصلت لواحد الحد حتى سمعت قال جملة مقدرتش موراها نصبر مازال "داك الزبل دولد خالتلك انا غادي نقتلو باش عمرك مازال ماتعاودي ترفعي راسك"
غير جبد علي وانا نفقد صوابي ..وغوتت عليه
- واش مكفاكش حرمتيني منهم .. واش مكفاكش خليتيهم يطجو من البلاد .. حرام عليك واش نتا بنادم ولا حيوان ..
مازال مكملت هضرتي حتى عطاني بالبونية للوجه دارت بيا الدنيا وطحت وبدا يضرب فيا .. الجسم ديالي كان ضعيف ومكيتحملش داك الضرب اللي كان كيعطيني .. هزني وبدا يجرجر ليا مع السبان بابشع الالفاظ .. خرجني وداني للمزرعة فتح واحد الكوخ ولاحني فيه .. وسد عليا .. جمعت رجلي ونزلو مني دموع حارة .. وسكت حتى نشكي على راسي مقدرتش .. حاولت نسترخي حيت فعلا مقدرتش نستوعب هادشي اللي كيوقعلي .. شيء اكبر مني .. فهاد اللحظة بالذات .. حسيت راسي غادية للمجهول .. اش غادي يوقعلي مازال كتر من هادشي .. استرخيت وانا فغرفة مظلمة تماما وخاوية الا من بعض الكراكيب القديمة .. حطيت راسي على الحيط .. وتفكيري غادي غير لجهة عائلتي .. مفكرتش ابدا فهادشي اللي واقعلي مع مراد ... علي واش صافي مشا الى الابد .. واش املي فأني غانرجع نعيش معاهم ضاع .. بقيت هكاك مدة.. حتى بديت نحس بألم فوجهي .. هادو كانو الضربات اللي وجههم ليا مراد ... بديت كنحس بيهم .. كنتخيل ان وجهي ولا مفيه ميتشاف .. بقيت متكية راسي عند الحيط .. حتى داني النعاس ..
بقيت غادي فواحد الطريق طويلة .. كيبانلي معندهاش نهاية .. غادية وانا عطشانة .. كنحس راسي مفيا نقطة جهد .. بقيت غادية والطريق مبغاتش تتسالا .. والعطش كيزيد عليا .. فين غادية .. تمشيت حتى طحت بقوة العطش .. شوية بانت واحد المرا .. مشفتش ملامحها مزيان بقوة ما انا عيانة .. عطاتني شربة دالما رويت بها العطش ديالي .. فقت لقيت راسي مازال فنفس البلاصة .. ولكن هاد المرا فعلا خفت .. حيت ضلام الحال على الغرفة وسمعت اصوات جعلاتني نخاف من وجود حيوانات وحشرات فهاد البلاصة .. رجعت وتنفست بعدما تفكرت ان هاد البلاصة مغاديش تكون اسوء من وجودي مع مراد فغرفة وحدة ... تأليف دودي العيساتي
البارت 12
بقيت فترة فالظلام وكنتأمل فزهري .. شوية بديت كنضحك .. على حالتي .. شنو كنت كنستنى .. واش تتحقق احلامي ونعيش فالجنة مثلا .. واش انا غبية حتى هاد الدرجة .. شكون انا باش تتحقق احلامي .. انا راه لاشيء .. علاش غايكون زهري زوين .. فوسط الضحك بداو الدموع يطيحولي... بقا فيا راسي ..مطلبتهاش كبيرة .. متمنيتهاش كتر مني .. تمنيت غا بيت يجمعني بولد خالتي اللي تربيت معاه .. وفكرت ندير اسرة .. ونبقى فكنف عائلتي .. صافي !! ماشي اكتر.. شنو تلقيت .. عذاب ماليه نهاية .. نخاف نحلم او نتمنى شي حاجة من هنا الفوق .. ولو كانت صغيرة .. تجيني فالمقابل مصيبة كبيرة بزاف ..
تحلات الباب وانا باقي كنخمم .. شكون جا عندي .. وشنو باغي ..
كان مراد وقال بنبرة هادئة : نوضي ..
نضت وانا خايفة وفنفس الوقت مترددة .. كيخوفني وماموالفاش لهاد الهدوء فيه ومتيقاهش
- اجي معايا ..
مشيت معاه وانا ركابيا كيترعدو .. شواقع شباغي مزال .. مشينا لبيتو ودخل وانا مصدومة .. واش هادا هو مراد .. اللي شبعني الصباح ضرب .. مشا جاب علبة الاسعافات الاولية .. جلسني فوق الناموسية وانا مصدومة .. وبدا يداوي فالجروج اللي فوجهي .. اش هادشي كنشوف .. مراد .. لا خاصني نقرض راسي.. اكيد مازال راني فالبيت وكنحلم .. داوالي الجروح وناض وسط اندهاشي وقال .. نعسي دابا .. ورتاحي .. مشا خرج .. لا لا اكيد كنحلم .. بديت نضرب وجهي باش نفيق .. اي .. اح .. قصت الجروح .. لا انا فايقة .. ومراد طلب مني ننعس .. تكيت قبل منفيق من الحلم .. واخا يكون حلم خليني نستاغلو .. ميتكررش .. نعست وانا كنفكر فهاد الجيست اللي وقع .. غريب بزاف .. فقت الصباح ... لقيت راسي بوحدي فالبيت .. واش ماجاش داك الهمجي .. معرفتش .. نضت لبست حوايجي وخرجت من البيت بواحد الحذر لا يخرجلي من شي قنت .. نزلت مشيت فطرت واخا الشهية معنديش .. مازال متنسالي الحزن دالبارح وفقداني عائيلتي اللي معرفتهم فين .. الصدمة اللي معرفتش كيفاش غانتخطاها ... كملت فطوري ونضت مشيت رجعت سالتة للبيت . حيت معنديش الجهد اللي نسمع لشي هضرة مسمومة .. وانا غادية بشوية دزت على بيت جالسة فيه ام مراد وبنتها وشدني الفضول نتصنت حيت على غير العادة كانت الام ممرتاحاش وشادة الركنة وكتطل من السرجم ... والبنت كتواسيها
- صافي اماما متشطنيش راسك واش هادي اول مرة ..
- قلبي ما مهنينيش .. حاسة هاد المرة غاتوقع شي حاجة ..
- تهدني عفاك راه مغايوقع والو .. راه غا الشيطان كيوسوس ليك ..
بقيت كنتصنط وانا مفاهمة والو .. شوية وانا نقيس بلا منحس واحد الفازة كانت تما حتى سمعوني خرجات ديك ختو بسرعة وشداتني وانا مصدومة ..
- اجي لهلا يالفعى كتصنطي علينا .. ليوما نوريك ..
- 😳 انا انا كنت غا دايزة ..
- ليوما غانربيك ..
نزلاتلي من السما ختو ليما وفكاتني منها
لينا : طلقي منها واش شديتي بلاصة مراد .. باراكة عليها غا ماكايدير فيها هو ..
عالية : مالك نتي ديما كدافعي عليها ياكنا وكلاتك محامي ليها ..
تعتقت بأعجوبة ... ومشيت مع لينا .. دوزت معاها نهاري وبقات كتفوج عليها وعرفت منها ان مراد مسافر.. فرحت حيت غانرتاح ونقدر نتنفس شوية وهو غابر... دوزت نهاري زوين عموما .. تأليف دودي العيساتي
البارت 13
بعدما داز نهاري مع لينا .. اخيرا مشيت ننعس وانا كنتفادا التصادم مع ماماها واختها .. دخلت للبيت وانا لاقية راحتي بعدم وجود مراد شفت فالمرايا لقيت الجرحات اللي فوجهي بداو شوية كيختافيو .. معرفتش حاسة راسي ليوما فرحانة وميزاجي زوين شوية .. يمكن حيت مكاينش مراد اللي كيخسرلي ميزاجي وكيخوفني ويمكن حيت اول مرة كنحس بالامان .. مشيت بالفرحة نقزت على الناموسية وطحت عليها .. وانا نحس بحريق فكرشي .. اي اش هادا ..اووف... تكيت بهدوء باش يمشيلي الحريق .. هادشي اللي بقا .. من نهار جيت لهاد الدار وانا اللور اللور .. الله ياخد فيك الحق ا مراد .. نعست وارتاحيت .. الغد ليه فقت على غوات غريب .. اش هادشي اش واقع .. نضت بسرعة وخرجت نشوف .. لقيت امهم كتبكي وكتقول ولدي .. شفت جهة الباب لقيت مدخلين مراد وكله دم .. دخلوه لواحد البيت دغيا ودخل معاه واحد الراجل باينة فيه طبيب كلشي مخلوع دخلوه دغيا .. وباه كيسكت امه للي جاتها هستيرية .. حتى انا اتخلعت .. المنظر كان مخيف بزاف .. رجعت للبيت وسديت الباب .. مخاصنيش مشاكل .. حسيت بالتقية .. مشيت للطواليط وبقيت كنستفرغ .. حتى رتاحيت وانا نرجع للناموسية .. تكتيت شوية حتى داني النعاس بلا منحس .. شفت فدامي نفس المرا اللي شفت داك النار فالكوخ .. واللي عطاتني نشرب .. رتاحيت مللي شفتها هاد المرا .. ابتسمت ليها وداتني معاها لواحد البلاصة عامرة بالناس ..تبهرت شوية بقيت كنقلب عليها ومالقيتهاش فقت على صوت الدقان فالباب ... نضت بسرعة وفتحت لقيت لينا .
لينا : ياكما كنتي ناعسة ..
عيشة : اه .. دخلي ..
لينا : فخبارك شنو واقع
عيشة : مراد .. مالو ..
لينا : تضرب بالقرطاس ..
عيشة : 😳
لينا : متخافيش .. دابا ولا لاباس .. الطبيب طمئنا عليه ...
عيشة : الحمد لله ،
لينا : تخلعتي عليه ؟
سكتت ومجاوبتهاش ..
لينا : المهم جيت نقولك باللي الطبيب طلبنا نجيبو ليه فرملية تقابلو ولكن هو رفض .. وطلبك نتي ..
عيشة: انا 😳
لينا : طلبك تقابليه .. معرفتش واش عقاب ليك كالعادة ولا .. يمكن بغاك تكوني حداه ..
انا بدوري استغربت بزاف من قراره .. وخفت .. خفت من عقابه .. يمكن باغي يشوفني قدامه حيت مكيتيقش فيا .. مشيت مع لينا للبيت اللي موجود فيه هو دخلت معاها والانظار ديال والديه عليا وختو غاتاكلني بعينيها .. ومحاملانيش .. شفتو كان متكي وذبلان وصفر .. مقادرش يهز حتى يديه .. بقيت واقفة .. شافت فيا امه وقالت
- هو مابغاش نجيبو فرملية وبغاك نتي تقابليه
-واخا 😔
بقاو شوية معاه عائلته .. ومشاو اما انا بقيت معاه .. كل شوية كنغطيه .. وكنحاول نريحه .. داه النعاس حتى وصل الليل شوية بداه الهذيان وكيهضر معرفتوش اش كيقول .. مللي قستو لقيت حرارته مرتفعة وعرقان .. خفت ولكن حاولت نتمالك نفسي .. خرجت باش نعيط على شي حد .. رجعت بعد دقيقة وجايبة فيدي ما وخرقة .. حاولت نزليه حرارته بيها .. حتى ولا لاباس شوية ونزلات حرارته.. شربته الدوا ورجع ينعس .. اه حنيت عليه .. ماشي لشيء غير حيت انا كيبقى فيا اي واحد ..
داز الليل بعدما بقيت فيه فايقة .. ولاول مرة مكنحسش بالعقاب ..وكندير شي حاجة اللي مرتاحة فيها .. طلع النهار ولكن هاد المرة داني النعاس شوية وانا جالسة على الكرسي حدا مراد .. حتى حسيت بيد تحطاتلي على راسي .. فقت لقيت اب مراد ..
الريان: بنتي .. واش داك النعاس هنا ..
حسيت احساس غريب .. اول مرة كنسمع بنتي من نهار جيت لهاد الدار .. حتى كانو عينيا غايدمعو ..
الريان : نوضي ابنتي رتاحي .. انا غانبقى معاه
عيشة : انا مرتاحة .. غانبقى معاه انا ..
الريان : لا ابنتي .. نوضي حتى نتي من حقك ترتاحي .،
تفكرت نهار قالي مراد نتي مامنحقك حتى حاجة .. الحق بالنسبة ليا حلم بعيد .. دابا معنديش مناش نخاف حيت مراد مريض ومغايعاقبنيش حيت رتاحيت .. مشيت للبيت وطحت فالنعاس كومة .. بحال الى فايتلي منعستش 10 سنين .. حتى سمعت الدقان من جديد فالباب
البارت 14
نضت مفزوعة ومشيت فتحت الباب .. لقيت الخدامة ..
- كتعيط عليك لالة ..
- واخا انا غانزل ..
غسلت وجهي بسرعة .. ونزلت بسرعة وانا خايفة .. اشواقع عاود تاني .. لقيت امه معاه وختو .. اللي بمجرد ما لمحاتو ووجهات ليا نظرات حادة وقالت : نتي واش صحابليك راسك سيدة القصر ولا راكي جاية دية فهمتي شناهيا د..
الام : باراكة .. سكتي ..
شافت فولدها اللي باينة على وجهه علامات الغضت من خته ..
مراد : عفاكم بغيت نبقى بوحدي ..
خرجو امه واختو وجيت نخرج حتى انا
مراد : عيشة نتي بقاي ..
تفاجأت بيه وبقيت .. جلست حداه وقال
- عيشة .. علاش مشيتي ..
- باباك قالي سيري ترتاحي ..
- وعلاش منعستيش هنا حدايا ..
سكتت ومتوقعتش منه يقول هاد الهضرة ولكن اللي فاجأني كتر هو الكلام اللي قال من بعد ..
مراد : عيشة عفاك متبقايش تبعدي عليا ..
بحال الى خويتي عليا سطل ديال الما البارد .. تجمدت فبلاصتي .، واش هادا مراد ولا شي واحد اخور .. مستحيل واش هادا هو العنيف العدواني اللي كان مكيعرف الا الذل والضرب .. مجددا شدني الطم مع هاد الانسان .. بقيت حانية راسي ..حتى قرب يدو وشد يدي .. انا حسيت دقات قلبي كيتسارعو ووجهي ولا حمر ..
- اجي جلسي حدايا ..
حسيت راسي للحظة غانسخف .. ومقدرت ندير اي ردة فعل .. كنت كنتمنى نحيد يدو مني .. اللي ولفتها غير ديال الضرب .. ولكن مقدرتش .. تشللت فعلا .. بقيت جالسة وساكتة وحتى هو سكت ... بقيت معاه كنقابلو .. كنغطيه مللي كينعس وكنعطيه الدوا وحتى الماكلة كنوكله اما هو فكلما بعدت عليه لو لحظة كيعيط عليا .. دازو ايام ولا فيهم مراد بخير وبدا ينوض .. شديت فيه واحد المرا خرجتو برا حيت قنط وبغا يشم الهوا .. واغتنمت الفرصة نسوله .. حيت جاني الفضول ..
- واخا نسولك ؟
- اه .. سولي
- اش طرا.. شكون اللي دار فيك هاكا ..
- 😔 شي ناس .. عندهم معايا حساب ..
- اشمن حساب ..
- من الاحسن متعرفي والو .. خلينا هكا مرتاحين .. فخبارك كتبانيلي عيانة ..
- انا 😳 (استغربت حيت اول مرة كيهتم لحالي )
بدا يدوز على خدي بصبغه ..
- باين على وجهك الارهاق .. واش عييتي حيت قابلتيني هاد اليوماين ..
- لا .. انا لاباس .. ماعيانة ما والو ..
شدلي فيدي وقال : حاولي ترتاحي .. انا وليت لاباس متبقايش تشطني عليا ..
معرفتش منين نزل على مراد هاد الحنان كله حيت فعلا بقوة مكنشوفو غول ولا كيبانلي هادا شي واحد اخور ماشي مراد بل وليت كنشك باللي كنحلم ..
دازت يوماين ولى فيهم مراد مزيان وبرا تماما .. وولا كيخرج ورجعنا لبيتو .. ولكن فعلا كما قال حاسة براسي مرهقة بزاف وماقاداش نهز حتى يدي .. اش واقعلي .. واقيلة الاعصاب خرجولي على صحتي.. كلشي ممكن اللي شفتو هنا ماشي ساهل .. دازت يوماين اخرى ومراد ولى واحد اخور .. يمكن تبدل حيت مرض وشاف حرصي عليه .. ولى كيهضر معايا وكياكل معايا .. دارلي قيمة .. حتى انا قررت ننسى كاع داكشي اللي داز غليا معاه ونبدا من جديد .، حيت انا ماشي من دوك النوع اللي كيهزو فقلبهم .. قلبي هشيش .. لوكنت مزوجة بعلي كاع مكان غايوقعلي هادشي كله .. حتى وصل النهار اللي غادي تتقلب من جديد عليا القفة وغايجي مراد منرفز للدار .. مفهمتش مالو .. بدا كيقلب فوراقه وكيقلب البيت .. ومشيت عنده وياريتني ما مشيت
- مراد مالك ..
- والو عطيني بالتيساع
- لا مغانعطيكش .. قولي مالك .. نقدر نخفف عليك .. ماشي نتا اللي قلتيلي بقاي بجنبي ديما .. هانا بجنبك دابا ..
- 😏 واش تيقتي راسك ولا .. عرفتي راسك شكون .. نتي غير دية جايبها باش ندوس عليها برجلي .. ونخليك تحت رجلي العمر كله
- انا ماشي عبدة ليك .. انا تزاديت حرة وغانبقى حرة ..
مازال مكملت هضرتي حتى عطاني بطرشة طحت على الناموسية ..
- شوفي شكون يعتقك الحرة ..
جبد السمطة وبدا يضرب فيا .. انا اللي كان صحابلي تبدل معايا وولى كيشوفني انسان .. انما اللي بحال مراد عمرهم غايتبدلو .. غايبقاو انذال حياتهم كلها .. اللي بحال هادا عمري مغانستنى منه الخير .. حسيت بحريق كبير طلع معايا من رجليا حتى لراسي . اما هو كمل السب والاهانة ديالو ليا .. جرني من دراعي وهزني وبدا كيسب ويبزق عليا .. ولكن مقدرتش نوقف على رجليا .. طحت من بين يديه .. وحسيت راسي فشلانة وغيبت
البارت 15
فقت لقيت راسي مغطية ومراد حدايا ..كان مخلوع ولكن انا محملتوش .. كيفاش كيدير راسو مهتم بيا وفنفس الوقت كيعاير ويقولي نتي غير دية مكتسواي حتى بصلة .. شوية دخلات واحد السيدة باينة فيها طبيبة وتأكدت مللي بدا يقوليها ادكتورة ... بدات كتفحصني ... ودوزات علي كلشي .. شوية ناضت خرجات ومعاها مراد .. بقيت بوحدي ومحاملاش راسي ... علاش كنعطي الامل لراسي ..علاش .. شوية دخل مراد ضاحك جا عندي وبدا كيعنق فيا .. مفهمت والو .. مالو هادا .. فرحان ..وانا محاملة فيه الشعرة .. واش الوقت اللي بغا هو يتودد ومللي يبغي هو يتقلب علي ويضرب .. مالي لعبة ..بناقص من هاد الود الى كان غايستناني موراه الضرب والبكا ..علاش يطمعني لحد الان مازال مفهمت والو .. حتى جات امه وعيطاتليه خرج عندها .. شوية سمعت صوتها ارتقع شدني الفضول نعرف اش كاين .. نضت وبقيت كنشوف مالهم
الام : هاد الولد مغايتزادش .. مغنخليكش تولد من دية ..
مراد : انا باغي هاد الولد وغايتزاد .. سواء كان من دية ولى من وحدة اخرى والهضرة ديالي هي اللي غاتكون .. انا غانتهلا فعيشة حتى تولد ..
شداتني الصدمة .. واش كنحلم ولى اش هادشي كنسمعو ... انا حاملة وغانولد 😳 رجعت لبلاصتي وانا مذهولة .. مستحيل .. واش هادا هو الحلم اللي حلمتو واش غانولد مع مراد ماشي مع علي 😔 شداتني الصدمة من داكشي اللي سمعت .. اش غاندير دابا .. واش غانولد هنا فهاد الدار وكيفاش غادي يعاملو ولدي .. غايعاملوه كما كيعامللوني انا وغايبقاو يقولو عليه ولد الدية .. مغانتحملش نشوف ولدي كيتعدب كما كنتعدب انا دابا .. دخل عندي مراد وجا عندي
- خاطرك فشي حاجة .. بغيتي نجيبلك شي حاجة .. طلبي اللي تمنيتيها تحضر ..
سكتت وقلبت وجهي .. ماشي هادا اللي ضربني البارح وسوطني ومحنش فيا .. اللي قالي واش تيقتي راسك راكي غير دية .. خايفة نقولهاله دابا ويقولي واش تيقتي راسك ... عيا ميهضر فيا وانا صارطة لساني ... محاملاش فيه الشعرة ... زروقية لحمي مازال شاهدة على ضربو وظلمه ليا ومغانسمحش ليه .. جابتلي الخدامة الماكلة .. وبديت كناكل .. ومكنشوفش فيه واخا كيحاول يوكلني ولكن انا مكنديهاش فيه مغانطمعش راسي .. سالا .. وبدا يغطيني باش ننعس ولكن انا مقدرتش ننعس .. بقيت كنفكر فولدي ولا بنتي .. الى كانت بنت راه غاتزاد للظلم والقهرة ... اما الى كان ولد راه غايربيو فيه عادات الظلم ... باغا ولدي او بنتي وفنفس الوقت خايفة بزاف .. خايفة نولد فهاد المجتمع اللي مكيرحم حتى واحد .. حرت ومعرفتش راسي اش غاندير .. فكرت نهرب ..فين نمشي ..انا معندي حتى واحد فالدنيا .. تفكرت .. عمتي فريدة .. سبقلي مشيت مع خالتي لعندها .. هي ساكنة فواحد البلاصة سميتها 😟 نسيت ..يا ربي نتفكر ... اشنو سميتها بس... بساين .. تفكرت حي البساتين .. تفكرتها .. انا غانوسول ونمشي ديك البلاصة ... تما غانطلب منها تديني عند خالتي .. وغانهربو انا وعلي نربيو هاد الولد .. ونديرو وليدات اخرين .. مغانبقاش هنا ..مللي غاينعسو كلشي انا غانهرب .. شوية دخل مراد .. باينة فوجهه فرحان درت راسي ناعسة وغمضت عينيا ..جا تكى حدايا وعنقني.. اش هادشي بحال الى كان عارفني غنهرب .. جا وشدني .. اش غاندير دابا سايستو .. وخليتو حتى نعس.. باش نقدر نتحرك
البارت 16
خليتو حتى نعس .. وانا عارفة ان نعاسو تقيل ... نضت بهدوء ولبست جوايجي .. وهزيت شوية منهم .خرجت وانا على اعصابي .. خايفة لا يشوفني شي واحد .. ونصدق معاقبة من جديد من طرف مراد .. بقيت كنتمشى بالحس حتى وصلت للباب فتحت بشوية وخرجت .. حتى سمعت صوت مورايا ..
- عيشة..
- 😳
تلفت هادا صوت نسائي لقيت لينا..
- فين ماشية فهاد الليل ... ونتي حاملة ..
- انا 😔..
- صافي فهمت .. اجي معايا ..
- فين 😥
- نوصلك 😉 ومنه نهضرو شوية ..
مشيت ركبت معاها فطوموبيلتها .. وبدات كتهضر .. اما انا مقدرت نتنفس حتى خرجنا من محيط الدار ..
لينا : انا كنتفهم انكي بغيتي تهربي .. وانك مبغيتيش تولدي فهاد الظروف.. ولكن واش نتي عارفة فين ماشية .. ولا غير باغا تخرجي .. عنداكي تصدقي فشي بلاصة اخيب من هادي اللي راكي فيها..
عيشة : باغا نمشي لعند عمتي 😔
لينا : وهاد عمتك عندك عنوانها؟
عيشة : فشي حي اسمه البساتين ..
لينا : واش عرفتي هاد البلاصة شحال كبيرة .. هاداك راه حي شعبي .. وكبير بزاف عنداكي تلفي ..
عيشة : ربي اللي خلقني معايا ..
لينا : ونعم بالله .. هاكي شدي الكار وهاد الفلوس خليهم معاك احتياط .. وايلا حتاجيتي شي حاجة صونيلي .. تهلاي فراسك اعيشة ..
عيشة : عمري مغاننسى ليك كاع داكشي اللي درتي معايا .. كنشكرك بزاف ..
نزلت من الطوموبيل وشديت اول كار غادي للمدينة .. طول الطريق وانا خايفة وشادة على كرشي .. اش غايوقعلي من بعد ..وانا عمري مخرجت من الدوار .. الطريق كانت طويلة بزاف ..حتى وصلت للمدينة ..
في مكان اخر ...
المرا: كيبقيتي اختي .. شفتي الدنيا شحال غريبة لاقاتنا من جديد بعد مدة طويلة ..
خالتي : عاليا انا مبقالي حد فالدنيا من غيرك .. عاونيني عفاك .. حنا كل املاكنا اتاخدو منا وجراو علينا من الدوار .. معندي حد من غيرك نلجأ ليه
المرا : واش مبقيتش بنت الحرام .. ماشي نتي اللي قلتيلي معنديش ختي وميشرفنيش تكوني ختي ..
خالتي : نتي اللي غلطتي .. متنسايش انه كيرجعلي الفضل فاللي نتي فيه دابا .. لوكان ماشي انا اللي هربتك وخديت منك البنت .. اكيد دابا كنتي غاتكوني ميتة ..
المرا: بنتي 😢 فين هي علاش مجاتش معاك ..
خالتي : 😔
المرا : شفتك سكتي .. فين بنتي .. ياكما وقعات ليها شي حاجة 😳
خالتي : داكشي اللي وقع ليك نتي .. ظلم العادات والتقاليد ..
المرا : اش كتقصدي .. فين بنتي 😨
خالتي : خداوها دية عائلة الريان ..
المرا : 😡الريان عاود تاني .. واش مكفاهمش داكشي اللي دارو فيا انا .. حتى بنتي .. انا مغانسمحش ليهم ... انا غاناخد منهم حقي .. وغانرجع بنتي .
البارت 17
فاق مراد من النعاس .. واول حاجة جذبت انتباهه هي ان عيشة مكايناش .. ناض وبدا يقلب عليها حيت مشطون عليها لانها حامل ولابد تتهلا فولده .. بدا كيقلب ومالقاش نزل وبدا يعيط
مراد: عايشة .. عايشة ..
الام : اش كاين اولدي
مراد : ماما واش مشفتيش عايشة .
الام: لا مبانتليش .. تهدن اولدي تكون غا هنا ..
بقا كيقلب ومبان ليها اثر ..
مراد: انا غانحماق فين غاتكون مشات ..
لينا : غاتكون طارت ..
مراد : اش كتقصدي .. لينا واش نتي عارفة شي حاجة ..
سكتات لينا وقلبات وجهها ..
مراد : دوي مالك ساكتة .. فين هي عايشة ..
لينا : عايشة مشات .. مشات بحالها هربات من الظلم ديالكم ..
مراد : ونتي باش عرفتيها هربات
لينا : 😒 انا اللي وصلتها للكار ..
مراد : الله ياخد فيك الحق الينا .. خدات ولدي ..عاونتيها تحرمني من ولدي .. معنديش شي صورة ديالها باش نقلب عليها .. هضري واش معرفتيش فين مشات .. انا خاصني نعتقها ونجيبها ..
لينا : نتا غاتجيبها تظلمها من جديد
مراد : دوي الينا .. انا مغانسمحش لولدي يتزاد بعيد عليا .. هضري وكنواعدك اني غانتهلا فيها
لينا : معرفتش انا قالتلي غاتمشي لعند عمتها فالمدينة ..
مراد : معرفتيش عنوانها ..
لينا : لا معرفتش ..
خرج بسرعة مراد ومشا يقلب عليها .. عيا يقلب ولكن ماليها اثر ..
عودة الى عايشة ..
بعدما نزلت من الكار .. شديت طاكشي وقلتله يوصلني للحي ..بقيت كنسول ،. مبان حتى شي حد كيعرفهم .. ولكن انا خفت بزاف حيت الحي شعبي بزاف وعامر غا بالشمكارة.. بقيت كنقلب .. شوية ضارو بيا شي وحدين انا تما طاحو ركابيا وحسيت كرشي كتحرق .. بداو كيقولو شي كلمات وانا مقادراش نتحرك .. ولا ندافع على راسي .. حيدولي الصاك .. ومشاو .. مفهمتش انا علاش كيجيني شلل مكنقدر نغوت ولا ندافع على راسي ... حيدولي الصاك فيه الفلوس اللي عطاتني لينا بسهولة .. جلست الارض وبقيت كنبكي .. فين كنت وفين وليت .. شوية دازت من حدايا مرا كبيرة .. مسحت دموعي ونضت سولتها على عمتي ... فرحت بزاف مللي عرفاتها .. نعتاتلي فين شكرتها ومشيت دغيا قبل ميضورو بيا شي شماكرية اخرين .. مشيت بقيت كندق .. حتى حلات الباب واحد البنت لابسة عباءة بلا كمام ومطالعاها من واحد الجهة وكتطرطق فالمسكة .. عبراتني من فوق لتحت ..
البنت : شكون نتي ..
عايشة : السلام هادي واش دار عمتك فريدة ؟
البنت : عمتك !!😕 اه هي هادي شكون نتي ..
عايشة : عفاك قوليلها عايشة .. من الدوار ..من طرف خوها .. عمي العربي
البنت : دخلي 😏
دخلت وانا خايفة .. حتى بانتلي عمتي فريدة .. كانت جالسة .. مشيت عندها كنبكي .. عمتي 😭 واخيرا لقيت شي حد من عائلتي .. شي حد من ريحتنا ..
فريدة : بنتي عيشة .. لاباس عليك ..
عيشة : 😭 الحمد لله .. عمتي ..
جلست وعاودت ليها كلشي .. من نهار خداوني دية لحد ما جيت لهنا وسرقوني دوك الشمكارة .
البارت 18
بقيت مع العمة حتى رتاحيت .. وتهدنو اعصابي شوية دخل واحد الشاب .. كان من هادوك اللي سرقوني .. تصدمت ومقدرتش ندوي وانا حالة فيه عينيا ..
الشاب : الواليدة .. شكون هاد التيتيز اللي معاك
العمة: سلم على بنت فاميلتك ..
سكتت ومقدرتش نحل فيه عينيا باش ميديرش فيا شي حاجة خايبة .. خصوصا وانا معاه فدار وحدة .. بقيت معاهم فالدار ونضت بقيت مع البنت فبيتها ..
- انا سميتي خديجة .. ونتي
- انا عيشة ..
- هي قلتيلي خداوك دية ..
- اه .. وهربت
- درتي مزية .. معندك مديري بيهم .. عيشي حياتك ،. وتهلاي فراسك نتي زوينة وغاتديري الفلوس ..
- مفهمتش ..
- هانتي السواعدة راه كيحماقو على البنيتات اللي بحالك بلديات .. زينهم عروبي وكيحطو فيهم فلوس صحاح ..
-😳 شنو ..!! واش انا هربت من مراد نصدق حابسة راسي مع السواعدة ..
نضت منها بلا هضرة .. محملتش هضرتها ومقدرتش ندابز معاها حيت نوات فيا الحاجة الخايبة .. نضت ومشيت جلست مع عمتي من جديد .. مفهمتش كيفاش طالقة بنتها حتى ولات هاكا .. ومارباتش ولدها حتى ولا شمكار .. دوزت معاهم نهاري حتى جينا نتعشاو .. جلس قبالتي مجددا داك الشفار ديال ولدها اللي مقدرت نقوله حتى اني باغا حوايجي .. شوية جاني نسول عمتي
عايشة:عمتي واش معندكش شي خبار على خوك .. فين مشاو ولا فين سكنو
فريدة: لا ابنتي مفخباريش ..
الشمكار : انا عارف فين كاين علي ..
قلبي خفق بالجهد مللي سمعت علي .. هو اللي كنقلب عليه .. بسرعة سولته
عائشة : فين كاين .. عفاك قولي ..
الشمكار : غدا نوصلك عنده ..
عائشة : كنشكرك بزاف ..
نضت ننعس فالبيت .. شوية لقيت خديجة كتبدل حوايجها ومصاوبة راسها .. وغادا تخرج ..
عائشة: فين غادية اختي
غمزاتني وقالت : للخدمة 😉
خرجات وخلاتني مصدومة .. كيفاش كيخليوها بلا ميقولولها حتى حاجة.. شوية تبعتها لقيت خوها معاها تما زادت الصدمة ديالي...اواه غادي معاها .. اش هاد الخدمة دالليل .. مقدرتش نصبر ومشيت لعند عمتي لقيتها كتسبح
- عمتي .. كيفاش خليتي بنتك تمشي تخدم بالليل ..
- قدر الله ابنتي .. معندنا حل اخور ..
- كاين عطا الله الخدمة ديال الحلال ..
- شوفي ابنتي .. مللي مات راجلي الله يرحمه .. بحال الى ريبتي علينا السقف .. تلات بينا الايام عييت منقلب على خدمة .. حتى كلاو صحتي .. ومدرت والو كما كتشوفي حتى هاد الدار دالكرا .. ولدي معندو حتى صنعة فيدو وزادها دخل الحبس ..مبقات عندي صحة بقوة الشقا .. مكان عندي حل .. خديجة هي اللي خدمات عليا وعلى خوها ..
- لا حول ولا قوة الا بالله ..الله يصبرك اعمتي على ما بلاك ..
- لهلا يبلي شي واحد ابنتي ..
البارت 19
مشيت للبيت ونعست وانا كندعي ان ربي يصلح بال عمتي .. فقت مع اذان الفجر نضت توضيت وصليت لله وانا كندعيه يحفظلي ولدي اللي فكرشي ويرجعني لعائلتي ويجمعني بعلي .. انا متأكدة انه غايربي ولدي .. وغايديرو بحال ولده .. دعيت الله ينورلي طريقي .. شويك وانا كنسمع الباب تفتحات هادي كانت خديجة راجعة للدار وكتتمايل وفيها ريحة خانزة عمري شميت بحالها .. لاحت الصاك ديالها وحيدات صباطها وتلاحت على الناموسية ونعسات ... كأنها هازة جبل على ظهرها وتقال عليها ... الله يعاونها ويفتح ليها بيبان الحلال .. قريت السور والايات اللي كان كيحفظهم ليا عمي العربي .. ورجعت ننعس ..
في مكان اخر وعند مراد ...
"فين مشات هاد البنت " بقا مراد كيقلب فكل مكان وكيسول اي واحد " عفاك خويا مشفتيش واحد البنت .. بنت البادية ولابسة فولار وبيضة شوية .. "..."لا مشفت حتى بنت بهاد المواصفات"... هكا بقا كيسول ويقلب حتى طابو رجليه ..
- اش واقع ليك امراد .. اش هادشي كدير .. من امتا ونت مهتم بهاد البنت .. ياك هي غير دية .. ومعندها قيمة .. علاش انا بلا منحس تحرق قلبي مللي ملقيتهاش حدايا .. لا انا باغي ولدي ،. ولدي هو اللي كيهمني .. خاصني نلقاها ونرجعها للدار ... فين غانلقاها يا ربي ..
في مكان اخر.. وبالتحديد فبيت راقي ومرتب .. من داخل مكتب.. كتواجد مرا جالسة وحاطة يدها على خدها وكتفكر ..
- ماما .. مالك ساهية .. فاش كتفكري ..
- ولدي اكرم .. اجي جلس حدايا .،
- عاوديلي .. نتي معمرك كتخبي عليا شي حاجة
- مغانخبيش عليك اولدي .. الماضي .. مازال كيلاحقني .. واخا عييت منبعد منه .. ونتساه .. مكيتنساش ..
- بنتك ياك ..
-بنتي كتواجه نفس المصير ديالي .. الظلم ..
- سمحيلي على الهضرة اللي غانقول ولكن بنتك نتي اللي ظلمتيها نهار تخليتي عليها ...
- ظروفي كانت خايبة بزاف .. كنت غادية للزنقة.. ومكنش ممكن اني ناخدها معايا ..
- مهما كانت الظروف .. هاداك راه اكبر غلط درتيه ..
- الاسوء فالموضوع ان بنتي معارفاش اني مازال عايشة .. صحابليها ميتة .. ً
- صارحيها .. من الافضل تقوليلها الحقيقة ..
- خايفة .. خايفة متسامحنيش .. انا كنت انانية بزاف .. ياريتني خليتهالهم يربيوها .. كانت على الاقل غاتكبر فمستوى اجتماعي كبير .. وكانت غاتكبر حدا باها .. ولكن انا فضلت انانيتي .. وكيريائي مسمحليش .. فقلت ليهم ان البنت ماتت .. وعطيتها لختي بدل متكبر بين يديا ..
- تهدني .. انا ممكن نهضر معاها ..
- لا نتا لا .. حتى يجي الوقت المناسب ..
- مكاينش شي وقت انسب من هادا ..
- ولكن ختي قالت ليا راها عند الريان دية
- دية 😧
- اه معرفتش كيفاش ولكن هادشي اللي فهمت ..
- مكاينش شي حاجة سميتها دية .. حنا غانمشيو نجيبوها من تما .. والى اقتضى الامر غادي نستعملو القوة ..
- هادشي اللي بانلك
-اكيد نوضي يالله يالله يالله ..
- واخا انا نبدل حوايجي .. ياربي عاوني
البارت 20
بقيت كنستنى بفارغ الصبر .. ومنعستش وانا كننتظر وعد ولد عمتي بأنه يديني عند علي .. غادي يتغير كلشي ليوم ..
في مكان اخر وعند مراد ..
- الو .. اش درتيلي ..
- سي مراد انا لقيت العنوان ديال اللي سميتو علي ..
- مزيان .. صيفطولي ..
انا متأكد باللي غاتكون معاه .. مغانسمحلكش اعايشة تعطي ولدي لداك القتال يربيه ...
في الطريق كانت الام غادية هي وكرم لدار الريان .. قلبها كان كيضرب .. من جهة تفتحات عليها جروح الماضي .. ومن جهة اخرى بنتها اللي عاشت حياتهاكتسنى تشوفها .. واخيرا غايتحقق الحلم ..
كرم : ماما .. واش نتي لاباس ..
الام : اه لا ..الصراحة انا خايفة بزاف ..
شد فيدها وباسها
كرم:متخافيش .. كلشي غايكون مزيان ..
كملو الطريق ديالهم .. اما عايشة فكان عندها امل اخور مختلف ..
جا عندي ولد عمتي وقالي نوضي نمشيو لعند علي .. ودار ابتسامة مفهمتهاش .. شوقي اثر عليا ومشيت ... بقا غادي وكيهضر .. وانا محملاهش شوية زعمت نهضر
- قولي .. فلوسي وحوايجي مغاتردهمليش ..؟ انا مبغيتش نقولها لعمتي ..
- هههه فلوسك تصرفو .. حوايجك غانردهم ليك ..
مقدرتش نزيد معاه ..
- واخا حوايجي ردهوملي ..
بقينا غاديين حتى صونالو التلفون .. بان مخلوع ..
- اش كاين ..
- خاصنا نرجعو دغيا ماما مريضة ..خاص نديوها للسبيطار ..
تحلعت معاه وجرينا بسرعة نشوفو اش كاين .. لقينا خديجة كتبكي ..
عيشة: اش وقع ليها ..
خديجة : معرفتش .. لقيتها مكتنفسش ..
بقينا كنديرو ليها الما والبارفان .. وحتى البطلة درناها .. صونا للاسعاف تجي .. مكيجاوبوش اضطر ولدها اعيط لصاحبو جاب طوموبيل وهزيناها فيها .. كلنا خايفين وكنبكيو عليها دخلناها للمستعجلات .. وبقينا نستناو .. الناس شي ناعس فالارض شي جالس كيستنى شي مضروب وشي معطوب وشي سخفان وشي عيان .. والسيكوريتي داير مابغا وحاسب راسو طبيب والفرملية دافعة كبير وكتلعب فتلفونها .. وشوية تضحك وتهضر.. انا تخنقت بقيت كنستنى وكنسولوهم كنقولو ليهم راه المرا عيانة وكتموت كيقولك كاع الناس مريضة وشادة التور .. ستناو حتى يوصل الدور ديالكم .. ياااه واش حتى لهاد الدرجة بنادم رخيص وبنادم قلبو ميت .. مكيهكوش يشوف بنادم حداه كيموت.. شوية ناض ولد عمتي بدا يدابز ويحيح تما .. وحنا كنرغبو فيه .. يسكت .. شفت خديجة كانو عينيها عامرين بالدموع وساكتة .. هزاا تلفونها صونات وناضت بدات كتهضر ..شوية وهي ترجع عندنا
خديجة : غانديو ماما للكلينيك ..
عيشة : 😢 ولكن ..
خديجة : عاونوني نهزوها من هنا ..
هزوها وركبنا مشات لواحد الكلينيك من الدخلة بداو كيتهلاو فيما وهزو عمتي .. جاو شي تلاتة دالطبة .. بداو كيفحصوها .. فرق كبير .. بقينا نستناو حتى خرج عندنا الطبيب قالينا راه عمتي ولات لاباس .. ونقدرو نشوفوها .. فرحنا ودخلنا نشوفوها .. اما خديجة فكانت ساهية بزاف .. معرفتش منين جابت فلوس السبيطار .. ولكن المهم دايا هو ان عمتي راها لاباس .